Kopelo ya go tumiša Modimo
Ke pesalome. Ke kopelo ya tšatši la Sabatha.
1Ke mo gobotse go go leboga, Morena,
le go go opelela ditumišo,
wena Ragodimodimo,
2le go bega leratorato la gago e sa le gosasa,
le go anega potego ya gago bošego ka moka
3ke letša harepa,
harepa ya metato ye lesome,
ke letša le sekgapa.
4Gobane wena, Morena,
o nthakgaditše ka ditiro tša gago;
ke hlalalela tše o di dirilego.
5Morena,
mediro ya gago ke ye megolo bjang!
Menagano ya gago ga se ka go iša.
6Tšeo ke tše mašilo a sa di tsebego;
ditlaela ga di di kwešiše.
7Le ge bakgopo ba hloga bjalo ka sekoro,
le badiradibe ka moka ba atlega,
sa bona ke go tlo fedišetšwa sa ruri.
8Eupša wena, Morena,
o yo o phagamego go ya go ile.
Bona manaba a gago, Morena!
9Ka kgonthe manaba a gago a a hwa;
badirakgopo bohle ba a phatlalatšwa.
10Nnaena o mphile maatla a nkego a nare;
o nthakgaditše gape.
11Manaba a ka ke a lebelela ka lenyatšo.
Badirakgopo ba go ntakana ke ba kwele.
12Baloki bona ba tla atlega boka mepalema;
ba tla letla bjalo ka mesedere ya Lebanone.
13Ba tsemilwe ka ntlong ya Morena,
ba tla atlega dikgorong tša Tempele ya Modimo wa rena.
14Le ge e šetše e le diputswa,
ba tla no fela ba tiile,
ba le bjalo ka mehlare ye metala.
15Seo e tla ba sešupo sa go loka ga Morena.
Ke yena sebo sa ka,
gomme mo go yena ga go bokgopo.
