Tšwela pele ka ntle le poifo – Letšatši la 14

[Mo ke bopaki go tšwa go babadi ba rena mo mengwageng.]

Mmadi wa 1, Rika: “Ke intastering ya IT. Moragonyana ke šišintše gore re tlogele moabi wa tirelo re ye go yo mongwe. Se ke tshepetšo e tseneletšego gomme ge re eya pele, go be go raragana – gomme ka thoma go belaela. Ka rapela ka yona kudu gomme letšatši le lengwe ka kwa eke Modimo o re: ‘Ga go se se ntšhitago’. Ka tšwa ka ofising ya ka le semeetseng ka ya ntle, mathuding, gomme ka neela Modimo protšeke ka thapelo. Morago ofising ka botša bašomi-gotee gore dilo ka moka di tlo atlega ka gobane di matsogong a Modimo. Go tloga ka lona letšatši leo, ke bile le khutšo ka protšeke. E sa na le ditlhohlo, eupša ga e sa le mootlwa. Maikwelo a ka a kaonafetše kudu mo e lego gore tekanyetšo ya nomoro ya bokgoni bja ka bja kolofo e ile tlase! Tumiša Morena, gobane ke Ramaatlaohle.”

Mmadi wa 2, Shivonn: “Le ge ke hweditše laesense ya ka ya go otlela ka 2009, ke be ke na le letšhogo le legolo la go otlela. Ka dinako tše dingwe ke be ke lla ge ke le tseleng. Go be go le gobe mo e lego gore ka dinako tše dingwe ke be ke nagana gore nkase fenye letšhogo le. Kgwedi ya go feta, nna le monna wa ka re rekile koloi gomme ka thoma go otlela. Lehono e be e le letšatši la ka la mathomo ke otlela go ya mošomong gomme ke ekwa bjalo ka mofenyi. Bjale ke a lemoga gore ka Modimo lehlakoreng la ka, nka fenya letšhogo le lengwe le le lengwe!”

Mmadi wa 3, Precious: “Nako ya go feta ke ile ka thoma go nyaka mošomo wa go ya go ile ka mogolo wa godimo wa go feta wo ke bego ke o hwetša go mošomo wa ka wa nakwana. Ge ke be ke phahla kuranta, ke hweditše poso lefapheng la ka ka mogolo o kaone. Ka ripa papatšo le semeetseng, ka romela kgopelo ya mošomo ya poso gomme ka gomaretša papatšo wotropong ya ka. Nako le nako ge ke e bona, ke be ke rapela gore Modimo a nkgaugele ke hwetše mošomo. Morago ga dibeke tše mmalwa ka lahlegelwa ke mošomo wa ka wa nakwana. Ke be ke maketše. Morago ga beke, ke ile ka laletšwa go tla ditekong tša mošomo khamphaning ye ke rometšego kgopelo ya mošomo go yona. Ke be ke le tseleng ya go ya gae morago ga diteko tša mošomo ge ba nteletša mogala ba botšiša gore nka thoma go šoma ka Mošupologo wo o latelago. Ke be ke sa kgaotše go tumiša Modimo. Lehono ke a tseba gore Modimo o hlahla dikgato tša ka. Mola ke sa lahlegelwa ke mošomo wa ka wa nakwana, go ka ba go bile boima go nna go ka ya ditekong tša mošomo ka ge mafelo a mabedi a le kgole le kgole. Modimo o tsebile gore ke be ke swanetše go lokollwa go mošomo wa ka wa nakwana pele kgaolo e mpsha bophelong bja ka e thoma. A go tumišwe leina la Gagwe!”

Mmadi wa 4, Tina: “Nna le monna wa ka re na le mo go nyakilego go e ba mengwaga e lesome re nyalane. Mengwaga ye seswai, re be re palela go ima. Re rapetše kudu, ra tlogela go rapela, gomme mafelelong ra lebala ka yona. Ke rapetše gape gore Modimo a ka mpha maatla a go tlogela go fola. Gomme gwa direga. Ka ima (dibeke tše lesome) gomme ka nako ya go swana ke be ke nkgela ke motšoko. Modimo o dirile mehlolo e mebedi ka mohlolo o tee! Modimo ka nnete o a botega. Ga A retwe!”

Babadi ba ba nepile. Ge re fokola, Modimo o na le maatla. Go 2 Bakorinte 12:9 Modimo o re: “Kgaugelo ya ka e go lekane, gobane maatla a ka a tiile kudu mo go ba ba fokolago.” Gomme go Jesaya 41:10 Modimo gape o bolela gore: “Le se ke la boifa – ke na le lena! Le se ke la lealea – ke nna Modimo wa lena! Ke a le tiiša, ke a le thuša, ke a le šireletša, ke le hlakodiša ka maatla a ka.”

Modimo o re theoša maswafo ge tlhohlo lefelong la mošomo e tšhošetša go re imela. O re kgontšha go fenya letšhogo le gape le gape le re šiago re lla. Ka nako ye nngwe o tswalela lemati gore A kgone go bula le lengwe le le kaone go rena le ge ka dinako tše dingwe re ka emela karabo go dithapelo tša rena mo e ka bago mengwaga e lesome, ga re a swanela go lahlegelwa ke tumelo ya rena ka gobane nako ya Modimo ka mehla e phethagetše! Modimo a go šegofatše.