To The Word – Day 83

₁Joaba o ile a botšwa gore Dafida o llela Absalomo, ebile o mo iletše. ₂Ka gona lethabo la go fenya la fetogela madira ka moka a Dafida manyami letšatši leo, ka gobane ba be ba kwele gore kgoši o llela morwa wa gagwe. ₃Ba ile ba boela motseng ba homotše, ba le bjalo ka bahlabani ba ba lewago ke dihlong ka gore ba tšo tšhaba ntweng. ₄Kgoši a ipipa sefahlego gomme a hlaboša lentšu a lla a re: “Joo ngwanaka! Ngwanaka Absalomo! Absalomo, ngwanaka!”

₅Joaba a ya ngwakong wa kgoši gomme a re go yena: “Lehono o lešitše banna ba gago dihlong – banna ba ba phološitšego wena le barwa ba gago le barwedi ba gago le basadi ba gago le metlabo ya gago. ₆O hloile bao ba go ratago mme o rata bao ba go hloilego! Lehono o laeditše gore balaodi ba madira a gago le banna ba gago ga se selo go wena. Ke a bona gore o be o tla thaba ge Absalomo a ka be a phela lehono gomme rena ka moka re hwile. ₇Bjale tsoga o yo kgothatša banna ba gago. Ke ena ka leina la Morena gore ge o ka se ye, banna ba gago ka moka ba tla go tlogela bjona bošego bjo. Bjoo e tla ba bobe bjo bogologolo bjo e sa lego e eba wena o sego wa ka wa bo bona.” ₈Ke moo kgoši a tsogilego gomme a ya a dula lesorong la kgoro ya motse. Banna ba gagwe ba kwa gore kgoši o fao, gomme ba mo kgobokanela ka moka.

Baisraele ka moka ba be ba tšhabile, yo mongwe le yo mongwe a tšhabetše lapeng la gagwe. ₉Nageng ka moka ba ile ba thoma go lwa seng sa bona. Ba botšana ba re: “Kgoši Dafida o re bolokile manabeng a rena. O re phološitše go Bafilista, eupša bjale o tšhabile Absalomo mme o tšwile mo nageng ye. ₁₀Re be re tloditše Absalomo gore e be kgoši ya rena, eupša o bolailwe ntweng. A bjale re reng re no itulela re sa bušetše Dafida mo?”

₁₁Ditaba tšeo Baisraele ba bego ba di bolela tša fihla ditsebeng tša Kgoši Dafida. Ka gona yena a roma moprista Tsadoko le moprista Abiatare gore ba yo botšiša baetapele ba Juda ba re: “Ke ka lebaka lang le eba ba mafelelo go thuša go bušetša kgoši mošate ga gagwe? ₁₂Ke lena bomorwarre, re madi a tee; ke ka lebaka lang le swanetše go ba ba mafelelo go mpušetša moo?” ₁₃Dafida a ba botša le gore ba re go Amasa: “Ke wena madi ešo. Go tloga bjale ke go bea molaodi wa madira sebakeng sa Joaba. A Modimo a mpolaye thoo ge nka se go bee yena!” ₁₄Mantšu ao a Dafida a dira gore banna ka moka ba Juda ba eme naye ka botlalo, gomme ba mo romela molaetša wa gore a boe le bahlankedi ba gagwe ka moka.

₁₅Tseleng ya ge a boela morago a gahlanetšwa ke banna ba Juda ba ba bego ba tlile Gilgale go tlo mo tshediša noka. ₁₆Ka yona nako yeo Shimi, Mobenjamene, morwa wa Gera wa Bahurime, a potlakela Jordane go yo gahlanetša Kgoši Dafida. ₁₇O be a na le banna ba sekete ba kgoro ya Benjamene. Gomme Tsiba, mohlanka wa lapa la Saulo, le yena a tla le barwa ba gagwe ba lesome le ba bahlano le bahlanka ba masome a mabedi, mme ba fihla Jordane pele ga ge kgoši a fihla. ₁₈Ba tshela noka go tlo tshediša ba mošate le go dira tšohle tše kgoši a di nyakago.

Ge kgoši a sa itokišetša go tshela, Shimi a itahlela fase pele ga gagwe, ₁₉a re: “Kgoši, hle, lebala phošo yela ka go e dira tšatši lela o tloga Jerusalema. O se ke wa ntshwara ka pelo ka yona goba wa hlwa o sa e gopola. ₂₀Ke a tseba, nna, mohlanka wa gago, gore ke dirile sebe, gomme lebaka ke lona leo ge ke le wa mathomo wa dikgoro tša ka leboa wa go tlo gahlanetša kgoši lehono.”

₂₁Abishai, morwa wa Tseruya, a re: “Shimi o swanetše go bolawa ka gobane o rogakile yo Morena a mo tloditšego gore e be kgoši.”

₂₂Eupša Dafida a re go Abishai le go Joaba, morwarragwe: “Tša ka ga di le ame, lena barwa ba Tseruya. Na ge le realo ga le lwe le nna? Ke nna yo bjale ke lego kgoši ya Israele gape, gomme ga go Moisraele yo a tlago bolawa lehono.” ₂₃Gomme a re go Shimi: “Ke a go enela gore o ka se bolawe.”

₂₄Ke moo Mefiboshete, setlogolo sa Saulo, a theogilego go tlo gahlanetša kgoši. O be a se a ka a hlapa maoto, goba a kota maledu, goba a hlatswa diaparo tša gagwe go tloga ka nako yela kgoši a tlogilego Jerusalema go fihlela ge a boa a bolokegile. ₂₅Ge Mefiboshete a fihla a etšwa Jerusalema a tlile go gahlanetša kgoši, kgoši a re go yena: “Mefiboshete, lebaka ke eng o se wa sepela le nna?”

₂₆Mefiboshete a mo fetola a re: “Bjalo ka ge o tseba, kgoši, ke golofetše. Ke boditše mohlanka wa ka gore a saletše pokolo ya ka gore ke e namele ke sepele le wena, eupša o ntahleditše. ₂₇O ntshentše leina go wena, kgoši, eupša wena o bjalo ka morongwa wa Modimo, ka gona dira se o bonago se lokile. ₂₈Lapa la tate ka moka le be le lebanwe ke go bolawa ke wena, kgoši, eupša nna o mpeile le bao ba jago le wena. Ga ke na le tokelo ya go ka kgopela se sengwe gape go wena, kgoši.”

₂₉Kgoši a mo fetola a re: “O boletše, go lekane. Ke rerile gore wena le Tsiba le arolelaneng thoto ya Saulo.”

₃₀Mefiboshete a mo fetola a re: “A Tsiba a tšee thoto yeo ka moka. Nna go ntekane ge kgoši a boetše mo gae a bolokegile.”

₃₁Barsilai, Mogileade, le yena o be a tlile a etšwa Rogelime go tlo felegetša kgoši go mo tshediša Jordane. ₃₂Barsilai e be e le mokgalabje kudu, a na le mengwaga ye masome a seswai. O be a humile kudu, gomme e le yena a bego a efa kgoši dijo mola kgoši a sa dula kua Mahanaime. ₃₃Kgoši a re go yena: “Yaa le nna Jerusalema, gomme ke tla go fepa.”

₃₄Eupša Barsilai a mo fetola a re: “Ga ke sa na matšatši a mantši a go phela; ke go reng ke swanetše go ya Jerusalema le wena, kgoši? ₃₅Ke šetše ke na le mengwaga ye masome a seswai, gomme ga ke sa thabišwa ke selo. Ga ke sa kwa bose bja seo ke se jago goba seo ke se nwago, le mantšu a baopedi ba banna le ba basadi ga ke sa kgona go a kwa. Ke tla no go imela, wena kgoši. ₃₆Nna, mohlanka wa gago, ke tla go felegetša gannyane ka go tshediša noka ya Jordane. Ga ke a swanela moputso wo mogolo ka mokgwa woo. ₃₇Hle, a ke ipoelele gae mme ke yo ikhwela kgauswi le lebitla la batswadi ba ka. Kimehamo, mohlanka wa gago, šo; sepela naye, kgoši, mme o mo direle se o bonago se lokile.”

₃₈Kgoši a mo fetola a re: “Ke tla sepela le yena gomme ka mo direla se sengwe le se sengwe se o se nyakago. Gomme ke tla go direla tšohle tše o nkgopelago tšona.” ₃₉Ke moo Kgoši Dafida le banna ba gagwe ka moka ba tshetšego Jordane. A atla Barsilai, a mo šegofatša, gomme Barsilai a ipoelela gae.

₄₀Ge kgoši a tshetše a felegeditšwe ke banna ka moka ba Juda le seripa sa banna ba Israele, a leba Gilgale, mme Kimehamo a sepela le yena. ₄₁Baisraele ka moka ba ya go kgoši gomme ba re go yena: “Kgoši, ke ka lebaka lang bomorwarragorena, banna ba Juda, ba ile ba gopola gore ba na le tokelo ya go go tšea le go felegetša wena le lapa la gago le banna ba gago, ba go tshediša Jordane?”

₄₂Banna ba Juda ba ba fetola ba re: “Re dirile taba yeo ka gobane kgoši ke yo mongwe wa rena. Ka gona se re se dirilego se ka le befediša bjang? Ga se a lefela dijo tša rena goba a re fa selo.”

₄₃Baisraele ba ba fetola ba re: “Kgoši Dafida ke wa rena galesome go feta lena, le ge e ka hlwa e le yo mongwe wa lena. Ke ka lebaka lang le re nyatša? Le se ke la lebala gore e bile rena ba mathomo ba go rera go yo buša kgoši!”

Eupša banna ba Juda ba bolela ka bogale go feta banna ba Israele.

₁Moo Gilgale go be go na le monna yo mongwe yo mobe yo leina la gagwe e bego e le Sheba, morwa wa Bikri, wa kgoro ya Benjamene. O ile a letša phalafala, a goelela a re: “Ga re iše felo ka Dafida! Ga ra hlakanela selo le morwanyana yoo wa Isai! Banna ba Israele, a re ikeleng gae!”

₂Ka gona banna ba Israele ba tlogela Dafida ba sepela le Sheba, eupša banna ba Juda bona ba fela ba botegela Dafida mme ba mo latela go tloga Jordane go yo fihla Jerusalema.

₃Ge Dafida a fihla mošate ga gagwe kua Jerusalema, a tšea metlabo yela ye lesome ye a ilego a e tlogela gore e hlokomele mošate, gomme a e bea ka ngwakong wo o letilwego. A fela a ba hlokomela ka tše ba di nyakago, eupša a se ke a robala nabo. Ba ile ba dula thokwana bophelo bja bona ka moka, ba phela bjalo ka bahlologadi.

₄Kgoši a re go Amasa: “Kgobokanya banna ba Juda mme o tle nabo mo go hlwa bosasa.” ₅Amasa a yo ba bitša, eupša a se ke a boa ka nako yela kgoši a e beilego. ₆Ka gona kgoši a re go Abishai: “Sheba o tla re swariša bothata bja go feta bjo Absalomo a bego a re swarišitše bjona. Tloga le banna ba ka o mo hlomare gore a se tsene metseng ye e ageleditšwego ka merako mme ya ba gona ge a re timeletše.” ₇Ka gona banna ba Joaba le baleti ba kgoši le bahlabani ba bangwe ka moka ba tloga Jerusalema gore ba hlomare Sheba. ₈Ge ba fihla lerakong le legolo kua Gibeone ba gahlana le Amasa. Joaba o be a apere tša ntwa le tšhoša e le ka segatleng sa yona se se tlemeletšwego lepanteng la gagwe. Ge a batamela Amasa tšhoša yela ya wa. ₉Joaba a re go Amasa: “Go bjang, mogwerake?” Gomme a mo swara ka maledu ka seatla sa la go ja gore a mo atle. ₁₀Amasa o be a se a gopola go phema tšhoša ye Joaba a bego a e swere ka seatla se sengwe, gomme Joaba a mo tsetsemetša dimpa ka yona, dikateng tša gagwe tša kgothogela fase. A hwa ka pelapela, mo e lego gore Joaba o ile a se ke a mmoeletša.

Ke moo Joaba le Abishai, morwarragwe, ba tšwetšego pele ba hlomara Sheba. ₁₁Yo mongwe wa banna ba Joaba a ema kgauswi le setopo sa Amasa, a goelela a re: “Yo mongwe le yo mongwe yo a emego le Joaba le Dafida a a latele Joaba!” ₁₂Setopo sa Amasa seo se bego se ripitla mading se be se rapaletše gare ga tsela. Monna yo mongwe wa Joaba a bona gore yo mongwe le yo mongwe o ema fao, ka gona a goga setopo seo moo tseleng a se iša ka thoko gomme a se pipa ka kobo. ₁₃Ka morago ga ge setopo seo se tlošitšwe moo tseleng, yo mongwe le yo mongwe a latela Joaba go hlomara Sheba.

₁₄Sheba o ile a putla dinaga tša dikgoro ka moka tša Israele gomme a fihla motseng wa Abele-Bethe-Maaka; batho ka moka ba kgorwana ya Bikri ba kgobokana mme ba mo šala morago ba tsena motseng. ₁₅Banna ba Joaba ba fihla ba dikanetša motse woo. Ba kgobela dintotoma tša mobu go ipata le morako wa motse, ba ba ba thoma go epa morako woo go o uša. ₁₆Go be go na le mosadi yo bohlale ka moo motseng yo a ilego a goa a le godimo ga morako a re: “Theetšang! Theetšang! Botšang Joaba a tle mo; ke nyaka go bolela le yena.” ₁₇Joaba a batamela, gomme mosadi a mmotšiša a re: “A ke wena Joaba?”

Yena a mo fetola a re: “Ee, ke nnaena.”

Mosadi a re: “Theetša se nna, mohlanka wa gago, ke se bolelago.”

Joaba a mo fetola a re: “Ke theeditše.”

₁₈Mosadi a re: “Kgale batho ba be ba tlwaetše go re: ‘Sepelang le yo kgopela maele motseng wa Abele’; e be e le ka mo ba hwetšago tharollo. ₁₉Wo wa rena ke motse wo mogolo, ke wo mongwe wa metse ya khutšo le potego go fetišiša mo Israele. Ke ka lebaka lang o leka go o fediša? A o nyaka go pšhatla se e lego sa Morena?”

₂₀Joaba a mo fetola a re: “Le gatee! Le gatee nka se ke ka pšhatlaganya motse wa lena ka o fediša! ₂₁Ga go bjalo. Monna yo leina la gagwe e lego Sheba, morwa wa Bikri, yo a tšwago nageng ya dithaba ya Efraime, o tsošeditše Kgoši Dafida mpherefere. Re neeleng monna yoo a nnoši, gomme ke tla tloga mo motseng wo.”

Mosadi a re: “Re tla go lahlela hlogo ya gagwe ka morako.” ₂₂Ke moo a ilego go batho ba motse ka leano leo la gagwe, gomme ba ripa Sheba hlogo ba e lahlela Joaba ka kua ga morako. Joaba a letša phalafala e le sešupo sa gore banna ba gagwe ba tlogele motse woo. Gomme a boela Jerusalema go kgoši.

₂₃Joaba o be a laola madira a Israele; Benaya, morwa wa Joyada, o be a hlokometše baleti ba Dafida; ₂₄Adoniramo o be a laola mediro ya kgapeletšo; Joshafate, morwa wa Ahilude, e be e le mongwaledi wa mmušo; ₂₅Sheba e be e le mongwaledi wa kgoši; Tsadoko le Abiatare e be e le baprista, ₂₆mme Ira wa motse wa Jaire le yena e le moprista wa Dafida.

₁Mehleng ya pušo ya Dafida go ile gwa wa tlala ye šoro ye e ilego ya tšea mengwaga ye meraro. Ka gona Dafida a boledišana le Morena ka tlala yeo, gomme Morena a re: “Saulo le lapa la gagwe ba na le molato wa polao; o bolaile batho ba Gibeone.” ₂Batho ba Gibeone e be e se Baisraele; e be e le mašaledi a Baamore ao Baisraele ba ilego ba a enela gore ba tla a šireletša, eupša Saulo o ile a leka go ba feleletša ka lebaka la ge a be a nyaka gore naga yohle ya Kanana e laolwe ke Baisraele le Bajuda. ₃Ka gona Dafida a bitša batho ba Gibeone a re go bona: “Ke le direle eng? Ke nyaka go lefeletša phošo yela la go ka la e dirwa, gore le tle le šegofatše setšhaba sa Morena.”

₄Bona ba mo fetola ba re: “Phapano ya rena le Saulo le lapa la gagwe e ka se fedišwe ka silibera le gauta, le gona ga re nyake go bolaya Moisraele le o tee.”

Dafida a ba botšiša a re: “Bjale le re ke le direle eng?”

₅Bona ba mo fetola ba re: “Saulo o be a logile maano a go re feleletša gore re se hlwe re eba gona nageng yohle ya Israele. ₆Ka gona re neele ditlogolo tša gagwe tša banna tše di šupago, gomme re tla ba lekeletša pele ga Morena kua Gibea, motse wa gaboSaulo, kgoši yela e kgethilwego ya Morena.”

Kgoši a ba fetola a re: “Ke tla le neela bona.”

₇Fela Dafida, ka lebaka la keno ye a itlemilego le Jonathane ka yona pele ga Morena, a šadiša morwa wa Jonathane, Mefiboshete, setlogolo sa Saulo. ₈A tšea Armoni le Mefiboshete, barwa ba babedi ba Ritsepa, morwedi wa Aya, bao a ba belegetšego Saulo, le barwa ba bahlano ba morwedi wa Saulo, Merabe, bao a ba belegetšego Adriele, morwa wa Barsilai, yo a bego a etšwa Mehola. ₉Dafida a ba neela batho ba Gibeone. Bona ba ba lekeletša godimo ga thaba pele ga Morena, gomme ba ba šupago bao ba hwa gotee. E be e le nakong ya ge go thongwa go bunwa garase ge ba bolawa.

₁₀Ke moo motlabo wa Saulo, Ritsepa, morwedi wa Aya, a tšerego masaka a a ala letlapeng lela ditopo di bego di le go lona, gomme a dula fao go tloga mathomong a ge go bunwa go fihlela ge dipula di ena. Mosegare o be a raka manong moo ditopong, gomme bošego a raka dibata.

₁₁Ge Dafida a ekwa se Ritsepa a se dirilego, ₁₂o ile a yo tšea mašapo a Saulo le a Jonathane, morwa wa Saulo, go batho ba Jabeshe kua Gileade. Bona ba be ba a utswitše lebaleng kua Bethe-Sheane moo Bafilista ba ilego ba lekeletša ditopo tšeo ka letšatši lela ba bolaya Saulo thabeng ya Gilboa. ₁₃Dafida a laela gore go tšewe mašapo a Saulo le a Jonathane mme go kgobokanywe le a banna bale ba šupago ba go lekeletšwa. ₁₄Ba boloka mašapo a Saulo le a Jonathane lebitleng la tatagoSaulo, Kishe, kua Tsela, nageng ya Benjamene, ba dira tšohle tše kgoši a di laetšego. Gomme ka morago ga moo Modimo a kwa dithapelo tša bona ge ba rapelela naga.

₁₅Go ile gwa tsoga ntwa ye nngwe ya Bafilista le Baisraele, gomme Dafida le banna ba gagwe ba ya ba lwa le Bafilista. Ntweng yeo Dafida a lapa. ₁₆Tšitširipa ye leina la yona e bego e le Jishbi-Benobo, yo a bego a swere lerumo la mphiri la boima bja dikilokramo tše tharo le seripa, a hlometše tšhoša ye mpsha lethekeng, a gopola gore a ka bolaya Dafida. ₁₇Eupša Abishai, morwa wa Tseruya, a thuša Dafida, a hlasela tšitširipa yeo gomme a e bolaya. Ke moo banna ba Dafida ba enišitšego yena Dafida gore a se tsoge a ile le bona gape ntweng. Ba re: “Ke wena lebone la Israele, gomme o se ke wa dira gore lebone leo le tingwe.”

₁₈Ka morago ga fao gwa ba le ntwa le Bafilista kua Gobo, moo Sibekai wa Husha a ilego a bolaya tšitširipa ye leina la yona e bego e le Sipai.

₁₉Gwa tsoga ntwa ye nngwe gape le Bafilista kua Gobo, gomme Elhanane, morwa wa Jaire wa Betlelehema, a bolaya Goliate wa Gathe, yo theko ya lerumo la gagwe e bego e lekana le mpheng wa mogoma.

₂₀Ka morago gwa ba le ntwa ye nngwe kua Gathe, moo go bego go le tšitširipa ye teleletelele. O be a na le menwana ye e selelago seatleng sa go ja le ye e selelago seatleng sa nngele, gomme le maotong ka mabedi a na le ye e selelago. ₂₁O ile a rumola Baisraele, gomme Jonathane, morwa wa Shama, morwarragoDafida, a mmolaya.

₂₂Ba bane bao e be e le ditlogolo tša ditšitširipa tša Gathe, gomme ba ile ba bolawa ke Dafida le banna ba gagwe.

₁Ge Morena a phološitše Dafida go Saulo le manabeng a gagwe ka moka, Dafida a mo opelela kopelo ye:

₁Mantšu a Dafida a mafelelo šea: “Yo a bolelago ke Dafida, morwa wa Isai, monna yo Modimo a ilego a mo dira yo mogolo, yo Modimo wa Jakobo a mo tloditšego gore e be kgoši, gape yo e bego e le mohlami wa dikopelo tše botse tša Israele.

₈Bahlabani ba Dafida ba bagale šeba: Wa mothomo e be e le Joshebe-Bashebete, Mohakmone, yo e bego e le moetapele wa “Bararo”; o ile a lwa le banna ba makgolo a seswai ka lerumo la gagwe gomme a ba bolaya ka moka ntweng e tee.

₉Wa bobedi wa “Bararo” bao ba bagale e be e le Eleasara, morwa wa Dodo, wa kgorwana ya Ahoage. Ka letšatši le lengwe yena le Dafida ba ile ba lwa le Bafilista ba ba bego ba kgobokanetše go lwa. Baisraele ba ile ba katakata, ₁₀eupša yena a ema senna a lwa le Bafilista go fihlela letsogo la gagwe le ehwa bogatšu mme a sa hlwe a kgona go lesa tšhoša ya gagwe. Tšatši leo Morena a fentšha Baisraele fenyang. Ge ntwa e seno fela Baisraele ba boela go Eleasara, e le fela go thopela ditopo.

₁₁Wa boraro wa “Bararo” bao ba bagale e be e le Shama, morwa wa Age, wa Harare. Bafilista ba be ba kgobokane kua Lehi, moo go bego go le tšhemo ya dihlodi. Baisraele ba tšhaba Bafilista, ₁₂eupša Shama a ema senna moo tšhemong a e šireletša, mme a bolaya Bafilista. Morena a fentšha Baisraele fenyang tšatšing leo.

₁₃Ge go batametše lebaka la go buna, ba bararo ba “Ba Masome a Mararo” ba ile ba theogela leweng la Adulamo, moo Dafida a bego a le gona, mola sehlopha sa Bafilista se be se hlomile mešaša ka molaleng wa Barafa. ₁₄Ka nako yeo Dafida o be a le ka sebong thabeng, gomme sehlopha sa Bafilista se be se thopile Betlelehema. ₁₅Dafida a kwa a nyoretšwe meetse a gabo gomme a re: “Nke nkabe motho a yo nkgela meetse sedibeng sa lesorong la kgoro ya Betlelehema!” ₁₆Bahlabani bale ba bararo ba bagale ba šwahla mešaša ya Bafilista, ba yo ga meetse sedibeng seo, gomme ba a tlišetša Dafida. Fela a se ke a a nwa, eupša a a tšholla ya ba kabelo go Morena ₁₇a re: “Morena, nka se ke ka nwa meetse a! Ge nka a nwa go ka swana le ge ke enwa madi a banna ba, bona ba ilego ba ipea kotsing ya lehu.” Ka gona a gana go a nwa.

Tšeo e bile ditiro tše bogale tša bahlabani bao ba bararo ba bagale.

₁₈Abishai, yo morwarragwe e bego e le Joaba, mmagobona e le Tseruya, e be e le moetapele wa “Bagale ba Masome a Mararo”. O ile a lwa le banna ba makgolo a mararo ka lerumo, a ba bolaya, gomme a thoma go tuma gare ga bao “Ba Masome a Mararo”. ₁₉Ke yena a bego a tumile kudu moo gare ga “Ba Masome a Mararo” gomme e ile ya ba moetapele wa bona, eupša o be a se a tuma bjalo ka “Bararo” bale.

₂₀Benaya, morwa wa Joyada, wa go tšwa Kabtsiele, e be e le mohlabani yo mongwe yo bogale; o dirile ditiro tše ntši tše kgolo, go balwa le go bolaya bahlabani ba babedi ba bagolo ba Bamoaba. O kile a theogela ka moleteng ka letšatši la leswela, a bolaya tau. ₂₁Le gona o kile a bolaya monna yo mongwe wa tšitširipa wa Moegepeta yo a bego a swere lerumo. Benaya a mo hlasela ka molamo, a ubula lerumo lela seatleng sa Moegepeta, a mmolaya ka lona. ₂₂Tšeo e bile ditiro tše bogale tša Benaya yo le yena a bego a tumile gare ga “Ba Masome a Mararo”. ₂₃O ile a tuma kudu gare ga bona, eupša a se swane le “Bararo” bale. Dafida a mmea mohlokomedi wa baleti ba gagwe.

_24-39Ba bangwe ba “Ba Masome a Mararo” šeba:

Bahlabani ba bagale ka moka e be e le ba masome a mararo le ba ba šupago.

₁Morena a galefela Baisraele gape, gomme a hlohleletša Dafida gore a ba tshwenye. A re go yena: “Sepela o bale batho ba Israele le ba Juda.” ₂Ka gona Dafida a laela Joaba, molaodi wa madira a gagwe, a re: “Sepela le balaodi ba gago le ye dikgorong ka moka tša Israele, go akaretša naga ka moka, gomme le baleng setšhaba. Ke nyaka go tseba gore ke ba bakae.”

₃Joaba a mo fetola a re: “Kgoši, a Morena Modimo wa gago a atiše setšhaba sa Israele galekgolo, gomme nke o ka phela gore o tle o bone ge a ba atiša bjalo. Bjale ke ka lebaka lang kgoši a nyaka go bala batho?” ₄Eupša kgoši a gapeletša Joaba le balaodi ba gagwe gore ba phethe taelo ya gagwe; ba tloga go yena gomme ba ya go bala setšhaba sa Israele.

₅Ba ile ba tshela noka ya Jordane mme ba hloma mešaša ka borwa bja Aroere, motse wo o lego ka moeding, nageng ya Gade. Go tloga moo ba ya Jasere, ₆mme ba ya le kua Gileade le Kadeshe, nageng ya Bahete. Ke moka ba ya Dane, mme go tloga Dane ba arogela Sidone. ₇Go tloga moo ba ya motseng wa Tirose wo o ageleditšwego ka morako, ba fetela le metseng ya Bahibe le ya Bakanana, ba feleletša ka go ya Beresheba, ka thokong ya ka borwa ya Juda. ₈Ka gona, ka morago ga dikgwedi tše senyane le matšatši a masome a mabedi ba boela Jerusalema ba sepetše naga ka moka. ₉Ba ile ba begela kgoši palo ya banna ba e ka bago bahlabani: dikete tše makgolo a seswai mo Israele, le tše makgolo a mahlano mo Juda.

₁₀Eupša ya re ge Dafida a badile setšhaba, letswalo la thoma go mo ja, gomme a re go Morena: “Ke dirile sebe se segolo ka taba ye! Hle, ntebalele. Ke dirile tša botlaela.”

_11-12Morena a re go Gade, moprofeta wa Dafida: “Sepela o yo botša Dafida gore a ikgethele se tee dilong tše tharo tše ke tlago mmotša tšona. Ke tla dira se a se kgethago.” Ka moswane ge Dafida a tsoga, ₁₃Gade a ya go yena a mmotša se Morena a se boletšego, gomme a mmotšiša a re: “A o kgetha eng? Mengwaga ye meraro ya tlala nageng ya gago, goba dikgwedi tše tharo o fenywa ke manaba a gago, goba matšatši a mararo a bolwetši bja leuba nageng ya gago? Bjale gopodišiša taba ye, gomme o mpotše gore ke fetole yo a nthomilego ke reng.”

₁₄Dafida a mo fetola a re: “Ke mo tlalelong ye kgolo! Eupša ga ke nyake go otlwa ke batho. A Morena e be yena yo a re otlago, ka gobane o na le kgaugelo.” ₁₅Ka gona Morena a tliša bolwetši bja leuba mo Israele bjo bo ilego bja thoma mosong woo go fihlela ka nako ye a e beilego. Nageng ka moka gwa hwa Baisraele ba dikete tše masome a a šupago. ₁₆Ya re ge morongwa wa Morena a emiša letsogo gore a fediše Jerusalema, Morena a kwela batho bohloko gomme a re go morongwa yo a bego a ba bolaya: “Ema! Go lekane!” Morongwa o be a le seboeng sa Arauna, Mojebuse.

₁₇Dafida a bona morongwa yo a bego a bolaya batho, gomme a re go Morena: “Ke nna yo ke dirilego sebe. Ke nna yo ke phošitšego. Batho ba bona ba dirile eng? Otla nna le lapa la ka.”

₁₈Ka lona letšatši leo Gade a ya go Dafida a re go yena: “Rotogela mola seboeng sa Arauna gomme o agele Morena aletare fao.” ₁₉Dafida a phetha taelo ya Morena gomme a ya fao bjalo ka ge Gade a mmoditše. ₂₀Arauna ge a gadima tlase a bona kgoši le bahlankedi ba gagwe ba rotogela go yena. A mo obamela ₂₁mme a mmotšiša a re: “Kgoši, mong wa ka, o reng o tlile go nna, mohlanka wa gago?”

Dafida a mo fetola a re: “Ke tlile go reka seboa sa gago gore ke agele Morena aletare gore bolwetši bja leuba bo emišwe.”

₂₂Arauna a re: “Se tšee, kgoši, o direle Morena sehlabelo ka dikgomo tše di mo kgahlago. Dikgomo tše o ka direlago Morena dihlabelo tša go tšhungwa ka moka ka tšona šedi; dijoko tša tšona šedi le selei sa go fola, o ka di dira dikgong. ₂₃Tšohle tše, mong wa ka, ke go fa tšona, kgoši. A Morena Modimo wa gago a amogele sehlabelo sa gago.”

₂₄Eupša kgoši a mo fetola a re: “Aowa, ke tla di reka ka theko ya tšona. Nka se direle Morena Modimo wa ka dihlabelo ka tše ke sego ka di lefela selo.” Gomme a reka seboa le dikgomo ka dipapetlana tša silibera tše masome a mahlano. ₂₅A napa a agela Morena aletare, gomme a dira dihlabelo tša go tšhungwa ka moka le tša kagišano. Morena a kwa thapelo ya gagwe, gomme bolwetši bjoo bja leuba mo Israele bja emišwa.