Pesalome 89

₁Morena, lerato la gago, kilaphetogo, ke tla le opela go ya go ile;

ke tla begela batho potego ya gago ka mehla.

₂Ke rile:

“Lerato la gago ke la go ya go ile;

o hlomile potego ya gago leratadimeng.”

₃Wena wa re:

“Ke dirile kgwerano le mokgethwa wa ka;

ke ikanne go Dafida, mohlanka wa ka, ka re:

₄‘Ke tla lotola bogoši bja gago ka mehla;

pušo yeno e tla dulela sa ruri.’ ” Sela

₅Magodimo a reta mehlolo ya gago, Morena,

le potego ya gago sebokeng sa barongwa.

₆Kgane ke mang kua magodimong yo a kago bapetšwa le Morena?

Ke mang gare ga dihlolwa tšeo tša legodimo yo a swanago le Morena,

₇Modimo, Mmoifegi gare ga barongwa,

senatla, Motšhabegi gare ga bohle ba ba mo potapotilego?

₈Morena, Modimo Ramaatlaohle,

ke mang mokawena?

O Ramaatla, Morena,

mme potego ya gago ke yona kobo ya gago.

₉O buša lewatle le le gaketšego;

o homotša maphoto a a fadilego.

₁₀O pšhatlagantše mmamogašwa Rahaba, wa o bolaya;

o šwalalantše manaba a gago

ka maatla a gago a magolo.

₁₁Legodimo le lefase ke tša gago;

ke wena Mothei wa tšona le tšohle tše di lego mo go lona.

₁₂O Mohlodi wa leboa le borwa;

thaba ya Taboro le ya Hermone di go gobela megobo.

₁₃O tiile e le ruri!

Ke wena Ramaatla!

₁₄Pušo ya gago e hlomilwe ka toka le molao;

lerato le potego di bonagala ditirong tšohle tša gago.

₁₅Go lehlogonolo setšhaba se se tsebago go go reta,

se se phelago se kgahla wena, Morena.

₁₆Se hlaladišwa ke wena letšatši lohle;

toka ya gago e se kgontšha go hlompšha.

₁₇Se a go reta ka ge o se tiiša;

ka botho bja gago o re kgontšha go fenya.

₁₈Mong wa kgoši ya rena ke Morena;

mong wa mošireletši yo wa rena ke Mokgethwa wa Israele.

₁₉O kile wa botša bahlanka ba gago ka pono ba ba botegago wa re:

“Ke thušitše mogaletsoko;

ke hlomphile yo ke mo kgethilego setšhabeng.

₂₀Ke hweditše Dafida, mohlanka wa ka,

ka mo tlotša ka makhura a ka a makgethwa.

₂₁Ke tla fela ke mo thekgile ka maatla a ka,

mme ona a tla mo tiiša.

₂₂Manaba a gagwe a ka se kgone go mo khukhunetša,

bakgopo ba ka se mo kgone.

₂₃Ke tla ripitla dira tša gagwe a lebeletše;

ke tla swielela ba ba mo hloilego.

₂₄Ke tla dula ke mo rata,

ke mmotegela;

ke tla mo kgontšha go fenya.

₂₅Ke tla mo okeletša mmušo wa tloga Lewatleng la Mediteraniene,

wa yo fihla nokeng ya Yufratese.

₂₆O tla re go nna:

‘O tate, o Modimo wa ka,

o sebo se ke tšhabelago go sona.’

₂₇Ke tla mo fa maemo a leitšibolo,

ka mo dira kgoši ya go feta magoši a lefase.

₂₈Ke tla dula ke mo rata,

ke botegela kgwerano ya ka le yena.

₂₉Ke tla lotola bogoši bja gagwe ka mehla;

ke tla dira gore pušo ya gagwe e swarelele e etše leratadima.

₃₀“Fela ge ditlogolo tša gagwe di ka nyatša melao ya ka,

tša se phele go ya ka mo ke ba laetšego,

₃₁ge ba ka tshela ditaelo tša ka,

ba se phethe melao ya ka,

₃₂gona ke tla ba otlela dikarogo tša bona gabohloko;

ke tla ba hlasela bokgopong bja bona ka dikotlo.

₃₃Fela Dafida yena nka se lese go mo rata,

goba ka lesa go mmotegela.

₃₄Nka se nyatše kgwerano ya ka le yena,

goba ka hlanamela tše ke mo tshephišitšego tšona.

₃₅“Ke ikanne ka nna mong ke lego yo mokgethwa,

gatee ya ba moka,

gomme Dafida nka se tsoge ke mo forile.

Ke ikanne ka re:

₃₆Bogoši bja gagwe ke bja go ya go ile,

setulo sa gagwe sa bogoši se tla no ba pele ga ka bjalo ka letšatši.

₃₇Bogoši bja gagwe bo tla dulela ruri boka ngwedi,

yona hlatse ye e tshephegago ya leratadimeng.” Sela

₃₈Fela bjale o galefetše motlotšwa wa gago,

wa mo nyatša wa mo lahla.

₃₉O furaletše kgwerano ya gago le mohlanka wa gago,

wa hlompholla kgare ya gagwe,

wa e lahlela fase.

₄₀O kgerešitše merako ya motse wa gagwe,

mme dibo tša gagwe wa di fetola mašope.

₄₁Bafeti bohle ba tsela ba a mo hlakola;

o fetogile dikwero go baagišani.

₄₂O kgontšhitše manaba a gagwe go mo fenya;

o ba thabišitše ka moka.

₄₃O mo dirile gore a fenywe;

wa se mo thuše ntweng.

₄₄Botšhepi bja gagwe o bo fedišitše,

wa lahlela setulo sa gagwe sa bogoši fase.

₄₅O mo tšofaditše e sešo ya ba nako,

wa mo apeša kgobogo. Sela

₄₆O tla iphihla go fihlela neng, Morena?

Go ya go ile?

O tla tuka bogale go fihlela neng?

₄₇O se lebale boripana bja bophelo bja ka.

Go bopa motho ga gago go holang?

₄₈Ke mang yo a kago phela a se hwe?

Ke mang yo a kago itlhakodiša naleng tša lehu?

₄₉Mong wa rena,

le kae lerato lela la gago la kgale,

lela wa go ikanela lona go Dafida ka ge o mmotegela?

₅₀O se lebale ka mo ke hlapaolwago ka gona,

nna, mohlanka wa gago,

ka mo ke rwelego mahlapa a ditšhaba,

₅₁ao manaba a gago a rumolago motlotšwa wa gago ka ona, Morena.

A mo rumola gohle mo a yago gona.

₅₂A go tumišwe Morena go ya go ile!

Amene! Amene!