To The Word – Day 77

₁Dafida a ya go moprista Ahimeleke kua Nobo. Ahimeleke a tšwa a thothomela a tlile go mo gahlanetša gomme a mmotšiša a re: “O reng o tlile mo o le noši?”

₂Dafida a mo fetola a re: “Ke tlile mo ka ditaba tša kgoši. O mpoditše gore ke se ke ka tsebiša motho se a nthomilego gore ke tle ke se dire. Ge e le banna ba ka bona, ke ba boditše gore ba nkgahlanetše lefelong le lengwe. ₃Bjale ge, a o na le se o ka mphago sona? Hle, mphe dinkgwa tše di fetšago seatla goba se sengwenyana se o nago naso.”

₄Moprista a re: “Ga ke sa na le dinkgwa tša mehleng; tše ke nago natšo ke dinkgwa tše kgethwa fela; o ka di tšea ge eba banna ba gago ga se ba robala le basadi kgauswinyana.”

₅Dafida a mo fetola a re: “Aowa, ga se ba robala le basadi. Banna ba ka ka mehla ba fela ba itlhwekiša ge re etšwa ka ditaba tša ka mehla; bjale ba ka se itlhwekiše bjang lehono mola re bile re tšwile ka ditaba tše e sego tša mehleng!”

₆Ka gona moprista a fa Dafida dinkgwa tšela tše kgethwa, ka gobane dinkgwa tše a bego a na le tšona e be e le fela tše di abetšwego Modimo, tše di bego di tlošitšwe tafoleng ye kgethwa mme legatong la tšona go beilwe tše di sa fišago.

₇Mookamedi wa badiši ba maruo a Saulo, Doege, wa Edomo, o be a le moo ka letšatši leo, ka gobane o be a tlile go phetha tshwanelo ya sedumedi.

₈Dafida a re go Ahimeleke: “A ga o na le lerumo goba tšhoša ye o ka mphago yona? Ditaelo tša kgoši di ntlošitše ka lephakuphaku ka ba ka hloka le nako ya go tšea tšhoša ya ka goba dibetša tše dingwe.”

₉Ahimeleke a mo fetola a re: “Ke na le tšhoša ya Goliate, Mofilista, yola o mmolailego molaleng wa Ela; e ka mola morago ga seaparo se sekgethwa, e phuthetšwe ka lešela. Ge o e nyaka, e tšee – ke sona sebetša se nnoši mo.”

Dafida a re: “Mphe yona. Ga go tšhoša ye e phalago yeo!”

₁₀Ka gona Dafida a tloga a tšhaba Saulo, gomme a ya go Kgoši Akishe wa Gathe. ₁₁Bakgomana ba Kgoši Akishe ba mmotšiša ba re: “A motho yo ga se Dafida, kgoši ya naga ya gabo? Yo ke monna yola basadi ba bego ba bina ba opela ka yena ba hlatlolana ba re: ‘Saulo o bolaile dikete, eupša Dafida o bolaile dikete tše masomesome.’ ”

₁₂Ge Dafida a ekwa tše ba di bolelago, a thoma go boifa Kgoši Akishe kudu. ₁₃Ka gona nako ye nngwe le ye nngwe ge ba le gona, Dafida o be a dira mo nkego ga a tšee gabotse mme a itshwara bjalo ka segafa ge ba leka go mo kgala; o be a ngwalangwala mo mamating a dikgoro tša motse gomme a intšha diteta di elela maledung. ₁₄Ka gona Akishe a re go bakgomana ba gagwe: “Bonang! Monna yo o a gafa! Ke ka lebaka lang le mo tlišitše go nna? ₁₅Ga ke re ke šetše ke na le digafa tše ntši mo? Bjale ke ka lebaka lang le ntlišetša se sengwe gape gore se tle se ntshwenye ka bogafa bja sona ka mo lapeng la ka?”

₁Dafida a tšhaba motseng wa Gathe a ya leweng kgauswi le motse wa Adulamo. Ge bomorwarragwe le ba bangwe ka moka ba lapa ba ekwa gore o fao, ba yo dula naye. ₂Batho ba ba bego ba le mathateng, le bao ba bego ba palelwa ke go lefa melato ya bona, le bao ba bego ba ngongorega ba ile ba ya go yena, ya ba banna ba e ka bago ba makgolo a mane, gomme yena ya ba moetapele wa bona.

₃Go tloga moo Dafida a ya Mitsepa kua Moaba gomme a re go kgoši ya Moaba: “Hle, dumelela tate le mme ba tle ba dule nago go fihlela ke tseba se Modimo a tlilego go ntirela sona.” ₄Ka gona Dafida a šadiša batswadi ba gagwe le kgoši ya Moaba, gomme ba dula moo nako ka moka ya ge Dafida a sa utamile ka sebong.

₅Eupša moprofeta Gade a tla go Dafida mme a re: “O se ke wa dula mo; napa o tloge o ye nageng ya Juda.” Ka gona Dafida a tloga a ya sethokgweng sa Herete.

₆Ka letšatši le lengwe Saulo o be a le Gibea, a dutše ka fase ga mohlare wa motamariske mmotong a swere lerumo la gagwe, gomme balaodi ka moka ba madira a gagwe ba eme kgauswi le yena. O ile a botšwa gore Dafida le banna ba gagwe ba bonwe, ₇mme a re go balaodi ba gagwe: “Theetšang, lena banna ba Benjamene! A le gopola gore morwanyana yola wa Isai a ka tla a le fa mašemo le dirapa tša merara ka moka ga lena, gomme a dira yo mongwe le yo mongwe wa lena molaodi wa ba lekgolo goba wa ba sekete? ₈A leo ke lona lebaka le le dirago gore ka moka ga lena le ntakane? Ga go yo a kilego a ntoma tsebe gore morwa wa ka o gwerane le Dafida. Ga go yo a nkwelago bohloko gare ga lena goba yo a ntshebelago gore Dafida, mohlanka wa ka, ka nako ye o nyaka nthobana ya go mpolaya, le gore morwa wa ka o mo hlohleletša go dira taba yeo!”

₉Doege o be a eme moo le balaodi ba madira a Saulo, gomme a re: “Ke bone Dafida nako yela a be a ile go Ahimeleke, morwa wa Ahitube, kua Nobo. ₁₀Ahimeleke o ile a botšiša Morena se Dafida a swanetšego go se dira, gomme ka morago ga moo a fa Dafida mphago le tšhoša ya Goliate, Mofilista.”

₁₁Ka gona Kgoši Saulo a roma batho gore ba yo bitša moprista Ahimeleke le meloko ya gagwe ka moka, bao le bona e bego e le baprista kua Nobo, gomme ba tla go yena. ₁₂Saulo a re go Ahimeleke: “Theetša, wena morwa wa Ahitube!”

Ahimeleke a re: “Ke theeditše, mong wa ka.”

₁₃Saulo a mmotšiša a re: “Ke ka lebaka lang wena le Dafida le ntakane? Ke ka lebaka lang o mo file mphago le tšhoša, mme wa botšiša Modimo se a swanetšego go se dira? Bjale o nkemetše ka maoto gomme o nyaka nthobana ya go mpolaya!”

₁₄Ahimeleke a mo fetola a re: “Dafida ke mohlankedi yo a go botegelago go feta bahlankedi ba gago ka moka. Ke mokgonyana wa gago, molaodi wa baleti ba gago, mme o hlompšha kudu kgorong ya mošate. ₁₅Ee, ke botšišitše Modimo se a swanetšego go se dira, gomme e be e se la mathomo le gatee. Ge e le mabapi le go go lakana gona, kgoši a se ke a rweša mohlanka wa gagwe molato, goba a rweša yo mongwe melokong yešo molato. Ga ke tsebe selo ka taba yeo!”

₁₆Kgoši a re: “Ahimeleke, o swanetše go hwa, wena le meloko ya geno ka moka.” ₁₇Ke moo a itšego go baleti ba ba bego ba eme kgauswi le yena: “Bolayang baprista ba Morena! Ba lakane le Dafida gomme ba se ntome tsebe gore o tšhabile, le ge ba be ba tseba taba yeo nako ye ka moka.” Eupša baleti ba gana nnang go bolaya baprista ba Morena. ₁₈Ka gona Saulo a re go Doege: “Wena ba bolaye!” Gomme Doege a ba bolaya ka moka. Ka letšatši leo a bolaya baprista ba masome a seswai a metšo ye e fetšago seatla, bao ba bego ba apara seaparo se sekgethwa. ₁₉Saulo a laela le gore le batho ba bangwe ka moka ba Nobo, motse wa baprista, ba bolawe: banna le basadi, bana le masea, dikgomo, dipokolo le dinku – batho ba bolawa ka moka le diphoofolo.

₂₀Eupša Abiatare, morwa yo mongwe wa Ahimeleke, a phologa, gomme a tšhabela go Dafida. ₂₁A mmotša ka moo Saulo a bolailego baprista ba Morena ka gona. ₂₂Dafida a re go yena: “Ke ile ge ke bona Doege kua tšatši lela, ka tseba gore ruri o ile go botša Saulo. Ka gona ke na le molato ge meloko ya geno ka moka e bolailwe. ₂₃Dula le nna gomme o se ke wa boifa. Saulo o nyaka go bolaya nna le wena bobedi bja rena, eupša ge o na le nna o tla bolokega.”

₁Dafida a kwa gore Bafilista ba hlasela motse wa Keila mme ba utswa mabele diboeng. ₂Ka gona a botšiša Morena a re: “A nka ya ka hlasela Bafilista?”

Morena a mo fetola a re: “Ee. Ba hlasele gomme o phološe ba Keila.”

₃Eupša banna ba Dafida ba re go yena: “Ge ešita mo Juda re phela ka go boifa, re ka napa ra kgona go tšwa ra ya Keila mme ra hlasela madira a Bafilista!” ₄Ka gona Dafida a botšiša Morena gape, gomme Morena a re go yena: “Sepela o yo hlasele Keila, ka gobane ke tla gafela Bafilista diatleng tša gago.” ₅Ka gona Dafida le banna ba gagwe ba ya Keila mme ba hlasela Bafilista; ba ba bolaya ka bontši gomme ba thopa maruo a bona. Ke ka mokgwa woo Dafida a ilego a phološa ba motse woo.

₆Mola Abiatare, morwa wa Ahimeleke, a tšhabela go Dafida kua Keila, o ile a tloga le seaparo se sekgethwa.

₇Saulo a botšwa gore Dafida o ile Keila, gomme a re: “Modimo o mo gafetše diatleng tša ka, ka gobane o itswaleletše ka ge a tsene motseng wo dikgoro tša wona di nago le ditswalelo le mapheko.” ₈Ka gona Saulo a rapa madira a gagwe gore a ye ntweng mme a theogele Keila, a dikanetše Dafida le banna ba gagwe.

₉Ge Dafida a ekwa gore Saulo o itokišetša go mo hlasela, a re go moprista Abiatare: “Tliša seaparo se sekgethwa mo.” ₁₀Ke moo Dafida a itšego: “Morena Modimo wa Israele, ke tloga ke kwele gore Saulo o itokišetša go tla mo Keila go tlo senya motse wo ka lebaka la ka, nna, mohlanka wa gago. ₁₁Na baetapele ba Keila ba tla nkgafela go Saulo? A ka nnete Saulo o tla tla, bjalo ka ge ke kwele? Morena Modimo wa Israele, nke o mphetole!”

Morena a mo fetola a re: “Saulo o tla tla.”

₁₂Dafida a mmotšiša gape a re: “A bjale baetapele ba Keila ba tla gafela nna le banna ba ka diatleng tša gagwe?”

Morena a mo fetola a re: “Ba tla le gafela.”

₁₃Ka gona Dafida le banna ba gagwe – ba e ka bago ba makgolo a a selelago – ba tloga Keila ka bjako mme ba ithalalela le naga. Ge Saulo a ekwa gore Dafida o tšhabile Keila, a se hlwe a eya gona.

₁₄Dafida o ile a phela ka dibong kua nageng ya dithaba, lešokeng la Sife. Saulo o be a mo nyaka ka mehla, eupša Modimo a se ke a gafela Dafida diatleng tša gagwe. ₁₅Dafida a bona gore Saulo o tloga a nyaka go mmolaya.

Dafida o be a le Horesha, kua lešokeng kgauswi le Sife. ₁₆Jonathane a ya go yena fao gomme a mo kgothaletša go Modimo ka go mmotša gore Modimo o tla mo šireletša, ₁₇a re go yena: “O se ke wa boifa. Tate Saulo a ka se go sware. Yena o tseba gabotse gore wena o tla ba kgoši ya Israele, le gore nna ke tla go latela ka maemo.” ₁₈Bobedi bja bona ba dira kgwerano pele ga Morena. Dafida a šala Horesha, gomme Jonathane a ya gae.

₁₉Batho ba bangwe ba Sife ba ya go Saulo kua Gibea gomme ba re: “Dafida o utamile nageng ya rena ka dibong kua Horesha thabeng ya Hakila, ka karolong ya ka borwa ya lešoka la Judea. ₂₀Re a tseba, kgoši, gore o tloga o nyaka go mo swara; ka gona tlaa nageng ya rena, gomme rena re tla mo gafela diatleng tša gago.”

₂₁Saulo a ba fetola a re: “A Morena a le šegofatše ka ge le nkwela bohloko! ₂₂Sepelang le yo nyakišiša gape; le boneng gabotsebotse mo a lego gona, le gore ke mang yo a mmonego fao. Ke kwa gore ke moradiana kudu. ₂₃Le nyakišišeng ka tlhokomelo mafelo ao a utamago go ona, mme ge le se no a tseba gabotse le tle le mpegele. Ke gona ke tlago ya le lena, gomme ge a sa le seleteng seo, ke tla mo tsoma go fihlela ke mo hwetša, le ge e ka ba ke tla tlemega go putuka dikgorwana ka moka tša Juda.”

₂₄Ka gona ba tloga ba boela Sife ba etile Saulo pele. Dafida le banna ba gagwe ba be ba le lešokeng la Maone, ka moeding wo o se nago meetse karolong ya ka borwa ya lešoka la Judea. ₂₅Saulo le banna ba gagwe ba ile ba tšwa go yo nyaka Dafida, eupša Dafida a sebelwa taba yeo gomme a ya lerakong lešokeng la Maone a fihla a dula gona. Ge Saulo a ekwa taba yeo, a šala Dafida morago. ₂₆Saulo le banna ba gagwe ba be ba le ka lehlakoreng le lengwe la thaba, Dafida le banna ba gagwe ba le ka go le lengwe. Ba be ba itlhaganetše gore ba šie Saulo le banna ba gagwe bao ba bego ba ba potapota gore ba ba sware. ₂₇Ka yona nako yeo gwa fihla motseta gomme a re go Saulo: “Boa ka pela! Bafilista ba šwahlela naga!” ₂₈Ka gona Saulo a lesa go rakediša Dafida gomme a yo lwa le Bafilista. Ke ka lebaka leo felo fao go bitšwago Lerako la Kgaoganyo.

₁Dafida a tloga a ya seleteng sa Engedi, moo a ilego a dula ka dibong. ₂Ge Saulo a boa a tšo lwa le Bafilista, o ile a botšwa gore Dafida o lešokeng la Engedi. ₃A tšea bahlabani ba dikete tše tharo ba a ba kgethilego mo Israele mme a tšama a nyaka Dafida le banna ba gagwe ka bohlabela bja Marako a Dikome. ₄A fihla leweng le lengwe kgauswi le meraka ya dinku ka thoko ga tsela, gomme a tsena ka moo leweng go yo ithoma. Lewa leo e be e le lona lela Dafida le banna ba gagwe ba bego ba utamile ka go lona ba le kua moseoseo. ₅Banna ba Dafida ba re go yena: “Bona, lehono ke letšatši lela Morena a bego a go botša lona ge a re: ‘Ke tla gafela lenaba la gago diatleng tša gago mme o le dire se o ratago go le dira sona.’ ” Dafida a khukhuna gomme a ripa morumo wa seaparo sa Saulo, Saulo a sa tsebe. ₆Eupša letswalo la Dafida la thoma go mo tshwenya, ₇gomme a re go banna ba gagwe: “A Morena a nthibele go gobatša mong wa ka, yo a mo kgethilego gore e be kgoši! Ga ke a swanela go mo gobatša le gannyane, ka gobane ke motlotšwa wa Morena!” ₈Ka gona Dafida a kgala banna ba gagwe gore ba se ke ba hlasela Saulo.

Saulo a emelela, a tšwa ka leweng, mme a wela tsela. ₉Ke moo Dafida a ilego a mo šala morago mme a mo goeletša a re: “Kgoši ya ka!” Saulo a retologa, gomme Dafida a khunama, a obamiša sefahlego ₁₀a re: “Ke ka lebaka lang o theetša batho ba ba rego ke leka go go kweša bohloko? ₁₁O ka bona ka bowena gore gonabjale ka mo leweng Morena o go gafetše diatleng tša ka mo nkego o re ke go bolaye, eupša ke go kwetše bohloko mme ka re nka se gobatše mong wa ka le gannyane, ka gobane ke motlotšwa wa Morena. ₁₂Lebelela, tate, bona morumo wa seaparo sa gago wo ke o swerego! Nkabe ke go bolaile, eupša ka no ripa morumo wo. Ka gona, iponele ka bowena mme o lemoge gore le gatee ga se ka ikemišetša go go gobatša goba go go tsogela maatla. O a ntsoma gore o mpolaye le ge ke se ka go phošetša. ₁₃A Morena a ahlole gore ke mang yo a nago le phošo, nna goba wena! A Morena a ntefeletše ka wena; ge e le nna nka se go kweše bohloko le gatee. ₁₄O tseba seema sa kgale se se rego: ‘Bobe bo dirwa fela ke batho ba babe.’ Ka gona nna nka se go kweše bohloko. ₁₅Na kgoši ya Israele o hlomere mang? O rakedišang? O rakediša mpša ye e hwilego, letsetsenyana le tee! ₁₆Moahlodi e tla ba Morena, mme a ahlola gore ke mang yo a nago le phošo, nna goba wena. O tla lebeledišiša taba ye, a ntšhireletša, mme a mphološa go wena.”

₁₇Ge Dafida a feditše go bolela, Saulo a re: “A e tloga e le wena, Dafida, ngwanaka?” Gomme a thoma go lla. ₁₈Ke moo a itšego go Dafida: “O mphala ka go loka. O bile yo botho go nna mola nna ke go dirile bobe! ₁₉Lehono o laeditše gabotse gore o ntoketše, ka gobane ga se wa mpolaya, le ge Morena a be a nkgafetše diatleng tša gago. ₂₀Kgane motho a ka re go swara lenaba la gagwe a le lesa le sepela a se a le kweša bohloko? Morena a go šegofatše ka lebaka la seo o ntiretšego sona lehono! ₂₁Bjale ke gona ke bonago gabotse gore o tla ba kgoši ya Israele, le gore bogoši bo tla tšwela pele ge o sa buša. ₂₂Fela nkenele ka leina la Morena gore o ka se bolaye ditlogolo tša ka, gore leina la ka le tle le se fedišwe.” ₂₃Dafida a mo enela gore a ka se di bolaye.

Ke moo Saulo a boetšego gae, gomme Dafida le banna ba gagwe ba boela sebong sa bona.

₁Samuele o ile a hwa, gomme Baisraele ka moka ba kgobokana ba mo llela. Ka morago ba mmoloka ga gabo kua Rama.

Ka morago ga fao Dafida a ya lešokeng la Parane. _2-3Go be go na le monna yo mongwe wa kgorwana ya Kalebe yo a bego a bitšwa Nabale. Yena o be a etšwa motseng wa Maone, mme a na le naga kgauswi le motse wa Karmele. E be e le monna wa mohumi kudu, a na le dinku tše dikete tše tharo le dipudi tše sekete. Abigaile, mosadi wa gagwe, e be e le yo mobotse a hlalefile, mola Nabale yena e le monna yo sehlogo le wa mekgwa ye mebe.

E rile ge Nabale a kota dinku tša gagwe kua Karmele, ₄Dafida a kwa taba yeo a le kua lešokeng. ₅Ka gona a roma masogana a lesome a ba laela gore ba ye Karmele, gomme ge ba fihla go Nabale ba fihliše madume a gagwe go yena. ₆A ba laela gore ba re go yena: “Nke o ka fela o atlega! Wena gotee le ba lapa la gago le iketle, le tšohle tše e lego tša gago di šegofatšwe. ₇Ke kwele gore o kota dinku tša gago, gomme ke nyaka gore o tsebe gore badiši ba gago ba bile le rena mme ga se ra ka ra ba tshwenya. Banna ba ka ga se ba ka ba ba utswetša selo nakong ka moka ya ge ba le Karmele. ₈Ba botšiše, gomme ba tla go botša. Masogana a ka a tlile ka letšatši la monyanya, gomme ke go kgopela gore o ba amogele gabotse. Hle, faa bahlanka ba gago le nna, Dafida, morwago, se o ka re fago sona.”

₉Banna ba Dafida ba fihliša molaetša woo go Nabale ka leina la Dafida. Ke moka ba leta, ₁₀gomme Nabale mafelelong a ba araba a re: “Dafida ke selo mang? Ke mang yena yoo morwa wa Isai? Mehleng yeno naga ye e tletše makgoba a a tšhabago! ₁₁Nka se tšee dinkgwa tša ka le meetse le diruiwa tše ke di hlabetšego bakoti ba dinku tša ka, ka di fa banna ba ba tšwago mo ke sa go tsebego!”

₁₂Banna ba Dafida ba boela go yena mme ba mmotša se Nabale a se boletšego. ₁₃Dafida a re go bona: “Tlemelelang ditšhoša tša lena!” Gomme ka moka ba di tlemelela. Dafida le yena a tlemelela ya gagwe tšhoša, mme a tloga le ba e ka bago ba makgolo a mane, a tlogela ba makgolo a mabedi gore ba šale le dithoto.

₁₄Yo mongwe wa bahlanka ba Nabale a re go Abigaile, mosadi wa Nabale: “A o kwele? Dafida o romile batseta a le lešokeng gore ba tle ba dumediše mong wa rena, eupša yena a ba fotlela, ₁₅le ge ba be ba re swere gabotse ruri; ga se ba ka ba re tshwenya, gomme nako ka moka ge re be re šika le bona kua nageng re fudiša dihuswane, ga se ra ka ra lahlegelwa ke selo. ₁₆Ba be ba re šireletša bošego le mosegare nako yeo ka moka ya ge re be re na le bona re dišitše mehlape ya rena. ₁₇Hle, gopodišiša taba ye mme o bone se o kago se dira. Taba ye e ka wetša mong wa rena le lapa la gagwe ka moka kotsing ye kgolo. O na le hlogo ye thata mo e lego gore ga a nyake go theetša motho!”

₁₈Abigaile a itlhaganela a tšea dinkgwa tše makgolo a mabedi, makuka a mabedi a beine, nama ya nku tše tlhano ye e budulego, dithuthupe tša dikilokramo tše lesome le tše di šupago, diphaphathi tše lekgolo tša makwapi a diterebe le diphaphathi tše makgolo a mabedi tša makwapi a mago, gomme a di nametša dipokolo. ₁₉A re go bahlanka: “Etang pele gomme nna ke tla le latela.” Eupša a se ke a botša monna wa gagwe selo.

₂₀Abigaile o be a nametše pokolo ya gagwe mo tsela e potologago thabana, ge ka bjako a gahlana le Dafida le banna ba gagwe ba etla go yena. ₂₁Dafida o be a eleletša a re: “Ke ka lefela ge ke be ke šireletša thoto ya monna yola mo lešokeng! Ga go selo sa gagwe se se ilego sa utswiwa, gomme bjale o nteboga ka mokgwa wo! ₂₂A Modimo a mpolaye thoo ge nka se bolaye banna bao ka moka pele ga ge letšatši le hlaba!”

₂₃Ge Abigaile a bona Dafida, o ile a fologa ka bjako mme a obama, a itahlela fase ka sefahlego pele ga gagwe, ₂₄a re go yena: “Hle, theetša se nna, mohlanka wa gago, ke se bolelago! A molato wo o rwalwe ke nna, mong wa ka. ₂₅Nke o hlokomologe Nabale, ke selo fela! E no ba seo leina la gagwe le se rago – setlatla! Ke be ke se gona ge bahlanka ba gago ba goroga, mong wa ka. ₂₆Gomme bjale ke ena ka Morena yo a phelago le ka wena gore ke Morena yo a go thibetšego go itefeletša wa bolaya manaba a gago. Nke manaba a gago le bohle ba ba nyakago go go kweša bohloko ba otlwe bjalo ka Nabale. ₂₇Hle, mong wa ka, amogela seloba se ke go tlišeditšego sona, mme o se fe banna ba gago. ₂₈Hle, ntebalele ge eba ke dirile phošo, nna, mohlanka wa gago. Morena o tla go dira kgoši, le tšona ditlogolo tša gago, ka gobane o lwa dintwa tša gagwe, gomme o ka se dire selo se sebe ge o sa phela. ₂₉Ge motho a ka go hlomara a nyaka go go bolaya, Morena Modimo wa gago o tla go boloka, wena, mong wa ka, bjalo ka ge motho a boloka selo se bohlokwa. Ge e le manaba a gago ona, o tla a lahlela kgole, bjalo ka motho ge a foša letlapa ka seragamabje. ₃₀Gomme mohla Morena a go direla tše botse ka moka tše a go holofeditšego tšona mme a go dira kgoši ya Israele, ₃₁gona, mong wa ka, o ka se hlwe o itshola goba o ipona molato, mong wa ka, ge o bolaetše batho lefeela goba ge o itefeleditše. Gomme ge Morena a go šegofatša, mong wa ka, hle, o se ke wa ntebala, nna, mohlanka wa gago.”

₃₂Dafida a re go yena: “A go retwe Morena Modimo wa Israele, yo lehono a go rometšego go tlo nkgahlanetša! ₃₃A Modimo a go šegofatše ka lebaka la ge o gopotše gabotse, le ka lebaka la seo o se dirilego lehono ka go nthibela go oba molato wa go tšholla madi, le ka go nthibela go itefeletša ka bonna. ₃₄Morena o nthibetše go go kweša bohloko. Eupša ke ena ka Modimo yo a phelago wa Israele gore mola o se ke wa itlhaganela go tla go nkgahlanetša, banna ba Nabale ka moka ba be ba tla be ba hwile mosong wa bosasa!” ₃₅Ke moo Dafida a amogetšego tše Abigaile a bego a mo tlišeditše tšona, gomme a re go yena: “Boela gae mme o se ke wa tshwenyega. Ke kwele se o se bolelago mme ke tla dira se o se kgopelago.”

₃₆Abigaile a boela go Nabale, yo a bego a le gae a dirile monyanya wo o swanelago kgoši. O be a tagilwe kudu mme a thabile, ka gona Abigaile a se ke a mmotša selo go fihlela mosong wa letšatši le le latelago. ₃₇Ya re ge a tšwilwe ke bjala, Abigaile a mmotša tšohle. Pelo ya gagwe ya ema mme a repha ditho ka moka. ₃₈Ka morago ga matšatši a e ka bago a lesome Morena a otla Nabale gomme a hwa.

₃₉Ge Dafida a ekwa gore Nabale o hwile a re: “A go retwe Morena! O ntefeleditše go Nabale ka ge a nthogile, mme o thibetše nna, mohlanka wa gagwe, go dira phošo. Morena o otlile Nabale ka lebaka la bobe bja gagwe.”

Ke moo Dafida a romilego bahlanka ba gagwe go Abigaile ka ditaba tša lenyalo. ₄₀Bahlanka bao ba ya go Abigaile kua Karmele mme ba re go yena: “Dafida o re romile gore re tle re go tšee o yo ba mosadi wa gagwe.”

₄₁Abigaile a obama, mme a re: “Ke nna mohlanka wa gagwe wa go hlapiša bahlanka ba gagwe maoto.” ₄₂A itokiša ka pela mme a namela pokolo ya gagwe. A felegetšwa ke bahlanka ba gagwe ba basadi ba bahlano gomme a sepela le bahlanka ba Dafida, mme ya ba mosadi wa gagwe.

₄₃Dafida o be a nyetše Ahinoamo wa Jesriele, gomme bjale Abigaile le yena ya ba mosadi wa gagwe. ₄₄Ge e le Migale, morwedi yola wa Saulo yo e bego e le mosadi wa Dafida, Saulo o be a šetše a mo neetše Palti, morwa wa Laishe, yo e bego e le wa motse wa Galime.