JOSHUA 2

₁Joshua a roma dihlodi tše pedi ka sephiring go tloga mešašeng kua Megohlong a re di yo hlola naga, gagologolo motse wa Jeriko. Ge ba fihla gona, ba ile ba ya ngwakong wa segwebakathobalo seo leina la sona e bego e le Rahaba gore ba robale moo. ₂Kgoši ya Jeriko ya kwa gore Baisraele ba bangwe ba tlile bošego bjoo go tlo hlola naga. ₃Ka gona a roma batseta go Rahaba gore ba mmotše ba re: “Banna bao ba lego ngwakong wa gago ba tlile go hlola naga ka moka. Ba ntšhe!”

_4-6Mosadi yoo a ba fetola a re: “Ke therešo, banna ba bangwe ba ile ba tla ngwakong wa ka, fela ga se ka ka ka tseba gore ba tšwa kae. Ba sepetše ge letšatši le dikela, ge kgoro ya motse e tswalelwa. Ga se ka ba botšiša gore ba ya kae, fela ge le ka ba šala morago ntle le go diega, le ka ba swara tseleng.” Rahaba o be a nameditše dihlodi tšela ka godimo ga tlhaka ya ntlo, gomme a di utile ka fase ga mahlaka a leokodi ao a bego a a beile fao. ₇Batseta bale ba kgoši ba tšwa motseng, mme kgoro ya tswalelwa. Ba nyaka dihlodi tšela tša Baisraele go ba go yo fihla moo tsela e tshelago Jordane.

₈Pele ga ge dihlodi tšela di robala, Rahaba a namelela tlhakeng ₉gomme a re go tšona: “Ke a tseba gore Morena o le file naga ye. Re a boifa. Yo mongwe le yo mongwe nageng ye o le tšhogile. ₁₀Re kwele ka moo Morena a ilego a omiša Lewatle la Mahlaka ge le fihla gona le etšwa Egepeta. Re kwele ka moo le bolailego Sihone le Ogo, dikgoši tše pedi tša Baamore, ka bohlabela bja Jordane. ₁₁Ge re ekwa taba tšeo re ile ra boifa; yo mongwe le yo mongwe o nolegile moko ka lebaka la lena. Morena Modimo wa lena ke Modimo kua godimo legodimong le mo fase lefaseng. ₁₂Bjale enang ka Morena gore le tla dira lapa la ka ka botho bjalo ka ge ke le dirile ka botho, mme le mphe sešupo se se kgodišago ₁₃gore le tla phološa tate le mme le dikgaetšedi le bomogolwake le banabešo le malapa a bona ka moka. Le se ke la re lesa re bolawa!”

₁₄Banna bao ba re go yena: “A Modimo a re bolaye ge re ka se le phološe! Ge o ka se bolele se re bego re se dira, re go holofetša gore re tla go swara setho ge Morena a re neela naga ye.”

₁₅Rahaba o be a dula ngwakong wo o kgohlaganego le morako wo o dikaneditšego motse, ka gona a fološetša banna bao ka ntle ka lefasetere ka thapo. ₁₆A re: “Le yeng kua nageng ya dithaba gore banna bale ba le hlomerego ba se ke ba le hwetša. Le utameng moo matšatši a mararo go fihlela ba boa. Ka morago ga fao gona le ka ikela mo le yago gona.”

₁₇Banna bao ba re go yena: “Re ka se tshele keno ye o re enišitšego yona. ₁₈Sese se o swanetšego go se dira: Ge re šwahlela naga ye ya geno, o tlemelele thapo ye ye khubedu lefasetereng le o re fološitšego ka lona. O kgobokanye tatago le mmago le dikgaetšedi le bohle ba lapa la tatago ka mo ngwakong wa gago. ₁₉Ge yo mongwe a ka tšwa ka mo ngwakong mme a bolawa, molato e tla ba wa gagwe, gomme re ka se bonwe molato tabeng yeo; eupša ge yo mongwe yo a lego ka mo ngwakong le wena a ka kwešwa bohloko, yeo e tla ba phošo ya rena. ₂₀Fela ge o ka botša yo mongwe se re bego re se dira mo, gona re ka se tlemege go phetha keno ye o re enišitšego yona.” ₂₁Rahaba a dumela gomme a ba lesa ba sepela. Ge ba sepetše a tlemelela thapo yela ye khubedu lefasetereng.

₂₂Dihlodi tšeo tša ya nageng ya dithaba mme tša utama gona. Banna bale ba bego ba ba hlomere ba ile ba ba nyaka nageng ka moka matšatši a mararo, fela ba se ke ba ba hwetša; ka fao ba ipoelela Jeriko. ₂₃Ke moo dihlodi tšela tše pedi di theogilego moo nageng ya dithaba, tša tshela noka, mme tša gomela go Joshua. Tša mmotša tšohle tše di ba hlagetšego ₂₄tša re: “Re na le therešo ya gore Morena o re file naga yela ka moka. Le gona batho ba gona ka moka ba a re tšhoga.”