To The Word – Day 217

₁Morena o theile motse wa gagwe thabeng ye kgethwa.

₂O rata motse wa Jerusalema go feta metse yohle ya ditlogolo tša Jakobo.

₃O go bolela ka tše di makatšago,

wena motse wa Modimo. Sela

₄Baegepeta le Bababilone ke ba bala le ditšhaba tše di rego ke Modimo.

Batho ba Filistia le ba Tirose le ba Etopia ba be ba tsebja ba tswaletšwe Jerusalema.

₅Mabapi le Sione go tla thwe:

“Batho ka moka ke ba gona kua;

ke motse wo o tiišitšwego ke Yogodimodimo.”

₆Mohla Morena a ngwala ditšhaba ka maina a tšona,

o tla re yo o tswaletšwe Jerusalema. Sela

₇Diopedi le dibini di re:

“Ke wena mothopo wa tšohle tše dibotse tše re nago le tšona.”

₁Morena Modimo, Mophološi wa ka,

ke go llela bošego le mosegare.

₂Ekwa thapelo ya ka;

ntheeletše ge ke go llela.

₃Ke wetšwe ke masetlapelo a mantši,

mo ke ilego ka ba kgauswi le lehu.

₄Ke balwa le ba ba theogelago go baithobaledi,

le maatla a mpheletše.

₅Ke bjalo ka ba ba lahlilwego gare ga bahu;

ke etša babolawa ba ba rapaletšego ka mabitleng,

ke swana le ba o se sa ba gopolago,

bao ba tšwilego pabalelong ya gago.

₆O ntahletše ka lebitleng fasefase;

o nkgohlomeditše ka sekoting sa leswiswi.

₇Kgalefo ya gago e a nkimela,

ke pipilwe ke mafula a yona.

₈O nkgaogantše le bagwera ba ka,

wa dira gore ba ntšhišingwe;

ke tswaleletšwe ka mo ke palelwago ke go tšwa.

₉Mahlo a ka a lapišitšwe ke matshwenyego;

ke go llela letšatši ka letšatši;

ke emiša matsogo ke go rapela.

₁₀Kgane ba ba hwilego o ba direla mehlolo?

Na bahu ba ka tsoga ba go tumiša?

₁₁Kgane leratorato la gago go bolelwa ka lona ka mabitleng,

goba yona potego ya gago kua tahlegong?

₁₂Na mehlolo ya gago e tsebja ka maswiswing,

goba yona toka ya gago nageng ya ba ba lebetšwego?

₁₃Morena, nna ke llela wena,

ke go rapela e sa le gosasa.

₁₄Morena, na o ntahlelang?

O reng o mphuralela?

₁₅E sa le ke hlaka go tloga bjaneng ka ba ka nyaka le go hwa.

O ntlaišitše ka tše di šiišago,

ke fedile.

₁₆Ke imelwa ke kgalefo ya gago;

ka ditlhaselo tša gago tše di šiišago o a mpheleletša.

₁₇Di mpotapota boka meetse letšatši ka moka;

di mpokanela ka mathoko ohle.

₁₈O nkgaogantše le bagwera le bakgotse,

gomme bjale wa ka mokgotse ke leswiswi.

₁Morena, lerato la gago, kilaphetogo, ke tla le opela go ya go ile;

ke tla begela batho potego ya gago ka mehla.

₂Ke rile:

“Lerato la gago ke la go ya go ile;

o hlomile potego ya gago leratadimeng.”

₃Wena wa re:

“Ke dirile kgwerano le mokgethwa wa ka;

ke ikanne go Dafida, mohlanka wa ka, ka re:

₄‘Ke tla lotola bogoši bja gago ka mehla;

pušo yeno e tla dulela sa ruri.’ ” Sela

₅Magodimo a reta mehlolo ya gago, Morena,

le potego ya gago sebokeng sa barongwa.

₆Kgane ke mang kua magodimong yo a kago bapetšwa le Morena?

Ke mang gare ga dihlolwa tšeo tša legodimo yo a swanago le Morena,

₇Modimo, Mmoifegi gare ga barongwa,

senatla, Motšhabegi gare ga bohle ba ba mo potapotilego?

₈Morena, Modimo Ramaatlaohle,

ke mang mokawena?

O Ramaatla, Morena,

mme potego ya gago ke yona kobo ya gago.

₉O buša lewatle le le gaketšego;

o homotša maphoto a a fadilego.

₁₀O pšhatlagantše mmamogašwa Rahaba, wa o bolaya;

o šwalalantše manaba a gago

ka maatla a gago a magolo.

₁₁Legodimo le lefase ke tša gago;

ke wena Mothei wa tšona le tšohle tše di lego mo go lona.

₁₂O Mohlodi wa leboa le borwa;

thaba ya Taboro le ya Hermone di go gobela megobo.

₁₃O tiile e le ruri!

Ke wena Ramaatla!

₁₄Pušo ya gago e hlomilwe ka toka le molao;

lerato le potego di bonagala ditirong tšohle tša gago.

₁₅Go lehlogonolo setšhaba se se tsebago go go reta,

se se phelago se kgahla wena, Morena.

₁₆Se hlaladišwa ke wena letšatši lohle;

toka ya gago e se kgontšha go hlompšha.

₁₇Se a go reta ka ge o se tiiša;

ka botho bja gago o re kgontšha go fenya.

₁₈Mong wa kgoši ya rena ke Morena;

mong wa mošireletši yo wa rena ke Mokgethwa wa Israele.

₁₉O kile wa botša bahlanka ba gago ka pono ba ba botegago wa re:

“Ke thušitše mogaletsoko;

ke hlomphile yo ke mo kgethilego setšhabeng.

₂₀Ke hweditše Dafida, mohlanka wa ka,

ka mo tlotša ka makhura a ka a makgethwa.

₂₁Ke tla fela ke mo thekgile ka maatla a ka,

mme ona a tla mo tiiša.

₂₂Manaba a gagwe a ka se kgone go mo khukhunetša,

bakgopo ba ka se mo kgone.

₂₃Ke tla ripitla dira tša gagwe a lebeletše;

ke tla swielela ba ba mo hloilego.

₂₄Ke tla dula ke mo rata,

ke mmotegela;

ke tla mo kgontšha go fenya.

₂₅Ke tla mo okeletša mmušo wa tloga Lewatleng la Mediteraniene,

wa yo fihla nokeng ya Yufratese.

₂₆O tla re go nna:

‘O tate, o Modimo wa ka,

o sebo se ke tšhabelago go sona.’

₂₇Ke tla mo fa maemo a leitšibolo,

ka mo dira kgoši ya go feta magoši a lefase.

₂₈Ke tla dula ke mo rata,

ke botegela kgwerano ya ka le yena.

₂₉Ke tla lotola bogoši bja gagwe ka mehla;

ke tla dira gore pušo ya gagwe e swarelele e etše leratadima.

₃₀“Fela ge ditlogolo tša gagwe di ka nyatša melao ya ka,

tša se phele go ya ka mo ke ba laetšego,

₃₁ge ba ka tshela ditaelo tša ka,

ba se phethe melao ya ka,

₃₂gona ke tla ba otlela dikarogo tša bona gabohloko;

ke tla ba hlasela bokgopong bja bona ka dikotlo.

₃₃Fela Dafida yena nka se lese go mo rata,

goba ka lesa go mmotegela.

₃₄Nka se nyatše kgwerano ya ka le yena,

goba ka hlanamela tše ke mo tshephišitšego tšona.

₃₅“Ke ikanne ka nna mong ke lego yo mokgethwa,

gatee ya ba moka,

gomme Dafida nka se tsoge ke mo forile.

Ke ikanne ka re:

₃₆Bogoši bja gagwe ke bja go ya go ile,

setulo sa gagwe sa bogoši se tla no ba pele ga ka bjalo ka letšatši.

₃₇Bogoši bja gagwe bo tla dulela ruri boka ngwedi,

yona hlatse ye e tshephegago ya leratadimeng.” Sela

₃₈Fela bjale o galefetše motlotšwa wa gago,

wa mo nyatša wa mo lahla.

₃₉O furaletše kgwerano ya gago le mohlanka wa gago,

wa hlompholla kgare ya gagwe,

wa e lahlela fase.

₄₀O kgerešitše merako ya motse wa gagwe,

mme dibo tša gagwe wa di fetola mašope.

₄₁Bafeti bohle ba tsela ba a mo hlakola;

o fetogile dikwero go baagišani.

₄₂O kgontšhitše manaba a gagwe go mo fenya;

o ba thabišitše ka moka.

₄₃O mo dirile gore a fenywe;

wa se mo thuše ntweng.

₄₄Botšhepi bja gagwe o bo fedišitše,

wa lahlela setulo sa gagwe sa bogoši fase.

₄₅O mo tšofaditše e sešo ya ba nako,

wa mo apeša kgobogo. Sela

₄₆O tla iphihla go fihlela neng, Morena?

Go ya go ile?

O tla tuka bogale go fihlela neng?

₄₇O se lebale boripana bja bophelo bja ka.

Go bopa motho ga gago go holang?

₄₈Ke mang yo a kago phela a se hwe?

Ke mang yo a kago itlhakodiša naleng tša lehu?

₄₉Mong wa rena,

le kae lerato lela la gago la kgale,

lela wa go ikanela lona go Dafida ka ge o mmotegela?

₅₀O se lebale ka mo ke hlapaolwago ka gona,

nna, mohlanka wa gago,

ka mo ke rwelego mahlapa a ditšhaba,

₅₁ao manaba a gago a rumolago motlotšwa wa gago ka ona, Morena.

A mo rumola gohle mo a yago gona.

₅₂A go tumišwe Morena go ya go ile!

Amene! Amene!

₁Yo a lego ka lehwafeng la Ramadulagodimo,

a dulago a šireleditšwe ke Ramaatlaohle,

₂a ka re go yena:

“Ke wena setšhabelo sa ka le sebo sa ka;

o Modimo yo ke mmotilego.”

₃Gobane ke yena a go phefišago mereo ya barei le malwetši a mašoro.

₄O go šireletša ka diphego tša gagwe;

o bolokega ge o hlokometšwe ke yena.

O botegela go go šireletša le go go phemela.

₅O ka se boife dikotsi tša bošego,

goba go hlaselwa mosegare,

₆le ge e le mauba a a welago batho bošego,

goba malwetši a a bolayago mosegare.

₇Le ge ba sekete ba ka bolawa kgauswi le wena,

ba dikete tše lesome ka mathoko ohle a gago,

wena o ka se kgwathwe ke selo.

₈O tla no lebelela ka mahlo,

wa bona ka moo bakgopo ba otlwago ka gona,

₉ka gobane Morena ke setšhabelo sa gago,

Yogodimodimo o mo dirile sebo sa gago.

₁₀O ka se welwe ke kotsi, goba lapa la gago la welwa ke leuba.

₁₁Modimo o tla laela barongwa ba gagwe gore ba go hlokomele,

ba go šireletše gohle mo o yago gona.

₁₂Ba tla go kuka gore o se thetšwe ke maswika.

₁₃O tla gata ditau le dinoga,

wa gataka ditawana le dipeetla.

₁₄Modimo o re:

“Ke tla phološa yo a nthatago,

ka šireletša yo a ntlhomphago.

₁₅Ge a nthapela ke tla mo kwa;

ge a le mathateng ke tla ba le yena.

Ke tla mo hlakodiša, ka mo hlompha.

₁₆Ke tla mo kgotsofatša ka bophelo bjo botelele;

ke tla mo thabiša ka go mo phološa.”

₁Ke mo gobotse go go leboga, Morena,

le go go opelela ditumišo,

wena Ragodimodimo,

₂le go bega leratorato la gago e sa le gosasa,

le go anega potego ya gago bošego ka moka

₃ke letša harepa,

harepa ya metato ye lesome,

ke letša le sekgapa.

₄Gobane wena, Morena,

o nthakgaditše ka ditiro tša gago;

ke hlalalela tše o di dirilego.

₅Morena,

mediro ya gago ke ye megolo bjang!

Menagano ya gago ga se ka go iša.

₆Tšeo ke tše mašilo a sa di tsebego;

ditlaela ga di di kwešiše.

₇Le ge bakgopo ba hloga bjalo ka sekoro,

le badiradibe ka moka ba atlega,

sa bona ke go tlo fedišetšwa sa ruri.

₈Eupša wena, Morena,

o yo o phagamego go ya go ile.

Bona manaba a gago, Morena!

₉Ka kgonthe manaba a gago a a hwa;

badirakgopo bohle ba a phatlalatšwa.

₁₀Nnaena o mphile maatla a nkego a nare;

o nthakgaditše gape.

₁₁Manaba a ka ke a lebelela ka lenyatšo.

Badirakgopo ba go ntakana ke ba kwele.

₁₂Baloki bona ba tla atlega boka mepalema;

ba tla letla bjalo ka mesedere ya Lebanone.

₁₃Ba tsemilwe ka ntlong ya Morena,

ba tla atlega dikgorong tša Tempele ya Modimo wa rena.

₁₄Le ge e šetše e le diputswa,

ba tla no fela ba tiile,

ba le bjalo ka mehlare ye metala.

₁₅Seo e tla ba sešupo sa go loka ga Morena.

Ke yena sebo sa ka,

gomme mo go yena ga go bokgopo.