To The Word – Day 81

₁Seruthwane se se latelago, nakong yeo ka yona magoši gantši a yago ntweng, Dafida o ile a ntšha Joaba le balaodi ba gagwe le madira ka moka a Baisraele; ba fenya Baamone mme ba dikanetša motse wa Raba. Eupša Dafida yena o be a šetše Jerusalema.

₂Ka letšatši le lengwe, ka merithi ye megolo, Dafida a tsoga malaong a gagwe gomme a namelela tlhakeng ya ngwako wa mošate. Ge a sepelasepela moo godimo, a bona mosadi a hlapa. E be e le yo mobotsebotse. ₃Ka gona a roma motseta gore a yo botšiša gore ke mang, gomme a kwa gore ke Batseba, morwedi wa Amiele, mosadi wa Uria, Mohete. ₄Dafida a roma batseta gore ba ye ba mo tšee; ba mo tliša go yena, gomme a robala le yena. Batseba o be a sa tšo fetša go itlhwekiša ka ge a be a bone kgwedi. Ka morago a ipoelela gae. ₅Ge go fetile lebaka a lemoga gore o imile, gomme a roma motho go Dafida gore a mo tsebiše.

₆Ke moo Dafida a romilego motseta go Joaba a re: “Nthomele Uria, Mohete.” Ka gona Joaba a mo romela yena. ₇Ge Uria a fihla, Dafida a mmotšiša ge eba Joaba le madira ba sa phela gabotse, le gore a ntwa e tšwela pele bjang. ₈Ke moo a itšego go Uria: “Sepela gae o yo khutša gannyane.” Uria a tloga, gomme Dafida a romela mpho lapeng la gagwe. ₉Eupša Uria a se ke a ya gae; o ile a ithobalela kgorong ya mošate le baleti ba kgoši. ₁₀Ge Dafida a ekwa gore Uria ga se a ka a ya gae, a mmotšiša a re: “O sa tšwa leetong le letelele; ke ka lebaka lang o se wa ya gae?”

₁₁Uria a mo fetola a re: “Banna ba Israele le ba Juda ba phela ka mešašeng, gomme Polokelo ya Kgwerano e na le bona; molaodi wa ka, Joaba, le bahlanka ba gago ba hlomile mešaša kua mabaleng. A nka ya gae bjang ka ya ka ja, ka nwa, mme ka robala le mosadi wa ka? Ke ena ka wena, kgoši, gore nka se tsoge ke dirile taba yeo!”

₁₂Ka gona Dafida a re: “Gona dula mo letšatši ka moka, gomme ka moswane re tla laelana wa boela morago.” Ka gona Uria a dula Jerusalema letšatši leo le le le latelago. ₁₃Dafida a mo laletša gore a tle dijong tša mantšiboa. Ba ja gomme a mo tagiša bjala. Eupša le bjona bošegong bjoo Uria a se ke a ya gae; o ile a ithobalela mola a bego a robetše gona le baleti ba kgoši.

₁₄Mosong wo o latelago Dafida a ngwalela Joaba lengwalo gomme a le romela ka Uria. ₁₅A ngwala a re: “Bea Uria ka pele, moo ntwa e galefilego kudu, gomme lena le katakateng gore a bolawe.” ₁₆Ka gona, ya re ge Joaba a sa dikaneditše motse, a romela Uria lefelong le a bego a tseba gore fao go na le manaba a bogale. ₁₇Madira a manaba a tšwa motseng gomme a lwa le madira a Joaba; balaodi ba bangwe ba madira a Dafida ba bolawa, gomme gwa bolawa le Uria.

₁₈Ke moo Joaba a romilego motho go Dafida go yo mmegela tša ntwa, ₁₉gomme a laela motseta yoo a re: “Ka morago ga ge o begetše kgoši tša ntwa ka moka, ₂₀a ka befelwa gomme a go botšiša a re: ‘Ke ka lebaka lang le ile la batamela motse kudu go lwa le bona? A le be le sa lemoge gore ba tla thunya metsi ba le morakong wa motse? ₂₁A ga le sa gopola ka moo Abimeleke, morwa wa Gideone, a bolailwego ka gona? E bile kua Tebetse moo mosadi a ilego a lahlela tšhilo ka morako gomme a mmolaya. Ke ka lebaka lang ge le ile la batamela morako ka mokgwa woo?’ Ge kgoši a ka go botšiša taba yeo, o mmotše o re: ‘Mohlanka wa gago, Uria, Mohete, le yena o bolailwe.’ ”

₂₂Ka gona motseta yoo a ya go Dafida gomme a mmotša se Joaba a mo laetšego gore a se bolele. ₂₃A re: “Manaba a rena a be a re feta ka maatla gomme ba tšwa motseng go tlo lwa le rena nageng, eupša re ile ra ba gomišetša kgorong ya motse. ₂₄Ke moo ba thunyeditšego metsi go rena ba le morakong, gomme bahlanka ba bangwe ba kgoši ba bolawa; mohlanka wa gago, Uria, Mohete, le yena o bolailwe.”

₂₅Dafida a re go motseta yoo: “O tiiše Joaba maatla gomme o mmotše gore a se ke a tshwenyega, ka gobane motho a ka se tsebe gore go ile go hwa mang ntweng. O mmotše gore a hlasele motse ka maatla gomme a o thope.”

₂₆Ge Batseba a ekwa gore monna wa gagwe o bolailwe, o ile a mo llela. ₂₇Ge nako ya go ilela e fetile, Dafida a laela gore a tlišwe mošate; ya ba mosadi wa gagwe gomme a mmelegela morwa. Eupša Morena a se ke a thabela seo Dafida a bego a se dirile.

₁Morena a roma moprofeta Nathane go Dafida. Nathane a ya go yena a re: “Go be go na le banna ba babedi ba ba bego ba dula motseng o tee; yo mongwe e be e le mohumi, yo mongwe e le modiidi. ₂Monna yo a humilego o be a na le dikgomo le dihuswane tše ntšintši, ₃mola monna wa modiidi yena a be a se na selo, ge e se kwanyana e tee fela ya tshatšana ye a bego a e rekile. O be a e hlokomela, gomme ya gola lapeng la gagwe le bana ba gagwe. O be a e fepa ka dijo tša gagwe, a e noša ka senwelo sa gagwe, mme a e fara diropeng. Kwanyana yeo e be nke ke morwedi wa gagwe. ₄Ka letšatši le lengwe moeng o ile a etela monna yola wa mohumi. Mohumi a se ke a rata go hlabela moeng seruiwa sa gagwe se sengwe – a mo hlabela kwanyana yela ya monna wa modiidi.”

₅Dafida a galefela monna yoo wa mohumi kudu gomme a re: “Ke ena ka Morena yo a phelago gore monna yo a dirilego taba yeo o swanetše go bolawa! ₆Ka ge a dirile taba yeo ya sehlogo o swanetše go lefa gane seo a se tšerego.”

₇Nathane a re go Dafida: “Monna yoo ke wena! Gomme se Morena Modimo wa Israele a se bolelago sese: ‘Ke nna ke go beilego kgoši ya Israele, gomme ke nna ke go phološitšego go Saulo. ₈Ke go file mmušo wa gagwe le basadi ba gagwe; ke go beile kgoši ya Israele le Juda. Ge eba tšeo di be di se tša lekana, nkabe ke go okeleditše ka tše ntši go feta moo. ₉Ke ka lebaka lang ge o nyaditše ditaelo tša ka? Ke ka lebaka lang o dirile taba ye mpe ye? O dirile gore Uria a bolawe ntweng; o dirile gore Baamone ba mmolaye, gomme wena wa tšea mosadi wa gagwe! ₁₀Bjale, molokong wo mongwe le wo mongwe go tla ba le ditlogolo tša gago tše dingwe tše di hwago lehu la lerumo, ka gobane o nnyaditše wa tšea mosadi wa Uria. ₁₁Ke a go botša ke re ke tla dira gore yo mongwe wa lapa la gago a go tlišetše matshwenyego. O tla be o lebeletše ge ke go amoga basadi ba gago mme ke ba fa monna yo mongwe; gomme yena o tla robala le bona mosegare wo monana. ₁₂Wena o dirile sebe sephiring, eupša nna ke tla dira gore taba yeo e direge mosegare wo mogolo gore Baisraele ka moka ba di bone.’ ”

₁₃Dafida a re: “Ke dirile sebe pele ga Morena.”

Nathane a mo fetola a re: “Morena o a go lebalela; o ka se hwe. ₁₄Eupša ka gobane o nyaditše Morena kudu ka go dira taba ye, ngwana wa gago o tla hwa.” ₁₅Ke moka Nathane a boela gae.

Morena a dira gore ngwana yola mosadi wa Uria a mmelegetšego Dafida a babje kudu. ₁₆Dafida a rapela Morena gore ngwana a fole. O be a ikona dijo, gomme bošego bjo bongwe le bjo bongwe a tsena phapošing ya gagwe mme a patlama lebatong bošego ka moka. ₁₇Bakgomana ba gagwe ba be ba eya go yena ba mo kgopela gore a tsoge, eupša yena a gana, mme le ge go iwa dijong a sa ye. ₁₈Ka morago ga matšatši a a šupago ngwana yoo a hwa, gomme bakgomana ba Dafida ba boifa go mmotša taba yeo. Ba ile ba re: “Ge ngwana a sa phela, Dafida o be a sa re šetše ge re bolela naye. A re tla mmotša bjang gore ngwana wa gagwe o hwile? A ka ikgobatša ka mokgwa wo mongwenyana!”

₁₉Ge Dafida a ba bona ba sebasebelana, a lemoga gore ngwana o hwile. Ka gona a ba botšiša a re: “A ngwana o hwile?”

Ba mo fetola ba re: “Ee, o hwile.”

₂₀Dafida a tsoga lebatong, a hlapa, a tlola, mme a apara diaparo tše dingwe. Ke moka a ya go khunamela Morena ka ngwakong wa yena Morena. Ge a fihla mošate, a kgopela dijo, gomme ge di tlišitšwe a ja. ₂₁Bakgomana ba gagwe ba re go yena: “Taba ye e a re makatša. Ge ngwana a sa phela, o be o mo llela gomme o ikona dijo; eupša ge a seno hwa, o tsogile wa ja!”

₂₂Dafida a ba fetola a re: “Ee, ke be ke ikona dijo ke lla ge a sa phela. Ke be ke gopola gore Morena o tla nkgaugela gomme a se ke a lesa ngwana a ehwa. ₂₃Eupša bjale ka gore o hwile, ke tla be ke sa ikonelang dijo? Kgane nka mmuša a phele gape? Ka letšatši le lengwe ke tla ya moo a lego ntshe, eupša yena a ka se tsoge a boetše go nna.”

₂₄Ke moo Dafida a homoditšego mosadi wa gagwe, Batseba. A robala naye, gomme a belega morwa; Dafida a mo rea leina la Solomone. Morena a rata mošemanyana yoo ₂₅gomme a laela moprofeta Nathane go mo rea leina la Jedidia, ka gobane Morena a be a mo rata.

₂₆Joaba o be a sa tšwela pele a hlasela motse wa Raba, mošate wa naga ya Amone, gomme a šetše a batametše go o thopa. ₂₇A roma batseta go Dafida gore ba mmegele ba re: “Ke hlasetše motse wa Raba gomme ke thopile lehlakore leo meetse a tšwago go lona. ₂₈Bjale bokanya madira a gago ao a šetšego, o hlasele motse mme o o thope ka bowena. Ga ke nyake gore go tle go bolelwe gore o thopilwe ke nna.” ₂₉Ka gona Dafida a bokanya madira a gagwe, a ya motseng wa Raba, a o hlasela mme a o fenya. ₃₀Hlogong ya modimo wa seswantšho wa Baamone, Milkomo, Dafida a tšea mphapahlogo wa gauta wa boima bjo e ka bago dikilokramo tše masome a mararo wo o nago le legakabje. A ithweša wona hlogong. A tšea le thoto ye ntšintši motseng, ₃₁gomme a laela batho ba wona gore ba šome ka disaga le ka megoma ya tshipi le ka dilepe, gomme a ba gapeletša go dira ditena. O ile a dira sona seo go batho ba metse ye mengwe ka moka ya Baamone. Ka morago yena le banna ba gagwe ba boela Jerusalema.

₁Ka morago ga tšeo gwa hlaga tše di latelago. Absalomo, morwa wa Dafida, o be a na le kgaetšedi ye botse ye leina la yona e bego e le Tamare. Amnone, yo mongwe wa barwa ba Dafida, o ile a mo duma. ₂A mo duma kudu a ba a babja, ka gobane o be a bona gore a ka se kgone go kopana naye sephiring; Tamare o be a se a ka a robala le monna, ka gona a ganetšwa go kopana le banna. ₃Eupša Amnone o be a na le mogwera yo leina la gagwe e bego e le Jonadaba, morwa wa Shama, morwarragoDafida; yena e be e le monna wa mahlajana. ₄Jonadaba a re go Amnone: “Ke wena morwa wa kgoši, fela letšatši le lengwe le le lengwe ke go bona o nyamile. A molato ke eng?”

Amnone a mo fetola a re: “Ke duma Tamare, kgaetšedi ya Absalomo, morwarre ka malapa.”

₅Jonadaba a re go yena: “Itire mo nkego o a babja, gomme o robale. Ge tatago a tlilo go bona, o re go yena: ‘Hle, kgopela kgaetšedi ya ka, Tamare, gore a tle a nteše dijo. Ke nyaka gore a apeele dijo tšeo fa mo ke tlago kgona go mmona, gomme a mphe tšona ka boyena.’ ” ₆Ka gona Amnone a dira mo nkego o a babja, gomme a ithobadiša.

Kgoši Dafida a yo mmona, gomme Amnone a re go yena: “Hle, dumelela kgaetšediaka, Tamare, a tle a ntirele dinkgwana di se kae fa mo nka mmonago, mme a nteše tšona ka seatla sa gagwe.”

₇Ka gona Dafida a roma motho go Tamare ka mošate gore ba re go yena: “Yaa ngwakong wa Amnone, kgaetšediago, mme o mo apeele dijo.” ₈Tamare a ya moo gomme a hwetša Amnone a patlamile. A tšea bupi a bo duba, gomme a bopa dinkgwana moo Amnone a bego a kgona go mmona. Ke moka a paka dinkgwana tšeo, ₉gomme a tšea pane a di kgotholela sebjaneng gore Amnone a di je, eupša a gana go di ja. A re: “Lena ba bangwe ka moka tšwaang” – gomme ka moka ga bona ba tšwa. ₁₀Ke moo a itšego go yena: “Tliša dinkgwana tšeo mo malaong a ka gomme o nteše tšona ka seatla sa gago.” Tamare a tšea dinkgwana tšela a ya go yena. ₁₁Ge a sa mo fa tšona, Amnone a mo swara mme a re: “Tlaa o robale le nna!”

₁₂Tamare a re: “Aowa, kgaetšedi, hle, o se ke wa nkata! Taba yeo e a šiiša, ga e dirwe mo Israele! ₁₃Ke tla sepela bjang gare ga batho? Gomme ge e le wena o tla goboga kudu mo Israele. Hle, bolela le kgoši, mme ke tloga ke kgolwa gore o tla go neela nna.” ₁₄Eupša Amnone a se ke a mo theetša; gomme ka ge a be a na le maatla go feta Tamare, a mo uša a mo robala.

₁₅Ka morago ga moo Amnone a hloya Tamare kudukudu; bjale o ile a mo hloya kudu go feta ka moo a bego a mo rata pele. A re go yena: “Tšwaa!”

₁₆Tamare a mo fetola a re: “Aowaa, go nthaka ka mokgwa wo ke bobe bjo bogolo go feta bjo o sa tšwago go ntira bjona.”

Eupša Amnone a se ke a mo theetša; ₁₇o ile a bitša mohlanka wa gagwe a re: “Tloša mosadi yo mo pele ga ka! Mo kgoromeletše ntle mme o notlele lemati!” ₁₈Mohlanka a mo ntšhetša ntle gomme a notlela lemati.

Tamare o be a apere seaparo se setelele sa matsogo a matelele, seaparo sa mehleng sa matšatšing ao sa morwedi wa kgoši yo a sego a tšwa a nyalwa. ₁₉O ile a itšhela hlogo ka melora, a gagola seaparo sela sa gagwe, gomme a sepela a ithwele megono a lla. ₂₀Ge Absalomo, kgaetšedi ya gagwe, a mmona, a mmotšiša a re: “Na Amnone o go tshwentše? Hle, kgaetšedi, o se ke wa iša pelo mafiša ka taba yeo. Ke kgaetšedi ya gago ka malapa, ka gona o se ke wa botša motho taba yeo.” Ka fao Tamare a dula ngwakong wa Absalomo, a šulafetše a le bodutwaneng.

₂₁Ge Kgoši Dafida a ekwa seo se diregilego, a befelwa kudu. ₂₂Absalomo a hloya Amnone kudu ka ge a katile kgaetšedi ya gagwe, Tamare, mo e lego gore o ile a se ke a hlwa a mmolediša.

₂₃Ka morago ga mengwaga ye mebedi Absalomo o be a kota dinku tša gagwe kua Baale-Hatsore, kgauswi le motse wa Efraime, gomme a laletša barwa ba kgoši ka moka. ₂₄A ya go Kgoši Dafida a re: “Kgoši, ke kota dinku tša ka. Wena le bahlankedi ba gago a re yeng le nna moo monyanyeng woo.”

₂₅Kgoši a mo fetola a re: “Aowa, ngwanaka. O tla senyegelwa kudu ge re ka ya ka moka.” Absalomo a fela a mo phegeletše, eupša kgoši a se ke a dumela, mme a kgopela Absalomo gore a sepele.

₂₆Fela Absalomo a re: “Go lokile, gona lesa mogolwake Amnone a ye.”

Kgoši a mmotšiša a re: “Ke ka lebaka lang a swanetše go ya?” ₂₇Eupša Absalomo a fela a mo phegeletše go fihlela Dafida a laela Amnone le barwa ba gagwe ba bangwe gore ba ye le Absalomo.

Absalomo a dira mokete wa segoši, ₂₈gomme a laela bahlanka ba gagwe a re: “Le dišeng ge Amnone a nwele kudu, gomme ge ke re: ‘Mmolayeng!’ le mmolaye. Le se ke la boifa – e tla be e le nna ke itšego le mmolaye. Le beng ba bogale mme le se ke la dikadika!” ₂₉Ka gona bahlanka bao ba phetha ditaelo tša Absalomo ba bolaya Amnone. Gomme barwa ba bangwe ba Dafida ba namela dimeila tša bona ba tšhaba.

₃₀Ge ba sa le tseleng ba eya gae, Dafida a botšwa gore Absalomo o bolaile barwa ba kgoši ka moka – ga go le o tee wa bona yo a šetšego. ₃₁Kgoši a emelela, a gagola diaparo tša gagwe ka manyami, gomme a patlama fase. Bakgomana ba ba bego ba le fao le yena le bona ba gagola diaparo tša bona. ₃₂Eupša Jonadaba, morwa wa Shama, morwarragoDafida, a re: “Mong wa ka, ga se gwa bolawa barwa ba gago ka moka. Ke Amnone fela yo a hwilego. O be o ka no bona ka go lebelela Absalomo sefahlego gore o be a feditše le pelo go dira taba ye go tloga ka letšatši lela Amnone a ilego a kata kgaetšedi ya gagwe, Tamare. ₃₃Ka gona, kgoši, o se ke wa kgolwa pego ye e rego barwa ba gago ka moka ba hwile; ke Amnone fela yo a bolailwego.”

₃₄Ka nako yeo ke ge Absalomo a tšhabile.

Go sa le bjalo, mohlabani yo a bego a letile motse a bona lešaba le legolo le theoga thabeng ka tsela ye e tšwago Horonaime. A ya go kgoši a mmegela seo a se bonego. ₃₅Jonadaba a re go yena: “Bao ke barwa ba kgoši ba etla, bjalo ka ge nna, mohlanka wa gago, ke boletše ka re ba tla tla.” ₃₆Ge a seno fetša go bolela, barwa ba Dafida ba tsena; ba thoma go lla, gomme Dafida le bakgomana ba gagwe le bona ba lla gabohloko.

_37-38Absalomo o be a tšhabile a ile go kgoši ya Geshure, Talmai, morwa wa Amihude, gomme a dula moo mengwaga ye meraro. Dafida a llela morwa wa gagwe, Amnone, nako ye telele; ₃₉eupša ge a fetša go mo llela, a golelwa Absalomo, morwa wa gagwe, kudu.

₁Joaba o be a tseba gore Kgoši Dafida o goletšwe Absalomo kudukudu, ₂ka gona a roma motho go yo bitša mosadi yo bohlale yo a bego a dula Tekoa. Ge mosadi yoo a fihla, Joaba a re go yena: “Itire mo nkego o dillong; o apare diaparo tša go ilela, gomme o se ke wa tlola. O itshware bjalo ka mosadi yo a bilego dillong nako ye telele. ₃O ye go kgoši o mmotše se ke go botšago gore o se bolele.” Ke moka Joaba a mmotša se a swanetše go se bolela.

₄Mosadi yoo a ya go kgoši, a obama, a itahlela fase ka sefahlego, a re: “Nthuše, kgoši!”

₅Kgoši a mmotšiša a re: “O nyaka eng?”

Mosadi a mo fetola a re: “Ke nna mosadi wa mohlologadi. Ke hlokafaletšwe ke monna. ₆Nna, mohlanka wa gago, ke be ke na le barwa ba babedi, gomme ka letšatši le lengwe ba lwa kua nageng mo go bego go se yo a ka ba namolago, mme yo mongwe a bolaya yo mongwe. ₇Gomme bjale, meloko ya ka ka moka e ntlhanogetše, nna, mohlanka wa gago, mme ba nyaka gore ke ba neele morwa wa ka, gore ba mmolaye ka ge a bolaile ngwanabo. Ge ba ka dira taba yeo, ke tla šala ke se na le mojalefa. Ba tla tima mollwana wa ka wo o sa šetšego, gomme monna wa ka a tla a hloka morwa yo a tlago tsoša leina la gagwe.”

₈Kgoši ya mo fetola ya re: “Boela gae, gomme ke tla hlokomela taba ye.”

₉Mosadi a re: “Kgoši, mong wa ka, se o ka se dirago, molato e tla ba wa ka le lapa lešo; wena le lapa la mošate le ka se be le molato.”

₁₀Kgoši a mo fetola a re: “Ge yo mongwe a ka go tšhošetša, o mo tliše go nna, gomme a ka se tsoge a go tshwentše gape.”

₁₁Mosadi a re: “Hle, kgoši, rapela Morena Modimo wa gago, gore moloko wešo yo a swanetšego go lefeletša lehu la morwa wa ka a se ke a oba molato wo mogolo ka go bolaya morwa wa ka yo mongwe.”

Dafida a mo fetola a re: “Ke ena ka Morena yo a phelago gore morwa wa gago a ka se kwišwe bohloko le gatee.”

₁₂Mosadi a re: “Hle, kgoši, nna, mohlanka wa gago, a ke go botšiše tabanyana e tee fela.”

Kgoši a mo fetola a re: “Go lokile.”

₁₃Mosadi a re go yena: “Ke ka lebaka lang o diretše setšhaba sa Modimo phošo ye kaaka ye? Ga se wa dumelela morwa wa gago gore a boe kua a tšhabetšego ntshe, gomme o ipona phošo ka seo o sa tšwago go se bolela. ₁₄Re tla hwa ka moka; re bjalo ka meetse a a tšhologetšego fase, ao a ka se kgobokanywego gape. Le Modimo ga a nyake gore motho a bolawe, fela o loga maano a gore yo a kgetholotšwego ke batho yena a se ke a mo kgetholla. ₁₅Bjale, se se ntlišitšego go tlo bolela nago, kgoši, mong wa ka, ke gore batho ba ntšhošitše, ka gona ka ipotša ka re ke tla bolela nago; mohlomongwe o tla dira se ke se kgopelago. ₁₆Ke ile ka gopola gore o tla ntheetša, wa mphološa go yoo a lekago go bolaya morwa wa ka mme ka go dira bjalo a re fediša setšhabeng sa Modimo. ₁₇Ke ipoditše gore se o tlago bolela, kgoši, mong wa ka, se tla mpea pelo, ka gobane kgoši o bjalo ka morongwa wa Modimo, mme o kgona go kgetholla botse le bobe. A Morena Modimo wa gago a be le wena!”

₁₈Kgoši a mo fetola a re: “Ke tlilo go botšiša potšišo, gomme o se ke wa nkutela selo.”

Mosadi a mo fetola a re: “O ka mpotšiša se o se nyakago, kgoši.”

₁₉Kgoši a mmotšiša a re: “A ga se Joaba a go dirišago dilo tše?”

Mosadi a mo fetola a re: “Ke ena ka bophelo bja gago, kgoši, gore ga go ka moo nka se fetolego potšišo ya gago. Gabotsebotse mohlanka wa gago, Joaba, ke yena yo a mpoditšego gore ke dire eng, le gore ke bolele eng. ₂₀Eupša o dirile ka mokgwa woo gore a tle a rarolle taba ye. Kgoši ke yo bohlale bjalo ka morongwa wa Modimo, gomme o tseba tšohle tše di diregago.”

₂₁Ka morago kgoši ya re go Joaba: “Ke itherile gore ke tla dira se o se nyakago. Sepela o yo tšea lesogana lela, Absalomo, o mmušetše mo.”

₂₂Joaba a obama, a itahlela fase ka sefahlego pele ga Dafida, a mo šegofatša. A re: “Bjale ke a tseba gore ke a go kgahla, ka gobane o dumetše se ke se kgopetšego.” ₂₃Ke moka a emelela a ya Geshure gomme a bušetša Absalomo Jerusalema. ₂₄Le ge go le bjalo, kgoši a laela gore Absalomo a se ke a dula ngwakong wa kgoši. A re: “Ga ke nyake go mmona.” Ka gona Absalomo a dula ka ngwakong wa gagwe gomme a se ke a tla go kgoši.

₂₅Go be go se na monna mo Israele yo a bego a tumišwa ka go bopega gabotse bjalo ka Absalomo; o be a sa solege felo mmeleng. ₂₆O be a kota hlogo gatee ka ngwaga ge moriri wa gagwe o gotše kudu mme o mo imela. Ge o kotilwe o be o imela go feta dikilokramo tše pedi go ya ka kelo ya mošate ya boima. ₂₇Absalomo o be a na le barwa ba bararo le morwedi yo mobotse yo leina la gagwe e bego e le Tamare.

₂₈Absalomo o ile a dula mengwaga ye mebedi Jerusalema a sa bone kgoši. ₂₉Ke moka a roma motho go yo bitša Joaba gore a tle a mo yele go kgoši, eupša Joaba a se ke a tla. Absalomo a roma motho gape go yena, gomme le gona Joaba a gana go tla. ₃₀Ka gona Absalomo a re go bahlanka ba gagwe: “Bonang, tšhemo ya Joaba e beelane mellwane le ya ka, gomme o lemile mabele. Sepelang le yo tšhuma tšhemo yeo.” Ka gona ba ya ba e tšhuma.

₃₁Joaba a ya ngwakong wa Absalomo gomme a mmotšiša a re: “Ke ka lebaka lang bahlanka ba gago ba tšhumile tšhemo ya ka?”

₃₂Absalomo a mo fetola a re: “Ke ka gobane ga se wa tla ge ke roma batho go wena. Ke be ke nyaka gore o ye go kgoši gomme o mpotšišetše yena o re: ‘Ke ka lebaka lang ke tlogile Geshure ka tla mo? Nkabe go bile kaone mola ke no itulela kua.’ ” Gomme Absalomo a tšwela pele a re: “Ke nyaka go ya go kgoši, gomme ge e le gore ke na le molato, gona a mpolaye.”

₃₃Ka gona Joaba a ya go Kgoši Dafida a mmotša se Absalomo a se boletšego. Ka fao kgoši a roma motho gore a bitše Absalomo. Absalomo a ya go yena mme a obama pele ga gagwe. Kgoši a mo amogela a mo atla.

₁Ka morago ga tšeo Absalomo a inyakela koloi le dipere, le banna ba go sepela pele ga gagwe ba e ka bago ba masome a fetšago seatla. ₂O be a tsoga e sa le bošego gomme a ye go ema ka thoko ga tsela kua kgorong ya motse. Ge motho a etla moo ka molato wo a nyakago gore kgoši a o ahlole, Absalomo o be a mmitša gomme a mmotšiše gore o tšwa kae. E re ge monna yoo a mmoditše kgoro ye a tšwago go yona, ₃Absalomo a re: “Bona, molao o kwana le wena, fela ga go moemedi wa kgoši yo a tlago ahlola molato wa gago.” ₄Gomme a tlaleletše ka go re: “Nke nkabe ke le moahlodi wa naga ye! Ke moo yo mongwe le yo mongwe yo a nago le taba a bego a tla tla go nna, mme ka mo ahlola ka toka.” ₅Ge motho yoo a batamela Absalomo gore a obame pele ga gagwe, Absalomo o be a iša letsogo, a mo sware, mme a mo atle. ₆Absalomo a dira seo go Moisraele yo mongwe le yo mongwe yo a tlelago go ahlolwa ke kgoši, ka gona a ba utswa dipelo.

₇Ka morago ga mengwaga ye mene Absalomo a re go Kgoši Dafida: “Morena, a ke ye Hebrone ke yo phetha keno ye ke e enetšego Morena. ₈Mola ke sa dula Geshure kua Siria ke ile ka enela Morena gore ruri ge a ka mpušetša Jerusalema, ke tla tla ke mo khunamela kua Hebrone.”

₉Kgoši a re: “O sepele gabotse.” Ka gona Absalomo a ya Hebrone. ₁₀Gomme a roma batseta dikgorong ka moka tša Israele gore ba bege ba re: “Ge le ekwa phalafala e lla, le goeng le re: ‘Absalomo ke kgoši kua Hebrone!’ ” ₁₁Go be go na le banna ba makgolo a mabedi bao ba bego ba laleditšwe ke Absalomo mme ba sepetše naye go tloga Jerusalema; ba be ba sa tsebe selo ka maano a Absalomo mme ba ile moo ka go se feme selo. ₁₂Gomme ya re mola Absalomo a sa dira dihlabelo, a roma motho motseng wa Gilo gore a yo bitša Ahitofele, yo e bego e le yo mongwe wa baeletši ba Kgoši Dafida. Maano a go theola Dafida setulong a ba le maatla, gomme balatedi ba Absalomo ba oketšega.

₁₃Motseta o ile a begela Dafida a re: “Baisraele ba ema le Absalomo.”

₁₄Ka gona Dafida a re go bahlankedi ba gagwe ka moka ba ba bego ba na le yena Jerusalema: “Re swanetše go tšhaba gonabjale ge re nyaka go phologa go Absalomo! Itlhaganeleng! Go sego bjalo o tla fihla mo gonabjale gomme a re fenya mme a bolaya yo mongwe le yo mongwe mo motseng!”

₁₅Bona ba mo fetola ba re: “Ee, kgoši, mong wa rena. Re itokišeditše go dira se sengwe le se sengwe se o se bolelago.” ₁₆Ka gona kgoši a tloga, a sepela le ba lapa la gagwe ka moka le bahlankedi ba gagwe, ntle le metlabo ye lesome ye a ilego a e šadiša go hlokomela mošate.

₁₇Ge kgoši le banna ba gagwe ka moka ba etšwa motseng, ba ile ba ema ngwakong wa mafelelo. ₁₈Bahlankedi ba gagwe ka moka ba ema kgauswi le yena ge baleti ba kgoši ba feta pele ga gagwe. Bahlabani ba makgolo a a selelago bao ba mo latetšego go tloga Gathe le bona ba feta, ₁₉gomme kgoši a re go Itai, moetapele wa bona: “Ke ka lebaka lang o sepela le rena? Boela morago gomme o yo dula le kgoši ye mpsha. Ke wena mofaladi, morakiwa yo a lego kgole le naga ya gabo. ₂₀O dutše mo lebakana le lekopana fela, bjale go ka se be botse gore ke go iše kua le kua. Le mo ke yago ga ke go tsebe. Boela morago le batho ba geno, gomme hle, a Morena e be yo botho go wena mme a go botegele.”

₂₁Eupša Itai a mo fetola a re: “Kgoši, ke go enela ka Morena yo a phelago gore ka mehla ke tla ya nago mo o yago gona, le ge e ka hlwa e le lehung.”

₂₂Dafida a mo fetola a re: “Go lokile. Fetela pele.” Ka gona Itai a fetela pele le banna ba gagwe ka moka le basadi le bana ba bona. ₂₃Batho ba be ba lla ka go hlaboša mantšu ge balatedi ba Dafida ba tloga. Kgoši a tshela moedi wa Kidrone, banna ba gagwe ba mo latela, gomme ba tšwa mmogo ba leba lešokeng.

₂₄Moprista Tsadoko o be a le moo a na le Balefi ba ba rwelego Polokelo ya Kgwerano ya Modimo. Ba e bea fase gomme ba se ke ba e kuka gape go fihlela batho ka moka ba tšwile motseng. Moprista Abiatare le yena o be a le gona. ₂₅Ke moka kgoši a re go Tsadoko: “Boetša Polokelo ya Kgwerano motseng. Ge ke kgahla Morena, ka letšatši le lengwe o tla mpuša a tlo mpontšha yona gotee le felo mo e dutšego ntshe. ₂₆Eupša ge ke sa mo kgahle – gona go lokile, a a dire ka nna se a se ratago.” ₂₇A tšwela pele a re go Tsadoko: “Bona, tloga le Ahimaatse, morwago, le Jonathane, morwa wa Abiatare, o ipoelele motseng, o se ke wa boifa selo. ₂₈Nna ke tla be ke letetše matšibogong a noka kua lešokeng go fihlela le mpotša tše di diregago.” ₂₉Ka gona Tsadoko le Abiatare ba boetša Polokelo ya Kgwerano Jerusalema, gomme ba dula fao.

₃₀Dafida a namela Thaba ya Mehlware a lla; o be a se a rwala dieta, a bile a ikhurumeditše hlogo, e le sešupo sa manyami. Bohle ba ba bego ba mo latela le bona ba be ba ikhurumeditše dihlogo ba lla. ₃₁Ge Dafida a botšwa gore Ahitofele o tsene mpherefereng wa Absalomo, a rapela a re: “Hle, Morena, phuhlamiša dikeletšo tša Ahitofele.”

₃₂Ge Dafida a fihla kua godimo ga thaba moo go bego go le lefelo la tirelo, Hushai, Moaraki, a mo gahlanetša a gagotše diaparo tša gagwe mme a itšhetše hlogo ka mobu. ₃₃Dafida a re go yena: “O ka se nthuše ka selo ge o ka sepela le nna, ₃₄eupša o ka nthuša ka go boela motseng mme wa botša Absalomo gore bjale o tla mo direla ka potego bjalo ka ge o be o direla tatagwe. Gomme o leke ka moo o ka kgonago go gana keletšo ye nngwe le ye nngwe ye Ahitofele a e rotošago. ₃₅Moprista Tsadoko le moprista Abiatare ba tla be ba le gona; o ba botše se sengwe le se sengwe se o se kwago mošate. ₃₆Ba na le barwa ba bona, Ahimaatse le Jonathane, gomme o ka roma bona go nna ba tliša ditaba ka moka tše o di kwago.”

₃₇Ka gona Hushai, mogwera wa Dafida, a boela motseng ge Absalomo a sa goroga.