2 DIKGOŠI 15

₁Ngwageng wa masome a mabedi le metšo ye e šupago wa pušo ya Kgoši Jeroboamo wa Israele, Usia, morwa wa Amatsia, e ile ya ba kgoši ya Juda ₂a na le mengwaga ye lesome le ye e selelago, gomme a buša a le Jerusalema mengwaga ye masome a mahlano a metšo ye mebedi. Mmagwe e be e le Jekolia wa Jerusalema. ₃O be a dira tše di kgahlago Morena, go no swana le tatagwe. ₄Eupša dintotoma tšeo go tšona go bego go khunamelwa medimo ya diswantšho a se di phušole, gomme batho ba no tšwela pele le go dira dihlabelo le go tšhuma diorelo fao. ₅Morena a otla Usia ka bolwetši bja letlalo bja go mo tšhilafatša bjo bo ilego bja mo swara go fihlela a ehwa. O be a dula ka ngwakong wa thokwana a lesišitšwe mediro ka moka ya bogoši, Jotamo, morwagwe, e le mohlokomedi wa mošate, a bile a buša naga.

₆Tše dingwe tše Usia a di dirilego di ngwadilwe mo go Ditaba tša magoši a Juda. ₇Usia a ithobalela le botatagwe, mme a bolokwa mabitleng a bona motseng wa Dafida, gomme Jotamo, morwagwe, a mo hlatlama bogošing.

₈Ngwageng wa masome a mararo a metšo ye seswai wa pušo ya Kgoši Usia wa Juda, Sakaria, morwa wa Jeroboamo, ya ba kgoši ya Israele, gomme a buša a le Samaria dikgwedi tše di selelago. ₉Yena, go no swana le ba ba bušitšego pele ga gagwe, a dira dibe pele ga Morena. A se ke a tlogela dibe tša Kgoši Jerobeamo, morwa wa Nebate, yo a dirišitšego Baisraele dibe. ₁₀Shalume, morwa wa Jabeshe, a loga maanomabe a go bolaya Kgoši Sakaria, gomme a mo hlasela a mmolaya kua Jibleamo, mme a mo hlatlama bogošing.

₁₁Tše dingwe tše Sakaria a di dirilego di ngwadilwe mo go Ditaba tša magoši a Israele.

₁₂Ka gona gwa phethega se Morena a bego a se holofeditše Kgoši Jehu ge a re: “Ditlogolo tša gago e tla ba dikgoši tša Israele go fihlela molokong wa bone.”

₁₃Ngwageng wa masome a mararo a metšo ye senyane wa pušo ya Kgoši Usia wa Juda, Shalume, morwa wa Jabeshe, ya ba kgoši ya Israele, gomme a buša a le Samaria kgwedi e tee.

₁₄Menaheme, morwa wa Gadi, a tloga Tirtsa a ya Samaria, a hlasela Shalume a mmolaya, gomme a mo hlatlama bogošing. ₁₅Tše dingwe tše Shalume a di dirilego, gotee le ditaba tša maanomabe a gagwe, di ngwadilwe mo go Ditaba tša magoši a Israele. ₁₆Ge Menaheme a le tseleng a etšwa Tirtsa, o ile a thuba motse wa Tapuage a fediša badudi ba wona, a ba a senya naga ye e o dikologilego, ka gobane motse woo o ile wa se ke wa ineela go yena. A ba a phula baimana ba gona ka moka dimpa.

₁₇Ngwageng wa masome a mararo a metšo ye senyane wa pušo ya Kgoši Usia wa Juda, Menaheme, morwa wa Gadi, ya ba kgoši ya Israele gomme a buša a le Samaria mengwaga ye lesome. ₁₈A dira dibe pele ga Morena, a se ke a tlogela dibe tša Kgoši Jerobeamo, morwa wa Nebate, yo a dirišitšego Baisraele dibe. Mehleng ya gagwe ₁₉Tiglate-Pilesere, kgoši ya Asiria, a hlasela Israele, gomme Menaheme a mo neela silibera ya dikilokramo tše dikete tše masome a mararo gore a mo thuše go tiiša mmušo wa Menaheme mo nageng. ₂₀Menaheme a kgobokanya tšhelete yeo ka go gapeletša mohumi yo mongwe le yo mongwe wa Israele go ntšha dipapetlana tša silibera tše masome a mahlano. Ka gona Tiglate-Pilesere a ipoelela nageng ya gabo.

₂₁Tše dingwe tše Menaheme a di dirilego di ngwadilwe mo go Ditaba tša magoši a Israele. ₂₂O ile a ithobalela le botatagwe, gomme morwa wa gagwe, Pekagia, a mo hlatlama bogošing.

₂₃Ngwageng wa masome a mahlano wa pušo ya Kgoši Usia wa Juda, Pekagia, morwa wa Menaheme, ya ba kgoši ya Israele, gomme a buša a le Samaria mengwaga ye mebedi. ₂₄A dira dibe pele ga Morena, a se ke a tlogela dibe tša Kgoši Jerobeamo, morwa wa Nebate, yo a dirišitšego Baisraele dibe. ₂₅Molaodi wa madira a Pekagia, e lego Pekage, morwa wa Remalia, a loga maanomabe, a hlasela Pekagia ka sebong sa ka gare sa mošate kua Samaria, a thušwa ke banna ba masome a a fetšago seatla ba Gileade, a mmolaya, gomme a mo hlatlama bogošing.

₂₆Tše dingwe tše Pekagia a di dirilego di ngwadilwe mo go Ditaba tša magoši a Israele.

₂₇Ngwageng wa masome a mahlano a metšo ye mebedi wa pušo ya Kgoši Usia wa Juda, Pekage, morwa wa Remalia, ya ba kgoši ya Israele, gomme a buša a le Samaria mengwaga ye masome a mabedi. ₂₈A dira dibe pele ga Morena, gomme a se ke a tlogela dibe tša Kgoši Jerobeamo yo a dirišitšego Baisraele dibe.

₂₉Ke ge Pekage e le kgoši ge Tiglate-Pilesere, kgoši ya Asiria, a thopa motse wa Iyone, le wa Abele-Bethe-Maaka, le wa Janoage, le wa Kedeshe, le wa Hatsore, le naga ya Gileade le ya Galilea le naga yohle ya Naftali, gomme a thopa batho ba moo a ba iša Asiria.

₃₀Ngwageng wa masome a mabedi wa ge Jotamo, morwa wa Usia, e le kgoši ya Juda, Hosea, morwa wa Ela, a logela Kgoši Pekage maanomabe, a mo hlasela, a mmolaya, gomme a mo hlatlama bogošing. ₃₁Tše dingwe tše Pekage a di dirilego di ngwadilwe mo go Ditaba tša magoši a Israele.

₃₂Ngwageng wa bobedi wa pušo ya Pekage, morwa wa Remalia, Jotamo, morwa wa Usia, ya ba kgoši ya Juda ₃₃a na le mengwaga ye masome a mabedi a metšo ye e fetšago seatla, gomme a buša a le Jerusalema mengwaga ye lesome le ye e selelago. Mmagwe e be e le Jerusha, morwedi wa Tsadoko. ₃₄Jotamo a dira tše di kgahlago Morena, go no swana le Usia, tatagwe. ₃₅Eupša dintotoma tšeo go tšona go bego go khunamelwa medimo ya diswantšho a se ke a di phušola, mme batho ba no tšwela pele le go dira dihlabelo le go tšhuma diorelo moo go tšona. Ke Jotamo yoo a ilego a aga kgoro ye e lebeletšego leboa ya Tempele.

₃₆Tše dingwe tše Jotamo a di dirilego di ngwadilwe mo go Ditaba tša magoši a Juda. ₃₇Mehleng ya gagwe Morena o ile a romela Kgoši Retsine wa Siria le Kgoši Pekage, morwa wa Remalia, go tlo hlasela Juda. ₃₈Jotamo a ithobalela le botatagwe, gomme a bolokwa mabitleng a bona motseng wa Dafida, mme morwa wa gagwe, Ahase, a mo hlatlama bogošing.