To The Word – Day 224

₁Ge nkabe Morena a se eme le rena – a Baisraele ba realo, ba re:

₂“Ge nkabe Morena a se eme le rena mola manaba a be a re hlasela,

₃nkabe ba re kwameditše re phela,

ge ba be ba re tukela bogale;

₄nkabe morwalela o re gogotše,

nkabe lefula le re pipeditše;

₅ee, meetse a sephalo nkabe a re pipeditše.”

₆A re tumišeng Morena,

yo a sa kago a ba lesa ba re rwaetša.

₇Re phonyokgile boka nonyana seropong sa mothei;

seropo sa re go robega, ra phonyokga.

₈Thušo ya rena e tšwa go Morena,

yena Mohlodi wa legodimo le lefase.

₁Ba ba botilego Morena ba etša thaba ya Sione,

yona e sa šikinyegego,

e ka se kego ya timelela.

₂Bjalo ka ge Jerusalema e dikaneditšwe ke dithaba,

tšhaba sa Morena le sona se dikaneditšwe ke yena,

gonabjale le go iša go sa felego.

₃Bakgopo ba ka se fele ba buša naga ya baloki;

ge ba ka e buša baloki ba ka no wela bokgopong.

₄Morena, dira baloki ka botho,

e lego ba pelo tše dibotse.

₅Ba ba kgelogetšego tseleng tša manyokenyoke bona

Morena o tla ba fediša mmogo le badiratšekgopo.

Israele a go rene khutšo!

₁Mola Morena a re bušetša Sione re etšwa bothopša,

e be nke re a lora.

₂Re be re sega re gobela;

ke ge baditšhaba ba re:

“Morena o ba diretše tše dikgolo.”

₃Le bjale, Morena o re diretše tše dikgolo,

gomme ra thakgala.

₄Morena, re bušetše nageng ya gaborena,

go etša ge o bušetša meela leganateng.

₅Ba ba bjalago ba lla,

ba tla buna ba gobela.

₆Yo a yago mašemong a lla a rwele peu,

o tla boa a gobela a rwele puno.

₁Retang Morena!

Ke mo gobotse go opelela Modimo wa rena ditumišo;

go a kgahliša ebile go a swanela go mo reta.

₂Morena o tsošološa Jerusalema;

o kgoboketša mathopša a Israele.

₃O homotša ba ba nyamilego,

o ba kgothatša manyaming a bona.

₄O beile dinaledi ka palo ya tšona,

a thea ye nngwe le ye nngwe leina.

₅Mong wa rena ke yo mogolo,

yo maatlamaatla,

bohlale bja gagwe ga bo elwe.

₆Morena o babalela banyatšegi,

bakgopo bona o a ba kokobetša.

₇Opelelang Morena sefela sa tebogo,

le opelele Modimo wa rena le letša sekgapa.

₈O pipa leratadima ka maru,

o nešetša lefase pula,

o mediša bjang mebotong.

₉O fa diphoofolo dijo tša tšona,

le mafotwane a magokobu ge a lla.

₁₀Ga a iše felo ka maatla a pere,

le a mohlabani ga a mo kgahle;

₁₁o kgahlwa ke ba ba mmoifago,

ba ba botilego rato la gagwe, kilaphetogo.

₁₂Reta Morena, wena Jerusalema!

Tumiša Modimo wa gago, wena Sione!

₁₃Gobane ke yena a dudišago batho ba gagwe ka boiketlo;

ke yena a šegofatšago badudi ba gago.

₁₄Ke yena a tlišago khutšo nageng ya lena,

gape a le khorišago ka dijo tše bosebose.

₁₅O ntšha ditaelo tša gagwe lefaseng,

gomme di fihla ka pela.

₁₆O neša lehlwa la šweufala bjalo ka leokodi;

šobane o e gaša bjalo ka molora.

₁₇O neša sefako se sekoto;

botšididi bja sona bo ka kgotlelelwa ke mang?

₁₈A ntšha taelo, tšeo ka moka tša tologa;

a fokiša phefo, meetse a tšona a ela.

₁₉Tše a di laetšego o di tsebiša Bajakobo,

ee, bona Baisraele ditaelo le melao ya gagwe o ba begela tšona.

₂₀Ga go tšhaba se sengwe se a se diretšego bjalo,

gomme taelo tša gagwe bona ga ba di tsebe.

Retang Morena!