To The Word – Day 225

₁Go lehlogonolo bohle ba ba boifago Morena,

ba ba sepelago ka tsela tša gagwe.

₂Wena o tla ja tše o di šometšego;

o yo lehlogonolo gomme o tla atlega.

₃Mosadi wa gago o tla etša morara wo o enywago ka lapeng la gago;

bana ba gago ba tla swana le mahlogedi a mohlware ge ba potapotile tafola ya gago.

₄Ruri, motho yo a boifago Morena o tla šegofatšwa ka tsela yeo.

₅Morena a go šegofatše a le Sione!

Nke o ka bona katlego ya Jerusalema mehleng yohle ya ge o sa phela.

₆O phele go fihlela o bona ditlogolwana tša gago.

Israele a go rene khutšo!

₁Manaba a ka e sa le a ntshwara gasehlogo go tloga bjaneng bja ka –

a Baisraele ba realo, ba re:

₂“Manaba a ka e sa le a ntshwara gasehlogo go tloga bjaneng bja ka,

fela ke ba paletše.

₃Mokokotlo wa ka ba o kgathile,

ba o fetoša boleme.

₄Morena o lokile,

o ntokolotše go bakgopo.”

₅A bahloi bohle ba Sione ba segišwe batho,

ba bušetšwe morago.

₆A ba etše bjang bjo bo metšego tlhakeng,

bjo bo ponago bo sešo bja gola.

₇Ga bo be le mosegi,

ga bo be le wa go bo bofa digola.

₈Ga go mofeti yo a tlago ba dumediša a re:

“Morena a le šegofatše!

Re le šegofatša leineng la Morena.”

₁Morena, nna ga ke ikgantšhe,

goba ka hlaetša ba bangwe mahlo.

Ga ke ipofe ka dilo tše di mphetago,

goba tša go nkgakgamatša.

₂Nka upša ka thekga ditho ke ikhomoletše,

ka fola maswafo go etša lesea le le tshwešitšwego letswele difarong tša mmalo.

₃Baisraele, botang Morena,

go tloga bjale le go ya go ile.

₁Morena, gopola Dafida le mathata a gagwe ohle.

₂Gopola se a ikannego ka sona,

a ikana go wena, Ramaatla wa Jakobo, a re:

₃“Nka se tsene ka ntlong ya ka goba ka robala malaong a ka,

₄ke tla itima boroko,

ešita le gona go potuma,

₅go fihlela ke hweletša Morena bodulo,

moago wa yena Ramaatla wa Jakobo.”

₆Kua Efrata re kwele ka Polokelo ya Kgwerano,

ra e hwetša mašemong a kua Jaare.

₇A re yeng bodulong bja Morena go mo khunamela gona.

₈Morena, eya bodulong bjoo bja gago,

o ye le Polokelo ya Kgwerano,

e lego sona sešupo sa maatla a gago.

₉A baprista ba gago ka mehla ba dire tše di lokilego,

ba ba go botegelago le bona ba gobele.

₁₀Ka lebaka la Dafida, mohlanka wa gago,

o se gane motlotšwa wa gago.

₁₁Morena o ikanne a tiišitše go Dafida,

ebile a ka se hlaname, o rile:

“Ke tla bea yo mongwe wa barwa ba gago kgoši ya go go hlatlama.

₁₂Ge bana ba gago ba ka botegela kgwerano ya ka le ditaelo tše ke ba fago tšona,

le bona bana ba bona ba tla go hlatlama go ya go ile.”

₁₃Ruri, Morena o ikgethetše Sione;

o kganyogile gore e be bodulo bja gagwe, a re:

₁₄“Bjo ke bjona bodulo bja ka go ya go ile;

mo ke mo ke nyakago go dula gona go ya ka mo ke ratilego.

₁₅Ke tla atla ba Sione ka tšohle tše ba di hlokago,

bahloki ba gona ka ba khoriša dijo.

₁₆Baprista ba gona ke tla ba atla go tšohle tše ba di dirago;

bampotegedi ba gona ba tla gobela ba hlaletše.

₁₇Mo ke mo ke tlago bea setlogolo sa Dafida kgošikgolo,

ke gona mo ke tlago lotola bogoši bja motlotšwa wa ka.

₁₈Manaba a gagwe ke tla a apeša kgobogo,

eupša yena mmušo wa gagwe ke tla o atla.”

₁Go botse ebile go kgahliša bjang ge ba leloko ba phedišana ka boiketlo!

₂Go etša makhura a go nkga bose hlogong ya Arone,

ge a elela maledung,

maledung a gagwe,

a elela le molaleng wa seaparo sa gagwe.

₃Go bjalo ka phoka ya thaba ya Hermone

ye e welago dithabeng tša Sione;

gape moo ke mo Morena a šegofatšago batho

ka go ba fa bophelo bja go ya go ile.

₁Etlang le tumišeng Morena,

lena bahlanka bohle ba gagwe

le lalago le letetše ka ntlong ya gagwe.

₂Phagamišetšang matsogo Tempeleng le tumišeng Morena.

₃A Morena,

yena Mohlodi wa legodimo le lefase,

a go šegofatše a le Sione.