Tšwela pele ka ntle le poifo – Letšatši la 15

Lebakeng le lengwe, Rory McIlroy e be le moraloki wa kolofo yo mokaonekaone lefaseng ka bophara. Lega go le bjalo, se ka mahla se be se se bjalo. Ka 10 Moranang 2011, moraloki wa kolofo wa mengwaga ye 22 o be a etile pele le go ba mmamoratwa go ka thopa sefoka ka letšatši la gagwe la mafelelo la (U.S.) Masters Tournament kua Augusta — thonamente ya gagwe e kgolo ya mathomo. Eupša kgateletšego ya monagano le kgagamalo tša atlega. A lahlegelwa ke tlhokomedišišo gomme a kgona go bapiša raonte e mpe kudu historing ya thonamente. Go bile kgobošo ya phatlalatša mo e lego gore bagaši ba dipapadi ba bantši ba ile ba ipotšiša gore McIlroy o tla boela a raloka kolofo gabotse.

Dikgwedi tše pedi morago, lega go le bjalo, McIlroy o makaditše baswaya-diphošo ba gagwe ge a thopa thonamente ya kolofo ya U.S. Open Championship ka rekhoto ya ka tlase ga palo ya distrouku tše 16. Lekga le, o kgahlile lefase la kolofo gomme bagaši ba dipapadi ba thoma go mmitša “Tiger Woods” o moswa wa papadi ya kolofo.

Ke eng se se thušitšego McIlroy go ka lwa morago ga pontšho ya gagwe ya go makatša kua Augusta? O arabile potšišo ye go sengwalwa: “Morago ga Augusta ke boletše le batho ba mmalwa gomme ka lemoga gore ke be ke tsepeletše kudu go letšatši la makgaolakgang. Ke robetše letšatši pele ga letšatši la makgaolakgang ke nagana ka makgaolakgang le go tsoga ke nagana ka seo se kago se direge gabotse. Seo se dirile gore ke tšhoge kudu.”

Lehono, McIlroy o fetotše leano la gagwe kudu: “Morago ga go betha kolofo ke tsepelela go dilo tše dingwe gomme ka bolela le mothuši wa ka ka filimi ye ke e bogetšego bošego bja go feta goba papadi ya kgwele ya maoto. Ke feela ge ke batamela kolofo mo ke thomago go tsepelela gape. Ka tsela ye ga ke be le nako ya go nagana ka seo se kago se direge gabotse. Se ka moka ke nago le nako ya sona ke go nagana ka go betha kgwele. Ke gopola fao e swanetšego go ya gona, gomme ka ntšha molangwana wa ka wa go betha kgwele ka mokotleng wa ka gomme ka betha kgwele.”

Mantšu a McIlroy a dirile gore ke lemoge gore rena, bjalo ka dibapadi tša tsebo, re ka wela gabonolo molabeng wa go tsepelela kudu go tšeo di ka se diregego gabotse, moo re kago balabala goba go phela ka letšhogo. Go Baefeso 6:11, Paulose o re gopotša go itlhama ka dihlabani tša Modimo letšatši le letšatši: “Itlhameng ka dihlabani tšohle tše Morena a le fago tšona gore le kgone go iphahlela bomenemene bja Diabolose.” Gomme go Baefeso 6:17 re bala gore: “Le amogele phologo ye e lego mpho ya Modimo; e tla le šireletša boka kefa ya tshipi.” Go Baroma 12:2 re bala gore: “Le se swantšhe mekgwa ya lena le ya batho ba mo lefaseng, le upše le dumelele Modimo gore a le fetoše ka go le mpshafatša dikgopolong. Ke mo le tlago tseba se e lego thato ya gagwe se se lokilego, se se mo kgahlago, se se feletšego.” Gomme go Bafilipi 4:8 Paulose o nea keletšo ye re kago nagana ka yona: “… tšohle tše e lego tša nnete, tšohle tše di tumišegago, tšohle tše e lego tša go loka, tšohle tše di hlwekilego, tšohle tše di kgahlišago, tšohle tše di dirago gore motho a retwe – a ke re tšohle tše di dirago gore motho e be mothomotho mme a tumišwe ke batho – tšeo ke tšona tše le swanetšego go dula le di nagana.”

Ekaba o dumelela dikgopolo tše mpe go go nola moko goba o ka kgona go bona ka gare ga leihlo la kgopolo ka tumelo ka fao Modimo a bušetšago lenyalo la gago maemong a lona, a go kgontšhago go ka reka ntlo ye e lego ya gago, ka fao ngaka a rego o phetše gabotse mmeleng, ka fao o bonago methaladi e mebedi go teko ya go ima morago ga mengwaga ya thapelo, goba ka fao o sepelago tsejaneng ka letšatši la gago la lenyalo go motho wa go ikgetha yo Modimo a go kgethetšego yena?

Se re se gopolago maphelong a rena (se sebotse goba se sebe) e tla feleletša e le nnete. Gomme re ka, bjalo ka McIlroy kua Augusta, ba le papadi e mpe ya kolofo historing ya thonamente goba re ka thopa sefoka ka tlase ga palo ya distrouku tše 16. Modimo a go šegofatše!