Pesalome 5

₁Morena, o ntlhwaele tsebe,

ke a go rapela;

o ele mefegelo ya ka hloko.

₂O ntheeletše ge ke go llela,

wena Kgoši ya ka le Modimo wa ka,

gobane ke wena yo ke go rapelago.

₃O kwa lentšu la ka mosong, Morena;

ke go neela thapelo ya ka e sa le gosasa,

gomme ka letela gore o nkarabe.

₄Ga o Modimo wa go kgahlwa ke bokgopo;

modiradibe ga a dule le wena.

₅Baikgogomoši ga o nyake

le go ba bona;

bakgopo ka moka o ba hloile.

₆Ba maaka o a ba fediša;

babolai le dihwirihwiri o a ba šišingwa.

₇Fela, ka lebaka la lerato la gago le legolo,

nna ke kgona go tsena ka ntlong ya gago;

ke kgona go go khunamela Tempeleng ya gago ye kgethwa ke go hlompha.

₈Morena, o ntlhahle ka go loka ga gago,

ka gobane manaba a ka a ntaletše;

o ntokišetše tsela ya gago gore ke tšee ka yona.

₉Tše di bolelwago ke manaba a ka ga di tshephagale;

sa bona ke go nagana tshenyo fela.

Dipolelo tša bona di a bolaya,

ba na le maleme a boreledi.

₁₀Ba sekiše o ba otle, Modimo;

a ba ipolae ka maanomabe a bona.

Ba rake mo pele ga gago ka lebaka la dibe tša bona tše dintši,

gobane ba go tsogela maatla.

₁₁Bohle ba ba tšhabelago go wena a ba thakgale,

a ba fele ba hlalala.

O šireletše ba ba go ratago,

gore ba thakgale ka lebaka la gago.

₁₂Ba ba lokilego o a ba šegofatša, Morena;

o ba šireletša ka kotse ya botho bja gago.