Pesalome 118

₁Retang Morena, gobane ke yo botho;

lerato la gagwe ke la go ya go ile.

₂Baisraele a ba re:

“Lerato la gagwe ke la go ya go ile.”

₃Ba lešika la Arone a ba re:

“Lerato la gagwe ke la go ya go ile.”

₄Ba ba boifago Morena a ba re:

“Lerato la gagwe ke la go ya go ile.”

₅Mola ke le tlalelong ke ile ka rapela Morena,

gomme a nkwa, a ntlhatlola.

₆Ka ge Morena a na le nna ga ke boife;

motho wa nama yena a ka ntirang?

₇Morena o na le nna gore a nthuše;

ka gona ke tla bogela manaba a ka a fentšwe.

₈Go kaone go khuta ka Morena,

go na le go ikanya motho wa nama.

₉Go kaone go khuta ka Morena,

go na le go ikanya babuši.

₁₀Ke be ke dikaneditšwe ke baditšhaba bohle,

mme ka ba phaya ka thušo ya Morena.

₁₁Ba be ba ntikaneditše ba ntsentšhitše gare,

fela ka ba phaya ka thušo ya Morena.

₁₂Ba be ba mpokanela bjalo ka dinose,

fela ba lauma ka pela boka mollo wa mašaša a meetlwa,

mme ka ba phaya ka thušo ya Morena.

₁₃Ba be ba ntlhasela wa go mphekeetša,

fela Morena a nthuša.

₁₄Nna ke maatlafatšwa ke Morena,

o a ntiiša;

ke yena Mohlakodiši wa ka.

₁₅Baloki ba gobela ka mekutwaneng ya bona ka ge ba fentše,

ba re:

“Modimo o dira dimaka ka maatla a gagwe.

₁₆Ka maatla a gagwe o re kgontšhitše go fenya;

Modimo o dira dimaka ka maatla a gagwe.”

₁₇Nna nka se hwe, ke tla phela,

ka bega ditiro tša Morena.

₁₈Morena o nkotlile gabohloko,

fela ga se a mpolaya.

₁₉Mpuleleng dikgoro tša toka,

ke tsene ke rete Morena.

₂₀Kgoro ya Morena še,

ke mo go tsenago baloki.

₂₁Ke a go reta, ka ge o nkwele mme o mphološitše.

₂₂Leswika le baagi ba le nyaditšego e bile lona la sekhutlo.

₂₃Ke se se dirilwego ke Morena,

se a re tlaba ge re se bona.

₂₄Le ke letšatši le le beilwego ke Morena;

a re hlalaleng, re gobeleng go lona!

₂₅Re a go rapela, hle, Morena, re phološe;

nke o re atle, re a go kgopela.

₂₆A go retwe yo a tlago a romilwe ke Morena;

re le šegofatša re le ka ntlong ya Morena.

₂₇Morena ke Modimo,

o re loketše;

swarang makala ka diatla,

le thome go keteka;

le sepele le dikologa aletare.

₂₈O Modimo wa ka,

ke a go tumiša;

Modimo wa ka,

ke tla go reta.

₂₉Tumišang Morena,

gobane ke yo botho;

lerato la gagwe ke la go ya go ile.