To The Word – Day 53

₁“Legodimo, ntlhwaele tsebe ke bolele,

lefase, theetša se ke se bolelago.

₂Thuto ya ka e tla sarasara bjalo ka pula,

polelo ya ka ya ikala fase boka phoka.

Mantšu a ka a tla na bjalo ka pula mabjanyeng a mananana,

bjalo ka pula ya modupi dimeleng tše boletiana.

₃Ke tla reta leina la Morena.

A setšhaba sa gagwe se mo godiše.

₄“Morena ke molwedi wa lena yo maatla;

se a se dirago ke se se phethegilego,

ditsela tšohle tša gagwe di lokile;

Modimo wa lena o a botega,

ga a dire tše mpe;

o dira tše di lokilego le gona di lebanego.

₅Eupša lena ga le mmotegele,

ga le a swanela go ba setšhaba sa gagwe;

le setšhaba se sebe sa baradia.

₆Na ye ke yona tsela ye le swanetšego

go swara Morena ka yona,

lena setšhaba sa ditlatla,

sa go hloka kgopolo?

Na ga se Tatagolena, Mmopi wa lena,

yo a le dirilego setšhaba?

₇“Gopolang tša bogologolo,

mehleng kgalekgale;

botšišang botatagolena ba le botše tše di diregilego;

botšišang bakgalabje ba le anegele tša botala.

₈Yogodimodimo o abetše ditšhaba dinaga tša tšona;

o arogantše merafe,

o beetše ditšhaba mellwane.

Setšhaba se sengwe le se sengwe

o se abetše morongwamohlokomedi,

₉ditlogolo tša Jakobo tšona a di kgetha ya ba setšhaba sa gagwe.

₁₀“O ba hweditše ba tlaruma le lešoka,

leganata la go hloka bophelo,

la go tšutla madimo.

A ba šireletša, a ba hlokomela,

a ba leta ka mo motho a letago ngwana yo e lego mmamoratwe.

₁₁Bjalo ka ntšhu ge e rutantšha matswianyana a yona go fofa,

e akalela ka godimo ga ona,

ya a kuka ka polokego

ka mafego a yona a phurologilego,

Morena o hlokometše Baisraele.

₁₂Morena o hlahlile setšhaba sa gagwe a nnoši,

a sa thušwe ke modimo o šele.

₁₃“O ba dirile gore ba buše dinaga tša meboto,

mme ba je se se metšego mašemong.

O ba fepile ka mamapo a ka gare ga marako,

a mediša mehlware ya bona

mengeng ya maswika a mathata.

₁₄O ba file dithatha tša dikgomo

le maswi a dihuswane;

ba be ba na le dinku le dipudi

le dikgomo tše kaonekaone,

le mabele a mabotsebotse,

le beine ye e di phalago ka moka.

₁₅“Setšhaba sa Morena sa re go huma

sa mo tšhela dithole;

ba akola ba nona,

ya ba dimphosonono.

Ba lahla Modimo, Mmopi wa bona,

ba nyatša Mophološi wa bona yo maatla.

₁₆Go khunamela medimo e šele ga bona

gwa tsebafiša Morena;

makgapha a ba a dirago a mo seleka,

₁₇Ba direla meoya ye mebe dihlabelo,

ba se di direle Modimo,

ba di direla medimo ye mefsa ye Baisraele ba bego ba sa e tsebe,

medimo ye borakgolokhukhu ba bona

ba sego ba ka ba e boifa.

₁₈Ba lebala Modimo wa bona,

yena Mophološi wa bona yo maatla,

yena Motswadi wa bona.

₁₉“Ge Morena a di bona,

a befelwa,

mme a lahla barwa le barwedi ba gagwe.

₂₀A re: ‘Nka se sa ba thuša;

ke gona ke tlago bona se se tlago ba hlagela,

sona setšhaba se sebe seo sa go se mpotegele.

₂₁Ka medimo ya bona ya diswantšho ba ntlhohlile,

ba nthumola ka dilo tšeo tša bona ba rego ke medimo,

dilo tše gabotsebotse e sego medimo.

Ka gona, ka setšhaba se bona ba rego ga se setšhaba

nna ke tla ba hlohla;

ke tla ba rumola ka setšhaba sa ditlatla.

₂₂Pefelo ya ka e tla lauma bjalo ka mollo,

mme ya tšhuma tšohle lefaseng.

E tla ba ya fihla lefaseng la ka fase,

mme ya tšhuma medu ya dithaba.

₂₃“ ‘Ke tla ba tlišetša dikotsi tše di sa felego,

ka ba lwantšha ka mesebe ya ka yohle.

₂₄Ba tla hwa ka tlala le malwetši a letadi;

ba tla hwa ba bolawa ke malwetši a mašorošoro.

Ke tla ba romela dibata gore di ba hlasele,

le dinoga tša mpholo gore di ba lome.

₂₅Mekgotheng ba tla bolawa ke manaba,

ka mengwakong ba aparelwa ke poifo.

Masogana le dikgarebe ba tla bolawa;

masea le bakgalabje le bona ba ka se šale.

₂₆Ke be ke re nka ba feleletša sa ruri,

gore ba se sa gopolwa ke motho,

₂₇eupša ke be nka se lese manaba a bona

a itheta a re a fentše setšhaba sa ka,

mola e le nna ka bonna ke ba fentšego.’

₂₈“Baisraele ke setšhaba se se hlokago tlhaologanyo,

ga ba na le kwešišo le gannyane.

₂₉Ba šitwa ke go bona

gore ke ka lebaka lang ba fentšwe,

ga ba kwešiše seo se hlagilego.

₃₀Ke ka lebaka lang ba sekete ba fentšwe ke o tee,

mme ba dikete tše lesome ba tšhabile ba babedi fela?

Morena Modimo wa bona o be a ba tlogetše;

Modimo wa bona yo maatla

o be a ba gafetše manabeng a bona.

₃₁Manaba a bona a tseba

gore medimo ya bona e a fokola,

ga se ye maatla bjalo ka Modimo wa Baisraele.

₃₂Manaba a bona ke a kgopo bjalo ka badudi ba Sodoma le ba Gomora.

Merara ya bona e enywa diterebe tše di galakago tša mpholo,

₃₃beine ya bona ke mpholo wa dinoga.

₃₄“Morena o gopola tšeo

manaba a bona a di dirilego;

o emetše fela nako ye botse ya go ba otla.

₃₅Morena o tla itefeletša a otla manaba ao;

nako e tla tla ya gore ba we;

letšatši la go phuhlama ga bona le kgauswi;

tše di tlago ba wela di a akgofa.

₃₆Morena o tla hlakodiša setšhaba sa gagwe

ge a bona gore se feletšwe ke maatla.

O tla šokela bao ba mo hlankelago

ge a bona gore ka moka ga bona ba fentšwe.

₃₇Ke gona Morena a tlago botšiša

setšhaba sa gagwe a re:

‘A medimo ye maatla

yela le bego le e botile e kae?

₃₈Le e fepile ka makhura a dihlabelo tša lena,

la e noša dikabelo tša lena tša dino.

A e tle e le thuše bjale;

a e tle e le šireletše.

₃₉“ ‘Bjale bonang, nna ke nnoši ke Modimo;

ga go modimo yo mongwe ka ntle le nna.

Ke a bolaya, ebile ke a phediša,

ke a gobatša, ka ba ka fodiša,

mme ga go yo a ka kgonago

go nthibela go se ke se dirago.

₄₀Ke emiša letsogo ka ena ke le Modimo yo a phelago go ya go ile,

₄₁gore ke tla lootša tšhoša ya ka

ye e bekenyago,

ka dira gore manaba a otlwe.

Ke tla itefeletša go ona,

ka otla bona bao ba ntlhoilego.

₄₂Mesebe ya ka e tla rotha madi a bona,

le tšhoša ya ka ya ja bohle

bao ba lwago le nna.

Nka se šadiše le o tee wa manaba a ka;

le tšona dikgobadi

le bao ba thopilwego

ba tla hwa.’

₄₃“Lena ditšhaba, retang setšhaba sa Morena –

o lefeletša madi a bahlanka ba gagwe.

O itefeletša manabeng a gagwe

mme a lebalela setšhaba sa gagwe

le naga ya gagwe dibe tša bona.”

₂Morena o tšwile thabeng ya Sinai;

o rotogile bjalo ka letšatši godimo ga Edomo,

mme mahlasedi a gaša setšhaba sa gagwe

a etšwa thabeng ya Parane.

Barongwa ba dikete tše lesome

ba be ba na le yena,

mollo wo o laumago

o le ka letsogong la gagwe la go ja.

₃Morena o rata setšhaba sa gagwe

mme o šireletša bao ba ineetšego go yena.

Ka gona re obama maotong a gagwe,

ra amogela ditaelo tša gagwe,

₄e le melao ye Moshe a re filego yona –

dilo tše bohlokwahlokwa tša setšhaba sa rena.

₅Morena e bile kgoši ya setšhaba sa gagwe sa Baisraele,

ge dikgoro le baetapele ba bona

ba bokane mmogo.

“A Rubene a se ke a ba a hwa,

gore batho ba gagwe ba se fokotšege.”

“Morena, theetša sello sa bona;

ba kopanye gape le dikgoro tše dingwe.

Ba lwele Morena,

mme o ba thuše manabeng a bona.”

“Wena, Morena, utollela Balefi,

bahlanka ba gago ba ba botegago,

thato ya gago ka Urime le Tumime;

o ba lekile kua Masa,

wa ngangišana le bona

kua meetseng a Meriba.

₉Ba laeditše go go tshephagalela kudu

go feta ka moo ba tshephagalelago

batswadi ba bona,

goba bomorwarragobona,

goba bana ba bona.

Ba phethile ditaelo tša gago;

ba botegetše kgwerano ya gago.

₁₀Ba tla ruta setšhaba sa gago

ditaelo tša gago;

ba tla tšhuma seorelo pele ga gago,

ba ba ba dira dihlabelo tša go tšhungwa ka moka aletareng ya gago.

₁₁Morena, thuša kgoro ya bona

gore e gole e be le maatla;

thabela seo ba se dirago.

Roba manaba a bona le bahloi ba bona dikgwele,

gore ba se sa kgona go emelela.”

“Ye ke kgoro ye Morena a e ratago

gape a e šireletšago;

o ba leta letšatši ka moka,

gomme o dula gare ga bona.”

“A Morena a šegofatše naga ya bona ka pula,

mpho ya legodimo,

le ka phoka,

le ka meetse a a tšwago

ka fase ga lefase.

₁₄A naga ya bona e šegofatšwe ka dienywa tše di budušitšwego

ke borutho bja letšatši,

le ka dienywa tše kaonekaone

tša sehla se sengwe le se sengwe.

₁₅A dithaba tša kgalekgale

le meboto ya bona ya go ya go ile di pipše ke dienywa tše bosebose.

₁₆A naga ya bona e tlale tšohle tše botse,

e šegofatšwe ke Morena yo botho,

yo a boletšego a le ka gare ga mošwana wo o tukago mollo.

A ditšhegofatšo tše di tle kgorong ya Josefa,

ka gobane e bile moetapele

gare ga bomorwarragwe.

₁₇Josefa o bonala bjalo ka kgoši;

ke leitšibolo la poo la tatagwe;

naka tša gagwe di bjalo ka tša nare.

Dinaka tšeo ke batho ba diketekete ba Manase,

le ba masome a diketekete ba Efraime.

Ka tšona o gonyolla ditšhaba

mme o di kgoromeletša

magomong a lefase.”

“A Basebulone ba atlege kgwebong ya bona

le ditšhaba tša mošola wa mawatle,

mme mahumo a Isakara

a oketšege mo gae.

₁₉Ba biletša ditšhaba thabeng ya bona,

mme moo ba dira dihlabelo

tše Modimo a di nyakago,

ka gobane ba hwetša lehumo la bona lewatleng

le lešabašabeng la lebopong.”

“Retang Modimo yo a ba filego naga ye kgolo.

Gade o lalela bjalo ka taugadi,

o nyaka go thaola letsogo goba hlogo.

₂₁Ba itšeetše seripa se se kaonekaone sa naga;

ba filwe karolo ya moetapele.

Ba phethile ditaelo tša Morena

le melao ya gagwe

ge baetaepele ba Baisraele

ba be ba bokane mmogo.”

“Dane ke tau ya lerojana;

o taboga a etšwa Bashane.”

“Naftali o šegofaditšwe kudu ke Morena yo botho;

letsha la Genesarete le naga ya ka borwa bja lona ke ya bona.”

“Asere o šegofaditšwe go feta ba dikgoro tše dingwe.

A e be yena mmamoratwe

gare ga bomorwarragwe,

mme naga ya gagwe e hume

ka makhura a mohlware.

₂₅A metse ya gagwe e šireletšwe

ka mapheko a tshipi le a mphiri,

mme ka mehla a dule a bolokegile.”

₂₆Lena setšhaba sa Israele,

ga go modimo yo a swanago le Modimo wa lena,

Modimo yo a rokamego letagong go putla legodimo,

yo a nametšego maru go tlo le thuša.

₂₇Modimo ka mehla e bile Mošireletši wa lena;

matsogo a gagwe a neng le neng ke boitshwarelelo bja lena.

O lelekile manaba a lena ge le goroga,

mme a le botša gore le ba fediše ka moka.

₂₈Ka gona ditlogolo tša Jakobo di dula di iketlile,

di dula di bolokegile nageng ye e tletšego mabele le beine,

moo legodimo le kolobišago lefase ka phoka.

₂₉Lena Baisraele, le ba mahlatse bjang!

Ke mang yo a swanago le lena –

setšhaba se se phološitšwego ke Morena?

Morena ke kotse ya lena le tšhoša ya lena go le šireletša le go le dira bafenyi.

Manaba a lena a tla tla go lena a phophotha,

mme le tla ba gatakela fase.

“Lehono ge le ekwa lentšu la Modimo

₈le se ke la ngangabala bjalo ka borakgolokhukhu ba lena mola ba gwabela Modimo,

bjalo ka mohla wola ba mo leka lešokeng.

₉Fao ke mo ba kilego ba ntlhohla

dipolelo ba nteka,

le ge ba be ba bone tše ke ba diretšego tšona

₁₀mengwageng ye masome a mane.

Ke ka lebaka le ke ilego ka galefela morafe woo ka re:

‘Ka mehla ga ba mpotegele.

Ba gana go phetha ditaelo tša ka.’

₁₁Ka gona ka ikana ke galefile ka re:

‘Ba ka se tsoge ba tsene nageng ye ke bego ke ile go ba khutšiša go yona.’ ”

“Lehono ge le ekwa lentšu la Modimo le se ke la ngangabala

bjalo ka borakgolokhukhu ba lena mola ba gwabela Modimo.”

₁Go lehlogonolo motho,

moganakeletšo ya bakgopo,

yo a sa tšeego ka tsela ya badiradibe,

a sa ikopanyego le ba ba kwerago Modimo.

₂Sa gagwe ya ba go thabela melao ya Morena,

le go ithuta yona bošego le mosegare.

₃O bjalo ka mohlare mobjalwamoeleng;

wa enywa dikenywa lebakeng la gona,

le gona wa se pone matlakala.

Go tšohle tše a di dirago o a atlega.

₄Bakgopo bona le gatee ga ba bjalo;

ba swana le mooko motšewakephefo.

₅Ba tla bonwa molato ke Modimo kahlolong;

badiradibe ba ka se kgobokane gotee le badiratoka.

₆Ee, Morena o hlokomela badiratoka;

badiradibe bona ba tla fedišwa.