DOITERONOMIO 34

₁Moshe a rotoga a etšwa melaleng ya Moaba a ya thabeng ya Nebo, ntlhohlong ya thaba ya Pisga ka bohlabela bja Jeriko, mme moo Morena a mmontšha naga ka moka, e lego selete sa Gileade go ya leboa go fihla motseng wa Dane; ₂selete ka moka sa Naftali; selete sa Efraime le sa Manase; selete sa Juda go ya bodikela go fihla Lewatleng la Mediteraniene; ₃karolo ya ka borwa ya Juda, le molala wo o tlogago Tsoare go ya Jeriko, motse wa mehlare ya mepalema. ₄Ke gona Morena a itšego go Moshe: “Ye ke naga ye ke enetšego Abrahama le Isaka le Jakobo gore ke tla e fa ditlogolo tša bona. Ke go bontšhitše yona, eupša nka se go goroše fao.”

₅Ka gona Moshe, mohlanka wa Morena, a hlokafalela moo nageng ya Moaba, bjalo ka ge Morena a be a boletše. ₆Morena a mmoloka ka moeding kua Moaba, go lebana le motse wa Bethe-Peore, eupša le go fihla le lehono ga go yo a tsebago gabotsebotse mo a bolokilwego gona. ₇Moshe o be a na le mengwaga ye lekgolo le masome a mabedi ge a ehwa; o be a sa tiile, le mahlo a gagwe a sa bona gabotse. ₈Setšhaba sa Israele sa mo llela matšatši a masome a mararo melaleng ya Moaba.

₉Joshua, morwa wa Nunu, o be a tletše bohlale, ka gobane Moshe o be a mmeile moetapele legatong la gagwe. Baisraele ba be ba theetša Joshua mme ba phetha ditaelo tše Morena a ba filego tšona ka Moshe.

₁₀Mo go Baisraele ga se gwa ka gwa ba le moprofeta yo a swanago le Moshe; Morena o be a bolela le yena ba lebantše difahlego. ₁₁Ga go moprofeta yo mongwe yo a kilego a dira mehlolo le dimakatšo tša go swana le tše Morena a rometšego Moshe go tlo di dira go kgoši ya Egepeta le bakgomana ba yona, le naga ya gona ka moka. ₁₂Ga go moprofeta yo mongwe yo a kilego a kgona go dira dilo tše kgolo tše di tšhošago tše Moshe a di dirilego Baisraele ka moka ba lebeletše.