To The Word – Day 82

₁Ge Dafida a theogile thaba gannyane, ka bjako a gahlanetšwa ke Tsiba, mohlanka wa Mefiboshete, yo a bego a gapa dipokolo di se kae tše di rwelego dinkgwa tše makgolo a mabedi, le diphaphathi tše lekgolo tša makwapi a diterebe, le tše lekgolo tša dienywa tša selemo, le lekuka la beine. ₂Kgoši Dafida a mmotšiša a re: “A o ile go dira eng ka dilo tše ka moka?”

Tsiba a mo fetola a re: “Dipokolo tše di tla namelwa ke ba lapa la kgoši; ge e le dinkgwa le dienywa tšona e tla ba dijo tša banna ba gago, mme beine ya ba ya batho ba ba ka lapago kua lešokeng.”

₃Kgoši a mmotšiša a re: “Mefiboshete, setlogolo sa mong wa gago, Saulo, o kae?”

Tsiba a mo fetola a re: “O ituletše Jerusalema ka gobane o kgolwa gore bjale Baisraele ba tla bušetša mmušo wa rakgolwagwe Saulo go yena.”

₄Kgoši a re go Tsiba: “Tšohle tše e bego e le tša Mefiboshete ke tša gago.”

Tsiba a mo fetola a re: “Thobela. Anke ka mehla ke fele ke kgahla kgoši, mong wa ka!”

₅Ge Kgoši Dafida a fihla kua Bahurime, yo mongwe wa meloko ya Saulo, Shimi, morwa wa Gera, a tšwa go tlo mo gahlanetša, a tšama a mo rogaka. ₆Shimi a thoma go foša Dafida le bahlankedi ba gagwe ka maswika, le ge Dafida a be a dikaneditšwe ke banna ba gagwe le baleti. ₇Shimi a mo rogaka a re: “Tloga! Tloga mo! Mmolai yo! Sekebeka tena! ₈O amogile Saulo mmušo, gomme bjale Morena o a go otla ka ge o bolaile lešaba le lekaaka la lapa la Saulo. Morena o neetše morwa wa gago, Absalomo, mmušo, mme wena o lahlegile, mmolai tena!”

₉Abishai, yo mmagwe e bego e le Tseruya, a re go kgoši: “Kgoši, o reng o lesa mpša ye e hwilego ye e go rogaka? A ke ye ke e ripe hlogo!”

₁₀Kgoši a re go Abishai le Joaba, morwarragwe: “Ga se taba ya lena ye! Ge a nthogaka ka gobane Morena a mmoditše gore a nthogake, ke mang yo a ka botšišago gore o direlang taba yeo?” ₁₁Gomme Dafida a re go Abishai le go bahlankedi ba gagwe ka moka: “Ge ešita yo e lego morwa wa ka tiitii e le yena yo a lekago go mpolaya, le ka napa la makatšwa ke Mobenjamene yo a nthogakago yo? Morena o mmoditše gore a nthogake; ka gona mo leseng. ₁₂Mohlomongwe Morena o tla bona tlaišego ya ka gomme a ntšhegofatša bakeng sa go rogakwa mo.” ₁₃Ka gona Dafida le banna ba gagwe ba fela ba swere tsela. Shimi a ba šala morago, a hlahla le patoga; o be a tšama a rogaka a ba foša ka maswika a ba tšitla ka mobu. ₁₄Kgoši le banna ba gagwe ka moka ba be ba lapile ge ba fihla Jordane gomme ba khutša fao.

₁₅Absalomo le Baisraele ka moka ba ba bego ba na le yena ba tsena Jerusalema, Ahitofele a na le bona. ₁₆Ge Hushai, mogwera wa Dafida, a gahlana le Absalomo, o ile a goa a re: “A kgoši e re phelele! A kgoši e re phelele!”

₁₇Absalomo a mmotšiša a re: “A ga o sa botegela mogwera wa gago, Dafida? Ke ka lebaka lang o se wa sepela le yena?”

₁₈Hushai a mo fetola a re: “Aowa, ke be nka se kgone! Nna ke ema le yo a kgethilwego ke Morena, le ke batho ba, le ke Baisraele ka moka. Ke tla dula nago. ₁₉Kgane ke mang yo ke swanetšego go mo hlankela? A ke re ke wena, morwa wa mong ka? Bjalo ka ge ke hlanketše tatago, bjale ke tla hlankela wena.”

₂₀Ke moo Absalomo a retologetšego go Ahitofele, a re: “Bjale ka gore re mo, re eletšeng gore re dire eng.”

₂₁Ahitofele a re go Absalomo: “Yaa go robala le metlabo ya tatago ye a e tlogetšego mo gore e hlokomele mošate. Ke moo yo mongwe le yo mongwe mo Israele a tlago tseba gore o kgopišitše tatago, gomme balatedi ba gago ba tia maatla.” ₂₂Ka gona ba hlomela Absalomo mošaša godimo ga tlhaka ya ngwako wa mošate, gomme a tsena bohle ba mo lebeletše a robala le metlabo ya tatagwe.

₂₃Keletšo ye nngwe le ye nngwe ya Ahitofele mehleng yeo e be e amogelwa mo nkego ke lentšu la Modimo; bobedi bja bona, Dafida le Absalomo, ba be ba latela dikeletšo tšeo.

₁Go se gwa iša kae Ahitofele a re go Absalomo: “A ke kgethe banna ba dikete tše lesome le tše pedi, gomme ke hlomare Dafida bošegong bja lehono. ₂Ke tla mo hlasela mola a lapile mme a nolegile moko. O tla tšhoga mme banna ba gagwe ka moka ba tšhaba. Ke tla bolaya kgoši fela, ₃gomme ka bušetša banna ba gagwe ka moka go wena. Lehu la motho yo o nyakago go mmolaya, e lego Kgoši Dafida, le tla dira gore batho ba gagwe bohle ba eme le wena, gomme setšhaba ka moka sa iketla.” ₄Keletšo yeo ya thabiša Absalomo le baetapele ba Baisraele ka moka.

₅Absalomo a re: “Bjale bitša Hushai gomme re tle re kwe gore yena o tla reng.” ₆Ge Hushai a fihla, Absalomo a mmotša se Ahitofele a ba boditšego sona, gomme a re: “Na re dire ka mokgwa woo? Ge o sa kwane le taba yeo, re botše gore re dire eng.”

₇Hushai a mo fetola a re: “Keletšo ye Ahitofele a go filego yona lehono ga se ya loka. ₈O a tseba gore tatago le banna ba gagwe ke bahlabani ba bogale mme ke ba bašoro bjalo ka bere ya tshadi e utsweditšwe bana ba yona. Tatago ke mohlabani wa mahlwaadibona, gomme ga a dule le banna ba gagwe bošego. ₉Gonabjale mohlomongwe o utamile ka leweng goba felwana mo gongwe. Ge Dafida a se na go thoma go bolaya banna ba gago, yo mongwe le yo mongwe yo a kwago taba yeo o tla re banna ba gago ba fentšwe. ₁₀Ke moo le banna ba bogalegale, bao ba sa boifego selo bjalo ka ditau, ba tlago boifa ka gobane yo mongwe le yo mongwe mo Israele o a tseba gore tatago ke mohlabani yo mogolo, le gore banna ba gagwe ke bahlabani ba bogale. ₁₁Keletšo ya ka ke gore o kgobokanye Baisraele ka moka mathokong ohle a naga, ka bontši bja go lekana le dithorwana tša lešabašaba lebopong la lewatle, gomme wena ka bowena o ba ete pele ntweng. ₁₂Re tla hwetša Dafida moo a lego gona, gomme ra mo wela godimo bjalo ka phoka ge e ewa fase. Yena le banna ba gagwe ga go le o tee yo a tlago phologa. ₁₃Ge a ka tšhabela ka motseng wo mongwe, Baisraele ka moka ba tla tliša dithapo gomme ba gogolela motse woo ka moeding. Ga go le leswika le tee leo le tlago šadišwa.”

₁₄Absalomo le Baisraele ka moka ba re: “Keletšo ya Hushai e phala yela ya Ahitofele.”

Morena o be a beakantše gore keletšo ye botse ya Ahitofele e se ke ya latelwa, gore a tle a wetše Absalomo kotsing.

₁₅Ke moo Hushai a boditšego moprista Tsadoko le moprista Abiatare keletšo ye a e filego Absalomo le baetapele ba Baisraele, le keletšo yeo Ahitofele a ba filego yona. ₁₆Hushai a tlaleletša ka go re: “Bjale phakišang! Romelang molaetša go Dafida gore a se ke a robala matšibogong a noka kua lešokeng, eupša a tshele noka ka pele, gore yena le banna ba gagwe ba se ke ba tla ba bolawa ka moka.”

₁₇Jonathane, morwa wa Abiatare, le Ahimaatse, morwa wa Tsadoko, ba be ba letetše kua mothopong wa Rogele ka gore ba be ba tšhaba go ka bonwa ba tsena motseng. Modiredi wa mosetsana o be a fela a eya a ba botša seo se diregago, gomme bona ba fela ba yo botša Kgoši Dafida. ₁₈Eupša ka letšatši le lengwe mošemanyana yo mongwe a ba bona, gomme a botša Absalomo; ka gona ba itlhaganela ba ya ba utama ka ngwakong wa monna yo mongwe kua Bahurime. O be a na le sediba ka kgorong ya gagwe, gomme ba theogela ka moo sedibeng. ₁₉Mosadi wa monna yoo a tšea sepipetši, a se ala godimo ga sediba seo gomme a tšitlanya mabele godimo ga sona, gore go se be yoo a lemogago. ₂₀Bahlankedi ba Absalomo ba tla moo ngwakong woo gomme ba botšiša mosadi yoo ba re: “A Ahimaatse le Jonathane ba kae?”

Mosadi yoo a ba fetola a re: “Ba tshetše noka.”

Banna bao ba ba nyaka eupša ba se ke ba ba bona, ka fao ba boela Jerusalema. ₂₁Ge ba tlogile, Ahimaatse le Jonathane ba tšwa ka moo sedibeng gomme ba ya ba begela Kgoši Dafida ditaba tšeo. Ba mmotša se Ahitofele a ikemišeditšego sona ka yena, mme ba re: “Itlhaganele o tshele noka.” ₂₂Ka gona Dafida le banna ba gagwe ba thoma go tshela Jordane, gomme ge letšatši le hlaba ke ge ka moka ba tshetše.

₂₃Ge Ahitofele a bona gore keletšo ya gagwe ga se ya latelwa, a saletša pokolo ya gagwe gomme a gomela motseng wa gabo. Ge a abagantše thoto ya gagwe, a iphega. A bolokwa ka lebitleng la lapa.

₂₄Dafida o be a šetše a fihlile motseng wa Mahanaime ka nako ye Absalomo le Baisraele ba tshela Jordane. ₂₅Absalomo o be a beile Amasa molaodi wa madira legatong la Joaba. Amasa e be e le morwa wa Jetere, Moishmaele; mmagwe e be e le Abigaile, morwedi wa Nahashe, Abigaile e be e le ngwanaboTseruya, mmagoJoaba. ₂₆Absalomo le banna ba gagwe ba ile ba hloma mešaša nageng ya Gileade.

₂₇Ge Dafida a fihla Mahanaime, a gahlanetšwa ke Shobi, morwa wa Nahashe, wa motse wa Raba kua Amone, le Makire, morwa wa Amiele, wa Lo-Dabare, le Barsilai, wa Roglime kua Gileade. _28-29Ba tla le meruswi le dipitša le tša go robala, ba tlišetša le Dafida le banna ba gagwe mabele, garase, bupi, dipale, dinawa, dihlodi, todi, tšhise, lebebe le dihuswane. Ba be ba tseba gore Dafida le banna ba gagwe ba tla be ba swerwe ke tlala le lenyora, mme ba lapile kua lešokeng.

₁Kgoši Dafida a kgobokanya banna ba gagwe, a ba arola dihlopha tša dikete le tša makgolo, gomme a ba beela balaodi. ₂Ke moka a ba ntšha motseng ka dihlopha tše tharo; sa pele se laolwa ke Joaba, sa bobedi se laolwa ke Abishai, monnagoJoaba, sa boraro se laolwa ke Itai wa Gathe. Gomme kgoši a re go banna ba gagwe: “Nna ka bonna ke tla ya le lena.”

₃Bona ba mo fetola ba re: “O se ke wa ya le rena. Rena manaba a ka se re ele hloko ge ka moka re ka tšhaba, goba le ge seripa sa rena se ka bolawa; eupša wena o lekana le ba dikete tše lesome ba rena. Go kaone ge o ka itšhalela mo motseng gomme wa re romela thušo.”

₄Kgoši a ba fetola a re: “Ke tla dira se le bonago se lokile.” Ke mo a ilego a ema ka thoko ga kgoro mola banna ba gagwe ba etšwa ka dihlopha tša dikete le tša makgolo. ₅A laya Joaba le Abishai le Itai a re: “Ka lebaka la ka hle, le sware lesogana leo, Absalomo, gabotse.” Gomme madira ka moka a kwa Dafida ge a laya balaodi ba ona ka tsela yeo.

₆Madira a Dafida a tšwa a ya nageng gomme a lwa le Baisraele sethokgweng sa Efraime. ₇Baisraele ba fenywa ke banna ba Dafida; ba ile ba fenywa o šorošoro, gwa bolawa banna ba dikete tše masome a mabedi tšatši leo. ₈Ntwa ya ikala le naga, gomme banna ba bantšintši ba hwa kua sethokgweng go feta bao ba bolailwego ntweng.

₉Absalomo a gahlana le banna ba bangwe ba Dafida a sa itebetše. O be a nametše meila, gomme ge e feta ka fase ga mohlare wo mogolo wa moeike, a tanywa ka hlogo gare ga makala. Meila ya fela e kitima, gomme Absalomo a šala a lekeletše. ₁₀Monna yo mongwe wa Dafida a mmona gomme a begela Joaba a re: “Ke bone Absalomo a lekeletše mohlareng wa moeike!”

₁₁Joaba a mo fetola a re: “Ge e le gore o mmone, ke ka lebaka lang o se wa mmolaya gona moo? Nna nkabe ke go file dipapetlana tše lesome tša silibera le lepanta la botšhepi.”

₁₂Eupša monna yoo a mo fetola a re: “Le ge nkabe o mphile dipapetlana tše sekete tša silibera, ke be nka se kgwathe morwa wa kgoši. Ka moka re kwele kgoši ge a laya wena le Abishai le Itai a re: ‘Ka lebaka la ka hle, le hlokomele lesogana leo, Absalomo.’ ₁₃Eupša mola ke nyatše kgoši gomme ke bolaye Absalomo, kgoši a ka be a kwele taba yeo – o kwa taba ye nngwe le ye nngwe – gomme o ka be o se wa ntšhireletša.”

₁₄Joaba a re: “Ga ke tle go hlwa ke senya nako le wena.” A tšea marumo a mararo a thothobetša Absalomo sefega a sa phela, a lekeletše mohlareng wa moeike. ₁₅Ke moo bahlabani ba bangwe ba Joaba ba lesome ba dikaneditšego Absalomo mme ba mo feleletša.

₁₆Joaba a laela gore phalafala e letšwe go emiša ntwa, gomme madira a gagwe a gomela Baisraele a boa. ₁₇Ba tšea setopo sa Absalomo, ba se lahlela ka moleteng wo o išago fase kua sethokgweng, gomme ba se kgatlelela ka morako wo mogolo wa matlapa. Baisraele ka moka ba tšhaba, yo mongwe le yo mongwe a tšhabela lapeng la gagwe.

₁₈Ge Absalomo a sa phela o ile a ikagela sehlwaseeme kua Molaleng wa Kgoši, ka gobane o be a se na le morwa yo a tlago tšwetša leina la gagwe pele. Ka gona o ile a reela sehlwaseeme seo leina la gagwe, gomme go fihlela le lehono se sa tsebja ka la Sehlwaseeme sa Absalomo.

₁₉Ahimaatse, morwa wa Tsadoko, a re go Joaba: “A ke kganyelele go kgoši ke yo mmotša ditaba tše botse tša go re Morena o mmolokile manabeng a gagwe.”

₂₀Joaba a re: “Aowa, lehono ga go taba tše botse tše o kago yo di bega. Ka letšatši le lengwe o ka ya, eupša e sego lehono, ka gobane go hwile morwa wa kgoši.” ₂₁Ke moka a re go lekgoba la gagwe la Moetopia: “Sepela o yo botša kgoši se o se bonego.” Lekgoba la obama pele ga Joaba mme la tlogelela ka lebelo.

₂₂Ahimaatse a fela a phegeletše a re: “Ga ke na taba le gore ke tla hlagelwa ke eng; le nna ntumelele ke yo bega ditaba tše.”

Joaba a mmotšiša a re: “Ke ka lebaka lang o nyaka go ya, ngwanaka? O ka se ke wa putswa ka selo ka lebaka la gona.”

₂₃Ahimaatse a bolela gape a re: “Ga ke na taba le gore ke tla hlagelwa ke eng; ke a ya.”

Joaba a re: “Gona sepela.” Ka gona Ahimaatse a kganyela a theoga ka tsela ye e putlago moedi wa Jordane, gomme a feta lekgoba lela.

₂₄Dafida o be a dutše magareng ga kgoro ya ka gare le ya ka ntle ya motse. Mohlapetši a namelela morakong a ema godimo ga tlhaka ya kgoro; ge a lebelela a bona monna a kitima a nnoši. ₂₅A hlaeletša kgoši fase a mmotša, mme kgoši a re: “Ge a le noši o tliša ditaba tše botse.” Mokganyedi yola a fela a batamela.

₂₆Ke moo mohlapetši yola a bonego yo mongwe monna a kitima a nnoši, gomme a hlaeletša moleti wa kgoro kua fase a re: “Bona! Yo mongwe monna šole o a kganyela!”

Kgoši a mo fetola a re: “Yoo le yena o tliša taba tše botse.”

₂₇Mohlapetši a re: “Ke a bona gore monna yola wa pele o kganyela bjalo ka Ahimaatse, morwa wa Tsadoko.”

Kgoši a re: “Ahimaatse ke monna wa go loka, gomme o tliša taba ye botse.”

₂₈Ahimaatse a tamiša kgoši, a mo obamela, gomme a re: “A go tumišwe Morena Modimo wa gago, ka gobane banna bale ba bego ba go tsogela maatla o ba gafetše diatleng tša gago.”

₂₉Kgoši a mmotšiša a re: “A lesogana lela, Absalomo, le sa phela gabotse?”

Ahimaatse a mo fetola a re: “Mong wa ka, ge Joaba, molaodi wa madira a gago, a nthoma, ke bone mpherehlakana wo mogolo, eupša ka se ke ka bona gore ke wa eng.”

₃₀Kgoši a re: “Emela mola.” Gomme a ya a ema gona.

₃₁Ka morago gwa fihla lekgoba lela la Moetopia gomme la re go kgoši: “Ke swaretše kgoši ditaba tše botse! Lehono Morena o fentše bohle bao ba bego ba go tsogela maatla!”

₃₂Kgoši a mmotšiša a re: “A lesogana lela, Absalomo, le sa phela gabotse?”

Lekgoba la mo fetola la re: “Kgoši, mong wa ka, ke duma ge nkabe se se mo hlagetšego se ka hlagela manaba a gago ka moka, le bohle bao ba go tsogelago maatla.” ₃₃Kgoši a kwa bohloko kudukudu. A namelela ka phapošing ye e lego ka godimo ga kgoro gomme a lla. Ge a sepela o be a tšama a lla a re: “Joo ngwanaka! Ngwanaka Absalomo! Absalomo, ngwanaka! Nkabe e be nna ke hwago sebakeng sa gago, ngwanaka! Absalomo, ngwanaka!”