LEFITIKOSE 4

₁Morena o laetše Moshe ₂gore a botše Baisraele gore ge yo mongwe a ka dira sebe a tshela ye nngwe ya ditaelo tša Morena a se a ikemišetša, o swanetše go phetha melawana ye e latelago.

₃Ge sebe se dirilwe ke Moprista yo Mogolo, ka fao a obela setšhaba molato, a tliše powana ye e se nago bosodi mme a e hlabele Morena ka lebaka la sebe sa gagwe. ₄A e tliše mojakong wa Tente ya bodulo bja Morena, a bee seatla godimo ga hlogo ya yona, gomme a e hlabe moo pele ga Morena. ₅Moprista yo Mogolo a tšee madi a mangwe a poo, a tsene nao Tenteng. ₆A ine monwana mading, gomme a a fokele gašupa pele ga seširo se sekgethwa. ₇A tlotše dinakana tša dikhutlo tša aletare ya seorelo ka gare ga Tente ka madi a mangwe. A tšhollele madi a a šetšego thitong ya aletare ya dihlabelo ye e lego mojakong wa Tente. ₈A ntšhe makhura ka moka a poo yeo, le mabipi, ₉le dipshio le makhura a a lego go tšona, le mphapha wo moteletšana wa sebete. ₁₀Moprista a tšee ditho tšeo a di tšhume aletareng ya dihlabelo. Ditho tšeo di ntšhwago di swane le tšela di ntšhwago sehlabelong sa kagišano. ₁₁Eupša mokgopa wa yona, le nama ya yona ka moka, le hlogo ya yona, le maoto a yona, le dikateng tša yona gotee le mošwang, ₁₂tšohle a di ntšhe mešašeng a di iše lefelong le le hlweketšego tirelo moo go tšhollwago melora, gomme fao a di tšhume ka mollo wa dikgong.

₁₃Ge sebe se dirilwe ke setšhaba ka moka sa Israele, gomme sa ba le molato wa go tshela ye nngwe ya ditaelo tša Morena se se sa ikemišetša, ₁₄ge sebe se seno tsebja, setšhaba se tliše powana e be sehlabelo sa tshwarelo ya dibe. Se e tliše Tenteng ya bodulo bja Morena; ₁₅bagolo ba setšhaba ba bee diatla godimo ga hlogo ya yona, gomme e hlabje moo pele ga Morena. ₁₆Moprista yo Mogolo a iše madi a mangwe a yona ka Tenteng, ₁₇a ine monwana go ona gomme a a fokele gašupa pele ga seširo. ₁₈A tlotše dinakana tša dikhutlo tša aletare ya seorelo ye e lego ka gare ga Tente ka madi a mangwe a yona, gomme a tšhollele a a šetšego thitong ya aletare ya dihlabelo ye e lego mojakong wa Tente. ₁₉A tšee makhura ka moka a yona a a tšhume aletareng. ₂₀A dire ka poo ye ka wona mokgwa woo a dirago ka poo ya sehlabelo sa tshwarelo ya dibe, mme ka tsela ye a boelanye setšhaba le Morena ka ge ba be ba dirile sebe, gomme ba tla lebalelwa. ₂₁Ka morago a ntšhetše poo yeo ka ntle ga mešaša, gomme a e tšhume ka wona mokgwa woo a tšhumago poo yeo e hlabjago ka lebaka la sa gagwe sebe. Se ke sehlabelo sa go tloša sebe sa setšhaba.

₂₂Ge sebe se dirilwe ke mmuši, mme a ba le molato wa go tshela ye nngwe ya ditaelo tša Morena a se a ikemišetša, ₂₃ge a seno tsebišwa sebe seo, a tliše phooko ye e se nago bosodi e be sehlabelo sa gagwe. ₂₄A bee seatla godimo ga hlogo ya yona, gomme a e bolaele moo diruiwa tša dihlabelo tša go tšhungwa ka moka di bolaelwago gona. Se ke sehlabelo sa go tloša dibe. ₂₅Moprista a ine monwana mading a phooko yeo, a tlotše dinakana tša dikhutlo tša aletare ya dihlabelo ka ona, gomme ao a šalago a a tšhollele thitong ya aletare. ₂₆A tšhume makhura a yona ka moka aletareng, ka wona mokgwa woo a tšhumago makhura a diruiwa tšeo di bolaetšwego go ba dihlabelo tša kagišano. Ka sehlabelo se sa sebe moprista a boelanye mmuši le Morena ka ge mmuši a be a dirile sebe, gomme o tla lebalelwa.

₂₇Ge sebe se dirilwe ke mothofela, mme a ba le molato wa go tshela ye nngwe ya ditaelo tša Morena a se a ikemišetša, ₂₈ge a seno tsebišwa sebe seo, a tliše pudi ya tshadi ye e se nago bosodi e be sehlabelo sa gagwe. ₂₉A bee seatla godimo ga hlogo ya yona, gomme a e hlabe moo go bolaelwago diruiwa tša dihlabelo tša go tšhungwa ka moka. ₃₀Moprista a ine monwana mading a pudi yeo, a tlotše dinakana tša dikhutlo tša aletare, gomme a a šetšego a a tšhollele thitong ya aletare. ₃₁A tloše makhura ka moka go yona, bjalo ka ge makhura a diruiwa tše di bolailwego go ba dihlabelo tša kagišano a tlošwa, gomme a a tšhume aletareng go dira monkgo wo o tsefelago Morena. Ka sehlabelo se sa sebe moprista a boelanye motho yoo le Morena, gomme motho yoo o tla lebalelwa.

₃₂Ge motho a tliša kwanyana e le sehlabelo sa tshwarelo ya dibe, e be ya tshadi ye e se nago bosodi. ₃₃A bee seatla godimo ga hlogo ya yona gomme a e hlabe moo diruiwa tša dihlabelo tša go tšhungwa ka moka di bolaelwago gona. ₃₄Moprista a ine monwana mading a kwanyana yeo, a tlotše dinakana tša dikhutlo tša aletare ka ona, gomme ao a šetšego a a tšhollele thitong ya aletare. ₃₅A tloše makhura a yona ka moka ka moo makhura a tlošwago kwanyaneng ye e bolaetšwego go ba sehlabelo sa kagišano, mme a a tšhume aletareng gotee le dikabelo tša go tšhumelwa Morena. Ka sehlabelo se sa tshwarelo ya dibe moprista a boelanye motho yoo le Morena, gomme yoo o tla lebalelwa.