Ihubo 16

₁Ngilondoloze, Nkulunkulu,

ngokuba ngiyaphephela kuwe.

₂Ngithi kuJehova: “Wena uyiNkosi yami;

anginakho okuhle ngaphandle kwakho.”

₃Abangcwele abasemhlabeni,

abayizikhulu, yonke intokozo yami ikubona.

₄Ziningi izinhlupheko zabazizuzela omunye unkulunkulu;

angiyikunikela ngeminikelo yabo yegazi;

angiyikuwaphatha amagama abo ngezindebe zami.

₅UJehova uyisabelo esahlukaniselwe mina,

nendebe yami;

wena uqinisa ifa lami.

₆Izabelo zingehlele ezindaweni ezinhle,

yebo, nginalo ifa elihle.

₇Ngiyakumbonga uJehova ongilulekayo;

nasebusuku izinso zami ziyangiyala.

₈Ngimbeke uJehova njalo phambi kwami,

ngokuba ungakwesokunene sami,

angiyikuzanyazanyiswa.

₉Ngakho-ke inhliziyo yami iyajabula,

nomphefumulo wami uyethaba,

nenyama yami iyakuhlala ngokwethemba.

₁₀Ngokuba awuyikunikela umphefumulo wami endaweni yabafileyo;

awuyikuvuma ukuba ongcwele wakho abone ukubola.

₁₁Uyakungazisa indlela yokuphila;

ukugcwala kwenjabulo kusebusweni bakho;

intokozo isesandleni sakho sokunene kuze kube phakade.