LEFITIKOSE 3

₁Ge motho a dira sehlabelo sa kagišano ka kgomo ya gagwe, e ka ba ye tona goba ye tshadi e be ye e se nago bosodi. ₂A bee seatla godimo ga hlogo ya kgomo yeo, gomme a e hlabe mojakong wa Tente ya bodulo bja Morena. Baprista ba Baarone ba foke aletare ka madi mahlakoreng ka moka, ₃gomme ba abele Morena ditho tše di latelago tša kgomo yeo e le sehlabelo: mabipi ka moka, ₄dipshio le makhura a a lego go tšona, le mphapha wo moteletšana wa sebete. ₅Baprista ba tšhume ditho tše ka moka aletareng gotee le sehlabelo sa go tšhungwa ka moka. Monkgo wa sehlabelo se o tsefela Morena.

₆Ge a dira sehlabelo sa kagišano ka sehuswane, e ka ba se setona goba se setshadi, eupša e be se se se nago bosodi. ₇Ge motho a abela Morena kwanyana, ₈a bee seatla godimo ga hlogo ya yona, gomme a e hlabe pele ga Tente ya bodulo bja Morena. Baprista ba foke aletare ka madi a yona mahlakoreng ka moka, ₉gomme ba abele Morena ditho tše di latelago tša sehuswane seo e le sehlabelo: makhura, le mosela wohle o ripilwe kgauswi le mokokotlo, le mabipi ka moka, ₁₀le dipshio le makhura ao a lego go tšona, le mphapha wo moteletšana wa sebete. ₁₁Moprista a tšhume dilo tše aletareng e le sehlabelo sa dijo go Morena.

₁₂Ge motho a abela Morena pudi, ₁₃a bee seatla godimo ga hlogo ya yona, gomme a e hlabe pele ga Tente ya bodulo bja Morena. Baprista ba foke aletare ka madi a yona mahlakoreng ka moka, ₁₄gomme ba abele Morena ditho tše di latelago e le sehlabelo: mabipi ka moka, ₁₅dipshio le makhura a a lego go tšona, le mphapha wo moteletšana wa sebete. ₁₆Baprista ba tšhume dilo tše godimo ga aletare e le sehlabelo sa dijo se se tsefelago Morena. Makhura ka moka ke a Morena. ₁₇Le se tsoge le jele makhura goba bobete; ye ke taelo ye lena le ditlogolo tša lena le swanetšego go e phetha go ya go ile gohle moo le dulago gona.