To The Word – Day 78

₁Banna ba bangwe ba Sife ba tla go Saulo kua Gibea gomme ba mmotša gore Dafida o utamile mmotong wa Hakila ka lešing la lešoka la Juda. ₂Saulo a napa a ya lešokeng la Sife le bahlabani ba dikete tše tharo ba ba kgethilwego go yo nyaka Dafida, ₃gomme a hloma mešaša ka thokong ga tsela mmotong wa Hakila. Dafida o be a sa le lešokeng, gomme ge a ekwa gore Saulo o tlile go mo nyaka, ₄a roma dihlodi mme a kwa gore Saulo o tloga a le fao. ₅Ka ntle le go senya sebaka a yo bontšhiša felo fao Saulo le Abnere, morwa wa Nere, molaodi wa madira a Saulo, ba bego ba robetše gona. Saulo o be a robetše gare ga mešaša, gomme banna ba gagwe ba hlomile ya bona mešaša go mo dikologa.

₆Dafida a botšiša Ahimeleke, Mohete, le Abishai, morwarragoJoaba, mmagobona e be e le Tseruya, a re: “Ke mang mo go lena ba babedi a tlago ya le nna go Saulo kua mešašeng?”

Abishai a mo fetola a re: “Ke tla ya nago.”

₇Ka gona bošego bjoo Dafida le Abishai ba tsena mešašeng ya Saulo mme ba hwetša Saulo a robetše gare ga mešaša, lerumo la gagwe le tsemilwe fase kgauswi le hlogo ya gagwe. Abnere le madira ba be ba robetše ba mo dikologile. ₈Abishai a re go Dafida: “Lehono Modimo o gafetše lenaba la gago diatleng tša gago. Bjale a ke mo thothobetše gatee fela ntle le go boeletša ka lerumo le phuleletše fase.”

₉Eupša Dafida a re: “O se ke wa mmolaya! Ke mang yo a ka kwešago motlotšwa wa Morena bohloko mme a se ke a otlwa?” ₁₀A ba a re: “Ka Morena yo a phelago ke a tseba gore yena Morena o tla bolaya Saulo ge nako ya gagwe ya gore a ikhwele ka boyena e fihla, goba ge a ehwa ntweng. ₁₁Morena a nthibele go kweša motlotšwa wa gagwe bohloko! Tšea lerumo leo la gagwe le legapa la gagwe la meetse, re sepele.” ₁₂Ka gona Dafida a tšea lerumo le legapa mola kgauswi le hlogo ya Saulo, gomme yena le Abishai ba tloga. Ga go yo a ilego a bona goba a tseba se se diregilego, goba a phafoga – ka moka ba be ba swerwe ke boroko, ka gobane Morena o be a ba swarišitše boroko bjo bogolo.

₁₃Ke moo Dafida a tsheletšego ka mošola wa moedi, a ema godimo ga thaba a le kgolekgole le bona, ₁₄gomme a goeletša bahlabani ba Saulo le Abnere a re: “Abnere! O a nkwa na?”

Abnere a mmotšiša a re: “Ke wena mang o goeletšago mme o hlodiago kgoši?”

₁₅Dafida a mo fetola a re: “Abnere, a ga se wena motho yo mogologolo mo Israele? Bjale ke ka lebaka lang o sa šireletše kgoši, mong wa gago? Gonabjale yo mongwe o be a tsene moo mešašeng go tlo bolaya yoo mong wa gago. ₁₆Ga se wa dira mošomo wa gago, Abnere! Ke ena ka Morena yo a phelago gore ka moka ga lena le swanetše go bolawa, ka gobane ga se la šireletša mong wa lena, motlotšwa wa Morena. Bonang! Lerumo la kgoši le kae? A legapa lela la meetse le bego le le theng ga hlogo ya gagwe lona le kae?”

₁₇Saulo a tseba lentšu la Dafida gomme a mmotšiša a re: “Dafida, a ke wena, ngwanaka?”

Dafida a mo fetola a re: “Ee, kgoši.” ₁₈A iša pele a re: “Ke ka lebaka lang, mong wa ka, o sa ntlhomere, nna, mohlanka wa gago? Ke dirile eng? Ke molato ofe wo ke o obilego? ₁₉Kgoši, theetša se ke tlago se bolela. Ge eba ke Morena yo a go hlohleletšago gore o ntlhomare, gona mo neele sebego; eupša ge eba ke batho ba ba dirago seo, a Morena a ba rogake, ka gobane ba nthaka nageng ya Morena gore ke ye nageng ye go yona nka khunamelago fela medimo e šele. ₂₀O se ke wa dira gore ke bolawe nageng e šele, kgole le Morena. Ke ka lebaka lang kgoši ya Israele a tlile go bolaya letsetsenyana le tee? Ke ka lebaka lang a ntsoma bjalo ka kgwale dithabeng?”

₂₁Saulo a mo fetola a re: “Ke dirile phošo. Boa, Dafida, ngwanaka! Nka se tsoge ke go kwešitše bohloko gape, ka gobane o ntšhoketše bošegong bjo. Ke dirile tša botlaela, ka phoša kudu ke sa lemoge!”

₂₂Dafida a mo fetola a re: “Lerumo la gago šele, kgoši. A yo mongwe wa banna ba gago a tle ka mošono a le tšee. ₂₃Morena o putsa ba ba botegago gape ba lokilego. Lehono o ile a go gafela diatleng tša ka, fela ka se rate go go kweša bohloko, wena kgoši, motlotšwa wa Morena. ₂₄Bjalo ka ge ke go šoketše lehono, a le nna Morena a ntšhokele gomme a ntokolle mathateng ka moka!”

₂₅Saulo a re go Dafida: “Modimo a go šegofatše, ngwanaka! O tla atlega go tšohle tše o di dirago!”

Ka gona Dafida a swara tsela ya gagwe, gomme Saulo le yena a boela gae.

₁Dafida o ile a eleletša a re: “Ka letšatši le lengwe Saulo o tla mpolaya. Ga go se nka se dirago ge e se go tšhabela Filistia. Ke moo Saulo a tlago lesa go hlwa a nnyaka mo Israele, mme ke tla phologa.” ₂Ke gona Dafida le banna ba gagwe ba makgolo a a selelago ba tsheletšego go Akishe, morwa wa Maoko, kgoši ya Gathe. ₃Dafida le banna ba gagwe ba dula moo Gathe le malapa a bona. Dafida o be a na le basadi ba gagwe ka babedi, Ahinoamo wa Jesriele, le Abigaile, mohlologadi wa Nabale, wa Karmele. ₄Ge Saulo a ekwa gore Dafida o tšhabetše Gathe, a lesa go mo nyaka.

₅Dafida a re go Akishe: “Ge ke go kgahla a ke o mphe motse wo monnyane wo nka dulago go wona. Ke go reng ge nna, mohlanka wa gago, ke dula le wena mo motseng wa mošate?” ₆Ka gona Akishe a mo fa motse wa Tsikelage mohlang woo, gomme ke ka lebaka leo Tsikelage e bilego motse wa dikgoši tša Juda go fihlela le lehono. ₇Dafida o dutše fao Filistia ngwaga le dikgwedi tše nne.

₈Mehleng yeo Dafida le banna ba gagwe ba be ba fela ba hlasela batho ba Geshure le ba Gesere le ba Amaleke, bao ba bego ba agile go tloga Telamo go yo fihla Shure le go yo fihla Egepeta. ₉Yena le banna ba gagwe ba be ba bolaya banna ka moka le basadi ba gona, gomme ba tšea dihuswane, dikgomo, dipokolo, dikamela, le tšona diaparo. Ke moka a boele go Akishe, ₁₀mme Akishe a mmotšiše a re: “A o tšo hula kae lehono?” Gomme Dafida a mmotše gore o tšwa ka borwa bja naga ya Juda, goba nageng ya kgorwana ya Jeragmeele, goba nageng yeo Bakene ba dulago go yona. ₁₁Dafida o be a sa lese monna goba mosadi a phela gore a thopelwe Gathe, gore go se ke gwa ba le yo a ka begago seo Dafida le banna ba gagwe ba se dirilego. Seo ke se Dafida a se dirilego nako yeo ka moka ya ge a sa dula Filistia. ₁₂Eupša Akishe o be a tshepha Dafida gomme a ipotša a re: “O hloilwe kudu ke Baisraele, setšhaba sa gabo, mo e lego gore e tla ba mohlanka wa ka bophelo bja gagwe ka moka.”

₁Ka morago ga lebaka Bafilista ba rapa madira a bona gore ba lwe le Baisraele, gomme Akishe a re go Dafida: “O a tseba gore wena le banna ba gago le swanetše go re thikiša.”

₂Dafida a mo fetola a re: “Go bjalo. Wena o tla bona se mohlanka wa gago a tlago se dira.”

Akishe a re: “Go lokile. Ke go dira moleti wa ka wa ka mehla.”

₃Bjale Samuele o be a šetše a hwile, gomme Baisraele ka moka ba mo lletše mme ba mmolokile motseng wa gabo wa Rama. Saulo o be a rakile dinoge le didupe Israele.

₄Madira a Bafilista a ile a bokana, a tsena nageng ya Israele gomme a hloma mešaša kgauswi le motse wa Shuneme; Saulo a rapa bahlabani ka moka ba Baisraele gomme ba hloma mešaša thabeng ya Gilboa. ₅Ge Saulo a bona madira a Bafilista, a boifa mme a thothomela a tšhogile. ₆Ka fao a botšiša Morena gore a dire eng. Eupša Morena a se ke a mo fetola, le ge e le ka ditoro, goba ka Urime le Tumime, goba ka baprofeta. ₇Ke moo Saulo a laetšego bahlankedi ba gagwe a re: “Nnyakeleng mosadi wa senoge, gomme ke tla ya ka mmotšiša.”

Ba mmotša ba re: “Go na le yo mongwe kua Endoro.”

₈Ka gona Saulo a itlhama ka mokgwa wa go gakantšha, a apara diaparo tše dingwe, mme ge leswiswi le swere a ya le banna ba gagwe ba babedi go mosadi yoo. A re go yena: “Mpotšišetše bahu gomme o mpotše se se tlilego go direga. Bitša mohu yo ke tlago go botša leina la gagwe.”

₉Mosadi yoo a mo fetola a re: “O tseba gabotse se Kgoši Saulo a se dirilego, ka mo a rakilego dinoge le didupe mo Israele. Ke ka lebaka lang bjale o nyaka go nthea gore ke bolawe?”

₁₀Ke moo Saulo a ennego a re: “Ka Morena yo a phelago o ka se kwešwe bohloko ka lebaka la taba ye.”

₁₁Mosadi a mmotšiša a re: “A ke go rotošetše mang?”

Saulo a mo fetola a re: “Nthotošetše Samuele.”

₁₂Ge mosadi yoo a bona Samuele, o ile a hlaboša lentšu a lla a re go Saulo: “Ke ka lebaka lang o nthadiile? Ke wena Kgoši Saulo!”

₁₃Kgoši a re go yena: “O se ke wa boifa! A o bona eng?”

Mosadi a mo fetola a re: “Ke bona moya wa mohu o rotoga o etšwa fase.”

₁₄Saulo a mmotšiša a re: “O swana le eng?”

Mosadi a mo fetola a re: “Go rotoga mokgalabje. O apere seaparo se setelele.”

Ke moo Saulo a tsebilego gore ke Samuele, gomme a obama, a itahlela fase.

₁₅Samuele a re go Saulo: “Ke ka lebaka lang o ntshwenya ka go ntira gore ke rotoge?”

Saulo a mo fetola a re: “Ke bothateng bjo bogolo! Bafilista ba ntšwetše dira, le Modimo o ntahlile. Ga a sa nkaraba, le ge e le ka baprofeta, le ge e le ka ditoro. Ka gona ke biditše wena gore o tle o mpotše gore ke dire eng.”

₁₆Samuele a re: “O mpotšišetšang mola Morena a go lahlile mme a fetogile lenaba la gago? ₁₇Morena o go dirile se a go boditšego sona ka nna: O go amogile mmušo gomme o o file Dafida, ₁₈ka gobane ga se wa phetha taelo ya Morena wa fediša Baamaleke le tšohle tše e bego e le tša bona. Ke ka lebaka leo bjale Morena a go dirago dilo tše. ₁₉O tla gafela wena le Baisraele diatleng tša Bafilista. Ka moswane wena le barwa ba gago le tla be le na le nna, gomme le gona Morena o tla gafela madira a Baisraele diatleng tša Bafilista.”

₂₀Gatee fela Saulo a wa fase, a rapalala moo a tšhošitšwe kudu ke seo Samuele a se boletšego. O be a se na maatla, ka gobane o be a se a ja selo letšatši ka moka le bošego ka moka. ₂₁Mosadi yola a ya go yena gomme a bona gore o tšhogile kudu, ka gona a re go yena: “Bona, nna, mohlanka wa gago, ke gafile bophelo bja ka ka dira seo o nkgopetšego sona. ₂₂Bjale hle, le wena dira se ke go kgopelago sona. A ke go apeele dijo o je, gore o tle o be le maatla a go sepela.”

₂₃Saulo a gana a re a ka se je selo. Eupša bahlankedi ba gagwe le bona ba mo tutuetša gore a je. Mafelelong a dumela, a tsoga mme a dula malaong. ₂₄Mosadi yola a akgofa a hlaba namane ye e nonnego ye e bego e le mo gae. Ke moka a tšea bupi, a bo duba, mme a apea dinkgwa tše di se nago komelo. ₂₅A bea dijo tšeo pele ga Saulo le bahlankedi ba gagwe, mme ba ja. Gomme ba tloga bjona bošego bjoo.

₁Bafilista ba bokanya madira a bona kua Afeke, mola Baisraele ba hlomile mešaša kua sedibeng molaleng wa Jesriele. ₂Magoši a Bafilista a sepela ka dikgao tša ona tša banna ba lekgolo le ba sekete; Dafida le banna ba gagwe ba be ba sepela ka morago le Kgoši Akishe. ₃Balaodi ba madira ba Bafilista ba ba bona gomme ba botšiša ba re: “A Baheberu ba ba nyakang mo?”

Akishe a ba fetola a re: “Yo ke Dafida, mohlankedi wa Kgoši Saulo wa Israele. E šetše e le nako ye telele bjale a na le nna. Ga se a ka a dira se nka mmonago molato ka sona go tloga ka lona letšatši lela a go tla go nna.”

₄Eupša balaodi ba Bafilista ba befelelwa Akishe gomme ba re go yena: “Boetša moesa yoo motseng wo o mo filego wona. O se ke wa mo lesa a ya ntweng le rena; a ka re hlanamela ge go lwewa. A ka utswa pelo ya mong wa gagwe bjang ge e se ka go bolaya banna ba rena? ₅Ntle le fao, yo ke Dafida, monna yola basadi ba bego ba opela ka yena ba bina ba re: ‘Saulo o bolaile dikete, eupša Dafida o bolaile dikete tše masomesome.’ ”

₆Akishe a bitša Dafida a re go yena: “Ke ena ka Morena yo a phelago gore o mpotegetše; gomme go lokile ge o eya le nna wa hlabana ntweng ye. Ga go phošo ye ke ilego ka go bona yona go tloga ka letšatši lela wa go tla go nna. Eupša magoši ale a mangwe ga a go dumelele. ₇Ka gona, ipoelele gae ka khutšo, gomme o se ke wa dira selo se se ka ba kgopišago.”

₈Dafida a mo fetola a re: “A ke obile molato ofe? Ge go se phošo ye o kilego wa mpona yona, nna, mohlanka wa gago, go tloga ka letšatši lela ka go thoma go go hlankela, ke ka lebaka lang ke sa ye le wena, kgoši, mong wa ka, mme ka lwa le manaba a gago?”

₉Akishe a mo fetola a re: “Ke a tseba gore o botega bjalo ka morongwa wa Morena. Eupša magoši ale a mangwe a boletše gore o se ke wa ya le rena ntweng. ₁₀Ka gona, ka moswane ge go esa, wena le bao le tlogetšego Saulo mme la tla go nna, le tsogeng ka maswiswana mme le tlogeng ge go sela sa ruri.”

₁₁Ka gona Dafida le banna ba gagwe ba thoma leeto ka moswane wa ntshe e sa le bošego ba boela Filistia, gomme Bafilista ba tšwela pele ba ya Jesriele.

₁Ka morago ga matšatši a mabedi Dafida le banna ba gagwe ba fihla motseng wa bona wa Tsikelage. Baamaleke ba be ba šwahletše selete sa ka borwa sa Juda mme ba hlasela Tsikelage. Ba be ba tšhumile motse ₂mme ba thopile basadi ka moka; ba be ba se ba bolaya motho, fela ba tšere batho bohle ge ba tloga. ₃Ge Dafida le banna ba gagwe ba fihla, ba ile ba hwetša gore motse o tšhumilwe, le gore basadi ba bona le barwa le barwedi ba thopilwe. ₄Dafida le banna ba gagwe ba hlaboša mantšu ba lla mme ba se ke ba homola go fihlela ba sa hlwe ba kgona go lla. ₅Le bona basadi ba Dafida ka babedi, Ahinoamo le Abigaile, ba be ba thopilwe.

₆Dafida bjale o be a le bothateng bjo bogolo, ka gobane banna ba gagwe ka moka ba be ba huduegile moyeng ge ba lahlegetšwe ke bana ba bona, mme ba šetše ba rera go mo kgatla ka maswika; eupša yena a ithekga ka Morena Modimo wa gagwe. ₇Dafida a re go moprista Abiatare, morwa wa Ahimeleke: “Hle, ntlele le seaparo se sekgethwa.” Abiatare a mo tlišetša sona. ₈Dafida a botšiša Morena a re: “A nka hlomara bašwahledi bale? A ke tla ba swara?”

Morena a mo fetola a re: “Ba hlomare; ka nnete o tla ba swara mme wa phološa mathopša.”

₉Ka gona Dafida le banna ba gagwe ba makgolo a a selelago ba wela tsela, gomme ge ba fihla nokaneng ya Besore, ba bangwe ba bona ba šala moo. ₁₀Dafida a fela a swere tsela le banna ba makgolo a mane; ba bangwe bale ba makgolo a mabedi ba be ba lapile mo e lego gore ba ile ba šitwa ke go tshela nokana yeo, ka gona ba šala fao. ₁₁Banna ba ba bego ba na le Dafida ba hwetša mošemane wa Moegepeta kua nageng gomme ba mo tliša go Dafida. Ba mo fa dijo le meetse ₁₂le phaphathi ya makwapi a mago le diphaphathi tše pedi tša makwapi a diterebe. Ge a lle, a tielela gape. O be a se a ka a ja goba a nwa selo matšatši a mararo le mašego a ona. ₁₃Dafida a mmotšiša a re: “Mong wa gago ke mang? O tšwa kae?”

Mošemane a mo fetola a re: “Ke nna Moegepeta, lekgoba la monna wa Moamaleke. Mong wa ka o ntlogetše matšatši a mararo a go feta ka gore ke be ke babja. ₁₄Re be re tšo šwahlela naga ya Bakereti karolong ya ka borwa ya Juda le naga ya kgorwana ya Kalebe, mme ra tšhuma Tsikelage.”

₁₅Dafida a mmotšiša a re: “A o ka nkiša go bašwahledi ba gona?”

Mošemane a mo fetola a re: “Nka go iša ge o ka nkenela ka leina la Modimo gore o ka se mpolaye goba wa mpušetša go mong wa ka.” ₁₆Gomme a iša Dafida go bona.

Bašwahledi ba be ba šwalalane le naga yeo, ba eja, ba enwa, mme ba keteka ka thoto ye ntšintši ye ba bego ba tšo e thopa Filistia le Juda. ₁₇Ka letšatši le le latelago ka mahube Dafida a ba hlasela mme a lwa le bona go fihlela mantšiboa. Ntle le masogana a makgolo a mane ao a ilego a namela dikamela a tšhaba, go ile gwa se ke gwa phologa motho. ₁₈Dafida a phološa batho bohle le dilo tšohle tše Baamaleke ba bego ba di thopile, gotee le basadi bale ba gagwe ka babedi; ₁₉gwa se ke gwa ba le se a sa se hwetšego. Dafida a buša barwa le barwedi ba banna ba gagwe ka moka, le thoto ka moka ye Baamaleke ba bego ba e tšere. ₂₀A buša le dihuswane le dikgomo tšohle; banna ba gagwe ba gapa diruiwa ka moka kua pele ga gagwe gomme ba re: “Tše ke tša Dafida!”

₂₁Ke moo Dafida a boetšego go banna bale ba makgolo a mabedi bao ba bego ba lapile kudu go ka sepela le yena mme ba šala nokaneng ya Besore. Ba ile ba tla go gahlanetša Dafida le banna ba gagwe, gomme yena a ba batamela a ba botšiša gore ba šetše bjang. ₂₂Eupša banna ba bangwe ba babe ba go se re selo ba ba bego ba ile le Dafida ba re: “Ga se ba ya le rena, ka gona ga go thoto ye re ba fago yona. Ba ka tšea basadi le bana ba bona ba sepela.”

₂₃Eupša Dafida a ba fetola a re: “Bagešo, le se ke la dira bjalo ka tše Morena a re filego tšona! O re bolokile gomme a gafela bašwahledi diatleng tša rena. ₂₄Ga go yo a ka kwanago le seo le se bolelago! Ka moka re swanetše go abelana ka go lekana: yo a šetšego le dithoto o fiwa kabelo ya go lekana le ya yo a tšwago ntweng.” ₂₅Dafida a dira taba yeo molao, gomme wa phethwa ke Baisraele go tloga wona mohlang woo.

₂₆Ge Dafida a boile Tsikelage o ile a romela thoto ye nngwe go bagwera ba gagwe, baetapele ba Juda, a re: “Ye ke mpho ya lena ye e tšwago thotong ye re e tšerego go manaba a Morena.” ₂₇A e romela go batho ba Bethele, le ba Ramate karolong ya ka borwa ya Juda, le go ba motse wa Jatire, ₂₈le wa Aroere, le wa Sifmote, le wa Eshtemoa, ₂₉le wa Rakale; a e romela le go kgorwana ya Jeragmeele, le go Bakene, ₃₀le go batho ba motse wa Horma, le wa Boro-Ashane, le wa Athake, ₃₁le wa Hebrone. A e romela le mafelong a mangwe ka moka ao yena le banna ba gagwe ba bego ba kile ba ralala go ona.

₁Bafilista ba ile ba lwa le Baisraele thabeng ya Gilboa. Baisraele ba bantši ba bolawa moo, gomme ba ba šetšego ba tšhaba. ₂Eupša Bafilista ba rakediša Saulo le barwa ba gagwe, e lego Jonathane, Abinadaba le Malkishua, gomme ba bolaya barwa bao. ₃Ntwa ya ba ye šoro mo go bego go le Saulo, gomme ge boramesebe ba mmatamela mo ba kago mo thunya ka mesebe, a thothomela kudu. ₄A re go morwaladibetša wa gagwe: “Hwanyolla tšhoša ya gago o mphuleletše ka yona, gore ke se ke ka tla ka phuleletšwa ke Bafilista ba ba go se bolle, gomme ba nkwera.” Eupša morwaladibetša yoo a boifa kudu go ka dira taba yeo. Ka gona Saulo a tšea tšhoša ya gagwe ka boyena a itahlela go yona. ₅Ge morwaladibetša yoo a bona gore Saulo o hwile, le yena a itahlela godimo ga ya gagwe tšhoša mme a hwa le Saulo. ₆Ke ka moo Saulo le barwa ba gagwe ka bararo le morwaladibetša yola ba hwilego ka gona; le banna ka moka ba Saulo ba hwa ka letšatši leo. ₇Ge Baisraele ba ka mošola wa moedi wa Jesriele le ba ka bohlabela bja noka ya Jordane ba ekwa gore madira a Baisraele a tšhabile, le gore Saulo le barwa ba gagwe ba bolailwe, ba tlogela metse ya bona mme ba tšhaba. Ke moo Bafilista ba tlilego mme ba dula go yona.

₈Ka letšatši le le latelago la ntwa Bafilista ba yo hula ditopo, gomme ba hwetša setopo sa Saulo le tša barwa ba gagwe ka bararo di rapaletše thabeng ya Gilboa. ₉Ba ripa Saulo hlogo, ba mo apola diaparo tša gagwe tša ntwa, gomme ba roma batseta nageng ka moka ya Filistia go tsebagatša ka ditempeleng tša medimo ya bona le go botša batho ba gabobona gore Baisraele ba fentšwe. ₁₀Ka morago ba bea dibetša tša Saulo ka tempeleng ya modimo wo motshadi, Astarte, gomme ba kokotela setopo sa gagwe lebotong la motse wa Bethe-Sheane.

₁₁Ge batho ba Jabeshe kua Gileade ba ekwa seo Bafilista ba se dirilego Saulo, ₁₂banna bohle ba bogale ba wela tsela gomme ba sepela bošego ka moka ba ya Bethe-Sheane. Ba fegolla setopo sa Saulo le tša barwa ba gagwe lebotong, ba di bušetša Jabeshe, gomme ba di tšhuma moo. ₁₃Ba tšea mašapo a tšona ba a boloka ka fase ga mohlare wa motamariske ka gare ga motse, mme ba ikona dijo matšatši a a šupago.