To The Word – Day 26

₁Morena o ile a bitša Moshe a le Tenteng ya bodulo bja Morena, a mo fa melawana ye ₂gore Baisraele ba e phethe ge ba dira dihlabelo tša bona.

Ge motho a dira sehlabelo ka seruiwa, a ka hlaba kgomo goba sehuswane sa gagwe. ₃Ge a dira sehlabelo ka kgomo e le sa go tšhungwa ka moka, a se dire ka poo ye e se nago bosodi. A e tliše mojakong wa Tente ya bodulo bja Morena gore Morena a e amogele. ₄A bee seatla godimo ga hlogo ya yona, gomme e tla amogelwa e le sehlabelo sa go mmoelanya le Morena ka ge a be a dirile sebe. ₅A hlabe poo yeo moo, gomme baprista ba Baarone ba tliše madi pele ga Morena mme ba foke aletare ye e lego mojakong wa Tente ka mahlakoreng ka moka. ₆Ke moka a bue seruiwa seo, a be a se phakologanye, ₇gomme baprista ba Baarone ba gotše mollo godimo ga aletare, ba bešetše dikgong. ₈Ba bee ditho tša seruiwa seo le hlogo le makhura a dipshio moo mollong. ₉Motho yoo a hlatswe dikateng le meomo, gomme moprista a tšhume sehlabelo seo ka moka godimo ga aletare. Monkgo wa sona o tsefela Morena.

₁₀Ge eba a dira sehlabelo ka sehuswane, e be sa tona se se se nago bosodi. ₁₁A se hlabe ka lehlakoreng la ka leboa la aletare, gomme baprista ba foke aletare ka madi a sona ka mahlakoreng ka moka. ₁₂Ge a e phakologantše, moprista a bee ditho ka moka le hlogo le makhura a dipshio mollong. ₁₃Motho yoo a hlatswe dikateng le meomo, gomme moprista a tliše sehlabelo seo go Morena, mme a se tšhume ka moka aletareng. Monkgo wa sehlabelo se o tsefela Morena.

₁₄Ge motho a direla Morena sehlabelo sa go tšhungwa ka moka ka nonyana, e be mokuru goba leeba. ₁₅Moprista a e tliše aletareng, a e phetle molala, gomme a tšhume hlogo ya yona moo. Madi a yona a gamolelwe ka lehlakoreng la aletare. ₁₆A ntšhe tšelo le tšeo di lego ka go yona, mme a di lahlele ka bohlabela bja aletare moo go tšhollelwago melora. ₁₇A e sware ka diphego mme a e fatole ka bogare ka ntle le go thaola diphego tšeo, gomme a e tšhume ka moka aletareng. Monkgo wa sehlabelo se o tsefela Morena.

₁Ge motho a tlišetša Morena kabelo ya bupi, e be bja matoka. A bo tšhele makhura a mohlware le seorelo, ₂gomme a bo tliše go baprista ba Baarone. Moprista a ntšhe bupi bjoo le makhura ka legoswi, le seorelo seo ka moka, gomme a di tšhume aletareng e le sešupo sa gore tšohle di abetšwe Morena. Monkgo wa kabelo ye o tsefela Morena. ₃Kabelo ye e šetšego ke ya baprista; ke ye kgethwakgethwa, ka ge e tšerwe buping bjo bo abetšwego Morena.

₄Ge kabelo e le dinkgwa tše di pakilwego ka ontong, e be tša bupi bja matoka tše di se nago komelo. E ka ba tše di dirilwego ka bupi bjo bo hlakantšwego le makhura a mohlware, goba tša diphaphathiana tše di tšhatšhitšwego ka makhura a mohlware.

₅Ge kabelo e le dinkgwa tše di pakilwego ka pane, e be tša bupi bja matoka bjo bo hlakantšwego le makhura a mohlware, eupša bo se na le komelo. ₆A di ngwathaganye mme a di tšhele ka makhura; seo ke kabelo ya bupi.

₇Ge kabelo e le dinkgwa tše di apeilwego ka pitša, e be tša bupi bja matoka le makhura a mohlware. ₈A bo tliše go Morena e le kabelo, a bo neele baprista bao ba tlago bo iša aletareng. ₉Moprista a tšee seripa sa bjona e le sešupo sa gore ka moka bo abetšwe Morena, mme a se tšhume aletareng. Monkgo wa kabelo ye o tsefela Morena. ₁₀Kabelo ye e šetšego ke ya baprista; ke ye kgethwakgethwa, ka gobane e tšerwe buping bjo bo abetšwego Morena.

₁₁Go se ke gwa ba le e tee ya dikabelo tša bupi tšeo le di tlišago go Morena le di dirile ka komelo; le se ke la tsoge le šomišitše komelo goba todi kabelong ya bupi ye le e tšhumelago Morena. ₁₂Le ka šomiša komelo goba todi dikabelong tša mabele a pele a le a bunago, eupša monkgo wa tšona o ka se tsefele Morena ge di tšhungwa godimo ga aletare. ₁₃Le tšhele kabelo ye nngwe le ye nngwe ya bupi letswai, ka gobane letswai le emela kgwerano ya Modimo le lena. Dikabelo tšohle tša lena le di tšhele letswai. ₁₄Ge o tlišetša Morena kabelo ya mabele a mathomo a o a bunago, o tliše dithuthupe tša mabele, goba bupi bja mabele a mafsa. ₁₅O e tšhele makhura a mohlware le seorelo. ₁₆Moprista a tšhume seripa sela sa bupi le sa makhura go laetša gore kabelo yohle ke ya Morena, gotee le seorelo ka moka. Ke kabelo ya bupi go Morena.

₁Ge motho a dira sehlabelo sa kagišano ka kgomo ya gagwe, e ka ba ye tona goba ye tshadi e be ye e se nago bosodi. ₂A bee seatla godimo ga hlogo ya kgomo yeo, gomme a e hlabe mojakong wa Tente ya bodulo bja Morena. Baprista ba Baarone ba foke aletare ka madi mahlakoreng ka moka, ₃gomme ba abele Morena ditho tše di latelago tša kgomo yeo e le sehlabelo: mabipi ka moka, ₄dipshio le makhura a a lego go tšona, le mphapha wo moteletšana wa sebete. ₅Baprista ba tšhume ditho tše ka moka aletareng gotee le sehlabelo sa go tšhungwa ka moka. Monkgo wa sehlabelo se o tsefela Morena.

₆Ge a dira sehlabelo sa kagišano ka sehuswane, e ka ba se setona goba se setshadi, eupša e be se se se nago bosodi. ₇Ge motho a abela Morena kwanyana, ₈a bee seatla godimo ga hlogo ya yona, gomme a e hlabe pele ga Tente ya bodulo bja Morena. Baprista ba foke aletare ka madi a yona mahlakoreng ka moka, ₉gomme ba abele Morena ditho tše di latelago tša sehuswane seo e le sehlabelo: makhura, le mosela wohle o ripilwe kgauswi le mokokotlo, le mabipi ka moka, ₁₀le dipshio le makhura ao a lego go tšona, le mphapha wo moteletšana wa sebete. ₁₁Moprista a tšhume dilo tše aletareng e le sehlabelo sa dijo go Morena.

₁₂Ge motho a abela Morena pudi, ₁₃a bee seatla godimo ga hlogo ya yona, gomme a e hlabe pele ga Tente ya bodulo bja Morena. Baprista ba foke aletare ka madi a yona mahlakoreng ka moka, ₁₄gomme ba abele Morena ditho tše di latelago e le sehlabelo: mabipi ka moka, ₁₅dipshio le makhura a a lego go tšona, le mphapha wo moteletšana wa sebete. ₁₆Baprista ba tšhume dilo tše godimo ga aletare e le sehlabelo sa dijo se se tsefelago Morena. Makhura ka moka ke a Morena. ₁₇Le se tsoge le jele makhura goba bobete; ye ke taelo ye lena le ditlogolo tša lena le swanetšego go e phetha go ya go ile gohle moo le dulago gona.

₁Morena o laetše Moshe ₂gore a botše Baisraele gore ge yo mongwe a ka dira sebe a tshela ye nngwe ya ditaelo tša Morena a se a ikemišetša, o swanetše go phetha melawana ye e latelago.

₃Ge sebe se dirilwe ke Moprista yo Mogolo, ka fao a obela setšhaba molato, a tliše powana ye e se nago bosodi mme a e hlabele Morena ka lebaka la sebe sa gagwe. ₄A e tliše mojakong wa Tente ya bodulo bja Morena, a bee seatla godimo ga hlogo ya yona, gomme a e hlabe moo pele ga Morena. ₅Moprista yo Mogolo a tšee madi a mangwe a poo, a tsene nao Tenteng. ₆A ine monwana mading, gomme a a fokele gašupa pele ga seširo se sekgethwa. ₇A tlotše dinakana tša dikhutlo tša aletare ya seorelo ka gare ga Tente ka madi a mangwe. A tšhollele madi a a šetšego thitong ya aletare ya dihlabelo ye e lego mojakong wa Tente. ₈A ntšhe makhura ka moka a poo yeo, le mabipi, ₉le dipshio le makhura a a lego go tšona, le mphapha wo moteletšana wa sebete. ₁₀Moprista a tšee ditho tšeo a di tšhume aletareng ya dihlabelo. Ditho tšeo di ntšhwago di swane le tšela di ntšhwago sehlabelong sa kagišano. ₁₁Eupša mokgopa wa yona, le nama ya yona ka moka, le hlogo ya yona, le maoto a yona, le dikateng tša yona gotee le mošwang, ₁₂tšohle a di ntšhe mešašeng a di iše lefelong le le hlweketšego tirelo moo go tšhollwago melora, gomme fao a di tšhume ka mollo wa dikgong.

₁₃Ge sebe se dirilwe ke setšhaba ka moka sa Israele, gomme sa ba le molato wa go tshela ye nngwe ya ditaelo tša Morena se se sa ikemišetša, ₁₄ge sebe se seno tsebja, setšhaba se tliše powana e be sehlabelo sa tshwarelo ya dibe. Se e tliše Tenteng ya bodulo bja Morena; ₁₅bagolo ba setšhaba ba bee diatla godimo ga hlogo ya yona, gomme e hlabje moo pele ga Morena. ₁₆Moprista yo Mogolo a iše madi a mangwe a yona ka Tenteng, ₁₇a ine monwana go ona gomme a a fokele gašupa pele ga seširo. ₁₈A tlotše dinakana tša dikhutlo tša aletare ya seorelo ye e lego ka gare ga Tente ka madi a mangwe a yona, gomme a tšhollele a a šetšego thitong ya aletare ya dihlabelo ye e lego mojakong wa Tente. ₁₉A tšee makhura ka moka a yona a a tšhume aletareng. ₂₀A dire ka poo ye ka wona mokgwa woo a dirago ka poo ya sehlabelo sa tshwarelo ya dibe, mme ka tsela ye a boelanye setšhaba le Morena ka ge ba be ba dirile sebe, gomme ba tla lebalelwa. ₂₁Ka morago a ntšhetše poo yeo ka ntle ga mešaša, gomme a e tšhume ka wona mokgwa woo a tšhumago poo yeo e hlabjago ka lebaka la sa gagwe sebe. Se ke sehlabelo sa go tloša sebe sa setšhaba.

₂₂Ge sebe se dirilwe ke mmuši, mme a ba le molato wa go tshela ye nngwe ya ditaelo tša Morena a se a ikemišetša, ₂₃ge a seno tsebišwa sebe seo, a tliše phooko ye e se nago bosodi e be sehlabelo sa gagwe. ₂₄A bee seatla godimo ga hlogo ya yona, gomme a e bolaele moo diruiwa tša dihlabelo tša go tšhungwa ka moka di bolaelwago gona. Se ke sehlabelo sa go tloša dibe. ₂₅Moprista a ine monwana mading a phooko yeo, a tlotše dinakana tša dikhutlo tša aletare ya dihlabelo ka ona, gomme ao a šalago a a tšhollele thitong ya aletare. ₂₆A tšhume makhura a yona ka moka aletareng, ka wona mokgwa woo a tšhumago makhura a diruiwa tšeo di bolaetšwego go ba dihlabelo tša kagišano. Ka sehlabelo se sa sebe moprista a boelanye mmuši le Morena ka ge mmuši a be a dirile sebe, gomme o tla lebalelwa.

₂₇Ge sebe se dirilwe ke mothofela, mme a ba le molato wa go tshela ye nngwe ya ditaelo tša Morena a se a ikemišetša, ₂₈ge a seno tsebišwa sebe seo, a tliše pudi ya tshadi ye e se nago bosodi e be sehlabelo sa gagwe. ₂₉A bee seatla godimo ga hlogo ya yona, gomme a e hlabe moo go bolaelwago diruiwa tša dihlabelo tša go tšhungwa ka moka. ₃₀Moprista a ine monwana mading a pudi yeo, a tlotše dinakana tša dikhutlo tša aletare, gomme a a šetšego a a tšhollele thitong ya aletare. ₃₁A tloše makhura ka moka go yona, bjalo ka ge makhura a diruiwa tše di bolailwego go ba dihlabelo tša kagišano a tlošwa, gomme a a tšhume aletareng go dira monkgo wo o tsefelago Morena. Ka sehlabelo se sa sebe moprista a boelanye motho yoo le Morena, gomme motho yoo o tla lebalelwa.

₃₂Ge motho a tliša kwanyana e le sehlabelo sa tshwarelo ya dibe, e be ya tshadi ye e se nago bosodi. ₃₃A bee seatla godimo ga hlogo ya yona gomme a e hlabe moo diruiwa tša dihlabelo tša go tšhungwa ka moka di bolaelwago gona. ₃₄Moprista a ine monwana mading a kwanyana yeo, a tlotše dinakana tša dikhutlo tša aletare ka ona, gomme ao a šetšego a a tšhollele thitong ya aletare. ₃₅A tloše makhura a yona ka moka ka moo makhura a tlošwago kwanyaneng ye e bolaetšwego go ba sehlabelo sa kagišano, mme a a tšhume aletareng gotee le dikabelo tša go tšhumelwa Morena. Ka sehlabelo se sa tshwarelo ya dibe moprista a boelanye motho yoo le Morena, gomme yoo o tla lebalelwa.

₁Mehleng ya kgale Modimo o boletše le borakgololokhukhu ba rena gantši le ka mekgwa ye mentši ka baprofeta, ₂ya re mehleng yeno ya mafelelo re phelago go yona a tla a bolela le rena ka Morwagwe. Ke yena yo a hlodilego legohle ka yena, yo a mmeilego mojalefa wa tšohle. ₃Go yena go bonala letago la Modimo, ke yena seswantšho sa nnete sa sebele sa Modimo, gomme o lota tšohle ka lentšu la gagwe le maatla. Ge a phethile modiro wa go hlatswa batho dibe, o ile a yo dula legodimong madulong a bogoši kgauswi le Modimo Kgoši.

₄Morwa wa Modimo o godišitšwe go feta barongwa, go swana le lona leina le a le filwego ge le feta a bona. ₅Etse Modimo ga se a ka a botša yo mongwe wa barongwa a re:

₁₄Na barongwa ka moka ga se meoya ye e hlankelago Modimo, mme yena a e romago go yo thuša ba ba tlago phološwa?

₁Ka gona go nyakega gore tše re di kwelego re di hlokomele le go feta, re se kgeloge. ₂Gobane melao ya Moshe yela barongwa ba e filego borakgolokhukhu ba rena e be e le ya go ba tlema, gomme yo a bego a sa e latele goba a sa e phethe, o be a otlwa ka mo go mo swanelago. ₃Bjale re ka phonyokga bjang ge re sa hlokomele phološo ye kaaka? Morena ka boyena ke yena wa mathomo wa go bega taba ye, gomme ba ba mo kwelego ba tiišitše gore ke nnete. ₄Le Modimo o ba hlatsetše ka go dira mehlolo le dimakatšo tša mehutahuta le ka go abela batho dimpho tša Moya wo Mokgethwa ka mo a ratago ka gona.

₅Ga se barongwa bao Modimo a ba beilego babuši ba lefase le lefsa la ka moso le re bolelago ka lona. ₆Mothotsoko o boletše felwanatsoko ka Mangwalong a Makgethwa a re:

₁₁Yo a kgethetšego Modimo batho mmogo le bona batho bao a ba kgethilego Tatagobona ke o tee. Ke ka lebaka leo Jesu a sa lewego ke dihlong ge a ba bitša banababo. ₁₂O re go Modimo:

₁₄Ka ge bana ba e le batho ba nama, Jesu le yena e bile motho wa nama bjalo ka bona, gore ka lehu la gagwe a tle a fenye molaolalehu, e lego Sathane, ₁₅gomme ka go dira bjalo a phološa ba e bilego makgoba bophelong bjohle bja bona, ka lebaka la ge ba boifa lehu. ₁₆Gobane go pepeneneng gore ba a ba thušago ga se barongwa. O thuša ditlogolo tša Abrahama. ₁₇Ka gona go be go lebane gore a swane le banababo ka tšohle, gore e tle e be Moprista wa bona yo Mogolo wa kgaugelo le yo a botegelago go hlankela Modimo, gore a tle a boelanye batho le Modimo ka lebaka la dibe tša bona. ₁₈Gomme bjale a ka thuša ba ba lekwago, ka ge le yena a ile a lekwa ka go hlokofatšwa.