Bible Society of South Africa
Izinhlelo zokufunda
To The Word – Bible Reading Challenge
To The Word – Day 135

To The Word – Day 135

Titus 1–3, Psalm 16, Proverbs 12

Um(Imi)bhalo weBhayibheli

KuThithu 1

Isibingelelo

1UPawulu, inceku kaNkulunkulu nomphostoli kaJesu Kristu ngokokukholwa kwabakhethiweyo bakaNkulunkulu nangokokwazi iqiniso elingokokukhonza uNkulunkulu, 2ethembeni lokuphila okuphakade uNkulunkulu ongaqambi amanga akwethembisa phambi kwezikhathi zaphakade, 3kepha ngesikhathi esifaneleyo ubonakalisile izwi lakhe entshumayelweni engayiphathiswayo ngokomyalo kaNkulunkulu uMsindisi wethu, 4kuThithu, umntanami ngempela ngokokukholwa esikuhlanganyele sonke: Makube kuwe umusa nokuthula okuvela kuNkulunkulu uBaba nakuKristu Jesu uMsindisi wethu.

UPawulu ukhumbuza uThithu ngomsebenzi eKrethe wokuhlela amabandla nokulwa nabafundisi bamanga

5Ngakushiya eKrethe ngenxa yalokhu ukuba uhlele okusaseleyo, umise amalunga emizini yonke, njengokuba ngakuyala, 6uma kukhona ongasolekiyo, indoda emfazi munye, enabantwana abakholwayo abangenakusolwa ngokushinga nabangalaleliyo. 7Ngokuba umbonisi umelwe ukuba abe ngongasolekiyo njengomphathimuzi kaNkulunkulu, ongaziqhenyi, ongesiso isififane, ongesiso isiphuzi, ongesiso isilwi, ongesiye ohahela inzuzo embi, 8kepha ophatha kahle izihambi, othanda okuhle, oqondileyo, olungileyo, ongcwele, ozithibayo, 9obambelele ezwini elithembekileyo ngokwesifundiso, aze abe nakho nokuyala ngesifundiso esiphilileyo nokwahlula abaphikayo. 10Ngokuba baningi abangalaleliyo abakhuluma ize, nabakhohlisayo, ikakhulu abokusoka, 11abamelwe ukuthuliswa, abachitha indlu iphela, befundisa okungafanele ngenxa yenzuzo embi. 12Omunye kubona, umprofethi wakubo, washo wathi:

“AbaseKrethe bangabaqambimanga njalo,

izilwane ezimbi,

iziminzi ezivilaphayo.”

13Lobo bufakazi buqinisile. Ngalokho-ke ubayalisise, ukuze baphile ekukholweni, 14benganaki izinganekwane zabaJuda nemiyalo yabantu abafulathela iqiniso. 15Kwabahlanzekileyo konke kuhlanzekile; kepha kwabangcolileyo nabangakholwayo akukho lutho oluhlanzekileyo, kodwa kungcole ingqondo yabo nonembeza wabo. 16Bavuma ukuthi bayamazi uNkulunkulu, kepha bayamphika ngemisebenzi yabo bengabenyanyekayo, nabangalaleliyo, nasemisebenzini yonke emihle kabasizi lutho.

KuThithu 1ZUL59NOVula kumfundi weBhayibheli

KuThithu 2

UThithu ufanele ukukhombisa abezimo zonke ukuba bazamele ukuhamba okungcwele

1Kepha wena khuluma lokhu okufanele isifundiso esiphilileyo 2sokuthi: Amadoda amadala mawabe ngazithibayo, azothileyo, aqondileyo, aphilile ekukholweni, nasothandweni, nasekubekezeleni; 3kanjalo nabesifazane abadala baziphathe ngokufanele abangcwele, bangabi ngabahlebi, bangabi yizigqila zewayini eliningi, babe ngabafundisi bokuhle, 4ukuze bafundise abesifazane abasha ukuthanda amadoda abo, bathande nabantwana babo; 5babe ngabaqondileyo, abamhlophe, abaphatha kahle amakhaya, abamnene, abathobela amadoda abo ukuba izwi likaNkulunkulu lingahlanjalazwa.

6Ngokunjalo ubayale abesilisa abasha ukuba babe ngabaqondileyo, 7uzibonakalise kukho konke ube yisibonelo semisebenzi emihle, nasekufundiseni kwakho ubonakalise ukungonakali, ube nesizotha, 8ukhulume okuqondileyo okungasolekiyo, ukuze omelana nathi abe namahloni, engenalutho olubi angalukhuluma ngathi.

9Yala izinceku ukuba zithobele amakhosi azo, zikholeke ezintweni zonke, zingaphiki nkani, 10zingantshontshi, zibonakalise konke ukwethemba okuhle, ukuze zihlobise isifundiso sikaNkulunkulu uMsindisi wethu ezintweni zonke.

11Ngokuba umusa kaNkulunkulu wokusindisa ubonakalisiwe kubantu bonke; 12uyasifundisa ukuba sidele ukungakholwa nezinkanuko zezwe, sihambe ngokuqonda, nangokulunga, nangokumesaba uNkulunkulu kulesi sikhathi samanje, 13sibheke ithemba elibusisiweyo nokuvela kwenkazimulo kaNkulunkulu omkhulu noMsindisi wethu uJesu Kristu 14owazinikela ngenxa yethu, ukuze asihlenge ebubini bonke, asihlambulule isizwe esingesakhe, sishisekele imisebenzi emihle.

15Khuluma lokho, uyale, ukhuze ngamandla onke. Ungadelelwa muntu.

KuThithu 2ZUL59NOVula kumfundi weBhayibheli

KuThithu 3

Ukulalela amakhosi

1Bakhumbuze ukuba bathobele ababusi neziphathimandla, balalele, balungele imisebenzi yonke emihle, 2bangahlambalazi muntu, bangabi yizilwi, babe ngabavileyo, bebonakalisa ubumnene obukhulu kubantu bonke.

3Ngokuba nathi kade sasiyiziwula, abangalaleliyo, abadukiswayo, sikhonza izinkanuko nokutamasa okuyizinhlobonhlobo, sihlezi ebubini nangomhawu, sizondekile sizondana. 4Kepha lapho sekubonakalisiwe ububele bukaNkulunkulu uMsindisi wethu nothando lwakhe kubantu, 5wasisindisa kungengamisebenzi yokulunga esayenzayo thina kepha ngokwesihawu sakhe ngesigezo sokuphindukuzalwa nokwenziwa sibe basha ngoMoya oNgcwele, 6amthelayo kakhulu phezu kwethu ngaye uJesu Kristu uMsindisi wethu, 7ukuze silungisiswe ngomusa wakhe, sibe yizindlalifa zokuphila okuphakade ngokwethemba.

Xwaya izifundiso zamanga

8Lithembekile leli zwi. Ngithanda ukuba uqinise impela ngalezo zinto, ukuze abakholwa nguNkulunkulu bakhuthalele ukwenza imisebenzi emihle. Lezo zinto zinhle, zinosizo kubantu; 9kepha gwema imibuzo yobuwula, nezindaba zolibo lokuzalana, nokubanga nokuphikisana ngomthetho; ngokuba lokho akusizi, kuyize. 10Umuntu onezifundiso ezidukisayo, eselulekwe kanye nakabili male, 11wazi ukuthi onjalo uphambukile, uyona, ezahlulela yena.

Isigcino

12Nxa sengithuma u-Arethema noma uThikhiku kuwe, woshesha ukuza kimi eNikopholi; ngokuba nginqumile ukuthi ngizakuhlala lapho ubusika. 13UZena, ummeli, no-Apholo wobahambisa ngokunakekela, bangasweli lutho. 14Nabakithi mabafunde ukukhuthalela imisebenzi emihle njengokuswelekileyo, ukuze bangabi ngabangenazithelo.

15Bonke abanami bayakhonza kuwe. Khonza kwabasithandayo ekukholweni.

Umusa mawube nani nonke.

KuThithu 3ZUL59NOVula kumfundi weBhayibheli

Ihubo 16

Umkhuleko wongcwele kaNkulunkulu

IMiktamu* likaDavide.

1Ngilondoloze, Nkulunkulu,

ngokuba ngiyaphephela kuwe.

2Ngithi kuJehova: “Wena uyiNkosi yami;

anginakho okuhle ngaphandle kwakho.”

3Abangcwele abasemhlabeni,

abayizikhulu, yonke intokozo yami ikubona.

4Ziningi izinhlupheko zabazizuzela omunye unkulunkulu;

angiyikunikela ngeminikelo yabo yegazi;

angiyikuwaphatha amagama abo ngezindebe zami.

5UJehova uyisabelo esahlukaniselwe mina,

nendebe yami;

wena uqinisa ifa lami.

6Izabelo zingehlele ezindaweni ezinhle,

yebo, nginalo ifa elihle.

7Ngiyakumbonga uJehova ongilulekayo;

nasebusuku izinso zami ziyangiyala.

8Ngimbeke uJehova njalo phambi kwami,

ngokuba ungakwesokunene sami,

angiyikuzanyazanyiswa.

9Ngakho-ke inhliziyo yami iyajabula,

nomphefumulo wami uyethaba,

nenyama yami iyakuhlala ngokwethemba.

10Ngokuba awuyikunikela umphefumulo wami endaweni yabafileyo;

awuyikuvuma ukuba ongcwele wakho abone ukubola.

11Uyakungazisa indlela yokuphila;

ukugcwala kwenjabulo kusebusweni bakho;

intokozo isesandleni sakho sokunene kuze kube phakade.

Ihubo 16ZUL59NOVula kumfundi weBhayibheli

IzAga 12

1Othanda ukulaywa uthanda ukwazi;

ozonda ukusolwa uyisiwula.

2Omuhle uthola umusa kuJehova,

kepha umuntu wamacebo uyamlahla.

3Umuntu akanakuma ngobubi,

kepha impande yabalungileyo ayiyikunyakaziswa.

4Owesifazane okhutheleyo ungumqhele kuyo indoda yakhe,

kepha ohlazisayo unjengokubola kwamathambo ayo.

5Imicabango yabalungileyo ingeyokwahlulela,

kepha iziluleko zababi ziyinkohliso.

6Amazwi ababi aqamekela igazi,

kepha umlomo wabaqotho uyabophula.

7Ababi bayachithwa, bangabikho,

kepha indlu yabalungileyo iyakuma.

8Umuntu uyadunyiswa ngokokuhlakanipha kwakhe,

kepha ophambene ngenhliziyo uyadelelwa.

9Odelelwayo eyinceku udlula ozidumisayo eswele ukudla.

10Olungileyo uyakunaka ukuphila kwesilwane sakhe,

kepha isihhe sababi silunya.

11Olima insimu yakhe uyakusutha ngokudla,

kepha olandela amayiyane akanangqondo.

12Ishinga lifisa impango yababi,

kepha impande yabalungileyo iyathela.

13Ngokuphambeka kwezindebe kukhona ugibe lomubi,

kepha olungileyo uyaphuma ekuhluphekeni.

14Umuntu uyasutha ngokuhle ngesithelo somlomo wakhe,

nemisebenzi yezandla zomuntu iyabuyela kuye.

15Indlela yesiwula ilungile emehlweni aso,

kepha ohlakaniphileyo ulalela iziluleko.

16Ukukhathazeka kwesiwula kuyaziwa ngosuku,

kepha oqondileyo uyasibekela ihlazo.

17Ophefumula iqiniso ulanda ngokulunga,

kepha ufakazi wamanga ngenkohliso.

18Bakhona abaphahluka njengokuhlaba kwenkemba,

kepha izilimi zabahlakaniphileyo ziyimpiliso.

19Indebe yeqiniso iyakuma kuze kube phakade,

kepha ulimi lwamanga lungolomzuzwana nje.

20Inkohliso isezinhliziyweni zabaceba okubi,

kepha abaluleka ukuthula,

kubona kukhona intokozo.

21Olungileyo akayikwehlelwa nangokukodwa okubi,

kepha ababi bayakugcwala ububi.

22Izindebe zamanga ziyisinengiso kuJehova,

kepha abenza iqiniso bayintokozo yakhe.

23Umuntu oqondileyo uyafihla ukwazi,

kepha izinhliziyo zeziwula zimemeza ubuwula.

24Isandla sabakhutheleyo siyakubusa,

kepha izidenge ziyakuphoqelwa umsebenzi.

25Ukukhathazeka enhliziyweni yomuntu kuyayithobisa,

kepha izwi elihle liyayithokozisa.

26Olungileyo ungumholi womakhelwane wakhe,

kepha indlela yababi iyabadukisa.

27Isidenge asiyosi inyamazane yaso,

kepha imfuyo enqabileyo ingeyokhutheleyo.

28Endleleni yokulunga kukhona ukuphila,

nalapho umkhondo wakho udlula khona, akukho ukufa.

IzAga 12ZUL59NOVula kumfundi weBhayibheli
Bible Society of South Africav.4.26.9
SITHOLE KU