To The Word – Day 42

₁Kgoro ya Rubene le ya Gade di be di na le diruiwa tše ntši kudu. Ge ba bona gore naga ya Jasere le ya Gileade ke selete se se loketšego leruo, ₂ba ya go Moshe le Eleasara le baetapele ba bangwe ba setšhaba ba re: _3-4“Selete se Morena a thušitšego Baisraele gore ba se thope – motse wa Atharote, wa Dibone, wa Jasere, wa Nimra, wa Heshbone, wa Elale, wa Sibma, wa Nebo le wa Beone – ke naga ye e loketšego diruiwa, mme rena re na le leruo le lentši. ₅Hle, re fe naga ye e be ya rena, gomme o se ke wa re tshediša noka ya Jordane ra yo dula gona.”

₆Moshe a ba fetola a re: “A le nyaka go dula fa mola Baisraele ba gabolena ba eya ntweng? ₇Le reng le nyaka go nola setšhaba sa Israele moko gore se se tshele noka ya Jordane sa tsena nageng ye Morena a ba filego yona? ₈Seo ke se botatagolena ba se dirilego ge ke ba roma go tloga Kadeshe-Barnea go tlo hlola naga. ₉Ba fihla moeding wa Eshkolo mme ba bona naga, eupša ge ba boa, ba nola setšhaba moko gore se se ke sa tsena nageng ye Morena a ba filego yona. ₁₀Morena a ba galefela tšatši leo, gomme a ena a re: ₁₁‘Ruriruri, ka ge ba se ba mpotegela, ga go monna yo a nago le mengwaga ye masome a mabedi goba go feta moo yo a tšwilego Egepeta yo a tlago tsena nageng ye ke enetšego Abrahama le Isaka le Jakobo ka re ke tla ba fa yona.’ ₁₂Keno yeo e be e akaretša yo mongwe le yo mongwe, ntle le Kalebe, morwa wa Jefune, Mokenase, le Joshua, morwa wa Nunu; bona ba ile ba fela ba botegetše Morena. ₁₃Morena a galefela setšhaba mme a se tlarumiša lešokeng mengwaga ye masome a mane, go fihlela ge moloko woo wa go mo galefiša o hwile ka moka. ₁₄Mme bjale le eme botatagolena legato, lešabana le lefsa la banna ba dibe ba ba itokišeditšego go theošetša bogale bjo bošoro bja Morena godimo ga Baisraele gape! ₁₅Ge lena batho ba Rubene le ba Gade bjale le gana go latela Morena, o tla boeletša a tlogela setšhaba se mo lešokeng, gomme le tla be le se bolaile ka moka.”

₁₆Ba ile ba tla go Moshe ba re: “Re dumelele re agele dihuswane tša rena mašaka ka maswika, re agele le bana ba rena le basadi le batšofadi metse ye e ageleditšwego ka merako. ₁₇Ke moo re tlago itokišetša go ya ntweng le Baisraele ba gaborena re ba etile pele go fihlela re ba goroša nageng ye e tlago ba ya bona. Ge tšeo di direga bana ba rena le basadi le batšofadi ba tla be ba dula mo metseng ye e ageleditšwego ka merako, ba šireleditšwe gore ba se hlaselwe ke badudi ba naga ye. ₁₈Re ka se boele magaeng a rena pele Baisraele ka moka ba thopa naga ye ba e aroletšwego. ₁₉Re ka se arolelane naga le bona ka mošola wa Jordane, ka gobane re šetše re tšere ya rena karolo ka mono bohlabela bja Jordane.”

₂₀Moshe a ba fetola a re: “Ge le tloga le tiišitše go dira se le se bolelago, gona itlhameng mo pele ga Morena. ₂₁Banna bohle ba lena ba ba itlhamilego ba tshele Jordane, mme ka taelo ya Morena ba hlasele manaba a rena go fihlela Morena a ba rakile ₂₂mme a tšere naga yeo. Ka morago ga moo le ka ipoela, ka gobane le tla be le phethile se le swanetšego go se phethela Morena le Baisraele ba gabolena. Ke moo Morena a tlago dumela gore naga ye ya ka bohlabela bja Jordane ke ya lena. ₂₃Eupša ge le ka se phethe ka mo le tshephišitše ka gona, le tla be le fošetša Morena. Le se ke la iphora; le tla otlelwa sebe seo sa lena. ₂₄Ka gona agang metse ya lena le mašaka a dihuswane tša lena, fela le dire se le se tshephišitšego.”

₂₅Banna ba Gade le ba Rubene ba mo fetola ba re: “Rena, bahlanka ba gago, re tla dira ka moo o re laelago ka gona. ₂₆Basadi ba rena le bana ba rena ba tla šala mo metseng ya Gileade le diruiwa tša rena tšohle. ₂₇Eupša rena ka moka ba re itlhametšego ntwa re tla tshela Jordane mme ra lwa re laolwa ke Morena ka moo o boletšego ka gona, mong wa rena.”

₂₈Ka gona Moshe a fa Eleasara le Joshua le baetapele ba bangwe ba Baisraele ditaelo tše: ₂₉“Ge banna ba Gade le ba Rubene ba ka tshela Jordane ba itlhametše ntwa ka taelo ya Morena, le ge ka thušo ya bona le ka kgona go thopa naga, gona le ba fe naga ya Gileade gore e be lefa la bona. ₃₀Eupša ge ba ka se tshele Jordane mme ba se ye ntweng le lena, gona ba arolelane le lena naga nageng ya Kanana.”

₃₁Banna ba Gade le ba Rubene ba mo fetola ba re: “Rena, bahlanka ba gago, re tla dira bjalo ka ge Morena a laetše. ₃₂Ka taelo ya gagwe re tla tshelela ka nageng ya Kanana re itlhametše ntwa, gore naga ye ya ka bohlabela bja Jordane e tle be ya rena.”

₃₃Ka gona Moshe a fa kgoro ya Gade le ya Rubene le seripa sa kgoro ya Manase naga ka moka ya Kgoši Sihone wa Baamore le ya Kgoši Ogo wa Bashane, gotee le metse le naga ya tikologo yeo. ₃₄Kgoro ya Gade ya tsošološa motse wo o ageleditšwego wa Dibone, wa Atharote, wa Aroere, ₃₅wa Atharote-Shofane, wa Jasere, wa Jogoboha, ₃₆wa Bethe-Nimra, le wa Bethe-Haramo. Ba ile ba aga le mašaka a dihuswane. ₃₇Kgoro ya Rubene ya tsošološa Heshbone, Elale, Kiriathaime, ₃₈Nebo, Baale-Meone (leina le le ile la fetošwa), le Sibma. Ba ile ba rea metse ye ba e tsošološitšego maina a mafsa.

₃₉Kgorwana ya Makire, morwa wa Manase, e ile ya hlasela naga ya Gileade, ya e thopa, mme ya raka Baamore ba ba bego ba le fao. ₄₀Ka gona Moshe a fa kgorwana ya Makire naga ya Gileade, mme ba dula fao. ₄₁Jaire, wa kgoro ya Manase, o ile a yo thopa metsana ye mengwe a e rea leina la metse ya Jaire. ₄₂Nobage o ile a yo thopa Kenate le metse ya yona, mme a e reela leina la gagwe la Nobage.

₁Lenaneo le le latelago ke la maina a mafelo ao Baisraele ba hlomilego mešaša go wona ka morago ga ge ba tlogile Egepeta ba etilwe pele ke Moshe le Arone. ₂Ka taelo ya Morena Moshe o be a ngwala leina la lefelo leo ba fihlago go lona nako ye nngwe le ye nngwe ge ba hloma mešaša.

₃Setšhaba sa Israele se tlogile Egepeta ka letšatši la lesome le metšo ye mehlano la kgwedi ya mathomo ya ngwaga, letšatši le le latelago Paseka ya mathomo. Ka tšhireletšo ya Morena ba ile ba tloga motseng wa Ramsese Baegepeta ba ba bona gabotse. ₄Ka nako yeo Baegepeta ba be ba boloka bašemane ba maitšibolo bao Morena a bego a ba bolaile. Ka go bolaya maitšibolo ao Morena o ile a otla medimo ya Baegepeta.

₅Baisraele ba ile ba tloga Ramsese, ba yo hloma mešaša Sukote. ₆Go tloga Sukote ba yo hloma mešaša Ethamo ka lešing la lešoka. ₇Go tloga moo ba gomela morago Pi-Hagirote, ka bohlabela bja Baale-Tsefone, gomme ba yo hloma mešaša kgauswi le Migdolo. ₈Ba tloga Pi-Hagirote ba tshela Lewatle la Mahlaka. Ka morago ga go sepela matšatši a mararo lešokeng la Ethamo, ba yo hloma mešaša Mara. ₉Go tloga moo ba ya Elime moo ba hlomilego mešaša, ka gobane go be go le methopo ya meetse ye lesome le ye mebedi, le mehlare ya mepalema ye masome a a šupago.

₁₀Ba tloga Elime ba yo hloma mešaša kgauswi le kgogometšana ya Suez. ₁₁Go tloga moo ba yo hloma mešaša lešokeng la Tsine. ₁₂Go tloga moo ba yo hloma mešaša Dofka, ₁₃mme go tloga moo ba yo e hloma Alushe. ₁₄Ba tloga mo ba yo e hloma Refidime, moo go bego go se meetse a go nwa.

_15-37Ge ba tloga Refidime ba eya thabeng ya Hore ba ile ba hloma mešaša mafelong a a latelago: lešokeng la Sinai, Kibrote-Taaba, Hatserote, Ritma, Rimone-Peretse, Libna, Risa, Kehelata, thabeng ya Shefere, Harada, Makhelote, Tahate, Terage, Mitika, Hashmona, Moserote, Bene-Jaakane, Hore-Gidgade, Jotobatha, Abrona, Etsione-Gebere, lešokeng la Tsine (ke go re Kadeshe), le thabeng ya Hore, mollwaneng wa naga ya Edomo.

_38-39Ka taelo ya Morena moprista Arone a namela thaba ya Hore. A hlokafalela moo, a na le mengwaga ye lekgolo le masome a mabedi le metšo ye meraro, ka letšatši la pele la kgwedi ya bohlano ya ngwaga wa masome a mane ka morago ga ge Baisraele ba tlogile Egepeta.

₄₀Kgoši ya Arade ka borwa bja Kanana a kwa gore Baisraele ba etla.

_41-49Ge ba tloga thabeng ya Hore ba eya melaleng ya Moaba ba ile ba hloma mešaša mafelong a a latelago: Tsalmona, Punone, Obote, maropeng a Abarime nageng ya Moaba, Dibone-Gade, Almone-Diblataima, thabeng ya Abarime kgauswi le thaba ya Nebo, le melaleng ya Moaba, mošola wa noka ya Jordane go lebana le Jeriko, gare ga Bethe-Jeshimote le Moedi wa Megohlo.

₅₀Moo melaleng ya Moaba, mošola wa Jordane go lebana le Jeriko, Morena a fa Moshe ₅₁ditaelo tše di latelago tša Baisraele: “Ge le tshela Jordane le tsena nageng ya Kanana, ₅₂le rake badudi ka moka ba naga yeo. Le pšhatlaganye medimo yohle ya bona ya diswantšho ya matlapa le ya ditshipi, le phušole le dintotoma tšeo go tšona ba khunamelago medimo ya diswantšho. ₅₃Le tšeeng naga yeo le dule go yona, ka gobane ke le fa yona. ₅₄Le aroleng naga go ya ka dikgoro le dikgorwana tše di fapanego ka go dira matengwa, le fe kgorwana ye e nago le batho ba bantši naga ye kgolo, mme kgorwana ya batho ba bannyane le efe naga ye nnyane. ₅₅Eupša ge le ka se rake badudi ba naga yeo, bao ba šetšego ba tla ba bjalo ka dilabi tša go le fahla ka mahlong, goba meetlwa ya go le hlaba mahlakore, le gona ba tla lwa le lena. ₅₆Ge le ka se ba rake, ke tla le dira se ke ikemišeditšego go ba dira sona.”

₁Morena o file Moshe ₂ditaelo tše di latelago tša setšhaba sa Israele: “Ge le fihla nageng ya Kanana ye ke le fago yona, mellwane ya lena e be ye e latelago. ₃Mollwane wa ka borwa o tloge lešokeng la Tsine go ipata le mollwane wa Edomo. O thome ka bohlabela magomong a ka borwa a Lewatle le le Hwilego. ₄O lebe borwa go ya Sefateng sa Diphepheng, mme o tšwele pele go putla Tsine, go ya borwa go fihla Kadeshe-Barnea. Go tloga moo o lebe leboabodikela go ya Hatsare-Adara le go fetela go Atsmone, ₅moo o swanetšego go leba moeding wa noka ya Egepeta, mme wa felela Lewatleng la Mediteraniene.

₆“Mollwane wa ka bodikela e be Lewatle la Mediteraniene.

₇“Mollwane wa ka leboa o tloge Mediteraniene o lebe thabeng ya Hore, ₈mme go tloga moo o ye sefateng sa Hamate. O fetele Tsedade ₉le Sifrone, mme o felele Hatsare-Enane.

₁₀“Mollwane wa ka bohlabela o tloge Hatsare-Enane o lebe Shefamo. ₁₁Go tloga moo o ye borwa Ribla, ka bohlabela bja Aine, mme o gome mebotong ya lebopong la ka bohlabela la letsha la Genesarete, ₁₂mme o ye borwa ka noka ya Jordane go fihla Lewatleng le le Hwilego.

“Ye e be mellwane ye mene ya naga ya lena.”

₁₃Ka gona Moshe a re go Baisraele: “Še naga ye le tlago e hwetša ka go dira matengwa, naga ye Morena a laetšego gore e fiwe dikgoro tše senyane le seripa sa kgoro. _14-15Kgoro ya Rubene le ya Gade le seripa sa kgoro ya Manase ba šetše ba hweditše naga ya bona ka bohlabela bja Jordane go lebana le Jeriko, ye e arotšwego go ya ka malapa a bona.”

₁₆Morena a re go Moshe: ₁₇“Moprista Eleasara le Joshua, morwa wa Nunu, ba arolele setšhaba naga. ₁₈O tšee le moetapele o tee kgorong ye nngwe le ye nngwe go ba thuša go e arola.” _19-28Banna bao Morena a ba kgethilego šeba:

₂₉Ba ke banna bao Morena a ba laetšego go abaganyetša Baisraele naga kua Kanana.

₁Melaleng ya Moaba, mošola wa Jordane go lebana le Jeriko, Morena a re go Moshe: ₂“Botša Baisraele gore mo nageng ye ba e hweditšego ba fe Balefi metse ye mengwe ye ba ka dulago go yona, le phulo go dikologa metse yeo. ₃Metse yeo e tla ba ya Balefi, mme ba dula go yona. Phulo e tla ba ya dikgomo le diruiwa tšohle tša bona. ₄Naga ya phulo ye e dikologilego metse ye le e filego Balefi e be dimetara tše makgolo a mane le masome a a selelago go tloga morakong wa motse, ₅mme e be ya botelele bja dimetara tše makgolo a senyane le masome a mabedi. Ka mathoko ohle a motse go be le lefelo le le bjalo gore motse o be gare. ₆Le feng Balefi metse ye e selelago ya botšhabelo yeo motho a ka tšhabelago go yona ge a bolaile yo mongwe ka phošo. Godimo ga moo le ba fe le metse ye mengwe ye masome a mane le metšo ye mebedi gotee le phulo ya yona. ₇Metse yohle ya bona ge e kopana e be ye masome a mane le ye seswai. ₈Dikgoro tše di hweditšego naga ye kgolo di swanetše go fa Balefi metse ye mentši go feta tšeo di hweditšego naga ye nnyane.”

₉Morena o laetše Moshe ₁₀gore a botše setšhaba sa Israele a re: “Ge le tshetše noka ya Jordane mme le gorogile nageng ya Kanana, ₁₁le kgethe metse ya botšhabelo yeo motho a ka tšhabelago go yona ge a bolaile yo mongwe ka phošo. ₁₂Moo o tla bolokega go moloko wa kgauswikgauswi wa mohu yo a nyakago go lefeletša yoo a bolailwego, gore yo a rwešwago molato wa go bolaya motho a se ke a bolawa ntle le go sekišwa phatlalatša. ₁₃Le kgethe metse ye e selelago, ₁₄ye meraro ka bohlabela bja Jordane, le ye meraro ka nageng ya Kanana. ₁₅Ye e tla ba metse ya botšhabelo ya Baisraele le bafaladi bao ba dulago le Baisraele lebakanyana fela, goba bao ba duletšego le bona sa ruri. Yo a bolailego yo mongwe a se a ikemišetša a ka tšhabela go wo mongwe wa yona.

_16-18“Fela ge motho a ka bolaya yo mongwe ka sebolai sa tshipi goba sa kota goba ka leswika, o na le molato wa polao, gomme o swanetše go bolawa. ₁₉Moloko wa kgauswikgauswi wa mohu a bolaye mmolai yoo ge a mo hweditše.

₂₀“Ge motho a hloile yo mongwe mme a mmolaya ka go mo kgoromeletša fase, goba ka go mo foša ka se sengwe, ₂₁goba ka go mo tia ka letswele, o na le molato wa polao mme o swanetše go bolawa. Moloko wa kgauswikgauswi a bolaye mmolai yoo ge a mo hweditše.

₂₂“Ge motho a ka tšhoga a bolaile yo mongwe e se ka lehloyo, e ka ba ka go mo kgoromeletša fase, goba ka go mo foša ka se sengwe, ₂₃goba a mo kgatla ka leswika a sa mmone mme a mmolaya e se lenaba la gagwe, a bile a se a ikemišetša go mo gobatša, ₂₄gona setšhaba se ahlole taba ya mmolai le moloko wa mohu yo a nyakago tefeletšo go ya ka ditaelo tšeo. ₂₅Setšhaba se phološe motho yoo a nago le molato wa go bolaya motho go moloko wa mohu, mme se mmoetše motseng wa botšhabelo woo a tšhabetšego go wona. A dule moo go fihlela ge Moprista yo Mogolo wa nako yeo, yo a tloditšwego ka makhura a makgethwa, a ehwa. ₂₆Ge motho yo a nago le molato wa go bolaya motho a ka tloga motseng wa botšhabelo wo a tšhabetšego go wona, ₂₇gomme moloko wa mohu a mo hwetša mme a mmolaya, gona ga a na molato tefeletšong yeo ya polao. ₂₈Motho yo a nago le molato wa go bolaya motho o swanetše go dula motseng wa botšhabelo go fihlela ge Moprista yo Mogolo a ehwa; ka morago ga moo gona a ka gomela gae. ₂₉Melao ye e ama lena le ditlogolo tša lena mo gongwe le mo gongwe mo le ka bego le dula gona.

₃₀“Motho yo a rwešwago molato wa polao a ka bonwa molato gomme a bolawa fela ge dihlatse tše pedi goba go feta fao di hlatsela bjalo; bohlatse bja hlatse e tee ga bja lekana go ka thekga molato wa polao. ₃₁Mmolayi yo a bonwego molato wa polao o swanetše go bolawa. A ka se pheme kotlo ya gagwe ka go lefa ka tšhelete. ₃₂Le se ke la dumelela motho yo a tšhabetšego motseng wa botšhabelo go lefa gore a boele gae pele ga ge Moprista yo Mogolo a ehwa. ₃₃Le se ke la kgotlela naga ye le dulago go yona. Polao e kgotlela naga, gomme ga go ka moo go ka phethagatšwago tiro ya tlhwekišo ya naga yeo motho a bolaetšwego go yona ka gona, ntle le ka lehu la mmolai. ₃₄Le se ke la tšhilafatša naga ye le dulago go yona moo go dulago nna, ka gobane ke nna Morena, gomme ke dula gare ga setšhaba sa Israele.”

₁Dihlogo tša malapa a kgorwana ya Gileade, morwa wa Makire, setlogolwana sa Manase, morwa wa Josefa, di ile tša ya go Moshe le go baetapele ba bangwe ₂tša re: “Morena o laetše wena, mong wa rena, gore o arolele setšhaba sa Israele naga ka go dira matengwa. O go laetše le gore naga ya moloko wa rena, Tselofohade, o e fe barwedi ba gagwe. ₃Eupša ge ba ka nyalwa ke banna ba kgoro ye nngwe, naga ya bona e tla ba ya kgoro yeo, gomme ye e aroletšwego rena ya fokotšega. ₄Ka Ngwaga wa Poetšo naga ya barwedi ba Tselofohade e tla tsenyetšwa sa ruri kgorong ye ba nyetšwego go yona, mme ya lahlegela kgoro ya botatagorena.”

₅Ka gona Moshe a fa setšhaba sa Israele taelo ye e tšwago go Morena a re: “Se kgoro ya Manase e se bolelago ke therešo, ₆ka gona Morena o re barwedi ba Tselofohade ba ka nyalwa ke mang goba mang yo ba mo ratago, fela e be monna wa kgoro ya gabobona. ₇Naga ya Moisraele yo mongwe le yo mongwe e tla fela e tlemagane le kgoro ya gabo. ₈Mosadi yo mongwe le yo mongwe yo a hwetšago bohwa bja naga kgorong ya Israele o swanetše go nyalwa ke monna yo e lego wa kgoro yeo. Ka tsela ye Moisraele yo mongwe le yo mongwe o tla hwetša bohwa bja borakgolokhukhu ba gagwe, ₉gomme bohwa bjoo bo ka se tloge go kgoro ye nngwe bja ya go ye nngwe. Kgoro ye nngwe le ye nngwe e tla fela e itshwaretše naga ya yona.”

_10-11Ka gona Magla, Tirtsa, Hogla, Milka le Noa, barwedi ba Tselofohade, ba dira ka moo Morena a laetšego Moshe, gomme ba nyalwa ke dikgaetšedi tša bona tša kgoro. ₁₂Ba ile ba nyalwa dikgorwaneng tša kgoro ya Manase, morwa wa Josefa, mme naga ya bona ya fela e le kgorong ya botatagobona.

₁₃Tšeo ke ditaelo le melawana ye Morena a e filego Baisraele ka Moshe melaleng ya Moaba, mošola wa Jordane go lebana le Jeriko.

₁Ka gona le nkekiše, bjalo ka ge le nna ke ekiša Kriste.

₂Ke a le reta ka gobane ka mehla le a nkgopola ebile le phetha tše ke le rutilego tšona. ₃Fela ke nyaka ge le tseba gore Kriste ke hlogo ya monna, monna ke hlogo ya mosadi wa gagwe, gomme Modimo ke hlogo ya Kriste. ₄Ka gona, monna yo a rapelago goba a begago molaetša wa Modimo a apere selo hlogong, o goboša hlogo ya gagwe, e lego Kriste. ₅Le mosadi yo a rapelago goba a begago molaetša wa Modimo a se a apara selo hlogong, o goboša hlogo ya gagwe, e lego monna wa gagwe; o swana le mosadi yo a bootšwego hlogo. ₆Mosadi ge a sa apare selo hlogong, a a kotwe le moriri, ge. Gomme ka ge go kotwa goba go boolwa hlogo e le taba ya dihlong mo mosading, a a apare selo hlogong. ₇Monna yena ga se a swanela go apara selo hlogong, ka gobane ke yena seswantšho sa Modimo le sa letago la gagwe. Ge e le mosadi yena ke letago la monna, ₈gobane monna ga a tšwe mosading, eupša ke mosadi yo a tšwago monneng. ₉Le gona monna ga se a bopelwa mosadi, ke mosadi yo a bopetšwego monna. ₁₀Ka gona, ka lebaka la barongwa, mosadi hlogong o swanetše go bea sešupo sa go bušwa ke monna wa gagwe. ₁₁Mo bophelong bja rena bja sedumedi mosadi o ithekga ka monna, le monna o ithekga ka mosadi. ₁₂Gobane bjalo ka ge mosadi a etšwa monneng, monna le yena o tswalwa ke mosadi, gomme tšohle di hlolwa ke Modimo.

₁₃Lena beng le ka no bona ge eba go lebane gore mosadi a rapele Modimo phuthegong a se a apara selo hlogong. ₁₄Ga ke re ke taba ye e tsebjago ke batho ka moka gore moriri wo motelele mo monneng o a mo goboša, ₁₅mola mo mosading moriri wo motelele o mo thakga. Mosadi o filwe moriri wo motelele woo gore e be seaparo. ₁₆Fela ge motho a ka rata go nganga mo tabeng ye, se nkago mmotša sona ke go re rena goba diphuthego tša Modimo ga re na setlwaedi se sengwe ka ntle le se.

₁₇Mo tabeng ye ke yago go le botša yona gonabjale ga ke le rete, gobane ge le kopana le etla go rapela, go kopana ga lena go tliša bošaedi go feta bothakga. ₁₈Sa mathomo, ke kwele gore ge le kopana le le phuthego le ikarola dihlophana tša go se kwane, gomme ke dumela gore taba yeo e ka no ba e le therešo. ₁₉Ga ke na pelaelo gore moo go lena go swanetše go na le dihlophana, gore ba ba botegago tumelong mo go lena ba tle ba bonagale. ₂₀Ge le kopana se le se jago ga e sa ba Selalelo sa Morena. ₂₁Gobane ge le eja, mongwe le mongwe o ja tša gagwe, e be gore bangwe ba bolaišwa tlala, mola bangwe bona ba tagwa. ₂₂Na ga le na magae moo le kago jela gona la ba la nwela gona? Na le nyatša phuthego ya Modimo la goboša le bahloki? Ke reng go lena? Kgane ke le rete? Aowaa, moo gona nka se le rete!

₂₃Gobane se Morena a ntaetšego sona, le nna ke se laetše lena, e lego gore Morena Jesu, bošegong bjo a ekilwego ka bjona, o ile a tšea senkgwa, ₂₄a leboga Modimo, a se ngwathaganya a re: “Se ke mmele wa ka wo o neelwago ka lebaka la lena. Le dire se e le go nkgopola.” ₂₅Ka yona tsela yeo ge go seno lewa, a tšea le senwelo a re: “Senwelo se ke kgwerano ye mpsha ye e tiišeditšwego ka madi a ka. Ka mehla ge le se nwa le se nwele go nkgopola.”

₂₆Seo se ra gore ka mehla ge le eja senkgwa se le enwa le senwelo se le tla be le bega lehu la Morena go fihlela a etla. ₂₇Ka fao, ge motho a ka ja senkgwa se goba a nwa senwelo sa Morena ka mokgwa wo o sego wa swanela, o tla be a oba molato go mmele wa Morena le go madi a gagwe. ₂₈Ka gona, motho a itekole pele, a kgone a eja senkgwa seo a enwa le senwelo seo. ₂₉Gobane ge a ka ja a ba a nwa a sa ele mmele wa Morena hloko, o tla be a itšela a bile a inwela go ahlolwa. ₃₀Ke ka lebaka leo moo go lena go nago le ba bantši ba ba fokolago le ba ba lwalago, ba ba hlokafetšego le bona e lego ba bantši. ₃₁Ge re ka be re thoma ka go itekola, Modimo o be a ka se re tšwe. ₃₂Fela Morena o a re ahlola, a re otla gore re se tlo tšwiwa gotee le ba ba sa dumelego ba lefase.

₃₃Ka gona, banabešo, ge le kopana go tlo ja Selalelo sa Morena, le letelaneng. ₃₄Gomme ge motho a swerwe ke tlala, a je gae pele, gore e se tlo re ge le kopane la ahlolwa.

Ge e le tšela tše dingwe ditaba, ke tla di beakanya mohla ke etla.