Kotlo ya Modimo le kgaugelo ya gagwe
Go tsebišwa moopediši gore ke sereto se Dafida a se ngwadilego mola Doege, Moedomo, a seno ya go Saulo a mo tsebiša gore Dafida o ile ka ga Ahimeleke.
1O reng o ikgantšha ka bobe, seoka?
Tseba, lerato la Modimo ke la ka mehla.
2O loga maano a go lahletša bangwe;
leleme la gago le bogale boka legare,
mokadikadi wa morara towe!
3O rata bobe go feta bolo,
le go bolela maaka go feta therešo. Sela
4O rata polelo tša go ferekanya batho,
mpheane towe!
5Ka gona, Modimo o tla go fedišetša ruri;
o tla go komola a go goga ka ga gago,
a go tloša go baphedi mo lefaseng. Sela
6Baloki ge ba di bona ba tla gakgamala,
wena ba tla go sega ba re:
7“Owaa!
Šoowe motho wa go se tšhabele go Modimo,
motho wa go ikanya mahumo a gagwe,
wa go dira dithoto tša gagwe botšhabelo.”
8Nnaena, ka ntlong ya Modimo,
ke bjalo ka mohlware wo motalana;
ke botile lerato la gagwe, kilaphetogo;
ke le botile go ya go ile.
9Morena, ke tla dula ke go tumiša ka lebaka la tše o di dirilego;
ke tla anega botho bja gago ke na le babotegi ba gago.
