Dira phapano – Letšatši la 20

Bjale ge, tlogelang bobe bjohle le maaka ohle le boikaketši bjohle le mona wohle le lesebo lohle. 1 Petrose 2:1

Boemo bja Modimo go batho ba gagwe maemong ka moka, ka dinako ka moka, ke lerato. Ke eng se se dirago gore motho a furalela seo? Mohlomongwe go itokafatša bjo bo bakago boikaketši?

Ge e ba o motšwasehlabelo wa lesebo, mona, boikaketši goba bofora, o tla tseba gore lerato ga le sepedišane le sebe. Temaneng, Petrose o botša babadi ba gagwe go fediša dibe tše maphelong a bona, tšeo Modimo a šetšego a di ileditše go Melao ye Lesome.

Nagana ka boemo bjo bobe bja mosadi yo a hwetšwago a otsa: batho ba babedi ba hwetšwa ba radia balekani ba bona. Sehlopha sa batho ba badumedi ba tliša o tee go Jesu gore a mo ahlole, eupša ba šetše ba mo ahlotše gomme ba nyaka go mo kgatla ka mswika; le ge go le bjalo, ga ba na taba le yo mongwe. (Mohlomongwe ba tla mo kganyoga ka morago goba go mo seba?) Eupša, Jesu o bea boikaketši bja bona nyanyeng gomme a fetoša teko ya bona kgahlanong le bona: yo a se a dirago dibe e be wa pele wa go mo kgatla ka maswika. Re ka be re eme kae?

Ka moka re na le molato wa go dira dibe tša go fapafapana gomme re be re tla sepela bjalo ka bona, ge re botšišitšwe. Le ge go le bjalo, go tlogela bofora le boikaketši go boima, ka gobane lefase le bušwa ke “tatago maaka” (Johanese 8:44) gomme bokagare bja bophelo bja rena ke “menagano ya motho e radia go feta tšohle, ke ye kgopo” (Jeremia 17:9). Eupša ge o ka lemoga lenaba le bothata, o ka e lweša! Se ke kgato ye botse ya kgolo, yeo e re neago monyetla wa go matlafatša boemo bja rena kgahlanong le diabolose. Gomme re na le thekgo ya Moya yo a re “lokollago molaong wa sebe le lehu” (Baroma 8:2).

Ge e ba re yo dira phapano, re swanetše re be le nnete ye e feletšego go rarolla bothata bjo. Gantši, ge re phela go ya ka maemo a rena. Go tloga ka maaka a pele, motho o lwele le go se botege ka poifo ya kotlo, boikgogomošo goba go šireletša motho yo mongwe; eupša bjale, re hloka go ikaroganya gomme re se be baikaketši bao ba naganago gore re ka dira tše fošagetšego, eupša ra ahlola ba bangwe.

Jesu o tla re lokolla go tše ka moka. Gomme,boikarabelo bja rena ke go ba kgole le selo sefe goba sefe se se re lekago gape, gaešita le ge se etla ka dilo tše tlwaelegilego, tšeo di bonalago di sa gobatše bjalo ka papatšo, thelebišene, mekero ya poledišano inthaneteng goba selo sefe goba sefe. Itsebe le go tseba mafokodi a gago.

Diema 12:22 e re: “Morena o šišingwa ba ba bolelago maaka, ba ba tshephegago bona o a ba thabela.” A re mo hlompheng ka mo go feletšego go se le go rapela le Dafida, “Modimo, hle, mpopele pelo ye e hlwekilego, mme o ntsenye moya wo mofsa wa potego.” (Pesalome 51:10)