Kholofelo e mpsha – Letšatši la 8

[Bokamorago: Babadi ba mmalwa ba nkgopetše go ngwala ka tebalelo. Mo ke dipotšišo tše mmalwa go tšwa go diemeile tše ke di amogetšego:]

Mmadi wa 1: “Naa o lebalela bjang motho yo a go fošeditšego kudu moo e lego gore maphelo a gago le ngwana wa gago a fetoga kudukudu ka lebaka la ditiro tša motho yoo?”

O ka se fetoše tša nakong e fetilego. Se o ka se dirago ke go laola ditiro tša gago tša lehono. Go nagana kudu ka selo se se kwešago bohloko kudu sa nakong e fetilego, go dira gore o se lebalele. Ka lebaka la eng? Re boifa gore go se lebalele ga rena motho yoo go tla mo dira gore a sepele ka ntle le kgobalo, mola wena o swanetše go šikara ditlamorago tša ditiro tša gagwe.

Se re sa se lemogego ke gore boitshwaro bja rena bja go se lebalele bo baka pefelo, ye e amago bophelo bja rena ka moka. Ka letsogong le lengwe, ge re kgetha go lebalela le go tlogela go ahlola go Modimo, o a re lokolla go tšwa go tša nakong e fetilego le go lwa legatong la rena, bjalo ka ge e le Moahlodi yo a lokilego.
Go Pesalome 50:6 re bala gore: Magodimo a bega go loka ga gagwe, gobane Modimo ka noši ke moahlodi. Gomme go Jesaya 54:17 go ngwetšwe gore: “ … ka dira le gore ba fenye.” O realo, Morena.

Go lebalela motho yo a go fošeditšego ke kgato ya pele. Ka morago ga fao, tshepetšo ya phodišo e a thoma. Le ge go ka ba boima go swaragana le maikwelo a fapanego a bohloko, e ba le nnete ya gore ge o dira Modimo karolo ya leeto le, o tla go kgontšha e se fela go swaragana le yona, eupša go tšwelela o le yo maatla le bohlale ka lehlakoreng le lengwe. Mo fe sebaka go lwa legatong la gago – o ka se itshole ka seo!

Mmadi wa 2: “Ke dirile diphošo tše ntši bophelong bja ka gomme ke ipoletše go Modimo. Ke nagana gore Modimo o ntebaletše, le ge go le bjalo, ka dinako tše dingwe ke sa ipona molato le go katana le go itebalela. Naa o na le keletšo le ge e le efe?”

Ge re ipolela dibe tša rena ka pelo e hlwekilego pele go Modimo, o a re lebalela le go se nagane ka dibe tša rena. Go Pesalome 103:12 re bala gore: Bjalo ka ge bohlabela bo tlogelane le bodikela, le rena o re tlogelanya le dibe tša rena. Gomme go Jesaya 44:22, Modimo o re: “Ke fedišitše bokgopo bja lena bjalo ka kgodi, le dibe tša lena bjalo ka leru. Boelang go nna ka gobane ke nna ke le phološitšego.”

Se letele boikwelo bja go ikgetha pelong ya gago go tseba gore o lebaletšwe. E ba le tumelo le go tshepha lentšu la Modimo. Go tseba gore o lebaletšwe, go tliša tokologo le lethabo pelong ya gago. Lenaba ga le rate se gomme le tla dira se sengwe le se sengwe maatleng a lona go go gopotša ka mehla diphošo tša gago tša nakong e fetilego. Ge se, ka gona, se direga gape, e ba le tumelo le go mo gopotša gore Jesu o šetše a fentše sefapanong: “Ge le ka lokollwa ke Morwa wa Modimo, gona le tla lokologa ka nnete” (Johanese 8:36). Tlogela go ipona molato ka morago gomme o sepele ka tokologo le lethabo go bokamoso bja gago!

Mmadi wa 3: “Ke rapela bjang gore Modimo a nolofatše pelo e thata ya motho go nna?”

Modimo o kgona go thatafatša le go nolofatša pelo ya motho. Re bone ka Farao le Baisraele nakong ya mauba a lesome kua Egepeta. Go Diema 21:1 re bala gape gore: Morena o laola monagano wa kgoši bjalo ka ge a laola moela wa meetse, a o lebiša mo a ratago gona. Gomme go Hesekiele 36:26, Modimo o re: “Ke tla le fa dipelo tše mpsha le menagano ye mefsa. Ke tla le amoga dipelo tša lena tše thata ka le fa dipelo tše boleta.”
Ge motho, ka gona, a na le sekgopi kgahlanong le wena, rapela gore Modimo, ka Moya wa gagwe wo Mokgethwa, a šome legatong la gagwe, a nolofatše pelo ya motho yoo le go fetoša boitshwaro bja gagwe go wena, le go boemo bjoo. Gopola, Modimo o tseba motho yoo go feta wena. O ka kgopela yena bohlale go ka šomiša mantšu a maleba nakong ya maleba, go rarolla bothata. Ka mehla o tseba bokaone.