Thapelo ya go bota Modimo
Go tsebišwa moopediši gore ke pesalome ya go opelwa ka modumo wa kopelo “Leeba la dihlareng tše dikgolo tša kgole”. Ke ya go lefela dibe ye Dafida a e ngwadilego mola Bafilista ba mo thopile kua Gathe.
1Ntšhokele, hle, Modimo,
gobane ke a gatakelwa;
bantwantšhi ba duletše go ntlaiša.
2Manaba a ka a hlwela go nkgatakela;
wena Yogodimodimo,
ba ba ntwantšhago ga ba kaaka.
3Ge ke ikwa ke boifa,
ke bota wena.
4Ke botile Modimo yo ke mo tumišago ka lebaka la tše a nkholofeditšego tšona,
gomme ga ke boife selo –
motho wa nama yena a ka ntirang?
5Manaba a ka a hlwela go ntlhaba ka mantšu;
sa bona ke go hlwa ba ntakana.
6Ba ntulela ka dihlophana ba ntalela;
ba beile mesepelo ya ka leihlo,
ba faletše go ntloša tšatšing.
7Na ba ka phonyokga ka mesebelele ya bona?
Hle, Modimo, thenola baditšhaba bao.
8O tseba ka mo ke tshwenyegilego ka gona.
Tšhela meokgo ya ka ka lekukeng la gago.
A ke re e ngwadilwe pukung ya gago?
9Mohla ke go bitša,
manaba a ka a tla katakata.
Se ke se tsebago ke gore Modimo o ema le nna.
10-11Ke botile Modimo yo ke mo tumišago ka lebaka la tše a nkholofeditšego tšona;
ke botile Morena yo ke mo tumišago ka lebaka la tše a nkholofeditšego tšona,
gomme ga ke boife selo –
motho wa nama yena a ka ntirang?
12Ke tla phetha tše ke go anetšego tšona, Modimo;
ke tla go neela sehlabelo sa tebogo,
13ka gobane o ntlhakodišitše lehung,
wa nthekga gore ke se thedimoge,
ke phele mo lefaseng ke bonegetšwe ke wena.
