Seswantšho se segolo – Letšatši la 9

Ga go bonolo ka mehla go tšea batho diswantšho ge ba dira mošomo wa go thuša bahloki, ka gobane batho ba bantši ba ipshina ka go tšewa diswantšho ge ba dira selo se ba se bonago bjalo ka pitšo ya bona.

Nakong ya ketelo go lenaneo la go aba dijo kua Danville, Tshwane, ke katane le go tšea diswantšho tša batho ba ba kgathilego tema lenaneong la kabo ya dijo. Ge ke ba botšiša gore ke ka lebaka la eng ba kgathile tema, karabo ya kakaretšo e bile, “Re dira se ka lerato – lerato la Jesu le lerato go bahloki.”

Tiragalong e nngwe, ke bile le monyetla wa go etela senthara moo bana ba tlaišitšwego ba amogelago thušo. Senthareng ye, ke kopane le batho ba ba nago le lerato le legolo le kwelobohloko go bao ba šomago le bona. Go be go na le dibera tša go bapadiša mo gohle! Ge ke botšiša ka palo e kgolo ya dibera, ke hweditše karabo ka pela. “Dibera tša go bapadiša di khothatša bana ge ba di gokara. Re badumedi gomme ka gobane re leboga se Kriste a re diretšego sona, re thuša ba bangwe.” Karabo ye e be e sa ganetšege ge ke botšiša ka lebaka la mošomo o bjalo wa go hloka boithati.

Ge ke etetše naga ya Mamoseleme, basadi ba bararo ba Khatolika ba mpoditše kanegelo ya bona ya tirelo, ba šoma sepetlele bjalo ka baoki. “Re leka go ba Kriste go batho ba. Basadi ba mo ba re lebelela ka go go re nyatša ka gobane ga re a nyalwa le gore ga re na bana. Se re ka se dirago ke gore re phele Kriste.” Ye e bile karabo ya bona e bonolo eupša ya go opa kgomo lenaka. Re tšee seswantšho? Aowa!

Badumedi ba bantši ba thuša batho ba bangwe letšatši le letšatši, bjalo ka ge batho ba ba boletše. Tlaišego e tla ka dibopego tša go fapafapana gomme go na le ditlhoko lefaseng ka moka, go akaretša ka Afrika Borwa. Ka mahlatse, go na le badumedi bao ba tsepelelago go seswantšho se sennyane gome ba ikwa o ka re ba ka dira phapano ya nnete maemong a tlase.

Se gape ke tlhohlo ye re lebeletšanego le yona, go ya ntle le go dira phapano maphelong a batho ba bangwe. Se ke pitšo ya rena bjalo ka Bakriste.