1 BAKORINTE 9

₁Kgane nna ga ke molokologi? Kgane ga ke moapostola? Kgane ga se ka bona Jesu, Morena wa rena? Ga ke re lena le badumedi ka lebaka la modiro wa ka wo ke o diretšego Morena? ₂Le ge ba bangwe ba sa ntsheme moapostola, lena le ntshema yena. Ka ge le phela le le ba tee le Morena, lena ka bolena le dihlatse tša gore ke nna moapostola.

₃Ge batho ba ntshekiša ke fetola ka go re: ₄Na ga ke na tokelo ya go ja le go nwa? ₅Kgane ga ke na tokelo ya go šika le mosadi wa modumedi e le mogatšaka, ka etša baapostola ba bangwe le bana ba boMorena le Petrose? ₆Na ke nna le Barnabase fela ba re swanetšego go šomela tša go re phediša? ₇Na mohlabani ke ofe yo a itefelago tše a phelago ka tšona ntweng? Ke mang yo a rego go bjala merara a se tle a ja diterebe tša yona? Modiša yena ke ofe yo a sa jego maswi a mohlape wo a o dišago?

₈Ge ke realo ga se gore ke bolela fela tše di tsebjago ke mang le mang, gobane le molao wa Moshe o realo. ₉Ka molaong woo go ngwadilwe go re: “Ge o fola mabele ka pholo o se e bofe molomo.” Etse dipholo Modimo o iša kae ka tšona? ₁₀Ga ke re gabotse ge a realo o ra rena? Gape taba ye e ngwaletšwe rena. Sa molemi ke go lema a holofetše puno, le mmuni sa gagwe ke go buna a gabile go ja mabele a gagwe. ₁₁Etse go le begela Ebangedi ga rena e bile go bjala peu ya tša go le phediša moyeng. Na e ka ba phošo bjang ge bjale re buna mo go lena tša go re phediša? ₁₂Ge eba ba bangwe ba loketšwe ke go holega mo go lena, gona rena re loketšwe le go ba feta.

Fela ga se ra ka ra dira go ya ka mo re loketšwego ka gona. Re ile ra no kgotlelela tšohle, gore Taba ye Botse ya Kriste re se e šitiše ka mokgwa ofe le ofe. ₁₃Ga ke re le a tseba gore ba ba šomago ka Tempeleng ba ja tša ka Tempeleng, le ba ba dirago dihlabelo aletareng ba abelwa tšona tša aletareng? ₁₄Agaa, babegi ba Ebangedi le bona Morena o laetše gore ba phele ka yona Ebangedi.

₁₅Nnaena le e tee ya ditokelo tšeo ga se ka ka ka ikhola ka yona; le gona ga se gore ditaba tše ke di ngwalela gore go tle go holege nna ka ditokelo tšeo. Ebile go ka ba kaone gore ke hwe! Le go itheta ga ka nka se go amogwe ke motho! ₁₆Go bega Ebangedi ga ka ga se taba ye nka ithetago ka yona, ka gobane ke tlemegile go e bega. Gomme nka ba yo madimabe kudu ge nka se e bege. ₁₇Ge nkabe ke dira mošomo wo ka go rata ga ka gona nkabe ke nyaka moputso; eupša ke o dira ke tlemegile, ka gobane ke o filwe ke Modimo. ₁₈Bjale moputso wa ka ke eng? Moputso wa ka ke gona go bega Taba ye Botse ye ntle le tefo, ntle le go nyaka go ikhola ka mošomo wo wa ka wa go e bega.

₁₉Le ge ke le molokologi, ke se lekgoba la motho, ke itirile lekgoba la bohle, gore ke tle ke sokollele ba bantši go Kriste. ₂₀Ge ke na le Bajuda ke phela bjalo ka Mojuda, gore ke ba sokolle; gomme le ge nna ke sa bušwe ke melao ya Moshe, ge ke le gare ga bao ba bušwago ke yona, ke phela bjalo ka ge nke ke bušwa ke yona, gore ke tle ke ba sokolle. ₂₁Ka yona tsela yeo, ge ke na le bao ba sa bušwego ke melao ya Moshe, ke phela bjalo ka yo a sa bušwego ke melao yeo, gore ke tle ke sokolle bao ba sa bušwego ke yona. Ka go realo ga se gore ga ke phethe melao ya Modimo; gabotsebotse ke bušwa ke molao wa Kriste. ₂₂Ge ke na le bafokodi tumelong, le nna ke itira mofokodi, gore ke ba sokolle. Ke dira gore batho bohle ba mpone ke swana le bona, e le ge ke gabile gore ka mo go kgonegago go be le ba ke ba phološago.

₂₃Tše ka moka ke di dira ka lebaka la Ebangedi, gore le nna ke tle ke be yo mongwe yo a kgathilego tema mo mošomong wo.

₂₄Ga ke re le a tseba gore ba ba šianago mokatong ba kitima ka moka, eupša sefoka se tšewe ke o tee? Le lena bophelong bja lena bja sedumedi katanang le etše mokati yo a gakalago, gomme le tla thopa sefoka. ₂₅Mang le mang yo a itlwaetšago go šiana o itima tše dintši, a gabile go tlo thopa sefoka se se senyegago; kganthe rena re itima tše dintši re gabile go tlo thopa sefoka se se sa senyegego. ₂₆Ka lebaka leo, nna ga ke kitime wa go tlaruma; ga ke lwe wa go kgeila phefo ka matswele. ₂₇Ke laola mmele wa ka ka o tlwaetša, gore ke se re ke rutile ba bangwe bophelo bja sedumedi, nna mong ka tla ka hwetšwa ke ronwa ke bophelo bjoo.