To The Word – Day 223

₁Modimo ke setšhabelo sa rena le maatla a rena;

ke komana madulaabapile mabakeng a mathata.

₂Ka gona,

le ge lefase le ka šikinyega,

le dithaba tša kgeregela ka garegare ga lewatle;

₃le ge mawatle a ka rora a galefile,

le dithaba tša thothomedišwa ke kgalefo yeo, re ka se tšhoge. Sela

₄Go na le noka ye nngwe yeo dinokana tša yona di thabišago motse wa Modimo,

le ngwako wo mokgethwa wa Yogodimodimo.

₅Modimo o mo motseng woo,

gomme wona o ka se thubje.

Yena o tla tlo o phalalela ge letšatši le hlaba.

₆Modimo o kwatša lentšu la gagwe –

ditšhaba di a gakanega,

mebušo e nyaka go wa,

lefase le a fedišwa. Sela

₇Morena Ramaatlaohle o na le rena;

Modimo wa Jakobo ke setšhabelo sa rena!

₈Etlang le bone ditiro tša Morena,

dimakatšo tše a di dirago lefaseng!

₉O fediša dintwa lefaseng ka moka;

o roba mara, a robaganya le marumo,

dikoloi tša ntwa a di tšhuma ka mollo.

₁₀O re: “Lesang go lwa,

mme le tsebe gore ke nna Modimo.

Ke nna Kokamaditšhaba,

ke nna Kokamalefase.”

₁₁Morena Ramaatlaohle o na le rena;

Modimo wa Jakobo ke setšhabelo sa rena!

₁Retang Morena, gobane ke yo botho;

lerato la gagwe ke la go ya go ile.

₂Baisraele a ba re:

“Lerato la gagwe ke la go ya go ile.”

₃Ba lešika la Arone a ba re:

“Lerato la gagwe ke la go ya go ile.”

₄Ba ba boifago Morena a ba re:

“Lerato la gagwe ke la go ya go ile.”

₅Mola ke le tlalelong ke ile ka rapela Morena,

gomme a nkwa, a ntlhatlola.

₆Ka ge Morena a na le nna ga ke boife;

motho wa nama yena a ka ntirang?

₇Morena o na le nna gore a nthuše;

ka gona ke tla bogela manaba a ka a fentšwe.

₈Go kaone go khuta ka Morena,

go na le go ikanya motho wa nama.

₉Go kaone go khuta ka Morena,

go na le go ikanya babuši.

₁₀Ke be ke dikaneditšwe ke baditšhaba bohle,

mme ka ba phaya ka thušo ya Morena.

₁₁Ba be ba ntikaneditše ba ntsentšhitše gare,

fela ka ba phaya ka thušo ya Morena.

₁₂Ba be ba mpokanela bjalo ka dinose,

fela ba lauma ka pela boka mollo wa mašaša a meetlwa,

mme ka ba phaya ka thušo ya Morena.

₁₃Ba be ba ntlhasela wa go mphekeetša,

fela Morena a nthuša.

₁₄Nna ke maatlafatšwa ke Morena,

o a ntiiša;

ke yena Mohlakodiši wa ka.

₁₅Baloki ba gobela ka mekutwaneng ya bona ka ge ba fentše,

ba re:

“Modimo o dira dimaka ka maatla a gagwe.

₁₆Ka maatla a gagwe o re kgontšhitše go fenya;

Modimo o dira dimaka ka maatla a gagwe.”

₁₇Nna nka se hwe, ke tla phela,

ka bega ditiro tša Morena.

₁₈Morena o nkotlile gabohloko,

fela ga se a mpolaya.

₁₉Mpuleleng dikgoro tša toka,

ke tsene ke rete Morena.

₂₀Kgoro ya Morena še,

ke mo go tsenago baloki.

₂₁Ke a go reta, ka ge o nkwele mme o mphološitše.

₂₂Leswika le baagi ba le nyaditšego e bile lona la sekhutlo.

₂₃Ke se se dirilwego ke Morena,

se a re tlaba ge re se bona.

₂₄Le ke letšatši le le beilwego ke Morena;

a re hlalaleng, re gobeleng go lona!

₂₅Re a go rapela, hle, Morena, re phološe;

nke o re atle, re a go kgopela.

₂₆A go retwe yo a tlago a romilwe ke Morena;

re le šegofatša re le ka ntlong ya Morena.

₂₇Morena ke Modimo,

o re loketše;

swarang makala ka diatla,

le thome go keteka;

le sepele le dikologa aletare.

₂₈O Modimo wa ka,

ke a go tumiša;

Modimo wa ka,

ke tla go reta.

₂₉Tumišang Morena,

gobane ke yo botho;

lerato la gagwe ke la go ya go ile.

₁Ge ke le tlalelong ke llela Morena,

gomme o a nthuša.

₂Morena, ntlhakodiše go ba maaka le go baradia.

₃Baradia tenang,

Morena o tla le dirang,

ge e se go le otla gabohloko?

₄O tla le tsotsometša ka mesebe ya dintlha ya mohlabani,

a le fiša le ka magala a mollo.

₅Go dula gare ga lena go nna go gobe go no swana le go falalela Mesheke,

goba go dula le batho ba Kedara.

₆E šetše e le kgale kudu ke dula le batho ba ba hloilego khutšo.

₇Nna ke rata khutšo,

fela ge ke bolela ka yona,

bona ba nyaka ntwa.