Dibe tša batho ba naga ya Juda le kotlo ya bona
1“Sebe sa batho ba naga ya Juda se ngwadilwe ka tshipi; se tlokilwe ka ntlha ya taamane dipelong tša bona le manakaneng a dialetare tša bona. 2Le bana ba bona ba sa gopola dialetare tša bona le dikota tša borapedi tše di lego kgauswi le mehlare ye metala mebotong ya go phagama 3le dithabeng kua nageng. Ke tlilo dira gore le thopelwe mahumo le matlotlo ohle ka lebaka la dibe tše le di dirilego nageng ka moka ya lena. 4Le tla swanela go tlogela naga ye ke le filego yona, molato e le wa lena, gomme ke tla dira gore le hlankele manaba a lena nageng ye le sa e tsebego, gobane le kgohleditše pefelo ya ka ya tuka bjalo ka mollo, gomme e tla tukela sa ruri.”
Ditaba tše di fapafapanego
5Morena o re:
“Morogakwa ke yo a botilego batho,
yo a botilego maatla a motho wa nama,
ke yo a mphuralelago, nna, Morena.
6O swana le mohlašana leganateng,
wo o melago lesehleng la lešoka,
tswaing, mo go sa dulego motho;
ga a na le mahlatse.
7“Go lehlogonolo yo a botilego nna, Morena,
yo a ithekgilego ka nna.
8O bjalo ka mohlare wo o bjetšwego kgauswi le moela,
wo medu ya wona e nabelago meetseng.
Ga o tšhoge phišo,
gomme matlakala a wona a dula e le a matala;
le ka ngwaga wa komelelo ga o tshwenyege,
ga o lese go enywa.
9“Menagano ya motho e radia go feta tšohle,
ke ye kgopo; e ka kwešišwa ke mang?
10Ke nna, Morena,
ke lekolago menagano,
ke hlahlobago dipelo tša batho,
gore ke putse motho yo mongwe le yo mongwe
ka se se mo lebanego,
go ya ka tšeo a di dirago.”
11Motho yo a ikhweletšago mahumo ka boradia
o swana le kgwale ye e thwathwašago mae ao a sego a bewa ke yona.
O tla loba mahumo a gagwe e sa le yo mofsa,
gomme a feletša e le lešilo.
12Setsha sa Tempele ya rena se swana le setulo sa kgoši se se phadimago,
seo e sa lego se bewa bophagamong go tloga mathomong.
13Morena, wena Mmotwa wa Baisraele,
bohle ba ba go tlogelago o a ba swabiša.
Ba ba go furalelago ba tla hwelela bjalo ka maina a a ngwadilwego mobung,
ka ge ba tlogetše wena, Morena,
mothopo wa meetse a a phedišago.
Jeremia o kgopela thušo go Morena
14Morena, mphodiše, gomme ke tla fola;
mphološe, gomme ke tla phologa.
Ke wena ke go retago!
15Batho ba re go nna: “A kae matšhošetši ale a Morena? A a a tliše!”
16Eupša ga se nke ke go hlohleletše gore o ba tlišetše masetlapelo. Ga se ka ba lakaletša nako ye ya go itlhoboga. Morena, seo se tsebja ke wena; o tseba se ke se boletšego. 17O se ke wa ntšhoša; ge masetlapelo a etla ke wena botšhabelo bja ka. 18O swabiše bantlhomari, e sego nna. A go tšhoge bona, e sego nna. O ba tlišetše masetlapelo, o ba otle o be o ba boeletše.
Go hlompha Sabatha
19Morena a re go nna: “Eya o eme Lesorong la Setšhaba, leo magoši a Juda a tsenago gape a tšwago ka lona; go tloga moo o ye masorong a mangwe a Jerusalema. 20O botše magoši le batho bohle ba Juda le badudi bohle ba Jerusalema ba ba tsenago ka masoro a gore ba theeletše se ke se bolelago. 21O ba botše gore ge eba ba rata go phela ba se ke ba rwala morwalo ka letšatši la Sabatha, goba ba tsena nawo ka masoro a Jerusalema, 22goba ba tšwa ka dintlong tša bona ba rwele selo ka letšatši la Sabatha. Ba se ke ba šoma ka letšatši la Sabatha; ba le hlomphe e le letšatši le lekgethwa, bjalo ka ge ke ile ka laela borakgolokhukhu ba bona. 23Borakgolokhukhu ba bona ba ile ba se ntheeletše, ba se ntshekegele tsebe. Bona ba ile ba ngangabala, ba se ntlhomphe, ba gana go kgalwa ke nna.
24“Ge setšhaba se se ka tloga se ntlhompha, ba se tsene ka masoro a motse ba rwele morwalo ka letšatši la Sabatha, ba hlompha Sabatha e le letšatši le lekgethwa, gomme ba se dire mošomo ofe le ofe, 25ke gona magoši le bakgomana ba ba bušago e le ditlogolo tša Dafida ba tlago tsena ka masoro a motse wo. Ba tla namela dikoloi tša ntwa gotee le batho ba Juda le badudi ba Jerusalema, ba namela le dipere, gomme motseng wo wa Jerusalema go tla dula go na le batho. 26Batho ba tla tla ba etšwa metseng ya Juda le tikologong ya Jerusalema; ba tla tšwa nageng ya Benjamene, le nagengtlase, le seleteng sa dithaba, le seleteng sa ka borwa se se omilego. Ba tla tliša dihlabelo tša go tšhungwa ka moka le dihlabelo tše dingwe, le dikabelo tša bupi le diorelo, le tšona dikabelo tša tebogo kua Tempeleng ya ka. 27Eupša ge ba ka se ntheeletše, ba se hlomphe Sabatha e le letšatši le lekgethwa, ba tsena ka masoro a Jerusalema ba rwele morwalo ka letšatši leo, ke tla gotša mollo wa hloka motimi masorong a Jerusalema, wa fiša dintlo tša mošate mo motseng.”
