DIEMA 7

₁Ngwanaka,

o gopole tše ke go botšago tšona,

ditaelo tša ka o se di lebale.

₂O di phethe, gomme o tla phela;

tše ke go rutago tšona o di hlokomele

bjalo ka tlhaka ya leihlo la gago.

₃O dule o di gopotše,

o di bolokile ka pelong ya gago.

₄Bohlale o bo tšee e le kgaetšedi ya gago,

mme temogo e be moloko weno.

₅Di tla go phemiša mosadi wa seotswa,

mosadi wa go hloka maitshwaro,

wa leleme le boreledi.

₆Ka tšatši le lengwe ke be ke ukametše ka ntle ka lefasetere la ngwako wa ka,

₇ka bona batho ba bantši ba go tšeatšeega;

gare ga masogana ka bona le lengwe le e bego e le setlatla.

₈Le be le sepela mokgotheng,

kgauswi le magahlano a ona ao go ona go bego go dula mosadi yo mongwe.

Lesogana leo le be le tšere ka tsela ye e fetago ngwakong wa mosadi yoo

₉e le mantšiboa,

leswiswana le swara.

₁₀Mosadi a le gahlanetša;

o be a apere bjalo ka segwebakathobalo gomme a na le mahlajana.

₁₁E be e le mosadi wa go se šie,

wa go itaola,

wa go se dule ka gae.

₁₂O be a hwetšwa mekgotheng le mabaleng a motse,

a dula a letile le magahlanong a mekgotha.

₁₃O ile u ubarela lesogana lela,

a le atla,

a le lebelela ka mahlong,

mme a re:

₁₄“Lehono ke ile ka swanela go dira dihlabelo tša ka tša kagišano,

ke phetha dikeno tša ka,

gomme ke sa na le nama ya dihlabelo tšeo ka gae.

₁₅Ka gona ke tšwile ngwakong wa ka ke tlilo go gahlanetša.

Ke be ke nyaka go go bona,

gomme bjale ke go hweditše.

₁₆Ke adile dikobo tša mebalabala tša Egepeta malaong a ka.

₁₇Ke tšhetše marobalo ao senkgabose sa mira,

sa sekgopha le sa sinamone.

₁₈Tlaa re yo lala re ipshina ka lerato go fihlela go esa!

A re yo thabišana ka go kgomana.

₁₉Mogatšake ga a gona mo gae;

o ile kgole.

₂₀O sepetše le tšhelete ye ntši gomme o tla tšea beke tše pedi a se gona.”

₂₁Ka gona mosadi a gokagoketša lesogana lela ka dipolelo tša gagwe tše ntši tše boreledi,

a le foraforetša ka leleme la gagwe le boleta.

₂₂Lesogana la napa la sepela le yena bjalo ka pholo ye e išwago tlhabong,

bjalo ka kgama ye e gogwago ka thapo

₂₃ge e išwa moo e tlago hlabja pelo ka lerumo,

la swana le nonyana ye e hlaganelago ka sefung –

le sa tsebe gore le a ipolaya.

₂₄Bjale, bana ba ka, ntheetšeng!

Hlokomelang se ke se bolelago.

₂₅Le se ke la lesa mosadi yoo a thopa dipelo tša lena;

le se ke la amana le yena ka selo.

₂₆O ušitše banna ba bantši,

o išitše ba bantšintši tahlegong.

₂₇Ge o eya ngwakong wa gagwe,

o tseleng ya go ya bodulabahu.

Ke tsela ya go kgaoletša ye e išago lehung.