To The Word – Day 43

₁Banabešo, ke rata ge le tseba gabotse mabapi le dimpho tša semoya tše le nngwaletšego mabapi le tšona. ₂Le a tseba gore mola le sa le baditšhaba, le be le arošwa ka mekgwa ye mentši go khunamela medingwana ya go se bolele. ₃Bjale ke nyaka gore le tsebe gore ga go motho yo e ka rego a bušwa ke Moya wa Modimo a re: “Jesu a a rogakwe!” Le gona ga go motho yo a ka rego: “Jesu ke Morena,” ge e se ge a bušwa ke Moya wo Mokgethwa.

₄Dimpho tša semoya ke tša mehuta, eupša ke tša Moya o tee. ₅Le mekgwa ya go direla batho ke ya mehuta, eupša Morena ke o tee yo a laelago badumedi go direla batho. ₆Le mediro ke ya mehuta, eupša Modimo yo a kgontšhago modumedi yo mongwe le yo mongwe go dira mediro ya gagwe ke o tee. ₇Tše di dirwago ke Moya ka modumedi yo mongwe le yo mongwe ke tša go hola bohle. ₈Yo mongwe o fiwa ke Moya go bolela ka bohlale, mola mongwe a fiwa ke wona Moya woo polelo ya tsebo. ₉Yo mongwe o fiwa ke Moya woo tumelo, mola mongwe, ka kgaugelo ya Modimo, a fiwa ke wona dimpho tša go fodiša. ₁₀Yo mongwe o fiwa ke Moya maatla a go dira mehlolo, mongwe a fiwa maatla a go bega molaetša wa Modimo, mola mongwe a fiwa maatla a go lemoga gore motho o hlohleletšwa ke moya ofe. Yo mongwe o fiwa bokgoni bja go bolela ka mantšu a go se kwešišwe, mongwe a fiwa bokgoni bja go a hlatholla. ₁₁Tšeo ka moka di dirwa ke wona Moya o tee woo; o abela yo mongwe le yo mongwe mpho ka mo o ratago.

₁₂Kriste o bjalo ka mmele o tee wo o nago le ditho tše dintši; le ge mmele o na le ditho tše dintši, ditho tšeo di bopa mmele o tee. ₁₃Le rena ka moka re bjalo; le ge re le Bajuda, goba bao e sego Bajuda, goba makgoba, goba balokologi, re kolobeditšwe ka wona Moya o tee woo ra ba mmele o tee, bohle ra fiwa Moya o tee woo wa dula ka dipelong tša rena.

₁₄Gobane mmele ka bowona ga se setho se tee, ke ditho tše dintši. ₁₅Ge leoto le ka re: “Ka ge ke se letsogo, ga ke wa mmele,” ga se go re ka nnete e tla be e se setho sa mmele. ₁₆Tsebe le yona ge e ka re: “Ka ge ke se leihlo, ga ke wa mmele,” ga se go re ka nnete e tla be e se setho sa mmele. ₁₇Ge mmele wohle e ka be e le leihlo, go kwa o be o tla go tšea kae? Le ge mmele ka moka e ka be e le tsebe, go dupa o be o tla go tšea kae? ₁₈Bjale ge, Modimo o beile setho se sengwe le se sengwe mmeleng ka mo a ratilego ka gona. ₁₉Ge ditho tšohle e ka be e le setho se tee, na mmele o ka be o le gona? ₂₀Bjale ditho ke tše dintši, fela mmele ke o tee.

₂₁Ka gona, leihlo le ka se re go letsogo: “Ga ke bote wena!” Le hlogo e ka se re go maoto: “Ga ke bote lena!” ₂₂Gabotsebotse, ditho tša mmele tše di bonalago nke di fokola go feta tše dingwe, le tšona mmele o di botile; ₂₃le tšeo re naganago gore ga di na mohola wo mogolo le tšona re di šetša kudu; le tše di sa išwego mahlo le tšona re lebanwe ke go di apeša gabotsebotse, ₂₄kganthe tše di išwago mahlo tšona ga re itshwenye ka go di kgabiša. Modimo o beakantše mmele bjalo, gore setho se se lebanwego ke tlhompho ye kgolo se hlomphiwe kudu. ₂₅Ka gona, ga se go re ditho tša mmele di a lwa, eupša di babalelana ka go kwana. ₂₆Ge setho se sengwe sa mmele se ekwa bohloko, tše dingwe ka moka le tšona di a bo kwa; ge se sengwe se retwa, tše dingwe ka moka le tšona di thaba le sona.

₂₇Lena le mmele wa Kriste, gomme mongwe le mongwe wa lena ke setho sa wona. ₂₈Ba bangwe mo kerekeng Modimo o ba file mediro: ba mathomo ke baapostola, ba bobedi ke baprofeta, ba boraro ya ba baruti; gwa latela ba go dira mehlolo, bona ba latelwa ke bao Modimo a ba filego mpho ya go fodiša le ba ba kgonago go thuša ba bangwe mo phuthegong, le ba ba hlahlago ba bangwe, le ba ba bolelago ka mantšu a a sa kwešišwego. ₂₉Ga se gore bohle ke baapostola, goba baprofeta, goba baruti. Ga se gore ka moka ba dira mehlolo, ₃₀goba ba na le mpho ya go fodiša malwetši, goba ba kgona go bolela ka mantšu a go se kwešišwe, goba go a hlatholla. ₃₁Ka gona, le kgothalele gagolo dimpho tše di phalago tše dingwe.

Gomme bjale ke le bontšha tsela ye e di phalago ka moka.

₁Le ge nka kgona go bolela mantšu ohle a go se kwešišwe a batho le a barongwa, ge ke se na lerato, ke no swana le tshipi ye e kwetenyago goba moropa wo o tidimetšago. ₂Le ge nka ba le mpho ya go kgona go bega molaetša wa Modimo, le ge nka tseba diphiri ka moka le dilo ka moka, le ge nka ba le tumelo yohle ye e nyakegago go šutiša dithaba, ge ke se na lerato, gona ga ke selo. ₃Le ge nka fa bahloki tšohle tše ke nago le tšona, le ge nka ikgafela go fišwa, ge ke se na lerato, gona ga go nkhole selo.

₄Wa lerato ga a felele motho pelo, ebile ke yo botho; ga a na mona, ga a ikgantšhe, ebile ga a na makoko. ₅Wa lerato ga a dire dihlabišadihlong, ga a nyake go ikhola; ga a selekege fela; ga a sware yo kgopo ka pelo. ₆Ga a thabele bobe, o thabela toka. ₇O kgotlelela tšohle, o dumela tšohle, o holofela tšohle, o pelotelele go tšohle.

₈Lerato ga le fele, kganthe mpho ya go kgona go bega molaetša wa Modimo yona e tla fela, le ya go kgona go bolela ka mantšu a a sa kwešišwego e tla fela, tsebo le yona e tla fela. ₉Gobane tsebo ye re nago le yona e a hlaelelwa, mokgwa wo re begago molaetša wa Modimo ka wona le wona o a hlaelelwa. ₁₀Eupša mohla go etla seemo sa tše di feletšego, tše di hlaelelwago di tla timelela.

₁₁Mola ke sa le ngwana, ke be ke bolela bjalo ka ngwana, ke gopola bjalo ka ngwana, ke nagana bjalo ka ngwana; bjale ka gore ke monna, tša bobjana ke di tlogetše. ₁₂Gonabjale tše re di bonago di etša seswantšho se se ifetšego ka seiponeng; ka nako yeo re tla bona tšohle re lebane le tšona. Gonabjale tše ke di tsebago ke seripanyana fela, ka nako yeo ke tla tseba tšohle ka botlalo bjalo ka ge le nna Modimo a ntseba ka botlalo.

₁₃Bjale ge, tše di dulago di le gona ke tumelo le kholofelo le lerato, tše tharo tše; gomme sa go di feta ka moka ke lerato.

₁Se le swanetšego go se bea pele ke lerato, le dimpho tša Moya le di fišegele, gagolo mpho ya go bega molaetša wa Modimo. ₂Gobane yo a bolelago ka mantšu a a sa kwešišwego ga a bolele le batho, o bolela le Modimo, ka gobane ga a kwešišwe ke motho. Ka maatla a Moya wa Modimo o bolela tše di sa kwešišwego. ₃Eupša yo a begago molaetša wa Modimo o bolela le batho ka tša go ba hola moyeng, le tša go ba kgothatša, le tša go ba homotša. ₄Yo a bolelago ka mantšu a a sa kwešišwego go ikhola yena mong fela, kganthe yo a begago molaetša wa Modimo yena o hola phuthego yohle.

₅Ke duma ge bohle le ka be le ka bolela ka mantšu a a sa kwešišwego; eupša gagolo ke duma ge le ka be le na le mpho ya go bega molaetša wa Modimo. Gobane motho yo a begago molaetša wa Modimo o na le mohola go fetiša yo a bolelago ka mantšu a a sa kwešišwego, ge e se ge a ka hlatholla se a se bolelago, gore phuthego e holege. ₆Ka gona, banabešo, ge nka tla go lena ke bolela ka mantšu a a sa kwešišwego, ke tla le holang, ntle le ge e le gore ke le botša taba ye ke e utolletšwego ya Modimo, goba ye le sa e tsebego, goba molaetša wa Modimo, goba ke le ruta se sengwenyana?

₇Ge ešita le diletšo tše di sa phelego – e ka ba naka goba harepa – ge di sa letšwe gabotse, motho a ka lemoga bjang koša ye e letšwago? ₈Le phalafala ge e sa lle go kwalagala, ke mang yo a ka itokišetšago ntwa? ₉Le go lena go bjalo. Ge tše le di bolelago ka mantšu a a sa kwešišwego di sa kwešišege, le ka kwešišwa ke mang? Gape tše le di bolelago di tla tšewa ke phefo. ₁₀Mo lefaseng go na le maleme a mehutahuta, fela ga go le le sa kwešišwego. ₁₁Eupša ge ke sa kwešiše leleme le le bolelwago, ke tla ba o šele go mmoledi wa lona, le yena a ba o šele go nna. ₁₂Le go lena go bjalo. Ka ge le fišegela go ba le dimpho tša Moya, le leke gore le atelwe ke tše di holago phuthego.

₁₃Yo a bolelago ka mantšu a a sa kwešišwego a rapele gore a fiwe mpho ya go kgona go hlatholla se a se bolelago. ₁₄Gobane ge ke rapela ka mantšu a a sa kwešišwego, go rapela moya wa ka fela, tlhaologanyo yona ga e dire selo. ₁₅Bjale ke swanetše ke direng? Ke swanetše ke rapele ka moya, ke be ke rapele le ka tlhaologanyo; ke swanetše ke opele ka moya, ke be ke opele le ka tlhaologanyo. ₁₆Go sego bjalo, ge o ka leboga Modimo ka moya fela, mothofela yo a lego moo thapelong a ka araba bjang thapelo ya gago ya tebogo a re “Amene”, ge a sa kwešiše se o se bolelago? ₁₇Le ge eba thapelo ya gago ke ye botse, yo mongwe yena ga e mo hole.

₁₈Nna ke leboga Modimo ge ke le fetiša bohle ka go bolela ka mantšu a a sa kwešišwego. ₁₉Eupša ge ke le phuthegong ke bona go le kaone gore ke bolele mantšu a mahlano a a kwešišwago, gore ke rute ba bangwe se sengwenyana, go na le gore ke bolele ka mantšu a diketekete a a sa kwešišwego.

₂₀Banabešo, le se ke la nagana bjalo ka bana; le be bana ka thokong ya bobe, eupša monaganong le be batho ba bagolo. ₂₁Ka melaong ya Moshe go ngwadilwe gwa thwe:

₂₃Bjale, ge e ka re ge phuthego yohle e kgobokane mme bohle ba bolela ka mantšu a a sa kwešišwego, gwa tsena bathofela goba batho ba ba sa dumelego, na ba ka se re le a gafa? ₂₄Eupša ge e ka re mola bohle ba bega molaetša wa Modimo gwa tsena yo a sa dumelego goba mothofela, o tla kokonelwa ke tšohle tše di bolelwago; o tla ahlolwa ke bohle ba a ba kwago. ₂₅Diphiri tša pelo ya gagwe di tla utologa; o tla itahlela fase ka sefahlego, a khunamela Modimo a bega a re: “Ruri, Modimo o mo go lena!”

₂₆Bjale go ka thweng, banabešo? Ge le kopane le le phuthego, yo mongwe o na le sefela, mongwe o na le se a ka se rutago ba bangwe, mongwe o na le se a se utolletšwego ke Modimo, mongwe o na le molaetša wo a ka o botšago ba bangwe ka mantšu a a sa kwešišwego, mongwe gape o kgona go hlatholla seo se bolelwago; tšohle e be tša go hola phuthego. ₂₇Ge go na le ba go bolela ka mantšu a a sa kwešišwego, a e be ba babedi goba ba bararo, e sego go feta fao, le gona ba šielane, gomme go be le wa go hlatholla tše di bolelwago. ₂₈Eupša ge go se na wa go hlatholla, gona yo a bego a rata go bolela ka mantšu a a sa kwešišwego mo phuthegong a homole, a bolele ge a le noši le Modimo gae. ₂₉Go ba ba begago molaetša wa Modimo go bolele ba babedi goba ba bararo, ba bangwe e be ba go sekaseka tše di bolelwago. ₃₀Ge yo mongwe wa ba ba dutšego phuthegong a ka utollelwa se sengwe ke Modimo, yo a bolelago a nape a homole. ₃₁Bohle le ka no bega molaetša wa Modimo ka go šielana, gore bohle ba ithute se sengwenyana, ba kgothatšege. ₃₂Babegi ba molaetša wa Modimo ba kgona go itshwara, ba homola, ₃₃gobane Modimo ga se Modimo wa tlhakatlhakano, ke Modimo wa molao.

Bjalo ka ge e le setlwaedi diphuthegong tšohle tša badumedi, ₃₄ge le kopane le tlilo rapela, basadi ba homole. Ga ba dumelelwe go bolela; ba swanetše go bušwa, ba phethe molao wa Moshe. ₃₅Ge ba na le taba ye ba nyakago go e tseba, ba botšiše banna ba bona gae. Ke taba ya dihlong ge mosadi a bolela phuthegong.

₃₆Kgane lentšu la Modimo le thomile moo go lena, goba le tletše lena fela? ₃₇Ge motho a ka ikwa a na le mpho ya go bega molaetša wa Modimo goba mpho ye nngwenyana ya Moya, a tsebe gore tše ke le ngwalelago tšona di laetšwe ke Morena. ₃₈Ge a ka se be le taba natšo, Modimo le yena a ka se be le taba naye.

₃₉Ka gona, banabešo, le fišegele go bega molaetša wa Modimo, gomme le ba ba bolelago ka mantšu a a sa kwešišwego le se ke la ba thibela. ₄₀Fela tšohle di dirwe ka maleba le ka molao.

₁Banabešo, ke nyaka go le gopotša Taba yela ye Botse ke le begetšego yona la e amogela la ithekga ka yona. ₂Ke yona ye le phološwago ka yona, ge le itshwareletše ka yona e le molaetša wo ke le begetšego wona. Ge le sa itshwarelele ka yona, gona le tla be le dumeletše lefeela.

₃Taba ye bohlokwahlokwa ye ke le boditšego yona, ye le nna ke e boditšwego, ke go re: Kriste o hwile ka lebaka la dibe tša rena, go ya ka Mangwalo a Makgethwa; ₄le go re o ile a bolokwa, gomme ka morago ga matšatši a mararo a tsoga bahung, go ya ka Mangwalo a Makgethwa; ₅le go re o ile a itšweletša go Kefase, a tla a itšweletša go baapostola ka moka ba lesome le metšo ye mebedi. ₆A tla a itšweletša go balatedi ba gagwe ba go feta ba makgolo a mahlano ka nako e tee, bao bontši bja bona bo sa phelago, le ge ba bangwe ba ithobaletše. ₇A tla a itšweletša go Jakobose, mme ka morago a itšweletša go baapostola ka moka.

₈Mafelelong a tla a itšweletša le go nna, le ge ke swana le motho yo a tswetšwego ka nako ye e sego yona. ₉Gobane nna ke fetwa ke baapostola ka moka ka maemo, ebile ga ke swanelwe le ke go bitšwa moapostola, ka gobane ke be ke hlomere kereke ya Modimo. ₁₀Eupša ka kgaugelo ya Modimo ke bile se ke lego sona, gomme kgaugelo ye e ntšwetše mohola. Ke šomile go ba feta ka moka, le ge etšwe go be go sa šome nna ka bonna, eupša e le kgaugelo ya Modimo e šoma ka nna. ₁₁Bjale ge, le ge eba e be e le nna goba bona, woo ke molaetša woo re o begago, gomme ke wo lena le o dumelago.

₁₂Ka ge molaetša wo re o begago e le wa go re Kriste o tsošitšwe bahung, go tla bjang ge bangwe ba lena ba re bahu ba ka se tsošwe? ₁₃Ge eba bahu ba ka se tsošwe, gona ke go re Kriste ga se a ka a tsošwa; ₁₄gomme ge eba Kriste ga se a ka a tsošwa, gona molaetša wo re o begago ke lefeela, le se le se dumelago ke lefeela. ₁₅Gona ke go re le rena re be re bolela maaka ka Modimo mola re re o tsošitše Kriste bahung. Gobane ge eba bahu ba ka se tsošwe, gona le Kriste Modimo ga se a ka a mo tsoša. ₁₆Gape ge eba bahu ba ka se tsošwe, ke gore le Kriste ga se a ka a tsošwa. ₁₇Gomme ge eba Kriste ga se a ka a tsošwa, tumelo ya lena e ka se le hole ka selo, le dibe tša lena ga se tša swarelwa. ₁₈Le gona ke go re bao ba ithobaletšego ba dumela go Kriste ba timetše. ₁₉Ge eba go holofela go Kriste ga rena go re hola fela bophelong bjo, gona re ba ba lebanwego ke go kwelwa bohloko go feta bohle lefaseng.

₂₀Eupša nnete ke go re Kriste o tsošitšwe bahung, a etša thakangwaga ya ba ba ithobaletšego. ₂₁Gobane bjalo ka ge lehu le tlile ka motho, le tsogo ya ba ba hwilego e tla ka motho. ₂₂Bjalo ka ge batho ka moka ba ehwa ba tswalane le Adamo, le go tsoga bahung ba tla tsoga ba tswalane le Kriste. ₂₃Fela yo mongwe le yo mongwe o na le nako ya gagwe ya go tsoga: wa mathomo e bile Kriste; gomme e tla re ge a etla, gwa tsoga bao e lego ba gagwe. ₂₄Gwa kgona go etla mafelelo a lefase, ge Kriste a tla be a tlilo fediša balaodi ba semoya le magoši a semoya le maatla a semoya ka moka, a neela Modimo, Tatagwe, mmušo. ₂₅Gobane Kriste o swanetše go buša, go fihlela Modimo a dira gore manaba ohle a Kriste a bušwe ke yena Kriste. ₂₆Lenaba la mafelelo le le tlago fenywa ke lehu. ₂₇Gobane Mangwalo a Makgethwa a re: “Modimo o dirile gore tšohle a di gate ka dinao.” Fela ge go thwe “tšohle” go bonala gabotse gore ga go balwe le yena Modimo, yo a dirilego gore Kriste a gate tšohle ka dinao. ₂₈Eupša mohla tšohle di laolwa ke Kriste, ke mo yena Morwa a tlago ikgafela go laolwa ke Modimo yo a mmeilego Molaodi wa tšohle; gomme yena Modimo o tla laola tšohle ka botlalo.

₂₉Bjale le reng ka bao ba kolobeletšwago ba ba hwilego? Seo ba se direlang? Ge eba ka nnete bahu ba ka se tsoge, batho bao ba reng ba kolobeletšwa bahu? ₃₀Le rena re reng re dula re ipeile kotsing? ₃₁Banabešo, nna ke dula ke lebane le lehu ka mehla! Ge ke realo ke boledišwa ke go kgantšha lena ka bophelo bjo bo ntirilego o tee le Kriste Jesu, Morena wa rena. ₃₂Ge eba kua Efeso ke be ke elwa mo nkego ke lwa le dibata, ke tutuetšwa fela ke maikutlo a botho, go nthušitšeng? Ge eba bahu ba ka se tsoge, gona a re yeng le polelo ye e rego: “A re jeng, re nweng, gobane gosasa re tla tsoga re hwile!”

₃₃Le se ke la forwa. Go thwe: “Go gwerana le ba babe go senya mekgwa ye mebotse.” ₃₄Phafogang, le tlogele dibe. Ke le botša ke le hlabiša dihlong gore ba bangwe moo go lena ga ba tsebe Modimo.

₃₅Yo mongwe motho a ka no botšiša a re: “Bahu ba tla tsoga bjang? Gona ba tla tsoga ka mmele wa mohuta mang?” ₃₆Yeo ke potšišo ya botlaela. Seo o se bjalago se ka se mele sa phela se sa ka sa hwa pele. ₃₇Le gona se o se bjalago ke thorwana fela – e ka ba ya lebele goba ya peu ye nngwenyana; ga se semela ka bosona se se tlilogo gola. ₃₈Ke Modimo yo a fago thorwana sebopego se a se ratago. O fa peu ye nngwe le ye nngwe sebopego sa yona.

₃₉Le nama ya diphedi ga e swane: batho ba na le ya bona, le diphoofolo di na le ya tšona, le dinonyana di na le ya tšona, le dihlapi di na le ya tšona.

₄₀Le legodimong go na le dilo tša gona, le lefaseng go na le tša gona. Go taga ga dilo tša legodimong ga go swane le ga tša lefaseng. ₄₁Go taga ga letšatši ke gošele, le ga ngwedi ke gošele, le ga dinaledi ke gošele, mola le tšona dinaledi di phalana ka go taga.

₄₂Le bona bahu mohla ba tsoga ba tla ba bjalo. Mmele o bolokwa e le wo o bolago, eupša o tla tsoga bahung e le wo o sa bolego. ₄₃O bolokwa o nyatšega, eupša o tla tsošwa bahung o thakgafetše. O bolokwa o fokola, eupša o tla tsoga o tiile. ₄₄O bolokwa e le wa nama, eupša o tla tsoga e le wa semoya. Bjalo ka ge go na le mmele wa nama, wa semoya le wona o swanetše go ba o le gona. ₄₅Le Mangwalo a Makgethwa a re: “Motho wa mathomo, e lego Adamo, e bile sebopiwa se se phelago”; le Adamo wa mafelelo e bile Moya wo o phedišago. ₄₆Pele ga ge go etla mmele wa semoya, go tla wa nama, gwa kgona go etla wa semoya. ₄₇Motho wa mathomo o tšwa mobung, ke wa lefase; motho wa bobedi yena o tšwa legodimong. ₄₈Ba e lego ba lefase ba swana le yola wa go tšwa mobung; ba e lego ba legodimong ba swana le yola wa go tšwa legodimong. ₄₉Bjalo ka ge re apere seswantšho sa yola wa go tšwa mobung, le seswantšho sa yola wa go tšwa legodimong re tla se apara.

₅₀Banabešo, ge ke realo ke ra gore motho wa nama a ka se be le bophelo bjo bo sa felego; se se bolago se ka se fetoge se se sa bolego.

_51-52Ekwang sephiri sese: Re ka se hwe ka moka, eupša ge phala e lla la mafelelo, ka moka re tla fetoga gateetee, ka go ponya ga leihlo. Gobane ge phala e lla, bahu ba tla tsošwa, ba se sa hwa gape, gomme rena re tla fetošwa. ₅₃Se se bolago se tla fetošwa se se sa bolego; se se hwago se tla fetošwa se se sa hwego. ₅₄Mohla se se bolago se fetošwa se se sa bolego, le se se hwago se fetošwa se se sa hwego, ke mo go tlago phethega Mangwalo a Makgethwa a a rego: “Lehu le fedišitšwe, le fenyeditšwe sa ruri!”

₅₈Ka gona, banabešo ba ke le ratago, tiang tumelong le se tekateke. Le tiišeng go direla Morena ka mehla, ka ge le tseba gore go itapišetša Morena ga lena ga se ga lefeela.

₁Bjale ke tla tabeng ya dimpho tše di ntšhetšwago badumedi ba ba lego Jerusalema. Le lena le dire ka mo ke laetšego diphuthego tša Galatia. ₂Ka letšatši la Sontaga mongwe le mongwe a beele tšhelete ye nngwenyana thoko go ya ka poelo ya gagwe, gomme a e kokotletše, gore mohla ke etla e se be gona go ntšhwago ditšhelete. ₃Ge ke tlile, banna ba le ba kgethilego ke tla ba roma ka mangwalo gore ba iše dimpho tša lena Jerusalema. ₄Ge e le gore go a swanela gore le nna ke ye, gona ke tla ya le bona.

₅Ke tla tla go lena ka tsela ya Matsedonia, ka gobane ke ikemišeditše go yo feta gona. ₆Mohlomongwe moo go lena nka dula sebakanyana, mohlomongwe ka ba ka fetša marega moo, ya ba gona le tlago mphelesetša mo ke tlago ba ke nyaka go ya gona. ₇Gobane ga ke rate go le bona fela ke feta; ke holofela gore ge Morena a dumela ke tla ba le lena lebaka le leteletšana.

₈Motseng wa Efeso ke tla dula go fihlela letšatši la Pentekoste. ₉Gobane ke mo ke bilego le sebaka se sebotse sa go bega molaetša wa Modimo wo o kago sokolla batho ba bantši, le ge ba ba nkganetšago le bona e le ba bantši.

₁₀Ge Timotheose a ka tla moo go lena, le mo sware gabotse, ka gobane ke modiredi wa Morena bjalo ka nna. ₁₁Go se be le yo a mo nyatšago, gomme le mo felesetše a sepele a iketlile, a be a boele mono go nna, gobane nna le badumedikanna re mo letetše.

₁₂Ge e le ngwanaborena, Apolose, yena ke gantši ke mo tutuetša gore a le etele a na le bana ba borena ba bangwe, fela le gatee o be a sa rate go tla gonabjale. Eupša mohla a hwetšago sebaka o tla tla.

₁₃Phafogang, le tieng tumelong, le beng le sebete, le tiiše maatla. ₁₄Tšohle tše le di dirago le di dire ka lerato.

₁₅Tša Stefanase le ba lapa la gagwe le a di tseba; gape ke bona Bakriste ba go sokologa pele mo nageng ya Agaya, gomme ba ikgafetše go direla badumedikabona. Ke le kgopela e le ruri, banabešo, ₁₆gore le dumele go laolwa ke ba babjalo le bohle ba ba itapišago mme ba šomago le bona.

₁₇Ke thabetše ge Stefanase le Fortunatose le Agaikose ba tlile, ka gobane ba le eme legato, lena le sego gona, ka ge ke be ke le hlolosetše ₁₈gomme ba ile ba nkhomotša bjalo ka ge le lena ba ile ba le homotša. Batho ba babjalo ba swanetše go elwa hloko.

₁₉Diphuthego tša naga ya Asia di re le dumele. Akhwila le Prisila le phuthego ye e tsenelago ka lapeng la bona, bona e lego badumedikalena, ba re le dumele kudu. ₂₀Badumedi ka moka ba ba lego mo ba re le dumele.

Le dumedišaneng ka go atlana, gona go bontšhago go ratana ga badumedi.

₂₁Le nna ke ngwala ka seatla sa ka ke re: Paulose o a le dumediša.

₂₂Ge go na le yo a sa ratego Morena, a a rogakwe!

Morena, etla!

₂₃Morena Jesu a le gaugele.

₂₄Lerato la ka le be le lena bohle ka Kriste Jesu.