Leviatan

Leviatan is die naam van die seemonster wat aan die begin van die skepping deur God verslaan is (Psalm 74:14). Hierdie draak of slang simboliseer die Oersee en die magte van chaos. In die apokaliptiese literatuur word gesê dat die draak aan die einde van die tyd weer gaan losbreek, maar dat God dit dan vir eens en altyd gaan verslaan (Jesaja 27:1).

Daar is ʼn soortgelyke seemonster in die Ou Testament met die naam Ragab.

In Job 40:25 – 41:25 is daar ʼn uitvoerige beskrywing van Leviatan. Vir lank is aanvaar dat Leviatan in hierdie teks nie ʼn monster was nie, maar ʼn krokodil. Dit word egter uit die beskrywing duidelik dat ons in hierdie hoofstukke ook te make het met ʼn mitologiese monster (sien Job 41:11-13).