To The Word – Day 27

₁Dihlabelo tša tshwarelo ya dibe di nyakega melatong ye e latelago.

Ge motho a biditšwe phatlalatša go tlo ba hlatse kgorong ya tsheko gomme a se ke a bolela se a se bonego goba a se kwelego, o na le molato.

₂Ge motho a ka kgwatha selo se se tšhilafetšego a se a ikemišetša, se se bjalo ka phoofolo goba segagabi se se hwilego, o tšhilafetše mme o na le molato ge a seno bona se a se dirilego.

₃Ge motho a ka kgwatha selo se se tšhilafetšego sa go tšwa mothong a se a ikemišetša, e ka ba eng goba eng, o na le molato ge a seno bona se a se dirilego.

₄Ge motho a ka ena a se a nagana gabotse go dira selo, e ka ba se sebotse goba se sebe, o na le molato ge a seno bona se a se dirilego.

₅Ge motho a ne molato, o swanetše go ipolela sebe seo, ₆gomme a tlišetše Morena kwanyana ya tshadi goba pudi ya tshadi e be selefa sa molato wa sebe seo sa gagwe. Moprista a boelanye motho yoo le Morena ka sehlabelo se, ka ge a be a dirile sebe.

₇Ge motho a se na le kwanyana goba putšane, a tlišetše Morena mekuru ye mebedi goba maeba a mabedi e be selefa sa sebe sa gagwe; le lengwe e be sehlabelo sa tshwarelo ya dibe, mme le lengwe e be sehlabelo sa go tšhungwa ka moka. ₈A a tliše go moprista yo a swanetšego go dira sehlabelo sa tshwarelo ya dibe ka nonyana ya pele. A le phetle molala a sa le kgaole hlogo, ₉gomme a fokele madi a mangwe a lona ka thoko ya aletare. Madi ao a šetšego a gamolelwe thitong ya aletare. Se ke sehlabelo sa tshwarelo ya dibe. ₁₀Ka morago a dire sehlabelo sa go tšhungwa ka moka ka nonyana ya bobedi, go ya ka molao. Ka tsela ye moprista a boelanye motho yoo le Morena ka ge a be a dirile sebe, gomme o tla lebalelwa.

₁₁Ge motho a se ne mekuru ye mebedi goba maeba a mabedi, a tliše bupi bja kilokramo e tee e le kabelo ya go tloša dibe. A se ke a bo tšhela makhura a mohlware goba seorelo, ka gobane ke kabelo ya tshwarelo ya dibe. ₁₂A bo tliše go moprista yo a swanetšego go ntšha legoswi la bjona go laetša gore ka moka ga bjona bo abetšwe Morena. Bupi bjoo bja legoswi a bo tšhume aletareng e le kabelo. Ke kabelo ya tshwarelo ya dibe. ₁₃Ka tsela ye moprista a boelanye motho yoo le Morena ka ge a be a dirile dibe tšeo ka moka, gomme motho yoo o tla lebalelwa. Bupi bjo bo šetšego ke bja moprista, go ya ka molao wa kabelo ya bupi.

₁₄Morena o file Moshe melawana ye. ₁₅Ge motho a ka tshela molao a dira sebe a se a ikemišetša ka go se tšhele metšhelo ye mekgethwa ya Morena, a tliše kgapa goba phooko ye e se nago bosodi e le selefa sa gagwe go Morena. Theko ya yona e bewe ka dipapetlana tša silibera ye e etšwego go ya ka boima bja papetlana ya silibera ya ka Felo mo Gokgethwa. ₁₆O tlemegile go tšhela metšhelo ye a šitilwego ke go e tšhela, gomme godimo ga moo a lefe le karolo ya bohlano ya yona. A e fe moprista, gomme ka go hlaba sehuswane seo e le sehlabelo sa tshwarelo ya dibe, moprista a boelanye motho yoo le Morena, gomme o tla lebalelwa.

₁₇Ge motho a ka dira sebe a se a ikemišetša ka go dira se se iletšwago ke Morena, o tla ba le molato, mme o swanetše go lefa molato woo. ₁₈A tliše kgapa goba phooko ye e se nago bosodi go moprista e le kabelo ya tefelo ya dibe. Theko ya yona e bewe ka dipapetlana tša silibera ye e etšwego go ya ka boima bja papetlana ya silibera ya ka Felo mo Gokgethwa. Ka go dira sehlabelo ka sehuswane seo, moprista a boelanye motho yoo le Morena ka ge a be a dirile sebe, gomme o tla lebalelwa. ₁₉Ke sehlabelo sa tefelo ya dibe se motho yoo a swanetšego go se dira ka ge a senyeditše Morena.

₂₀Morena o file Moshe melawana ye. ₂₁Ge motho a senyeditše Morena ka go latola gore Moisraelekayena o kile a mo neela selo gore a mo lotele sona, goba ka go mo utswetša, goba ka go mo amoga selo, ₂₂goba ka go bolela maaka ka selo se se timetšego mme a ena gore ga se a se thwala, goba a ena ka maaka ka sebe se a se dirilego, go swanetše go dirwa sehlabelo. _23-24Ge motho a dirile sebe se sebjalo, a lefe seo a se hweditšego ka bomenetša bja mohuta woo. Ka letšatši leo a bonwego molato ka lona, o swanetše go lefa mong wa selo ka botlalo; godimo ga moo a be a mo lefe le karolo ya bohlano ya sona. ₂₅A tliše kgapa goba phooko ye e se nago bosodi go moprista e le sehlabelo sa tefo go Morena. Theko ya yona e bewe ka dipapetlana tša silibera ye e etšwego go ya ka boima bja papetlana ya silibera ya ka Felo mo Gokgethwa. ₂₆Ka sehlabelo se moprista a boelanye motho yoo le Morena ka ge a be a dirile sebe, gomme o tla lebalelwa.

₁Morena o laetše Moshe ₂gore a fe Arone le barwa ba gagwe melawana ye e latelago ya dihlabelo tša go tšhungwa ka moka. Sehlabelo sa go tšhungwa ka moka se swanetše go tlogelwa aletareng bošego ka moka, mme mollo o tukišwe bošego bjohle. ₃Ke moka moprista a apare seaparo sa gagwe sa lešela, le diaparo tša ka gare tša lešela, gomme a tloše melora ye e šetšego aletareng, a e bee ka thoko ga aletare. ₄A apole diaparo tšeo tša gagwe, a apare tše dingwe, a ntšhetše melora ka ntle ga mešaša a e iše felong moo go hlweketšego tirelo. ₅Mollo wola wa aletareng o fele o tukišwa, o se ke wa leswa wa tima. Mosong wo mongwe le wo mongwe moprista a beše dikgong go wona, a beakanye sehlabelo sa go tšhungwa ka moka godimo ga wona, gomme a tšhume makhura a sehlabelo sa kagišano. ₆Ka mehla mollo o fele o tukišwa aletareng, o se ke wa leswa wa tima.

₇Še melawana ya dikabelo tša bupi. Moprista wa Moarone a tlišetše Morena kabelo ya bupi pele ga aletare. ₈Ke moka a ntšhe legoswi la bupi bjo bo hlakantšwego le makhura a mohlware, a tšee le seorelo sohle, mme a di tšhume aletareng go laetša gore tšohle di abetšwe Morena. Monkgo wa kabelo ye o tsefela Morena. ₉Baprista ba je tšeo di šalago. Go apewe dinkgwa tše di se nago komelo ka tšona mme di lewe felong mo gokgethwa, e lego kgorong ya Tente ya bodulo bja Morena. _10-11Morena o ba file tšona gore e be seripa sa bona sa dikabelo tša bupi. Ke tše kgethwakgethwa go swana le dihlabelo tša tshwarelo ya dibe le dihlabelo tša tefelo ya tšona. Banna bohle ba e lego ditlogolo tša Arone ba ka di ja e le seaba sa bona go ya go ile sa dijo tše di abelwago Morena. Mang le mang yo a kgwathago kabelo ya bupi o tla tšhelwa madimabe ke maatla a bokgethwa bja yona.

₁₂Morena o file Moshe melawana ye e latelago ₁₃ya go bea moprista wa Moarone. Ka letšatši leo a bewago ka lona, a tlišetše Morena bupi bja kilokramo e tee e le kabelo, bupi bjo bo lekanago le bja kabelo ya bupi ya letšatši ka letšatši, seripagare mosong le seripagare mantšiboa. ₁₄Bo hlakanywe le makhura a mohlware, bo apewe ka pane, gomme bo šilwe bo tlišwe e le kabelo; wo ke monkgo wo o tsefelago Morena. ₁₅Ka mehla mabakeng a a tlago kabelo ye e swanetše go dirwa ke ditlogolo tšohle tša Arone tše e lego Baprista ba Bagolo. E tšhungwe ka moka e le kabelo ya Morena. ₁₆Go se be le se se lewago se se apeilwego ka kabelo ya moprista ya bupi; kabelo yeo ka moka e tšhungwe.

₁₇Morena o laetše Moshe ₁₈go fa Arone le barwa ba gagwe melawana ye e latelago ya dikabelo tša tshwarelo ya dibe. Seruiwa sa sehlabelo sa tshwarelo ya dibe se swanetše go hlabja moo go bolaelwago diruiwa tša dihlabelo tša go tšhungwa ka moka. Se ke sehlabelo se se kgethwakgethwa. ₁₉Moprista yo a hlabago seruiwa a se jele felong mo go kgethwa, ka kgorong ya Tente ya bodulo bja Morena. ₂₀Se se ka kgwathago nama ya seruiwa seo se tla tšhelwa madimabe ke maatla a bokgethwa bja yona. Ge seaparo se ka thantshelwa ke madi a seruiwa seo, se swanetše go hlatswiwa felong mo gokgethwa. ₂₁Pitša ya letsopa yeo nama e apeilwego ka yona e swanetše go pšhatlwa, gomme ge go šomišitšwe pitša ya mphiri, e swanetše go gohlwa mme e tšokotšwe ka meetse. ₂₂Monna yo mongwe le yo mongwe wa lapa la moprista a ka ja sehlabelo se; ke se kgethwakgethwa. ₂₃Eupša ge madi a sehlabelo sa tshwarelo ya dibe a ka tsenywa ka Tenteng mme ka ona gwa boelanywa motho le Morena, sehlabelo seo se se ke sa lewa; se tšhungwe.

₁Melawana ya dihlabelo tše kgethwakgethwa tša tefelo ya dibe še. ₂Seruiwa sa sehlabelo se se swanetše go hlabja moo diruiwa tša dihlabelo tša go tšhungwa ka moka di bolaelwago gona, gomme ka madi a sona go fokwe aletare mahlakoreng ka moka. ₃Makhura a sona ka moka, a mosela, le mabipi, ₄le dipshio le makhura a tšona, le mphapha wo moteletšana wa sebete a tšhungwe aletareng. ₅Moprista a tšhume makhura ka moka aletareng e le sehlabelo go Morena. Ke sehlabelo sa tefelo ya dibe. ₆Monna yo mongwe le yo mongwe wa lapa la moprista a ka se ja. Se swanetše go jelwa ka felo mo gokgethwa, ka gobane ke se sekgethwakgethwa.

₇Go na le molawana o tee wo o amago sehlabelo sa tshwarelo ya dibe le sehlabelo sa tefelo ya tšona: nama ke ya moprista yo a dirago sehlabelo. ₈Mokgopa wa seruiwa seo se bolaetšwego go ba sehlabelo sa go tšhungwa ka moka ke wa moprista yo a dirago sehlabelo. ₉Kabelo ye nngwe le ye nngwe ya bupi – e ka ba dinkgwa tše di pakilwego ka ontong, goba tšohle tše di pakilwego ka pitša goba ka pane – ke ya moprista yo a e abetšego Morena. ₁₀Fela dikabelo ka moka tša bupi tše di sego tša apewa, di hlakantšwe le makhura goba di se tša hlakanywa nao, ke tša baprista ba Baarone, gomme ba swanetše go di abelana ka go lekana.

₁₁Še melawana ya dihlabelo tša kagišano tšeo di direlwago Morena. ₁₂Ge motho a dira sehlabelo se e le sa go leboga Morena, a tliše seruiwa gotee le kabelo ya dinkgwa tše di apeilwego ntle le komelo: e ka ba tše di dirilwego ka bupi bjo bo hlakantšwego le makhura a mohlware, goba tša diphaphathiana tše di tšhatšhitšwego ka makhura a mohlware, goba tša go nyaka go swana le tšela di dirilwego ka bupi bjo bo hlakantšwego le makhura a mohlware. ₁₃A di tliše le dinkgwa tše di tšhetšwego komelo. ₁₄A tliše seripa se tee sa mohuta wo mongwe le wo mongwe wa senkgwa e le mpho ye e fiwago Morena ka tsela ye e itšeng; ke sa moprista yo a fokago aletare ka madi a sehlabelo. ₁₅Nama ya sehlabelo seo e lewe ka letšatši leo go dirilwego sehlabelo ka lona; e se ke ya šadišwa go fihlela mosong wa letšatši le le latelago.

₁₆Ge motho a dira sehlabelo sa kagišano e le go phethagatša keno goba e le sehlabelo sa gagwe sa go ithaopa, ga se gore nama yohle ya sona e tlemegile go lewa ka letšatši leo, eupša ye e ka šalago e ka lewa ka letšatši le le latelago. ₁₇Nama ye e sa šetšego le ka letšatši la boraro e swanetše go tšhungwa. ₁₈Ge ye nngwe ya yona e ka lewa ka letšatši la boraro, Modimo a ka se amogele sehlabelo sa monna yoo. Sehlabelo seo se ka se mo hole ka selo, eupša se tla tšewa gore se tšhilafetše, gomme yo a se jago o tla otlwa. ₁₉Ge nama yeo e ka kgwathwa ke se sengwe se se tšhilafetšego, e se ke ya lewa, e tšhungwe.

Mang le mang yo a hlwekilego a ka ja nama yeo, ₂₀eupša ge yo mongwe yo a sego a hlweka a ka e ja, o swanetše go kgaolwa setšhabeng sa gabo. ₂₁Le gona, ge motho a ka ja nama ya sehlabelo se a kgwathile se sengwe se se sego sa hlweka, sa go tšwa mothong goba phoofolong, goba se sengwe se se tšhilafetšego, o swanetše go kgaolwa setšhabeng sa gabo.

₂₂Morena o file Moshe melawana ye e latelago ₂₃ya setšhaba sa Israele. Le se ke la ja makhura a kgomo goba a nku goba a pudi. ₂₄Makhura a seruiwa seo se ikhwetšego ka bosona, goba seo se bolailwego ke dibata a se ke a lewa, eupša a ka šomišwa ka mererong ye mengwe. ₂₅Motho yo a ka jago makhura a sehlabelo se se tšhumelwago Morena a kgaolwe setšhabeng sa gabo. ₂₆Mo gongwe le mo gongwe mo Baisraele ba dulago gona ba se ke ba tsoga ba lle bobete bja dinonyana goba bja diphoofolo. ₂₇Yo a ka tshelago molao wo a kgaolwe setšhabeng sa gabo.

₂₈Morena o file Moshe melawana ye e latelago ₂₉ya setšhaba sa Israele. Yo a dirago sehlabelo sa kagišano a tliše seripa sa sona e le mpho ye e itšeng go Morena, ₃₀a se tliše ka boyena e le sehlabelo. A tliše makhura a sehlabelo seo le leumo la sona, gomme leumo le abelwe Morena e le mpho ye e fiwago yena ka tsela ye e itšeng. ₃₁Moprista a tšhume makhura aletareng, eupša leumo lona e be la baprista. _32-33Serope sa la go ja sa sehlabelo seo se fiwe moprista yo a dirago sehlabelo ka madi le makhura a sehlabelo sa kagišano e le kabelo ye e abjago ka tsela ye e itšeng. ₃₄Leumo la sehlabelo seo ke mpho ye e fiwago Morena ka tsela ye e itšeng, gomme serope sa la go ja le sona ke kabelo ye e abelwago Morena ka tsela ye e itšeng. Ke ditho tše Morena a di tšerego go setšhaba sa Israele mme a di fa baprista. Tše ke tše Baisraele ba swanetšego go di fa baprista ka dinako tšohle. ₃₅Tše ke diripa tša dihlabelo tše di direlwago Morena tšeo di filwego Arone le barwa ba gagwe ka letšatši lela ba beilwego baprista ka lona. ₃₆Ka letšatši leo Morena o laetše Baisraele gore ba ba fe diripa tše tša sehlabelo. Ke molawana wo ba swanetšego go o phetha ka dinako tšohle.

₃₇Yeo ke melawana ya dihlabelo tša go tšhungwa ka moka, le dikabelo tša bupi, le dihlabelo tša tshwarelo ya dibe, le dihlabelo tša tefelo ya tšona, le dihlabelo tša go bewa ga baprista, le dihlabelo tša kagišano. ₃₈Morena o file Moshe melawana ye thabeng ya Sinai kua lešokeng, ka letšatši le a boditšego Baisraele gore ba direle yena Morena dihlabelo le dikabelo.

₁Morena o rile go Moshe: ₂“Tšea Arone le barwa ba gagwe o ba iše mojakong wa Tente ya bodulo bja ka, o tliše le diaparo tša boprista le makhura a tlotšo, le powana ya sehlabelo sa tshwarelo ya dibe, le dikgapa tše pedi, le seroto sa dinkgwa tše di se nago komelo. ₃Ke moka o kgobokanye setšhaba ka moka fao.”

₄Moshe a dira ka mo Morena a mo laetšego ka gona, gomme ge setšhaba se bokane, ₅a re go bona: “Se ke tlilego go se dira bjale ke se Morena a laetšego gore se dirwe.”

₆Moshe a batametša Arone le barwa ba gagwe go yena mme a ba hlapiša. ₇A apeša Arone hempe le phurabura, a mo tlema letheka ka lepanta la bodiredi. A mo apeša seaparo se sekgethwa, gomme a se tlema lethekeng ka lepanta la sona le le logilwego gabotse. ₈A mo apeša phaphathiana ya sehubeng, gomme a bea Urime le Tumime ka gare ga yona. ₉A mo rweša tuku ya hlogo, a tlemelela go yona mo phatleng sekgabišo se sekgethwa sa gauta, ka moo Morena a mo laetšego ka gona.

₁₀A tšea makhura a tlotšo a tlotša Tente ya bodulo bja Morena le tšohle tše di bego di le ka go yona, mme ka go dira bjalo a di kgethwafaletša Morena. ₁₁A tšea makhura a mangwe a foka aletare ka ona gašupa, a foka le ditlabakelo tša yona, le sebjana sa go hlapela le thito ya sona, gore a di kgethwafaletše Morena. ₁₂A bea Arone moprista ka go mo tlotša hlogo ka makhura ao. ₁₃Ke moka a batametša barwa ba Arone go yena mme a ba apeša dihempe, a ba tlema matheka ka mapanta a bodiredi, mme a ba rweša dikefana, ka moo Morena a laetšego ka gona.

₁₄Ke mo a tlišitšego powana ya sehlabelo sa tshwarelo ya dibe, gomme Arone le barwa ba gagwe ba bea diatla godimo ga hlogo ya yona. ₁₅Moshe a e hlaba, gomme a tšea madi a mangwe a yona a tlotša dinakana tša dikhutlo tša aletare ka monwana, gore a hlwekiše aletare. Madi a a šetšego a a tšholla thitong ya aletare. Ka tiro yeo ya go boelanya motho le Morena a kgethwafatša aletare. ₁₆A ntšha mabipi ka moka, le mphapha wo moteletšana wa sebete, le dipshio le makhura a a lego go tšona, gomme a di tšhuma aletareng. ₁₇A tšea poo yeo ka moka le mokgopa wa yona le nama le mošwang, a di tšhuma ka ntle ga mešaša, ka moo Morena a laetšego ka gona.

₁₈A tliša kgapa ya sehlabelo sa go tšhungwa ka moka, gomme Arone le barwa ba gagwe ba bea diatla godimo ga hlogo ya yona. ₁₉Moshe a e hlaba, gomme a foka aletare ka madi a yona mahlakoreng ka moka. _20-21A phakologanya kgapa yeo, a hlatswa dikateng le meomo, gomme a tšhuma hlogo ya yona le makhura le tšohle tše di šetšego aletareng, ka wona mokgwa woo Morena a laetšego. Sehlabelo se sa go tšhungwa ka moka se be se diretšwe Morena, gomme monkgo wa sona wa mo tsefela.

₂₂Moshe a tliša kgapa ya bobedi ye e bego e le ya go bewa ga baprista, gomme Arone le barwa ba gagwe ba bea diatla godimo ga hlogo ya yona. ₂₃Moshe a e hlaba, gomme a tšea madi a mangwe a yona a tlotša lerephu la tsebe ya la go ja ya Arone, le monwana wa gagwe wo mogolo wa seatla sa la go ja, le monwana wa gagwe wo mogolo wa leoto la go ja. ₂₄A batametša barwa ba Arone go yena, gomme a tšea madi a mangwe a tlotša marephu a ditsebe tša bona tša la go ja, le menwana ya bona ye megolo ya diatla tša la go ja, le menwana ya bona ye megolo ya maoto a la go ja ka ona. A foka aletare ka madi a a šetšego mahlakoreng ka moka. ₂₅A tšea makhura, le mosela, le mabipi ka moka, le mphapha wo moteletšana wa sebete, le dipshio le makhura a a lego go tšona, le serope sa la go ja. ₂₆Ke moo a tšerego senkgwa se tee serotong sa dinkgwa tše di se nago komelo tše di abetšwego Morena, se tee se se dirilwego ka makhura a mohlware, le senkgwa se tee sa phaphathiana, gomme a di bea godimo ga makhura le serope sa la go ja. ₂₇A bea dijo tše ka moka ka diatleng tša Arone le tša barwa ba gagwe, gomme ba di abela Morena e le mpho ye e fiwago yena ka tsela ye e itšeng. ₂₈A tšea dijo tšeo go bona mme a di tšhuma aletareng, gotee le sehlabelo sa go tšhungwa ka moka, e le sehlabelo sa go bea baprista. Sehlabelo se se be se diretšwe Morena, gomme monkgo wa sona wa mo tsefela. ₂₉Ke moo Moshe a tšerego leumo a le abela Morena e le mpho ye e fiwago yena ka tsela ye e itšeng. E ile ya ba setho sa Moshe sa kgapa yela ya go bewa ga baprista. Moshe a dira tšohle ka moo Morena a laetšego ka gona.

₃₀A tšea makhura a mangwe a tlotšo le madi a mangwe a a bego a le aletareng, a foka Arone le barwa ba gagwe le diaparo tša bona ka ona. Ka tsela ye a ba kgethwafatša gotee le diaparo tša bona.

₃₁A re go Arone le barwa ba gagwe: “Tšeang nama ye le e iše mojakong wa Tente ya bodulo bja Morena, le e apee, le e jele fao gotee le dinkgwa tšela di lego ka serotong sa dikabelo tša ge go bewa ga baprista, ka moo Morena a laetšego ka gona. ₃₂Nama ye e ka šalago goba senkgwa le e tšhume. ₃₃Le se ke la tloga mojakong wa Tente pele matšatši a a šupago a ditirelo tša go bewa boprista ga lena a fela. ₃₄Morena o re laetše go dira se re se dirilego lehono gore le boelanywe le yena. ₃₅Le swanetše go dula mojakong wa Tente ya bodulo bja Morena matšatši a a šupago bošego le mosegare, le dira tše Morena a le laetšego. Ge le ka se dire bjalo, le tla hwa. Se ke se Morena a ntaetšego sona.” ₃₆Ka gona Arone le barwa ba gagwe ba dira tšohle tše Morena a di laetšego ka Moshe.

₁Badumedikanna ba bakgethwa ba le biditšwego ke Modimo gotee le nna, gopolang ka Jesu, Moapostola le Moprista yo Mogolo wa tumelo ye re ipegago yona. ₂O ile a botegela Modimo yo a bego a mo kgethile, boka Moshe ge a ile a botegela modiro wa gagwe ka lapeng la Modimo. ₃Mohlodi wa lapa o hlompšha go feta lona lapa. Ka yona tsela yeo Jesu le yena o lebanwe ke tlhompho ye kgolo go feta Moshe. ₄Lapa le lengwe le le lengwe le na le mohlodi wa lona, gomme Modimo ke yena Mohlodi wa dilo tšohle. ₅Moshe o be a botega e le mohlanka wa lapa la Modimo, gomme modiro wa gagwe e le go porofeta tše di bego di tlilo bolelwa ke Modimo ka moso. ₆Kriste yena o botegetše Modimo e le Morwa wa go buša lapa la gagwe. Rena, ge eba re na le sebete ebile re holofela re tiišitše, gona re ba lapa la gagwe.

₇Ka gona, bjalo ka ge Moya wo Mokgethwa a bolela:

₁₂Badumedikanna, le hlokomeleng gore mo go lena go se be le wa pelo ye mpe ya go gana go dumela, mo a kago ba a furalela Modimo yo a phelago. ₁₃Sa lena e be go kgothatšana tšatši le lengwe le le lengwe ge le ekwa lentšu leo la go re “Lehono”, gore go se be le yo a hlalefetšwago ke sebe a ngangabala. ₁₄Gobane re fetogile ba ba nago le kabelo le Kriste go tša gagwe ge fela re ka tiišetša go yo fihla mafelelong kholofelong ye re bilego le yona mathomong.

₁₅Ke ka lebaka leo Mangwalo a Makgethwa a rego:

₁₆Etse ke bafe ba ba rilego go kwa Modimo a bolela ba mo gwabela? Ga ke re ke bohle bale ba go hudušwa ke Moshe Egepeta? ₁₇Modimo yena o ile a galefela bafe mengwaga ye masome a mane? Ga ke re ke ba ba bego ba dirile dibe, bao ditopo tša bona di ilego tša rapalatšwa lešokeng? ₁₈Ke bafe bao Modimo a bego a ikana go bona, a re ba ka se tsene nageng ye a bego a tla ba khutšiša go yona? Ga ke re ke bona bale ba go se mo theeletše? ₁₉Ka gona, re a bona gore ba ile ba palelwa ke go tsena ka lebaka la go se dumele ga bona.

₁Ka ge kholofetšo yela ya Modimo ya go re re tla tsena makhutšong e sa le gona, a re hlokomeleng gore go se be le o tee wa lena wa go palelwa ke go tsena makhutšong ao. ₂Re begetšwe Taba ye Botse ya Modimo go no swana le bona. Fela bona ba rile go kwa molaetša woo wa Modimo wa se ba hole ka selo, ka gobane e rile ge ba o kwa ba se o amogele ka tumelo. ₃Rena re dumelago re tsena makhutšong ao Modimo a boletšego ka ona a re:

₈Ge Joshua a ka be a be a ile a iša setšhaba makhutšong, ka morago Modimo a ka be a se a bolela ka letšatši le lengwe. ₉Ge go le bjalo, setšhaba sa Modimo se sa na le letšatši la go khutša, go no swana le Modimo mola a khutša ka letšatši la bošupa. ₁₀Gobane yo a tsenego makhutšong ao Modimo a re holofeditšego ona, o khutša a phethile modiro wa gagwe go etša Modimo mola a khutša a phethile wa gagwe modiro. ₁₁Ka gona, a re ikokoropeleng go tsena makhutšong ao, gore go se be le yo mongwe yo a palelwago go etša bona ka ge ba be ba sa theeletše Modimo.

₁₂Lentšu la Modimo le a phela, le mafolofolo ebile le bogale go feta tšhoša ya magale a mabedi. Le sega go hlaphola la ba la kgaoganya pelo le moya, la kgaoganya le malokologo le moko. Le fetleka dikakanyo le menagano ya ka pelong. ₁₃Ga go sebopiwa se se širegelago Modimo; tšohle di a mo utologela tša ba pepeneneng. Ke yena yo re swanetšego go ikarabela go yena.

₁₄A re kgomareleng tumelo ye re e amogetšego, gobane re na le Moprista yo Mogolo, yena Jesu, Morwa wa Modimo, yo a ilego gonagona kua go lego Modimo. ₁₅Moprista wa rena yo Mogolo ga se wa go se re kwele bohloko mafokoding a rena. Ke yo a ilego a lekwa ka tšohle bjalo ka rena, eupša yena a se dire sebe. ₁₆Ka gona a re batameleng Modimo ka sebete setulong sa gagwe sa bogoši moo a gaugelago batho, gore a re šokele, a re gaugele, a re thuše ge re nyaka thušo.