To The Word – Day 44

₁Lena setšhaba sa ka,

theeletšang tše ke le rutago tšona;

tše ke di bolelago le di ele hloko.

₂Ke tla bolela le lena ka diema,

ka bola phiri tša mehleng ya kgale.

₃Tše re di kwelego re bile re di tseba,

tše re di boditšwego ke borakgolokhukhu

₄re ka se di fihlele ditlogolo tša bona;

re tla botša ba moloko wa ka moso ditiro tše dikgolo tša Morena,

le maatla a gagwe,

le mehlolo ye a e dirilego.

₅O file ditlogolo tša Jakobo taelo,

o hlometše tšhaba sa Israele molao,

a laela borakgolokhukhu gore ba o rute bana ba bona,

₆gore meloko ya ka moso e tle e o tsebe,

o tsebje ke bana ba ba sa tlilogo belegwa;

le bona ba tle ba o botše ba bona bana,

₇gore le bona ba tle ba bote Modimo,

ba se lebale ditiro tša gagwe,

ba phethe ditaelo tša gagwe,

₈ba se etše borakgolokhukhu ba bona,

ya ba moloko wa dinganga,

wa kgang,

moloko wo o se nago maikemišetšo,

wa go se botegele Modimo.

₉Baefraime ba ba itlhamilego ka mesebe ba ile ba tšhaba mohla wa ntwa.

₁₀Ba hlanamela kgwerano ya bona le Modimo,

ba gana go phetha melao ya gagwe.

₁₁Ba itebatša ditiro tša gagwe tše dikgolo,

yona mehlolo yela a ilego a ba bontšha yona.

₁₂A dira mehlolo molaleng wa Tsoane kwa Egepeta borakgolokhukhu ba bona ba lebeletše.

₁₃A aroganya lewatle a ba tshediša;

a emiša meetse boka leboto.

₁₄Mosegare a ba etetša ka leru,

bošego ka moka a ba bonegela ka seetša sa mollo.

₁₅A pharola matlapa lešokeng,

a ba noša ba kgolwa,

meetse a nkego a phamphamadiba.

₁₆A ntšha meela letlapeng,

a ediša meetse a nkego dinoka.

₁₇Le ge go le bjalo ba no fela ba mo fošetša,

ba rumola Ragodimodimo kwa lešokeng.

₁₈Ba hlohla Modimo ka boomo ka go mo kgopela dijo tše di nyakwago ke bona.

₁₉Ba bolela Modimo gampe ba re:

“Afa Modimo a ka kgona go re fa dijo mo lešokeng?

₂₀Leswika lona o rile go le betha la phulega meetse,

dinoka tša falala.

Na le bogobe a ka kgona go bo fa setšhaba sa gagwe,

le nama sa ja?”

₂₁Morena o rile go ba kwa a ba galefela;

ditlogolo tšeo tša Jakobo a di hlasela ka mollo,

a tukela Baisraele bogale,

₂₂ka ge ba be ba sa mo dumele,

ba sa tshephe gore a ka ba hlakodiša.

₂₃Le ge go le bjalo,

a laya leratadima kua godimo gomme a le bula mejako.

₂₄A ba nešetša manna ya ba dijo tša bona,

e le mabele a go tšwa legodimong.

₂₅Batho ba ja sejo sa barongwa,

a ba fa mphago wo montši.

₂₆A fokiša phefo ya bohlabatšatši sebakabakeng;

a tsoša le ya borwa ka maatla a gagwe.

₂₇A ba nešetša nama ye ntši ye nkego lerole,

e le dinonyana tše dintši boka lešabašaba lebopong la lewatle.

₂₈A di wišetša ka mešašeng ya bona,

le go dikologa mekutwana ya bona.

₂₉Ka fao ba ja ba khora,

Modimo a ba file tše ba bego ba di nyaka.

₃₀Fela bona ba di galala.

E rile ba sa ja,

₃₁a ba galefela,

a bolaya dikokotla gare ga bona,

a rapalatša dinatla tša masogana a Israele.

₃₂Le ge go le bjalo,

batho ba no tšwela pele le go dira dibe;

ba se dumele mehlolo ya gagwe.

₃₃Ka gona a ba hlokiša mohola bophelong,

a ba bolaya ka lephakuphaku.

₃₄E be e re ge a bolaile ba bangwe,

ba ba šetšego ba sokologele go yena,

ba itshole mme ba mo khunamele gape,

₃₅ba lemoge gore Modimo ke sebo sa bona,

le gore yena, Ragodimodimo, ke Molopolli wa bona.

₃₆Fela ba leke go mo radia ka dipolelo,

ba mmotša maaka.

₃₇Ba be ba sa mmotegele,

ba sa botegele le kgwerano ya gagwe.

₃₈Fela a ba gaugele,

a ba swarele molato wa bona,

a se ke a ba fediša.

Gantši ge a galefile o be a itshwara,

a sa fenywe ke kgalefo ya gagwe.

₃₉A sa lebale gore ke batho ba nama;

ba swana le phefo ye e iphetelago e sa boe.

₄₀Ke gantši ba mo rumola kua lešokeng,

ba mo nyamiša kwa leganateng.

₄₁Ba mo hlohla leboelela,

ba kweša Mokgethwa wa Israele bohloko.

₄₂Ba be ba lebala maatla a gagwe,

le mohla wola a ba hlakodiša manabeng a bona,

₄₃mola a ipontšha ka go dira dimakatšo,

ka go dira mehlolo molaleng wa Tsoane kua Egepeta.

₄₄A fetoša dinoka le dinokana tša Egepeta madi,

gore Baegepeta ba se kgone go nwa meetse a gona.

₄₅A ba romela diboba tša ba loma,

le digwagwa tša ba senyetša.

₄₆Mašemo a bona a a gafela bojane;

tše ba di bjetšego a di leša segongwane.

₄₇Merara ya bona a e rothotha ka sefako,

mego a e gwamiša ka šobane.

₄₈Dikgomo tša bona tša keketwa ke sefako,

dihuswane tša rathwa ke legadima.

₄₉A ba tlaletša ka go ba tukela bogale le pefelo,

a ba romela barongwa ba ba bolayago.

₅₀A se thibele bogale bja gagwe,

le lehu a se ba phefiše lona,

a upša a ba gafela mauba.

₅₁A bolaya maitšibolo ohle a bona Egepeta,

maitšibolo a bona mešašeng ya Hamo.

₅₂Setšhaba sa gagwe sona a se bulela boka dinku,

a se etetša lešokeng bjalo ka mohlape.

₅₃A ba eta pele a ba šireleditše, ba sa boife selo;

manaba a bona ona a a ribegetša ka lewatle.

₅₄A ba iša nageng ya gagwe ye kgethwa,

nagathota ye a ithopetšego yona.

₅₅A raka ditšhaba ge Baisraele ba etla;

kgoro tšohle tša Israele a di elela naga,

a di bea magaeng a ditšhaba tšela.

₅₆Fela bona ba fela ba hlohla Modimo,

Ragodimodimo;

ba mo rumola ba gana go phetha melao ya gagwe.

₅₇Ba kgeloga ba hloka botshephegi

go etša borakgolokhukhu ba bona;

ba ba bjalo ka mosebe wo o nyefilego.

₅₈Ba mo rumola ka go khunamela medingwana dintotomeng,

mme medingwana yeo ya mo hufegiša.

₅₉Ge a di bona a galefa,

mme setšhaba sa gagwe a se lahlela sa ruri.

₆₀A furalela bodulo bja gagwe kua Shilo,

wona mošaša wo a bego a dula le batho ka go wona.

₆₁A lesa manaba a thopa Polokelo ya gagwe ya Kgwerano,

e lego sona sešupo sa maatla le letago la gagwe.

₆₂A galefela setšhaba sa gagwe,

mme bona bao e lego lefa la gagwe a ba lesa ba bolawa ka tšhoša.

₆₃Masogana a bona a metšwa ke mollo,

makgarebe a bona a hloka banyadi.

₆₄Baprista ba gabobona ba bolawa ka tšhoša,

fela bahlologadi ba bona ba se dumelelwe go ba ilela.

₆₅Ke mo yena Mong wa bohle a phafogilego mo nkego o tsoga borokong;

a etša senwi se se tlogwago ke botagwa.

₆₆A lwa le manaba a gagwe,

a ba gomišetša morago,

a ba segiša batho go ya go ile.

₆₇A lahla ditlogolo tša Josefa,

le kgoro ya Benjamene a se ikgethele yona.

₆₈A ikgethela kgoro ya Juda le thaba ya Sione,

e lego thaba ye a e ratago.

₆₉A ikagela Tempele ye e phagamego go fihla leratadimeng;

a e hloma ya tiela ruri go etša lefase.

₇₀A ikgethela Dafida gore e be mohlanka wa gagwe;

a mo tšea a le merakeng ya dinku.

₇₁A mo tlogediša dinku tša ditswetši,

gore a tle a mo dišiše setšhaba sa gagwe,

tšona ditlogolo tša Jakobo, Baisraele,

lona lefa la gagwe.

₇₂Dafida a ba diša ka boikgafo,

a ba hlahla ka temogo.

₁Modimo,

baditšhaba ba šwahletše ka nageng ya gago;

ba hlompholotše Tempele ya gago ye kgethwa;

Jerusalema ba e fetotše mašope.

₂Ditopo tša bahlanka ba gago ba di lahletše manong;

ba gafetše ditopo tša babotegi ba gago dibata.

₃Madi a bona a etša meetse go dikologa Jerusalema,

gomme wa go ba boloka a hlokega.

₄Re segwa ke ditšhaba tše di agišanego le rena,

re fetogile dikwero le dikgegeo go ba ba bapilego le rena.

₅O tla re galefela go fihlela neng, Morena?

Na e tla ba go ya go ile?

Kgane bogale bja gago bo tla no fela bo re tukela boka mollo?

₆Kgalefo ya gago e thenolele

godimo ga ditšhaba tše di sa go dumelego,

le mebušo ya ba ba sa go rapelego.

₇Gobane ke bona ba go re fediša,

rena ditlogolo tša Jakobo,

mme ba senya naga ya gaborena.

₈O se re otlele dibe tša borakgolokhukhu ba rena;

re šokele, gobane re feletšwe ke tshepo.

₉Re thuše, hle, Modimo,

Mophološi wa rena,

gore re tle re go godiše;

re phološe, o re swarele dibe tša rena,

ka ge o le Modimo wa lešoko.

₁₀Baditšhaba ba reng ba re botšiša ba re:

“Modimo wa lena o kae?”

Re bone ge o ba tsebiša gore o lefeletša bahlanka ba gago ka ge ba ba bolaile.

₁₁Nke o ele dillo tša mathopša hloko,

gomme ba ba ahloletšwego lehu o ba phološe ka maatla a gago a magolo.

₁₂Ditšhaba tše di agišanego le rena o di lefiše gašupa nyefolo ye ba go nyefotšego ka yona, Morena.

₁₃Ke mo rena, setšhaba sa gago,

mohlape wo o o dišago,

re tlago go leboga go iša le go iša,

ra anegela ditlogolo le ditlogolwana tša rena ka mo o swanelwago ke go tumišwa ka gona.

₁Re hlwaele tsebe, hle,

Modiša wa Israele.

Wena wa go etetša ditlogolo tša Josefa boka mohlape,

wena o dutšego godimo ga bakerubi,

iponatše ka letago

₂go ba kgoro ya Efraime,

le ya Benjamene,

le ya Manase.

Utolla maatla a gago o tle o re thuše.

₃Boela o re atle, hle, Modimo,

o re edišetše sefahlego,

ke mo re tlago phologa.

₄Morena, Modimo Ramaatlaohle,

na o tla re galefela go fihlela neng,

rena setšhaba sa gago se se go rapelago?

₅Etse o re file meokgo ya ba dijo tša rena,

wa re noša yona ka bontši.

₆O re fetotše sebakwa sa ditšhaba tše di bapilego le rena;

re kodutlwa ke manaba a rena.

₇Boela o re atle, hle,

Modimo Ramaatlaohle,

o re edišetše sefahlego,

ke mo re tlago phologa.

₈O epolotše morara Egepeta,

wa tla wa o bjala mo o bego o rakile ditšhaba gona.

₉Wa o kgorela lebala mo o bego o o bjala gona,

medu ya swara,

gomme wa tlala naga.

₁₀Dithaba tša apešwa ke moriti wa wona,

mesedere ya go letla ya pipša ke dikala tša wona.

₁₁Wa letla dikala tša fihla lewatleng,

mahlogedi a wona le wona a fihla nokeng.

₁₂O reng o kgerešitše morako wa wona,

gore bafeti ba tsela ba tle ba o kge dikenywa?

₁₃Dikolobe tša naga di a o senya;

o lewa ke diphoofolo tša lešoka.

₁₄Re boele, hle,

Modimo Ramaatlaohle;

okamela mono fase o le legodimong,

o bone morara wo,

mme o boele o o babalele.

₁₅Šireletša se o se bjetšego ka seatla sa gago.

₁₆Ba ba o remilego mme ba o fiša

o ba tomolele mahlo o ba fediše.

₁₇Šireletša setšhaba se o se kgethilego,

sona setšhaba se o itiišeditšego sona,

₁₈ke mo re ka se sa go furalelago.

Re lote re phele,

ke mo re tlago go rapela.

₁₉Boela o re atle, hle, Morena,

Modimo Ramaatlaohle;

o re edišetše sefahlego,

ke mo re tlago phela.