Tša Tempele le se Morena a ikannego ka sona go Dafida
Ke sefela sa ge go iwa Tempeleng Jerusalema go rapela.
1Morena, gopola Dafida le mathata a gagwe ohle.
2Gopola se a ikannego ka sona,
a ikana go wena, Ramaatla wa Jakobo, a re:
3“Nka se tsene ka ntlong ya ka goba ka robala malaong a ka,
4ke tla itima boroko,
ešita le gona go potuma,
5go fihlela ke hweletša Morena bodulo,
moago wa yena Ramaatla wa Jakobo.”
6Kua Efrata re kwele ka Polokelo ya Kgwerano,
ra e hwetša mašemong a kua Jaare.
7A re yeng bodulong bja Morena go mo khunamela gona.
8Morena, eya bodulong bjoo bja gago,
o ye le Polokelo ya Kgwerano,
e lego sona sešupo sa maatla a gago.
9A baprista ba gago ka mehla ba dire tše di lokilego,
ba ba go botegelago le bona ba gobele.
10Ka lebaka la Dafida, mohlanka wa gago,
o se gane motlotšwa wa gago.
11Morena o ikanne a tiišitše go Dafida,
ebile a ka se hlaname, o rile:
“Ke tla bea yo mongwe wa barwa ba gago kgoši ya go go hlatlama.
12Ge bana ba gago ba ka botegela kgwerano ya ka le ditaelo tše ke ba fago tšona,
le bona bana ba bona ba tla go hlatlama go ya go ile.”
13Ruri, Morena o ikgethetše Sione;
o kganyogile gore e be bodulo bja gagwe, a re:
14“Bjo ke bjona bodulo bja ka go ya go ile;
mo ke mo ke nyakago go dula gona go ya ka mo ke ratilego.
15Ke tla atla ba Sione ka tšohle tše ba di hlokago,
bahloki ba gona ka ba khoriša dijo.
16Baprista ba gona ke tla ba atla go tšohle tše ba di dirago;
bampotegedi ba gona ba tla gobela ba hlaletše.
17Mo ke mo ke tlago bea setlogolo sa Dafida kgošikgolo,
ke gona mo ke tlago lotola bogoši bja motlotšwa wa ka.
18Manaba a gagwe ke tla a apeša kgobogo,
eupša yena mmušo wa gagwe ke tla o atla.”
