Tšwela pele ka ntle le poifo – Letšatši la 13

Ge morwedi wa ka Joalé a na le mengwaga e mebedi, o be a nyaka go ja fela motepa wa mabele bjalo ka dijo tša goseng mesong e mengwe le e mengwe. Mesong o tee re be re šile ke nako gomme, ka go itlhaganela, ka oketša letswai le le ntši go motepa go feta tekanyo. Ka ge nako e be e le e nnyane, ke be ke sa kgone go ka dira motepa gape. Ka nagana gore tatso e be e se e mpe, eupša Joalé o jele fela malepola a motepa a mmalwa pele a tliša mogopo go nna a šošobantše sefahlego – a sa thabela motepa.

Mesong ya go latela, ke dirile motepa ka ntle le katlego. Joalé a se nyake le go kwa tatso – le ge o be o dirilwe gabotse gomme ka oketša swikiri go dira gore o kgahliše le go feta.

Mesong o tee, ke dirile motepa gape. Ge Joalé a ka se nyake go ja motepa, ke tla tlogela go o dira. Ke dirile motepa gore o be le tatso gomme ka bea mogopo pele ga gagwe. Pele a ka ipelaetša, ka tšea lepola, ka ngwatha motepa o mo nyenyane gomme ka le bea molomong wa gagwe gore a kwe tatso. Go bile le setu nakwana. Ke be ke letile dikeledi, eupša go e na le moo, o ile a myemyela gomme a re: “Ke kgopela o mphe gape Mma.” Mesong yeo Joalé o jele megopo e mebedi ya motepa wa mabele.

Maphelong a rena ka nako e nngwe re ba le maitemogelo a a sa thabišego. Re kwa bohloko ge tswalano ya lerato goba segwera e fela. Re kwa bohloko ka gare ga lenyalo ge molekani a itshwara ka tsela ye e sa naganelego maikwelo a yo mongwe. Goba re kgopišwa kerekeng goba lefelong la mošomo ge motho yo mongwe a re nyamiša goba go re kweša bohloko ka mantšu goba ditiro. Bjalo ka ge morwedi wa ka a be a sa nyake go ja motepa o a o ratago morago ga boitemogelo bja gagwe bjo bobe, le rena, morago ga go nyamišwa goba go kwešwa bohloko, re aga maboto goba go ipeela thoko ka maiteko a go itšhireletša go kwešeng bohloko gape.

Go kgopišwa, lega go le bjalo, go dira gore re se itemogele tše botse go tšwa go Modimo tša maphelo a rena. Theeletša mantšu a Diema 18:19: “Ngwanabomotho a kgopišwa, ga a tsenege, o feta le motse wo o ageleditšwego ka go se tsenege, wa fapana naye, o gana poelano.”

Ekaba o bjalo ka motse wo ka maboto a matlafaditšwego go go dikologa? Gopola, tebalelo e tliša tokologo maphelong a rena. E thuba maboto le go dumelela Modimo go go fa tše botsebotse tša Gagwe. Tswalano ya lerato e kaba e fedile, eupša mohlomongwe Modimo o rulaganya go go nea molekani wa maleba? Molekani wa gago a ka ba a go kwešitše bohloko, eupša go boelana le yena nako le nako go tla fediša lethabo la gago. Segwera se ka ba se fedile, eupša go ipeela thoko go tla go thibela go kopana le bagwera ba bakaone kudu bao Modimo a rulaganyago go ba romela bophelong bja gago. Ge o ka se tlogele go sola Modimo ka go kwešwa bohloko goba go nyamišwa kerekeng, o ka se tsoge o itemogetše bogona bja Gagwe bjalo ka ge Yena rerile ka wena.

Modimo o na le dithulaganyo go rena gore re atlege gomme e se go re gobatša. Mopesalome o re tše botse le kgaugelo di tla re latela matšatši ka moka a go phela ga rena. Motepa o šetše o sotšwe. O monate kudu. A re kgerešeng maboto a rena gomme re kwe tatso ya wona. Go sego bjalo, re ka hlawa ke mogopo o monate kudu! Modimo a go šegofatše.