Seswantšho se segolo – Letšatši la 8

Dipapadi tša diOlimpiki – ke mahlatse go bogela boradiatletiki bao ba šommego ka thata mengwaga e mentši. Diswantšho tše di tšewago ke dikhamera nakong ya dipontšho di tla bonwa dikgwedi le mengwaga ye e latelago.

Tše ke diswantšho tša bao ba thopilego sefoka le go fihlelela tebanyo ya mafelelo, metale wa gauta. Go na le diswantšho tša bao ba nyamišitšwego ke go palela ga bona. Dikhamera di tla ba di tšere nakwana yeo ya katlego goba ya manyami. Selo sa go nyamiša ke gore seswantšho se segolo se ga se naganwe. Mošomo o thata wa radiatletiki o tla re feta. Ke fela dikanegelo tše botse tše di tlago anegwa. Le ge go le bjalo, se sekaone ke mehlala ye e bago gona, mehlala ya melaetša ye e kgahlišago.

Go modumedi yo a kgathago tema mokatong wa bophelo, tšohle di mabapi le bophelo bja ka morago, bophelo bjo bo sa felego le Modimo wa boraro-botee. Paulose o bolela ka ditokišetšo bjalo ka selo se re swanetšego go se latela. Se mabapi le rena re e ba bahlohleletši go ba bangwe.

Ga go bonolo go ba mohlohleletši. Bahlohleletši ka mehla ba a hlahlobja. Dikhamera di a ba latela moo ba yago gona gomme ditiro tša bona ka mehla di a sekasekwa.

Tlhohlo ye rena bjalo ka badumedi re lebeletšanago le yona ke go ya ntle le go phela ka mokgwa wa go bontšha ditiro go e na le mantšu. Tswalano ya rena le Kriste e swanetše e be ye e kgethegilego kudu le go ba kgauswi gore ba bangwe ba nyake go e latela. Le bona ba swanetše go nyaka go fihla mothalading wa mafelelo go ba le Modimo ka go sa felego.

Phapano e kgolo magareng ga Dipapadi tša diOlimpiki le mokato ke gore go ka se be le mothapa-sefoka o tee fela. Ge o kgatha tema mokatong wa bophelo gomme o ba le nnete go fihla mafelelong, o tla thopa sefoka. O tla hwetša bophelo bjo bo sa felego.