Diensbaarheid, nederigheid en die vrug van die Gees – Dag 21

Alle goeie verhoudings word gebou op getrouheid. ʼn Vrou en ʼn man wat getrou is aan mekaar is noodsaaklik vir ʼn goeie huwelik. In ʼn goeie vriendskap is mense getrou aan mekaar. Goeie werksverhoudings vind plaas wanneer kollegas mekaar kan vertrou. Getrouheid is ook noodsaaklik in ons verhouding met God.

Ons verwys dikwels na die getrouheid van God. Wanneer ons ʼn reënboog sien word ons daaraan herinner dat Hy getrou is en sy beloftes sal hou. Maar wat van ons eie getrouheid? Behalwe vir vandag se teksvers uit Openbaring is daar baie Skrifgedeeltes wat ons daarop wys dat ons getrou moet wees: 1 Korintiërs 4:1-2 herinner ons dat ons getroue dienaars van Christus moet wees, Efesiërs 6:21 verwys ook na getroue dienaars en in 1 Timoteus 5:9 word daar na getrouheid in die huwelik verwys.

Getrouheid – om altyd op God te vertrou – word dikwels gesien as iets wat ons doen. Baie mense dink aan getrouheid as ʼn sinoniem vir vasberadenheid, ʼn gesindheid wat ons kan aanleer eerder as ʼn produk van die Gees van God wat in ons woon. Paulus maak dit egter duidelik dat getrouheid ʼn geskenk van die Heilige Gees is. Die Heilige Gees wat in ons kom woon wanneer ons ons sondes bely en tot bekering kom, verander ons karakter van binne en maak ons getrou.

Dit is slegs deur die Heilige Gees dat ons oor die liefde, vreugde, vrede, geduld, vriendelikheid en goedhartigheid kan beskik wat ons as Christene behoort te hê. Net so is dit net deur die Heilige Gees dat ons die soort getrouheid kan hê wat ons in staat stel om volkome op God te vertrou, Hom te gehoorsaam en om altyd, wanneer ons verkeerd doen, ons sondes teenoor Hom te bely.