To The Word – Day 120

₁Ngwageng wa lesome le metšo ye e šupago wa ge Pekage, morwa wa Remalia, e le kgoši ya Israele, Ahase, morwa wa Jotamo, ya ba kgoši ya Juda ₂a na le mengwaga ye masome a mabedi, gomme a buša a le Jerusalema mengwaga ye lesome le ye e selelago. A se ke a dira tše di kgahlago Morena, bjalo ka rakgolokhukhu wa gagwe, Dafida; ₃eupša yena a itirela tše mpe tše di bego di dirwa ke magoši a Israele. A ba a direla medimo ya diswantšho sehlabelo ka morwa wa gagwe, a etša ditlwaedi tša makgapa tša batho bale Morena a ba rakilego nageng ge Baisraele ba goroga. ₄Ahase a dira dihlabelo, a tšhuma le diorelo dintotomeng tšeo go tšona go bego go khunamelwa medimo ya diswantšho, dithabaneng, le ka fase ga mehlare ka moka ya merithi ye megolo.

₅Kgoši Retsine wa Siria le Kgoši Pekage wa Israele ba hlasela Jerusalema mme ba e dikanetša, eupša ba šitwa ke go fenya Ahase. ₆Ka tšona nako tšeo Kgoši Retsine a thopollela Baedomo motse wa Elate mme a raka Bajuda ba ba bego ba dula moo. Baedomo ba tla ba dula Elate go fihlela le lehono. ₇Ahase a roma batseta go Tiglate-Pilesere, kgoši ya Asiria, gore ba mmotše ba re: “Ke nna mohlanka wa gago le morwa wa gago. Tlaa o ntlhakodiše go kgoši ya Siria le go ya Israele bao ba ntlhaselago.” ₈Ahase a tšea gauta le silibera ka Tempeleng le ka polokelong ya mošate a di romela go kgoši e le seloba. ₉Tiglate-Pilesere a kwana le kgopelo ya Ahase, a ya le madira a gagwe Damaskose, a thopa motse woo, a bolaya Kgoši Retsine gomme a iša batho ba ntshe bothopša kua Kire.

₁₀Ge Kgoši Ahase a eya Damaskose go Kgoši Tiglate-Pilesere, o ile a bona aletare fao gomme a romela moprista Uria meelo ya yona ya mmakgonthe le seswantšhobopša sa yona ka moo e bego e tloga e le ka gona. ₁₁Ka gona Uria a aga aletare ye e bego e swana le yona swaniswani, a ba a e fetša pele ga ge Ahase a boa. ₁₂Ge Ahase a boa Damaskose a hwetša aletare yeo e fedile, ₁₃gomme a neela dihlabelo tša go tšhungwa ka moka le dikabelo tša bupi godimo ga yona, a tšhela le beine godimo ga yona ya ba kabelo ya seno, a ba a e foka ka madi a dihlabelo tša gagwe tša kagišano. ₁₄Aletare ye e abetšwego Morena ya mphiri e be e le gare ga aletare ye mpsha le Tempele, ka gona Ahase a e šuthišetša ka lehlakoreng la ka leboa la aletare ya gagwe. ₁₅Ya ba o laela Uria o re: “Godimo ga aletare ye ya ka ye kgolo o dire dihlabelo tša go tšhungwa ka moka tša mosong le dikabelo tša mantšiboa tša bupi, le dihlabelo tša go tšhungwa ka moka, le dikabelo tša bupi tša kgoši le tša setšhaba, le dikabelo tša seno tša setšhaba. O e foke ka madi a diruiwa tšohle tše go dirwago dihlabelo ka tšona. Eupša ge e le aletare ya mphiri yona o e lese, nna ke tla bona gore ke tla dira eng ka yona.” ₁₆Uria a dira ka moo kgoši a laetšego ka gona.

₁₇Kgoši Ahase a ripa diforeime tša dikoloyana tša mphiri tše di bego di šomišwa ka Tempeleng, gomme a tloša dibjana tše di bego di le godimo ga tšona; a tloša le legopo lela la mphiri mekokotlong ya dikgomo tše lesome le tše pedi tša mphiri, a le bea godimo ga madulo a a bego a le agetše ona ka matlapa. ₁₈Gore a tle a kgahle kgoši ya Asiria a tloša mathudi a a bego a le ka Tempeleng ao kgoši a bego a putla ka go ona ka letšatši la Sabatha, a thiba le mojako wa kgoši wa go tsena ka Tempeleng.

₁₉Tše dingwe tše Kgoši Ahase a di dirilego di ngwadilwe mo go Ditaba tša magoši a Juda. ₂₀Ahase a ithobalela le botatagwe, mme a bolokwa mabitleng a bona motseng wa Dafida, gomme morwa wa gagwe, Hiskia, a mo hlatlama bogošing.

₁Ngwageng wa lesome le metšo ye mebedi wa pušo ya Kgoši Ahase wa Juda, Hosea, morwa wa Ela, ya ba kgoši ya Israele, gomme a buša a le Samaria mengwaga ye senyane. ₂A dira dibe pele ga Morena, eupša e sego go swana le magoši a a bušitšego Israele pele ga gagwe. ₃Kgoši Salmanasere wa Asiria a mo tšwela dira; Hosea a ineela go yena gomme a mo ntšhetša diloba ngwaga ka ngwaga. ₄Fela ka ngwaga wo mongwe Hosea a roma batseta go So, kgoši ya Egepeta, a mo kgopela gore a mo thuše gore a se hlwe a bušwa ke Salmanasere, gomme a napa a lesa go ntšha diloba tšela tša ngwaga ka ngwaga. Ge Salmanasere a ekwa taba tšeo, a swara Hosea a mo tswalelela kgolegong.

₅Ke moo Salmanasere a hlasetšego Israele gomme a dikanetša Samaria. Ngwageng wa boraro wa go dikanetšwa fao, ₆wo e bego e le ngwaga wa senyane wa pušo ya Hosea, kgoši ya Asiria ya thopa Samaria, ya iša Baisraele bothopša kua Asiria, ya dudiša ba bangwe ba bona motseng wa Halage, ba bangwe nokeng ya Habore, seleteng sa Gosane, gomme ba bangwe ya ba dudiša metseng ya Media.

₇Samaria e ile ya wa ka gobane Baisraele ba be ba dira dibe pele ga Morena Modimo wa bona yo a ba hlakodišitšego go kgoši ya Egepeta mme a ba ntšha Egepeta. Ba be ba khunamela medimo ye mengwe, ₈ba latela ditlwaedi tša ditšhaba tše Morena a di rakilego ge setšhaba sa gagwe se goroga, ba bile ba ithuta mekgwa ye mebe ya magoši a Israele. ₉Baisraele ba be ba bolela Morena Modimo wa bona gampe. Ba ikagela dintotoma tšeo go tšona ba bego ba khunamela medimo ya diswantšho metseng ya bona ka moka, go tloga ka metsana ya ditora tša tlhapetšo go fihla ka metse ye megolo ye e ageleditšwego ka merako. ₁₀Ba hloma dikokwane tša borapedi tša maswika le dikota tša borapedi mebotong yohle ye e phagamego, le ka fase ga mehlare yohle ya merithi ye megolo, ₁₁gomme ba tšhuma diorelo dintotomeng tšohle tšeo go tšona ba bego ba khunamela medimo ya diswantšho, ba dira tše di bego di dirwa ke ditšhaba tšela Morena a go di ntšha nageng. Ba rumola Morena ka ditiro ka moka tša bona tše mpe, ₁₂gomme ba tshela molao wa Morena wo o rego ba se ke ba khunamela medimo ya diswantšho.

₁₃Morena o be a rometše baboni le baprofeta ba gagwe ka moka gore ba botše Baisraele le Bajuda ba re: “Sokologang ditseleng tša lena tše mpe gomme le phetheng ditaelo tša ka tše di lego melaong ye ke e filego borakgolokhukhu ba lena, ka ba ka e fetišetša go lena ka bahlanka ba ka, baprofeta.” ₁₄Eupša ba se ke ba theetša; ba ngangabala bjalo ka borakgolokhukhu ba bona, bale ba go se ke ba tshepha Morena Modimo wa bona. ₁₅Ba gana ditaelo tša gagwe le kgwerano ye a e dirilego le borakgolokhukhu ba bona, le gona ba se theetše ge a ba kgala. Ba khunamela medimo ya diswantšho ya lefeela gomme le bona ya ba mafeela, ba latela mekgwa ya ditšhaba tše di bapilego le bona, ba tshela taelo ya Morena ye e rego ba se ke ba dira tše ba di dirago. ₁₆Ba tshela melao ka moka ya Morena Modimo wa bona, ba ba ba bopa dipowana tše pedi ka tshipi, ba di khunamela; ba betla le kota ya borapedi, ba obamela dinaledi, ba khunamela le Baale. ₁₇Ba direla medimo e šele dihlabelo ka barwa le barwedi ba bona; ba ya go dinoge le go didupe, gomme ba ikgafela go dira tše mpe pele ga Morena, mme ka go dira bjalo ba mo rumola. ₁₈Morena a galefela Baisraele gomme a ba raka pele ga gagwe, a šadiša fela mmušo wa Juda.

₁₉Eupša le sona setšhaba sa Juda se be se sa phethe melao ya Morena Modimo wa sona; ba ile ba tšea mekgwa yela ya batho ba Israele. ₂₀Morena a lahla Baisraele ka moka, a ba kokobetša mme a ba gafela diatleng tša bašwahledi go fihlela ge a ba raka pele ga gagwe.

₂₁Ka morago ga ge Morena a kgaogantše Baisraele le lapa la bogoši la Dafida, Baisraele ba ile ba bea Jerobeamo, morwa wa Nebate, kgoši ya bona. Jerobeamo a ba aroša go Morena gomme a ba diriša dibe tše mpempe. ₂₂Ba latela Jerobeamo gomme ba se ke ba tlogela dibe tše a bego a di dira, ₂₃go fihlela ge Morena a ba raka pele ga gagwe bjalo ka ge a be a ba boditše ka bahlanka ba gagwe, baprofeta. Ka gona batho ba Israele ba išwa bothopša kua Asiria moo ba sa dulago gona le lehono.

₂₄Kgoši ya Asiria ya tšea batho motseng wa Babilone, le wa Kuta, le wa Aba, le wa Hamate, le wa Sefarabaime ya ba dudiša metseng ya Samaria, moo go bego go dutše Baisraele ba ba bego ba thopilwe. Ba tšea metse yeo gomme ba dula go yona. ₂₅Ge ba thoma go dula moo, ba se ke ba boifa Morena, ka gona a romela ditau mme tša bolaya ba bangwe ba bona. ₂₆Kgoši ya Asiria ya botšwa gore batho ba a ba dudišitšego metseng ya Samaria ga ba tsebe ka moo ba swanetšego go direla Modimo wa naga yeo ka gona, ka fao Modimo woo o rometše ditau mme di a ba bolaya. ₂₇Ka gona kgoši ya ntšha taelo ya go re: “Tšeang yo mongwe wa baprista ba re ba thopilego kua le mmušetše gona gore a yo dula gona a rute batho ba fao ka moo Modimo wa naga yeo a swanetšego go direlwa ka gona.” ₂₈Ka gona moprista yo mongwe yo a bego a thopilwe Samaria a tloga a yo dula Bethele fao a ilego a ruta batho ka mo Morena a swanetšego go khunamelwa ka gona.

₂₉Eupša merafe ye e bego e dutše Samaria ya tšwela pele le go itirela medimo ya yona ya diswantšho, gomme ba e bea ka ditempelaneng dintotomeng tša go agwa ke Baisraele, tšeo go tšona go bego go khunamelwa medimo ya diswantšho. Morafe wo mongwe le wo mongwe wa itirela medimo ya wona ya diswantšho motseng wo o bego o dula go wona: ₃₀Batho ba Babilone ba dira diswantšhobopša tša modimo wa go bitšwa Sukote-Benote; batho ba Kuta ba dira tša Nergale; ba Hamate tša Ashima; ₃₁ba Aba tša Nibihase le tša Tartake; gomme ba Sefarabaime bona ba direla medimo ya bona, Adrameleke le Anameleke, dihlabelo ka bana ba bona. ₃₂Batho ba le bona ba be ba boifa Morena, gomme ba no ikgethela mang le mang gare ga bona gore e be moprista wa go hlankela medimo ya diswantšho ditempelaneng tša dintotomeng, le go ba direla dihlabelo moo. ₃₃Ka gona ba be ba khunamela Morena ba bile ba khunamela medimo ya bona go ya ka ditlwaedi tša ditšhaba tše ba bego ba etšwa go tšona.

₃₄Le lehono ba sa latela ditlwaedi tšeo tša bona tša kgale. Ga ba khunamele Morena goba ba phetha melao le ditaelo tše a di filego ditlogolo tša Jakobo yo a mo reetšego leina la Israele. ₃₅Morena o be a dirile kgwerano le bona mme a ba laetše a re: “Le se ke la khunamela medimo ye mengwe; le se ke la e obamela, goba la e rapela, goba la e direla dihlabelo. ₃₆Le khunameleng nna, Morena, yo ke le ntšhitšego Egepeta ka maatla a magolo le go tia ga ka; le obameleng nna gomme le direleng nna dihlabelo. ₃₇Ka mehla le phetheng melao le ditaelo tše ke le ngwaletšego tšona. Le se ke la khunamela medimo ye mengwe, ₃₈le gona le se ke la lebala kgwerano ye ke e dirilego le lena. Le se ke la khunamela medimo ye mengwe, ₃₉eupša le khunameleng nna fela, Morena Modimo wa lena, mme ke tla le hlakodiša manabeng a lena.” ₄₀Fela ba ile ba se ke ba theetša, ba no tšwela pele le go latela ditlwaedi tša bona tša kgale.

₄₁Ka gona batho bao ba be ba boifa Morena, ba bile ba khunamela medimo ya bona ya diswantšho; gomme le lehono ditlogolo tša bona di sa tšwela pele le go dira bjalo.

₁Ngwageng wa boraro wa ge Hosea, morwa wa Ela, e le kgoši ya Israele, Hiskia, morwa wa Ahase, ya ba kgoši ya Juda ₂a na le mengwaga ye masome a mabedi a metšo ye e fetšago seatla, gomme a buša a le Jerusalema mengwaga ye masome a mabedi a metšo ye senyane. Mmagwe e be e le Abi, morwedi wa Sakaria. ₃Hiskia a dira tše di kgahlago Morena, a swana le Kgoši Dafida, rakgolokhukhu wa gagwe. ₄A phušola dintotoma tšeo go tšona go bego go khunamelwa medimo ya diswantšho, a kgereša dikokwane tša maswika tša borapedi, a rema le dikota tša borapedi. A pšhatlaganya le noga yela ya mphiri ye e bego e dirilwe ke Moshe e bitšwa Nehushtane. Go fihlela ka nako yeo setšhaba sa Israele se be se e hlompha ka go e tšhumela diorelo. ₅Hiskia yena a bota Morena Modimo wa Israele; Juda e be e se ya ka ya ba le kgoši ye e swanago le yena pele ga gagwe, mme le ka morago ya se ke ya ba gona. ₆Yena o ile a kgomarela Morena a se ke a mo tlogela le gatee, a phetha ditaelo ka moka tše Morena a bego a di file Moshe. ₇Ka gona Morena a ba le yena, gomme a atlega go tšohle tše a di dirago. A tsogela kgoši ya Asiria maatla gomme a gana go ineela go yona. ₈A fenya Bafilista gomme a šwahlela metsana ya bona ya ditora tša tlhapetšo le metse ye megolo ye e ageleditšwego ka merako, go ba go yo fihla le Gasa le tikologong ya yona.

₉Ngwageng wa bone wa pušo ya Hiskia, wo e bego e le ngwaga wa bošupa wa ge Hosea e le kgoši ya Israele, Kgoši Salmanasere wa Asiria o ile a hlasela Israele gomme a dikanetša motse wa Samaria. ₁₀Ngwageng wa boraro a o thopa; woo e be e le ngwaga wa boselela wa pušo ya Hiskia, e bile e le ngwaga wa senyane wa pušo ya Hosea. ₁₁Kgoši ya Asiria ya thopa Baisraele ya ba iša Asiria, gomme ya dudiša ba bangwe ba bona motseng wa Halage, ba bangwe nokeng ya Habore, seleteng sa Gosane, gomme ba bangwe ya ba dudiša metseng ya Media.

₁₂Motse wa Samaria o ile wa wa ka gobane Baisraele ba be ba sa theeletše Morena Modimo wa bona, eupša ba be ba lahla kgwerano ye a bego a e dirile le bona, gomme ba nyatša melao ka moka ye e bego e beilwe ke Moshe, mohlanka wa Morena. Ba be ba hlokomologile melao yeo, ba sa e phethe.

₁₃Ngwageng wa lesome le metšo ye mene wa pušo ya Kgoši Hiskia, Sanheribe, kgoši ya Asiria, a hlasela metse ya Juda ye e ageleditšwego ka merako, gomme a e thopa. ₁₄Hiskia a roma batseta go Sanheribe, yo a bego a le Lakishe, gore ba mmotše ba re: “Ke go phošeditše; hle, gomela morago, gomme ke tla go loba ka se o se nyakago.” Kgoši a ba fetola ka go re Hiskia a mo romele silibera ya dikilokramo tše dikete tše senyane, le gauta ya dikilokramo tše makgolo a senyane. ₁₅Hiskia a mo romela silibera ka moka ya ka Tempeleng le ya polokelo ya mošate; ₁₆a ba a gopa le gauta ya mamating a Tempele le gauta ye yena mong a bego a manegile dikota tša mejako ka yona, a e romela go Sanheribe. ₁₇Kgoši ya Asiria ya romela madira a mantši a tloga Lakishe go yo hlasela Hiskia kua Jerusalema; a be a laolwa ke balaodi ba gagwe ba bararo ba bagologolo. Ge ba fihla Jerusalema ba dula tseleng ye e bapetšego le tšhemo ya mohlatswi wa mašela, kgauswi le mokero wo o tlišago meetse a a tšwago letshaneng la ka godimo. ₁₈Ke moo ba romilego batho go yo bitša Kgoši Hiskia, gomme bahlankedi ba bararo ba gagwe ba tšwa go yo ba gahlanetša. Bona e be e le Eliakime, morwa wa Hilkia, yo a bego a hlokometše mošate, le Shebna, mongwaledi wa mošate, le Joage, morwa wa Asafo, mongwaledi wa mmušo. ₁₉Yo mongwe wa balaodi ba Baasiria a ba botšiša a re: “Kgošikgolo, kgoši ya Asiria, o nyaka go tseba gore ke eng se se dirago gore Hiskia a itshephe ka mokgwa wo. ₂₀A Hiskia o gopola gore a ka boledišana le rena mola a swanetše go loga maano a ntwa le go rapa madira a gagwe? A o be a gopola gore o tla thušwa ke mang ge a be a tsogela Asiria maatla? ₂₁O tshephile Egepeta gore e tla mo thuša, eupša go bota Egepeta go bjalo ka ge motho a ka tšea lehlaka a hlotlela ka lona – le tla thokgega la mo hlaba seatla. Kgoši ya Egepeta e bjalo ge motho a e tshephile.”

₂₂Molaodi yoo wa Moasiria a tšwela pele a re: “Kgane le nyaka go mpotša gore le tshephile Morena Modimo wa lena? A ga se tšona dintotoma tše a khunamelwago go tšona le dialetare tša gagwe tše yena Hiskia a di kgerešitšego ge a botša batho ba Juda le ba Jerusalema gore ba direle fela aletareng ye e lego Jerusalema? ₂₃Ke nyaka gore a phegišane le mong wa ka, kgoši ya Asiria, ka tsela ye: Ke tla mo fa dipere tše dikete tše pedi ge a ka kgona go ba le banna ba ba tlago di namela! ₂₄A bjale a ka kgona bjang go fenya molaodi yo monnyannyane ka maemo wa Moasiria? Gomme le ge go le bjalo o sa botile Egepeta gore e mo romele dikoloi tša ntwa le banamedi ba dipere! ₂₅A o gopola gore ke hlasetše motse wo go tlo o senya e se thato ya Morena? Ke Morena ka boyena yo a mpoditšego gore ke hlasele naga ye ke e senye.”

₂₆Eliakime le Shebna le Joage ba re go molaodi yoo: “Hle, mong wa rena, bolela le rena ka Searamo. Re a se tseba. O se ke wa bolela Seheberu; batho ba ba lego godimo ga morako ba a go kwa.”

₂₇Molaodi yoo a ba fetola a re: “A le gopola gore mong wa ka o nthomile go tlo botša lena le mong wa lena fela dilo tše? Aowaowaa, ke botša le batho bale ba dutšego godimo ga morako, bao, bjalo ka lena, ba tlago ba ba ja mantle a bona, ba nwa le mehlapologo ya bona.”

₂₈Ke moo molaodi a emeletšego gomme a goeletša ka Seheberu a re: “Theetšang se kgošikgolo, kgoši ya Asiria, e le botšago sona! ₂₉O le botša gore le se ke la lesa Hiskia a le lahletša. Hiskia a ka se le phološe. ₃₀Le gona le se ke la mo lesa a le goketša gore le tshephe Morena ge a re: ‘Ruri, Morena o tla re phološa, le gona motse wo o ka se gafelwe diatleng tša kgoši ya Asiria.’ ₃₁Le se ke la theetša Hiskia. Kgoši ya Asiria e le laela gore le tšwe motseng gomme le ineele. Ka moka ga lena le tla dumelelwa go ja diterebe tše di tšwago merareng ya lena, le mago a mego ya lena, le go nwa meetse a didiba tša lena, ₃₂go fihlela ge kgoši a le khudušetša nageng ye e swanago le ya lena kudu, moo go lego dirapa tša merara gore le be le beine, le mabele gore le be le bogobe; ke naga ya makhura a mohlware le todi ya dinose. Ge le ka dira se a se bolelago, le ka se hwe, le tla phela. Le se ke la theetša Hiskia ge a le fora a re: ‘Morena o tla re hlakodiša.’ ₃₃Na medimo ya dinaga tše dingwe yona e kile ya phološa dinaga tša yona go kgoši ya Asiria? ₃₄A e kae bjale medimo ya Hamate le ya Arpade? E kae medimo ya Sefarabaime le ya Hena le ya Aba? A go na le medimo ye e kilego ya phološa motse wa Samaria? ₃₅Ke ofe modimo wo o kilego a phološa naga ya wona go kgoši ya rena? Bjale go ka kgonega bjang gore Morena a phološe Jerusalema?”

₃₆Batho ba no ikhomolela bjalo ka ge Kgoši Hiskia a be a ba boditše, ba se ke ba fetola. ₃₇Ke moo Eliakime le Shebna le Joage ba gagotšego diaparo tša bona ba nyamile, gomme ba ya ba begela kgoši se molaodi yola wa Asiria a se boletšego.

₁Ge Kgoši Hiskia a ekwa ditaba tšeo, a gagola diaparo tša gagwe ka manyami, a apara diaparo tša go ilela, gomme a ya Tempeleng ya Morena. ₂A roma Eliakime, mohlankedi yo a bego a hlokometše mošate, le Shebna, mongwaledi wa mošate, le baprista ba bagolo go moprofeta Jesaya, morwa wa Amotse. Le bona ba be ba apere diaparo tša go ilela. ₃A ba laela gore ba botše Jesaya ba re: “Lehono ke letšatši la tlalelo; re a otlwa gomme re a gobošwa. Re swana le mosadi yo a batametšego go belega, eupša a fedile maatla. ₄Kgoši ya Asiria e rometše molaodi wa yona yo mogolo go tlo roga Modimo yo a phelago. Nke Morena Modimo wa gago a kwe maroga a gomme a otle bao ba a boletšego. Ka gona re rapelele go Modimo, rena mašaledi a Bajuda.”

₅Ge Jesaya a seno kwa molaetša wa Kgoši Hiskia, ₆a mo fetola ka go re Morena o re: “O se ke wa tšhošwa ke mantšu ao Baasiria ba nkgobošitšego ka ona. ₇Ke tla dira gore kgoši ya Asiria e kwe pego ye e tlago e tlaletša, mme ya boela nageng ya gaboyona, gomme ka dira gore e bolawe moo.”

₈Molaodi yola wa Moasiria a kwa gore kgoši ya gabo e tlogile Lakishe gomme e lwa le ba motse wa Libna; ka gona a ya moo go yo bolela le yena. ₉Kgoši ya Baasiria ya kwa gore madira a Baegepeta a tseleng go tlo ba hlasela, mme a etilwe pele ke Kgoši Tirihaka wa Etopia. Ka gona yena a roma batseta ka lengwalo go Kgoši Hiskia wa Juda, ₁₀a re go yena: “Modimo yo o mo tshephilego o go boditše gore Jerusalema e ka se gafelwe diatleng tša ka, fela o se ke wa forwa ke Modimo yoo wa gago. ₁₁O kwele ka bowena tše magoši a Asiria a di dirilego dinaga ka moka – a sentše gohle! A o gopola gore wena o ka phologa? ₁₂Borakgolokhukhu ba ka ba fedišitše motse wa Gosane, wa Harane, le wa Retsefo, ba bolaya batho ba Edene ba ba bego ba dula Telasare, mme le o tee wa medimo ya bona a se kgone go ba phološa. ₁₃A kae magoši a motse wa Hamate, wa Arpade, wa Sefarabaime, wa Hena, le wa Aba?”

₁₄Kgoši Hiskia a tšea lengwalo leo go batseta, a le bala. Ke moka a ya Tempeleng, a le phutholla moo pele ga Morena, ₁₅gomme a rapela a re: “Wena Morena Modimo wa Israele, o dutšego setulong sa gago sa bogoši ka godimo ga bakerubi, ke wena o nnoši o lego Modimo, o bušago mebušo ka moka ya lefase. O hlodile legodimo le lefase. ₁₆Bjale, Morena, lebelela tše di re hlagelago. Theetša dilo ka moka tše Sanheribe a go rogago ka tšona, wena Modimo yo a phelago. ₁₇Ke therešo, Morena, gore magoši a Asiria a fedišitše ditšhaba le dinaga tša tšona, ₁₈a tšhuma medimo ya tšona; a kgona go e senya ka ge e be e se medimo le gatee, eupša e le dibetlwa tša kota le tša leswika tše di dirilwego ke batho. ₁₉Bjale Morena Modimo wa rena, re phološe go Baasiria gore mebušo ka moka ya lefase e tle e tsebe gore ke wena o nnoši, Morena, o lego Modimo.”

_20-21Ke moo Jesaya a romilego motseta go Kgoši Hiskia, a mmotša gore Morena o kwele thapelo ya kgoši gomme o re:

₂₉Ke moo Jesaya a itšego go Kgoši Hiskia: “Sešupo sa tše di tlago direga sese: Lenyaga le išago le tla ja mabele a a imelelago ka boona, eupša ka ngwaga wa boraro le tla kgona go ipšalela mabele la ba la tla la a buna, la bjala merara la ba la tla la ja dienywa tša yona. ₃₀Mašaledi a Juda a tla boela a tseneletša medu fase mme a enywa dienywa. ₃₁Go tla ba le mašaledi Jerusalema le baphologi thabeng ya Sione, ka gobane Morena o ikemišeditše go phethagatša seo.

₃₂“Tše Morena a di boletšego mabapi le kgoši ya Asiria šedi: ‘A ka se tsene mo motseng wo goba a o thunya le ka mosebe o tee. Ga go bahlabani ba ba tlago tla motseng wo ba swere dikotse, le gona ga go madira a a tlago kgobela ntotoma ya mobu ya go o hlasela. ₃₃O tla boela morago ka yona tsela ye a tlilego ka yona, eupša mo motseng wo a ka se tsene. Ke realo, nna, Morena. ₃₄Ke tla phemela motse wo mme ka o phološa, gore ke tle ke hlomphiwe, le gore ke tle ke phethe se ke se tshephišitšego mohlanka wa ka, Dafida.’ ”

₃₅Bošegong bjoo morongwa wa Morena a ya mešašeng ya Baasiria mme a bolaya bahlabani ba dikete tše lekgolo le tše masome a seswai le tše tlhano. Ka mahube a letšatši le le latelago ba be ba rapaletše moo, ka moka e le ditopo! ₃₆Ke moo kgoši ya Asiria, Sanheribe, a gomilego a boela Ninibe. ₃₇Ka letšatši le lengwe ge a sa rapela ka tempeleng ya modimo wa gagwe, Nisroko, barwa ba gagwe, Adrameleke le Saretsere, ba mmolaya ka ditšhoša, gomme ba tšhabela nageng ya Ararate. Morwa wa gagwe yo mongwe, Esarhadone, a mo hlatlama bogošing.

₁Mehleng yeo Kgoši Hiskia a swarwa ke bolwetši gomme a nyako hwa. Moprofeta Jesaya, morwa wa Amotse, a ya go yena a re: “Morena o re: ‘Beakanya tša lapa la gago, ka gobane o ka se fole; o tla hwa.’ ”

₂Hiskia a phekgoga a lebelela lebotong gomme a rapela a re: ₃“Hle, Morena, gopola gore ke go hlanketše ka potego le botshephegi, le gore ka mehla ke dirile tše o bego o nyaka ke di dira.” Gomme a thoma go lla gabohloko.

₄Jesaya a tloga go kgoši, eupša ya re pele ga ge a putla ka kgorong ya ka gare ya mošate, Morena a mmotša gore a ₅boele go Hiskia, mmuši wa setšhaba ba Morena, a re go yena: “Nna, Morena, Modimo wa rakgolokhukhu wa gago, Dafida, ke kwele thapelo ya gago mme ke bone megokgo ya gago. Ke tla go fodiša, gomme ka letšatši la boraro o tla ya Tempeleng. ₆Ke tla go phediša mengwaga ye mengwe ye lesome le metšo ye mehlano. Ke tla hlakodiša wena le motse wo wa Jerusalema go kgoši ya Asiria. Ke tla šireletša motse wo gore ke tle ke godišwe, le gore ke tle ke phethe se ke se tshephišitšego mohlanka wa ka, Dafida.”

₇Ka morago Jesaya a botša bahlokomedi ba kgoši gore ba tšee sekgomaretši sa phaphathi ye e dirilwego ka mago a a omišitšwego, ba se phare sekakung sa kgoši, gomme kgoši o tla fola. ₈Kgoši Hiskia a mmotšiša a re: “A sešupo ke eng sa gore Morena o tla mphodiša, le gore ka letšatši la boraro ke tla kgona go ya Tempeleng?”

₉Jesaya a mo fetola a re: “Morena o tla go laetša sešupo sa gore yena o tla phetha se a se boletšego. A o nyaka gore morithi wo o lego mo manamelong a o ye pele dikgato tše lesome goba o ye morago dikgato tše lesome?”

₁₀Hiskia a mo fetola a re: “Ga go thata go dira gore morithi o ye pele dikgato tše lesome! A o boele morago dikgato tše lesome.”

₁₁Jesaya a rapela Morena, gomme Morena a dira gore morithi o boele morago dikgato tše lesome manamelong ao a bego a agilwe ke Kgoši Ahase.

₁₂Yona mehleng yeo kgoši ya Babilonia, Merodaka-Baladane, morwa wa Baladane, a kwa gore Kgoši Hiskia o be a babja. Ka gona a mo ngwalela lengwalo a ba a mo romela le mpho ka batseta. ₁₃Hiskia a amogela batseta bao gomme a ba laetša polokelo ya mahumo a gagwe ka moka ye e bego e boloketše silibera le gauta le dikhanakhana le dinkgabose le dibetša tša ntwa le dilo ka moka ka mengwakong ya gagwe ya polokelo. Gwa se ke gwa ba le selo ka ngwakong wa kgoši le mmušong wa gagwe ka moka se a sa ba laetšego sona. ₁₄Ke moo moprofeta Jesaya a ilego go Kgoši Hiskia a mmotšiša a re: “A banna bale ba tšwa kae, le gona ba go boditše eng?”

Hiskia a mo fetola a re: “Ba tšwa nageng ya kgole, Babilonia.”

₁₅Jesaya a mmotšiša a re: “A ba boneng mo mošate?”

Hiskia a mo fetola a re: “Ba bone se sengwe le se sengwe. Ga go se ke sego ka ba laetša sona ka mengwakong ya ka ya polokelo.”

₁₆Ke moo Jesaya a itšego go kgoši: “Morena o re ₁₇nako e etla yeo ka yona se sengwe le se sengwe mo mošate, ga gago, e lego tšohle tše borakgolokhukhu ba gago ba di bolokilego go fihlela lehono, di tlago thothelwa Babilonia. Go ka se šadišwe selo. ₁₈Mo go ditlogolo tša gago go tla thopša ba bangwe gomme ya ba baamogwabonna ba go šoma ngwakong wa kgoši ya Babilonia.”

₁₉Kgoši Hiskia o ile a gopola gore se Jesaya a se bolelago se šupa gore go tla ba le khutšo le polokego nakong ya ge yena Hiskia a sa phela, ka gona a mo fetola a re: “Taba ye o mpoditšego yona e etšwa go Morena e lokile.”

₂₀Tše dingwe tše Kgoši Hiskia a di dirilego, ditiro tšohle tša bogale bja gagwe, le ka moo a agilego letamo a ba a epa mokero wa meetse gore o tsenye meetse ka motseng, ka moka di ngwadilwe mo go Ditaba tša magoši a Juda. ₂₁Hiskia a ithobalela le botatagwe, gomme Manase, morwa wa gagwe, a mo hlatlama bogošing.