Pesalome 44

₁Re ikwetše ka tša rena ditsebe, Modimo;

borakgolokhukhu ba re boditše ba re

o dirile ditiro tše dikgolo mehleng ya bona,

mehleng yela ya kgale:

₂O rakile baditšhaba ka maatla a gago,

naga wa e fa borakgolokhukhu;

wa dira baditšhaba bošula,

borakgolokhukhu bona wa ba atla.

₃Naga ye ga se ba e thopa ka tšhoša,

goba ba fenya ka a bona maatla,

eupša e bile ka maatla a gago a magolo,

le go ba lokela ga gago,

ka gobane ba be ba go kgahla.

₄O kgoši ya ka, wena Modimo;

o kgontšha ditlogolo tša Jakobo go fenya.

₅Ka maatla a gago re katelela manaba a rena;

re ba gatakela re laelwa ke wena.

₆Nna ga ke bote mosebe,

le tšhoša e ka se ntlhakodiše.

₇Yo a re phološitšego manabeng a rena ke wena,

ke wena o dirilego gore ba inyatše.

₈Re hlwela go go tumiša letšatši ka moka;

re go reta go ya go ile. Sela

₉Eupša bjale o re ngadile,

o re kokobeditše,

ga o sa tšwa dira le rena.

₁₀O re katakatišitše re lebane le manaba a rena,

mme ba re thopela dithoto.

₁₁O re lesitše re hlabja bjalo ka dinku,

wa re gašanya le ditšhaba di šele.

₁₂Setšhaba sa gago o se rekišitše ka theko ya go se re selo,

mme wa se boelwe ke selo thekišong yeo.

₁₃O re segiša ba ba bapilego le rena;

re fetogile dikwero le dikgegeo go baagišani.

₁₄O re pharile seka ditšhabeng;

ba ditšhaba ba re šišinyetša dihlogo ka lenyatšo.

₁₅Letšatši ka moka ke hlwa ke inyatša,

dihlong di nkhurumeditše sefahlego,

₁₆ka ge ke ekwa bakodutli le barogi ba ka,

ka lebaka la tše ke di dirilwego ke manaba le baitefeletši ba ka.

₁₇Tše ka moka di re hlagetše le ge re se ra go lebala,

goba ra lahla kgwerano ye o e dirilego le rena.

₁₈Ga se ra go nyatša,

goba ra aroga tseleng ya gago.

₁₉Eupša o re ripitletše ka meleteng ya diphukubje,

wa ba wa re ribega ka leswiswi le leso.

₂₀Ge re ka be re ile ra lesa go khunamela Modimo wa rena ra rapela modimo o šele,

₂₁ga ke re wena, Modimo,

o ka be o ile wa lemoga,

ka ge o tseba diphiri tša pelo?

₂₂Fela ke ka lebaka la gago ge re bolawa ka mehla,

re swerwe bjalo ka dinku di eya go hlabja.

₂₃Phafoga, Mong wa rena!

O reng o robetše?

Tsoga! Se re ngalele sa ruri!

₂₄O reng o re furaletše,

o lebala ka mo re tlaišwago le ka mo re gateletšwego ka gona?

₂₅Re sobeletše lerupurupung,

re rapaletše fase.

₂₆Nanoga, o re thuše!

Re phološe, ka ge o re rata ka lerato, kilaphetogo.