To The Word – Day 52

₁Šea mabaka a kgwerano yeo Morena a laetšego Moshe gore a e dire le setšhaba sa Israele nageng ya Moaba; tše ka moka e be e le go tlaleletša kgwerano ye Morena a e dirilego nabo thabeng ya Sinai.

₂Moshe o ile a bokanya setšhaba ka moka sa Israele mme a re go sona: “Le iponetše ka a lena mahlo seo Morena a se dirilego kgoši ya Egepeta le bakgomana ba gagwe le naga ya gagwe ka moka. ₃Le bone dikotlo tšela tše šoro le mehlolo le dimakatšo tše kgolo tše Morena a di dirilego. ₄Eupša go fihlela le lehono ga se a le dira gore le kwešiše se le se bonego. ₅Mo mengwageng ye masome a mane ya ge Morena a le hlahla lešokeng, diaparo le dieta tša lena ga se tša ka tša hlagala. ₆Le be le hloka bogobe bjo le ka bo jago, le ge e le beine ye le ka e nwago, goba bjala, fela Morena o ile a le fa dilo tše le di hlokago gore a tle a le rute gore ke Modimo wa lena. ₇Gomme ge re etla felo fa, Kgoši Sihone wa Heshbone le Kgoši Ogo wa Bashane ba ile ba re hlasela. Fela re ile ra ba fenya, ₈ra tšea naga ya bona mme ra e arolela kgoro ya Rubene le ya Gade le seripa sa kgoro ya Manase. ₉Le botegele go phetha mabaka ka moka a kgwerano ye, gore le tle le atlege go tšohle tše le di dirago.

₁₀“Lehono le eme pele ga Morena Modimo wa lena, ka moka ga lena – baetapele ba lena le bakgomana, le banna ba lena, ₁₁bana ba lena, basadi ba lena, le bafaladi ba ba dulago gare ga lena bao ba le rwalelelago dikgong, ba le gelago le meetse. ₁₂Le eme mo lehono go tsena mo kgweranong ye Morena Modimo wa lena a e dirago le lena, le go itlema ka keno go phethagatša mabaka a yona, ₁₃gore Morena bjale a le tiišetše gore le setšhaba sa gagwe mme yena ke Modimo wa lena, bjalo ka ge a le holofeditše, a enetše le borakgolokhukhu ba lena, Abrahama le Isaka le Jakobo. ₁₄Ga se lena le nnoši bao Morena a dirago le lena kgwerano ye le mabaka a yona. ₁₅O e dira le rena bohle ba re emego fa pele ga gagwe lehono, le tšona ditlogolo tša rena tše di sego tša tšwe di belegwa.

₁₆“Le a tseba gore re be re phela bjang Egepeta, le gore go putla dinaga tša ditšhaba tše dingwe go be go le bjang. ₁₇Le bone medingwana ya bona ye e selekišago ya go dirwa ka dikota, ka maswika, ka silibera, le ka gauta. ₁₈Le hlokomeleng gore go se ke gwa ba le monna, goba mosadi, goba lapa, goba kgoro ye e lego fa lehono yeo e furalelago Morena Modimo wa rena mme ya khunamela medimo ya ditšhaba tše dingwe. Seo se ka ba bjalo ka modu wo o melago ya ba semela se se galakago sa mpholo. ₁₉Le hlokomeleng gore go se ke gwa ba le o tee wa lena yo a rego go kwa mabaka a kgwerano, a fela a sa iphora gore tšohle di tla mo atla le ge a ka ngangabala a dira tša boithatelo. Seo e ka ba kotsi go batho le dilo go swana. ₂₀Morena a ka se lebalele motho wa mohuta woo, eupša o tla mo tukela bogale, gomme dithogako ka moka tše di ngwadilwego mo pukung ye di tla mo wela, go fihlela Morena a timeletša leina la gagwe lefaseng. ₂₁Morena o tla mo kgetholla dikgorong ka moka tša Baisraele, gomme a mo tlišetša dikotsi go ya ka dithogako ka moka tša kgwerano ye e ngwadilwego mo pukung ye ya melao ya Morena.

₂₂“Mo melokong ya lena ya ka moso ditlogolo tša lena le bafaladi ba ba tšwago dinageng tša kgole ba tla bona dikotsi le malwetši ao Morena a a tlišeditšego naga ya lena. ₂₃Naga e tla ba lehwafa ya se ntšhe selo, ya pipetšwa ke tshebela le letswai; ga go se se ka bjalwago goba se se ka melago go yona, ešita le bjona bjang bo ka se mele moo. Naga ya lena e tla ba bjalo ka motse wa Sodoma le wa Gomora, wa Adma le wa Tseboime, yeo Morena a e ribegeditšego ge a be a befetšwe kudu. ₂₄Ke moo ditšhaba tšohle di tlago botšiša tša re: ‘Ke ka lebaka lang Morena a dirile naga ya bona dilo tše? Ke go reng a ile a befelwa o šorošoro ka mokgwa wo?’ ₂₅Phetolo e tla ba go re: ‘Ke ka gobane setšhaba se se tshetše kgwerano ye yena Morena, Modimo wa borakgolokhukhu ba bona, a bego a e dirile le bona ge a ba ntšha Egepeta. ₂₆Ba obamile ba direla medimo ye mengwe yeo ba bego ba sa e tsebe, medimo ye Morena a rilego ba se ke ba e direla. ₂₇Ka gona Morena o ile a befelelwa setšhaba sa gagwe mme a tlišetša naga ya bona dikotsi tše ka moka tše di ngwadilwego mo pukung ye. ₂₈Morena o ile a befelwa kudu, mme ge a befetšwe o šoro bjalo, a ba lahlela nageng e šele moo le lehono ba sa lego gona.’

₂₉“Go na le dilo tšeo Morena Modimo wa rena a sego a di utolla, eupša o utolotše melao ye ya gagwe, gomme rena le ditlogolo tša rena re swanetše go e phetha go ya go ile.”

₁“Bjale ke le file go ikgethela tšhegofatšo goba thogako. Ge dilo tše ka moka di le hlagetše gomme le dutše gare ga ditšhaba tše Morena Modimo wa lena a le šwalalantšego natšo, le tla gopola se ke se boletšego. ₂Ge lena le ditlogolo tša lena le ka sokologela go Morena, mme ka dipelo tša lena ka moka le ka moya wa lena ka moka la phetha ditaelo tša gagwe tše ke le fago tšona lehono, ₃gona Morena Modimo wa lena o tla le šokela. O tla le buša ditšhabeng tšeo a le šwalalanyeditšego go tšona, mme a le atlegiša gape. ₄Le ge le ka šwalalanyetšwa mafelong a lefase, Morena Modimo wa lena o tla le kgobokanya gona moo mme a le buša, ₅gore le tle le tšee naga ye borakgolokhukhu ba lena ba kilego ba e thopa. Gomme o tla le atlegiša a ba a le atiša go feta ka moo borakgolokhukhu ba lena ba kilego ba ba ka gona. ₆Morena Modimo wa lena o tla dira gore lena le ditlogolo tša lena le mo theeletše, gore le tle le mo rate ka dipelo tša lena ka moka le ka moya wa lena ka moka, mme le tle le fele le dula moo nageng yeo. ₇Dithogako tše ka moka o tla di lebiša go manaba a lena le go bao ba le hloilego gape ba le hlomerego, ₈mme le tla boela la mo theeletša la phetha ditaelo tša gagwe ka moka tše ke le fago tšona lehono. ₉Morena o tla le atla go tšohle tše le di dirago; le tla ba le bana ba bantši le diruiwa tše ntši, gomme mašemo a lena a tla le ntšhetša puno ye botse. O tla thabela go le atla bjalo ka ge a be a thabetše go atla borakgolokhukhu ba lena, ₁₀eupša le tla swanelwa ke go mo theeletša le go phetha melao le melawana ya gagwe ye e ngwadilwego mo pukung ye ya dithuto tša gagwe. Le tla swanelwa ke go sokologela go yena ka dipelo tša lena ka moka le ka moya wa lena ka moka.

₁₁“Taelo ye ke le fago yona lehono ga se ye thata kudu, ebile ga e kgole le lena. ₁₂Ga e kua legodimong mo le ka ba la botšiša la re: ‘Ke mang a tlago re namelela a re fegollela yona, gore re tle re e kwe re e phethe?’ ₁₃Le gona ga e ka mošola wa lewatle mo le ka ba la botšiša la re: ‘Ke mang yo a tlago tshela lewatle a yo re tšeela yona, gore re tle re e kwe mme re e phethe?’ ₁₄Aowaa, e kgauswikgauswi le lena. Le a e tseba mme le ka e bolela ka hlogo, ka gona e phetheng.

₁₅“Lehono ke le fa go kgetha botse goba bobe, bophelo goba lehu. ₁₆Ge le ka phetha ditaelo tša Morena Modimo wa lena tše ke le fago tšona lehono, ge le ka mo rata, la mo theeletša, mme la latela melao le melawana ya gagwe, gona le tla atlega mme la ba setšhaba se sentši. Morena Modimo wa lena o tla le šegofatša nageng ye le batametšego go e thopa. ₁₇Eupša ge le ka se mo theeletše, la gana go mo theetša, la foraforetšwa la direla medimo ye mengwe, ₁₈ke le botša e sa le gonabjale gore le tla fedišwa taa. Le ka se phele nako ye telele nageng yela ya mošola wa Jordane ye le batametšego go e thopa. ₁₉Bjale ke le fa go ikgethela bophelo goba lehu, tšhegofatšo ya Modimo goba thogako ya gagwe, gomme ke bitša legodimo le lefase go tlo hlatsela gore le kgetha eng. Kgethang bophelo, gore lena le ditlogolo tša lena le tle le phele. ₂₀Le rateng Morena Modimo wa lena, le mo theeletšeng, mme le mmotegeleng, gore le tle le dule nako ye telele nageng ye a enetšego borakgolokhukhu ba lena, Abrahama le Isaka le Jakobo, a re o tla ba fa yona.”

₁Moshe a tšwela pele le go bolela le setšhaba sa Israele ₂a re: “Bjale ke na le mengwaga ye lekgolo le masome a mabedi, mme ga ke sa kgona go ba moetapele wa lena. Ntle le fao, Morena o mpoditše gore nka se tshele noka ya Jordane. ₃Morena Modimo wa lena ka boyena o tla sepela pele ga lena mme a fediša ditšhaba tše di dulago moo, gore le tle le dule nageng ya tšona, gomme Joshua e tla ba moetapele wa lena, bjalo ka ge Morena a boletše. ₄Morena o tla dira batho ba moo se a se dirilego Sihone le Ogo, dikgoši tša Baamore, mola a ba fediša le naga ya bona. ₅Morena o tla ba gafela go lena, mme le ba dire tšohle tše ke le laetšego tšona. ₆Le beng le sebete, le tie. Le se ke la ba boifa, gobane Morena Modimo wa lena o tla ba le lena. A ka se le lahle goba a le tlogela.”

₇Ke moka Moshe a bitša Joshua mme a re go yena pele ga setšhaba ka moka sa Israele: “O be le sebete o tie; ke wena o tlago eta setšhaba se pele gore se thope naga ye Morena a enetšego borakgolokhukhu ba sona a re o tla ba fa yona. ₈Morena ka boyena o tla go eta pele mme a ba le wena. A ka se go lahle goba a go tlogela, ka gona o se ke wa boifa goba wa nolega moko.”

₉Ka gona Moshe a ngwala melao yeo ya Modimo mme a e fa baprista ba Balefi, bao modiro wa bona e bego e le go rwala Polokelo ya Kgwerano ya Morena, a e fa le baetapele ba Baisraele. ₁₀A ba laya a re: “Mafelelong a ngwaga wo mongwe le wo mongwe wa bošupa, e lego ngwaga wo ka wona melato e phumolwago, le baleng melao ye ka go hlaboša lentšu Monyanyeng wa Mešaša. ₁₁Le e baleleng setšhaba sa Israele ka moka ge se etla go khunamela Morena Modimo wa lena felong ga tirelo. ₁₂Le kgobokanyeng setšhaba – banna le basadi le bana – le bafaladi ba ba dulago metseng ya lena, gore yo mongwe le yo mongwe a e kwe mme a ithute go boifa Morena Modimo wa lena, le go botegela go phetha melao yeo ka moka. ₁₃Ka tsela ye ditlogolo tša lena tše di sego tša ka tša kwa melao ya Morena Modimo wa lena di tla e kwa. Ka fao ba tla ithuta go mmoifa ge ba sa phela nageng ye le batametšego go e thopa mošola wa Jordane.”

₁₄Ke moo Morena a itšego go Moshe: “Nako ya gago ya go ithobalela e batametše. Bitša Joshua mme o tsene le yena ka Tenteng ya bodulo bja ka, gore ke tle ke mmotše tše a swanetšego go di dira.” Moshe le Joshua ba tsena ka Tenteng, ₁₅gomme Morena a iponatša go bona fao ka thololo ya leru ye e bego e eme mojakong wa Tente.

₁₆Morena a re go Moshe: “O kgauswi le go ikela go borakgolokhukhu ba gago, gomme ge o šetše o ithobaletše, setšhaba se se ka se sa mpotegela mme ba tla lahla kgwerano ye ke e dirilego le bona. Ba tla ntlogela ba khunamela medimo e šele ya naga ye ba batametšego go tsena go yona. ₁₇Ge ba dira bjalo ke tla ba galefela, ka ba furalela, ka ba tlogela. Ba tla welwa ke dikotsi tše ntši le mathata a mantši, mme ke moo ba tlago lemoga gore dilo tše di ba hlagetše ka gobane nna, Modimo wa bona, ke be ke se sa na le bona. ₁₈Mme ka nako yeo ke tla gana go ba thuša, ka gobane ba dirile tše mpe ba ba ba khunamela medimo ye mengwe.

₁₉“Bjale ngwala kopelo ye. O e rute setšhaba sa Israele gore e tle e be hlatse ya go ba tšwa. ₂₀Ke tla ba goroša nageng yela ya mokhora le monono, bjalo ka ge ke enetše borakgolokhukhu ba bona. Moo ba tla ja ba khora, mme ba phela ka boiketlo. Eupša ba tla mphuralela ba khunamela medimo ye mengwe. Ba tla nnyatša mme ba lahla kgwerano ya ka, ₂₁gomme ba tla welwa ke dikotsi tše ntši le mathata. Eupša kopelo ye e tla no fela e sa opelwa ke ditlogolo tša bona, gomme e tla ba hlatse ya go ba tšwa. Le gonabjale, pele ga ge ke ba goroša nageng ye ke ennego go ba fa yona, ke tseba seo ba se gopolago.”

₂₂Ka lona letšatši leo Moshe a ngwala kopelo yeo gomme a e ruta setšhaba sa Israele.

₂₃Ke moo Morena a boditšego Joshua, morwa wa Nunu, a re: “O be le sebete, o tie. O tla goroša Baisraele nageng ye ke ennego go ba fa yona, gomme ke tla ba nago.”

₂₄Moshe a ngwala melao ya Modimo pukung, a hlokomela gore a se ke a tlogela selo. ₂₅Ge a feditše a re go baprista ba Balefi, bao modiro wa bona e bego e le go rwala Polokelo ya Kgwerano ya Morena: ₂₆“Tšeang puku ye ya melao le e bee ka thoko ga Polokelo ya Kgwerano ya Morena Modimo wa lena, gore e tle e dule e le moo e le hlatse ya go tšwa setšhaba sa gagwe. ₂₇Nna ke tseba ka moo ba ngangabalago ka gona le ka moo ba tsogelago Morena maatla. Ge ba tsogetše Morena maatla ke sa phela, ke sa na le lena, mohlang ke ehwa gona go tla ba bjang? ₂₈Kgobokanya mantona a dikgoro ka moka le bakgomana pele ga ka, gore ke tle ke ba botše taba tše; ke tla bitša legodimo le lefase gore e tle e be dihlatse tša ka. ₂₉Ke tseba gore ge ke hwile, setšhaba e tla ba se sebe mme ba tlogela tše ke ba rutilego tšona. Gomme mabakeng a a tlago ba tla hlagelwa ke dikotsi, ka gobane ba tla be ba selekile Morena ka go dira tše a di ganago.”

₃₀Ke moka Moshe a reta kopelo ye setšhaba sohle sa Israele se theeditše a re:

₁E rile ge go esa baprista ba bagolo, le bagolo ba setšhaba, le boramangwalo ba lakana ka pelapela e le Kgorokgolo ka moka. Ba bofa Jesu ka diketane, ba tloga naye ga Moprista yo Mogologolo ba yo mo gafela Pilato. ₂Pilato a mmotšiša a re: “Na ke wena kgoši ya Bajuda?”

Jesu a mo fetola a re: “O a bolela.”

₃Baprista ba bagolo ba mmega ka dilo tše dintši. ₄Ka gona Pilato a buša a mmotšiša a re: “Na ga o iphetolele? Ekwa gore ba go bega ka dilo tše dintši bjang!”

₅Eupša a se sa fetola selo, mo Pilato a ilego a ba a makala.

₆Ka Monyanya wa Paseka Pilato o be a tlwaetše go lokolla mogolegwa yo lešaba le mo kgopelago. ₇Pakeng yeo go be go na le monna yo mongwe yo leina la gagwe e bego e le Barabase, yo a bego a golegilwe gotee le ba ba bego ba ile ba tsoša mpherefere, mme ba bolaya motho gona moo mpherefereng. ₈E rile ge lešaba le kgobokane mme le kgopela Pilato gore a ba direle se a bego a tlwaetše go ba direla sona ka Monyanya wa Paseka, ₉yena a ba botšiša a re: “Etse le nyaka gore ke le lokollele kgoši ya Bajuda?” ₁₀Gape o be a tseba gore baprista ba bagolo ba gafetše Jesu go yena ka lebaka la mona.

₁₁Baprista ba bagolo ba hlohleletša lešaba gore le kgopele Pilato gore a ba lokollele Barabase. ₁₂Pilato a ba botšiša gape a re: “Bjale le nyaka gore ke direng ka yo le rego ke kgoši ya Bajuda?”

₁₃Ba goa ba re: “Mmapole sefapanong!”

₁₄Pilato a ba botšiša a re: “Etse o sentšeng?”

Bona ba goa le go feta ba re: “Mmapole sefapanong!”

₁₅Pilato, ka go rata go kgahliša lešaba, a ba lokollela Barabase, gomme ge Jesu a seno itiwa ka tshelane ka taelo ya gagwe, a mo gafela go bapolwa sefapanong.

₁₆Bahlabani ba iša Jesu ka lapeng la mošate gomme ba kgoboketša sekgao ka moka sa bahlabani. ₁₇Ba mo apeša seaparo sa bohubedu bja moretele, ba loga kgare ya meetlwa, ba mo rweša yona. ₁₈Ba mo dumediša ba re: “Re a lotšha, kgoši ya Bajuda!” ₁₉Ba mo itia hlogo ka lepara, ba mo tshwela ka mare, ba khunama ba mo lotšha. ₂₀Ba re go mo kwera, ba mo apola seaparo sela sa bohubedu bja moretele, ba mo apeša diaparo tša gagwe. Ke moka ba mo iša go bapolwa sefapanong.

₂₁Bahlabani ba gapeletša monna yo mongwe yo a bego a iphetela a etšwa mašemong a eya motseng go rwalela Jesu sefapano. Leina la gagwe e be e le Simone, wa motse wa Sirene, tatagoAleksandere le Rufose. ₂₂Ba iša Jesu felo mo gongwe mo go bitšwago Golgotha, ke go re “Felo ga Legata”. ₂₃Moo ba mo neela beine ye e hlakantšwego le mira gore a e nwe, fela yena a e gana. ₂₄Ge ba seno mmapola sefapanong ba abelana diaparo tša gagwe ka go tema, go bona se yo mongwe le yo mongwe a lebanwego ke go se tšea. ₂₅E be e le nako ya senyane mosong ge ba mmapola. ₂₆Ka godimo ga hlogo ya gagwe gwa ngwalwa pego ya molato wa gagwe ye e rego: “Kgoši ya Bajuda.” ₂₇Ba bapola le bahlakodi ba babedi gotee le yena, yo mongwe a ba ka letsogong la gagwe la go ja, yo mongwe ka go la nngele.

₂₉Batho ba ba bego ba feta ka tsela ba be ba šikinya dihlogo, ba nyefola Jesu ba re: “Owaa, wena wa go kgereša Tempele mme wa e tsoša ka matšatši a mararo! ₃₀Itlhakodiše o theoge moo sefapanong!”

₃₁Baprista ba bagolo le boramangwalo le bona ba mo kwera bjalo, ba botšana ba re: “O phološitše ba bangwe, fela yena ga a kgone go iphološa! ₃₂Mesia, kgoši ya Israele, a a theoge mo sefapanong gonabjale, gore re bone mme re dumele!”

Bale ba go bapolwa le yena le bona ba mo roga.

₃₃Ka nako ya mosegare wo mogolo naga ka moka ya aparelwa ke leswiswi go fihlela ka nako ya boraro mathapama. ₃₄Ya re ka nako ya boraro mathapama Jesu a goelela kudu a re: “Eloi, Eloi, lama sabagtani?” Ke go re: “Modimo wa ka, Modimo wa ka, o ntlogeletšeng?”

₃₅Ba bangwe ba ba bego ba eme moo ba mo kwa ba re: “Theeletšang, o bitša Eliya!” ₃₆Yo mongwe wa bona a kitima a yo ina motšitla ka beineng ye bodila, a o hlomela patlaneng, a o bea molomong wa gagwe a re: “Lesang, re bone ge eba Eliya o tla tla a mo fegolla mo sefapanong!”

₃₇Jesu a goelela kudu, ya ba o a ikhwela.

₃₈Ke moka seširo sa ka Tempeleng sa gagoga ka bogare go tloga godimo go fihla fase. ₃₉Ge molaodi wa bahlabani ba lekgolo yo a bego a eme pele ga Jesu a mmona a ehwa ka mokgwa woo, a kgotsa a re: “Jo, ka nnete motho yo e be e le Morwa wa Modimo!”

₄₀Le basadi ba bangwe ba be ba le gona moo ba lebeletše ba le kgojana. Gare ga bona go be go na le Maria Magadalena le Maria, mmagoJakobose yo monnyane le Josese, le Salome. ₄₁Ke bale ba bego ba latela Jesu mme ba mo hlokomela mola a le Galilea. Ba bangwe ba bantši basadi ba ba bego ba tlile le yena Jerusalema le bona ba be ba le gona.

_42-43E rile ge e šetše e le mantšiboa gwa tla monna yo mongwe wa go tšwa Arimathea, leina la gagwe e le Josefa. E be e le molekgotla yo a tsebegago, yo le yena a bego a letetše go hlongwa ga mmušo wa Modimo. E be e le letšatši le le tlago pele ga Sabatha, leo ka lona go bego go lokišetšwa yona Sabatha. Ka gona Josefa a beta pelo a ya go Pilato mme a kgopela setopo sa Jesu. ₄₄Pilato a makala ge a ekwa gore Jesu o šetše a hwile. A bitša molaodi wa bahlabani ba lekgolo, a mmotšiša ge eba e šetše e le lebaka Jesu a hwile. ₄₅Ya re ge Pilato a seno kwa se se bolelwago ke molaodi, a fa Josefa setopo sa Jesu. ₄₆Josefa a ya go reka lešela, a tla a fegolla setopo sa Jesu, a se phuthela ka lešela leo, mme a se bea ka lebitleng le le bego le gwailwe leswikeng. Ke moka a kgokološetša leswika mojako wa lebitla. ₄₇Maria Magadalena le Maria, mmagoJosese, ba be ba lebeletše mme ba bona mo Jesu a bolokwago gona.

₁Ya re ge letšatši la Sabatha le fetile, Maria Magadalena le Maria, mmagoJakobose, le Salome ba reka ditlolo gore ba ye ba tlotše setopo sa Jesu. ₂Mosong wa Sontaga, ge letšatši le hlaba, ba ya lebitleng. ₃Ba tšama ba botšišana ba re: “Ke mang yo a tlago re kgokološetša leswika a le tloša mojako wa lebitla?” ₄Gape e be e le leswika le legolo kudu. Gomme ya re ge ba lebelela ba bona leswika lela le kgokološitšwe. ₅Ge ba tsena ka lebitleng ba bona lesogana le lengwe le dutše ka letsogong la go ja, le apere seaparo se setelele se sešweu, mme ba tšhoga.

₆Lesogana leo la re go bona: “Le se ke la tšhoga. Etse le nyaka Jesu wa Nasaretha yo a bego a bapotšwe sefapanong. Ga a gona mo, o tsogile bahung. Bonang felo mo ba bego ba mmeile gona. ₇Bjale ge, eyang le botše barutiwa ba gagwe gotee le Petrose le re: ‘O le thaka pele go ya Galilea; le tla mmona gona kua bjalo ka ge a le boditše.’ ”

₈Ba napa ba tšwa ka lebitleng ba tšhaba, gobane ba be ba tšhogile ebile ba thothomela kudu; fela ba se botše motho selo, gobane ba be ba boifa.

[ ₉Ya re ge Jesu a tsogile bahung mosong wa Sontaga, la mathomo a itšweletša go Maria Magadalena, yola Jesu a bego a kile a leleka bademone ba ba šupago go yena. ₁₀Yena Maria a ya a tsebiša bale ba bego ba šika le Jesu. Ba be ba nyamile ba lla. ₁₁Gomme ge ba ekwa gore o a phela, le gore yena Maria o mmone, ba se dumele.

₁₂Ka morago ga tšeo Jesu a itšweletša go balatedi ba gagwe ba babedi ka sebopego se sengwe. Bona ba be ba eya mašemong. ₁₃Ba napa ba gomela morago go yo tsebiša barutiwa ba gagwe, fela le bona ba se ke ba dumela.

₁₄Mafelelong a itšweletša go barutiwa ba gagwe ba lesome le motšo o tee ba sa le dijong. A ba kgalela go se dumele ga bona le bonganga bja bona, gobane ga se ba dumela bale ba mmonego ge a seno tsoga bahung. ₁₅A re go bona: “Sepelang le lefase ka moka, le begele batho bohle Ebangedi. ₁₆Yo a dumelago mme a kolobetšwa o tla phologa; eupša yo a sa dumelego o tla lahlwa. ₁₇Ba ba dumelago ba tla fiwa maatla a go dira mehlolo ye: Ba tla leleka bademone ka go bolela leina la ka; ba tla bolela ka maleme a šele. ₁₈Ge ba ka swara dinoga goba ba nwa mpholo, di ka se ba dire selo; ba tla bea balwetši diatla, gomme ba fola.”

₁₉Ka morago ga ge Morena Jesu a feditše go bolela le bona, a rotošetšwa ke Modimo legodimong, a yo dula ka letsogong la go ja la Modimo. ₂₀Barutiwa ba gagwe bona ba ya go kwatša Ebangedi gohle, gomme Morena a ba thuša, a bontšha ka mehlolo ye ba bego ba e dira gore thuto ya bona ke ya nnete.]

[Ba ya go bale ba bego ba na le Petrose, mme ba ba anegela ka boripana tšohle tše ba bego ba laetšwe gore ba di dire. Ka morago ga moo Jesu ka boyena a phatlalatša molaetša wo mokgethwa wo o ka se tsogego o paletšwe, wa go bega phologo ya go ya go ile, ka balatedi ba gagwe go tloga bohlabela go ya bodikela. Amene.]

₁Moprista yo mongwe le yo mongwe yo Mogolo o kgethwa bathong a bewa go hlankela Modimo bakeng sa bona ka go mo neela dikabelo le dihlabelo tša dibe. ₂Ka ge le yena mong a fokola, o kgona go se be le sekgapho go bao ba dirago sebe ba sa tsebe. ₃Le gona ka gore yena mong o a fokola, o swanetše go dira dihlabelo e sego fela ka lebaka la dibe tša batho, eupša le ka lebaka la tša gagwe. ₄Motho ga a iphe bohlomphegi bjoo bja go ba Moprista yo Mogolo. Ke fela ge a biditšwe ke Modimo mo a bewago Moprista yo Mogolo bjalo ka Arone.

₅Le yena Kriste ga se a ipha bohlomphegi bja go ba Moprista yo Mogolo, eupša o bo filwe ke Modimo mola a re go yena:

₇Jesu ge a sa phela mo lefaseng o kile a rapela Modimo yo a bego a ka mo phološa lehung, a mo kgopela ka sello se segolo le meokgo. Ka ge a be a na le tlhompho, Modimo o ile a mo kwa. ₈Le ge e be e le yena Morwa wa Modimo, go tlaišwa ga gagwe go ile gwa mo dira gore a rate go phetha thato ya Modimo le go feta. ₉Ya re ge a phethagaditšwe ka ditlaišego, a ba yena wa go phološetša sa ruri bao ba mo theeletšago, ₁₀gomme Modimo a mmega gore ke Moprista yo Mogolo wa boprista bja go swana le bja Melkitsedeke.

₁₁Ke tše dintši tše re kago di bolela ka taba ye, fela ke mo gothata go le hlalošetša tšona, ka ge le diega go kwešiša. ₁₂Le be le swanetše go ba le šetše le le baruti, eupša le sa nyaka motho wa go le ruta dithuto tša mathomo tša molaetša wa Modimo. Bakeng sa go ja dijo tše di tiilego le sa swanetšwe ke lebese. ₁₃Mang le mang yo a fepšago ka lebese e sa le lesea, ga sešo a kgona go kgethologanya se se lokilego le se se sego sa loka. ₁₄Dijo tše di tiilego ke tša batho ba bagolo, ba ba šetšego ba ithutile ka go itlwaetša go kgethologanya botse le bobe.