DIEMA 12

₁Yo a ratago go kgalwa ke yo a ratago go tseba;

yo a ganago go kgalwa yena ke setlatla.

₂Morena o kgahlwa ke moloki,

wa go loga maanomabe yena o a mo tšwa.

₃Bokgopo ga bo lote motho,

boloki bjona bo na le tšhireletšo.

₄Mosadisadi ke seala sa monna wa gagwe;

wa go leša monna wa gagwe dihlong yena ke bolwetši bo jago monna marapo.

₅Baloki ba rera tša go loka,

bakgopo bona ba rera tša boradia.

₆Polelo tša bakgopo di a bolaya,

tša baloki tšona di a phološa.

₇Bakgopo ba a fedišwa ya ba moka,

malapa a baloki ona a dula a le gona.

₈Rabohlale o retelwa bohlale bja gagwe,

rapelompe yena sa gagwe ke go nyatšwa.

₉Monyatšegi wa go ba le lekgoba o phala moiponi wa go hloka dijo.

₁₀Moloki o hlokomela diruiwa tša gagwe,

yo kgopo yena ga a na taba le tšona.

₁₁Moitemelatšhemo o bolaya mabele,

molatamafeela yena o itlhokiša tlhaologanyo.

₁₂Bakgopo ba nyaka fela go dira tše mpe,

baloki bona ga ba šikinyege.

₁₃Yo kgopo o tanywa ke polelo tša gagwe tše mpe,

moloki yena o intšha mathateng.

₁₄Motho o atlega ka tše a di bolelago;

o boelwa ka tše a di dirago.

₁₅Lešilo le gopola gore le dira tše di nepagetšego,

yo bohlale yena o kwa dikeletšo.

₁₆Lešilo le bontšha go ngala ka pela,

yo bohlale yena o nyatša maroga.

₁₇Hlatse ye e tshephegago e bolela bohlatse bja nnete,

ya maaka yona e bolela bohlatse bja bofora.

₁₈Polelo ya yo a sa kgethego mantšu

e ka gobatša motho bjalo ka tšhoša,

ya yo bohlale yona e a fodiša.

₁₉Therešo ke ya go ya go ile,

maaka ona ga a swarelele.

₂₀Pelong tša ba ba logago maanomabe go letše boikaketši,

badiraleago bona ba na le lethabo.

₂₁Baloki ga ba hlagelwe ke se sebe,

bakgopo bona ba welwa ke masetlapelo a mantši.

₂₂Morena o šišingwa ba ba bolelago maaka,

ba ba tshephegago bona o a ba thabela.

₂₃Go yo bohlale tsebo ke thopa,

ditlatla tšona di phatlalatša bošilo bja tšona.

₂₄Ba ba kalokanago ba tla buša,

dibodu tšona e tla ba makgoba.

₂₅Mathata a imela motho,

mantšu a botho ona a a mo thabiša.

₂₆Moloki o hlahla wa gabo tseleng,

bakgopo ya bona tsela e a ba timetša.

₂₇Sebodu ga se hwetše seo se se nyakago,

yo a katanago yena o ikhweletša lehumo le legolo.

₂₈Go phetha thato ya Modimo ke tsela ya go iša bophelong,

go kgeloga gona go iša lehung.