To The Word – Day 218

₁Ditšhaba di reng di tsoša marole?

Merafe e reng e dulela serepa sa lefeela?

₂Magoši a lefase a tsoša mpherefere;

babuši ba lakana Morena,

le motlotšwa wa gagwe ba a mo lakana.

₃Ba re: “A re itokolleng kgatelelong ya bona;

re kgaoleng dithapo tše ba re bofilego ka tšona,

re di lahleng.”

₄Mong wa bohle o ba sega a dutše setulong sa gagwe sa bogoši legodimong;

o a ba kwera.

₅Ya ba o bolela le bona a galefile;

o ba tšhoša a ba befeletšwe.

₆O re: “Ke nna ke hlomilego kgoši ya ka Sione,

thabeng ya ka ye kgethwa.”

₇Kgoši o re: “A ke le botše se se begilwego ke Morena.

O mpoditše a re: ‘O morwa wa ka;

lehono ke go tswetše.

₈Nkgopele, mme ke tla go fa ditšhaba;

lefase ka moka e tla ba la gago.

₉O tla ba robaganya ka patla ya tshipi;

o tla ba pšhatlaganya bjalo ka pitša.’ ”

₁₀Bjale ge, lena dikgoši,

lemogang seo.

Ithuteng, lena babuši ba lefase.

₁₁Direlang Morena le mmoifa;

₁₂mo khunameleng le thothomela,

gore a se tlo le galefela mme la hwa.

Go lehlogonolo ba ba tšhabelago go yena.

₁Morena ke kgoši,

o apere borena;

Morena o tšhepile,

maatla ke lepanta la gagwe.

O tsemile lefase madulong a lona,

gomme le ka se šikinyege.

₂Setulo sa gago sa bogoši se tsemilwe mathomong;

wena o bile gona go tloga le go tloga.

₃Phamphamawatle e a rora, Morena;

e hlaboša modumo e bopa.

₄Modumo wa meetsemagolo ke wo maatla;

wa maphoto a lewatle ke wo maatla le go fetiša;

eupša Morena wa legodimo yena ke yo maatla phetelela.

₅Wena melao ya gago e tiile,

ga e fetoge;

Morena,

ntlo ya gago e swanelwa ke bokgethwa go ya go ile.

₁Morena ke kgoši,

lefase a le gobele!

Dihlakahlaka a di thabe ka bontši bja tšona!

₂O apešitšwe ke marumaso.

Pušo ya gagwe e theilwe ka toka le molao.

₃O etilwe pele ke mollo wo o tšhumago manaba a a mo dikaneditšego.

₄Magadima a gagwe a bonegela lefase;

lefase la re go di bona la thothomela.

₅Dithaba di tologa boka motu pele ga Morena,

pele ga Morena wa lefase lohle.

₆Magodimo a bega go loka ga gagwe;

ditšhaba tšohle di bogela letago la gagwe.

₇Bakhunamelamedingwana bohle,

bao ba go ikgantšha ka dititikwane tša bona,

ba segwa ke batho.

Medimo ka moka e a mo khunamela.

₈Batho ba Sione ba re go di kwa ba thaba;

le metse ya Juda ya gobela dikahlolo tša gago, Morena.

₉Gobane wena, Morena,

o Kokamababuši lefaseng ka moka;

medimo yohle o e feta kgole.

₁₀Morena o rata bahloyabobe;

o lotola ba ba mmotegelago;

o ba hlakodiša dinaleng tša bakgopo.

₁₁Seedi ke sa go tlela baloki,

le lethabo ke la go tlela ba dipelo tše di lokilego.

₁₂Hee, lena baloki,

hlalalelang tše di dirilwego ke Morena!

Tumišang yena Mokgethwa!

₁Opelelang Morena kopelo ye mpsha,

gobane o dirile mehlolo.

O fentše ka maatla a gagwe,

maatla a gagwe a makgethwa.

₂Morena o tsebaditše go fenya ga gagwe;

go loka ga gagwe a go utollela ditšhaba.

₃O gopotše lerato la gagwe, kilaphetogo,

le go botegela tšhaba sa Israele ga gagwe.

Batho mo gohle ba bone go fenya ga Modimo wa rena.

₄Gobelang Morena megobo,

lena ba lefase lohle!

Hlalalang, le gobele le opela.

₅Opelelang Morena le letša dikgapa;

letšang dikopelo ka dikgapa

₆le ka diphala

le ka diphalafala.

Gobelang Morena, Kgoši ya rena,

megobo.

₇A lewatle le rore le tšohle tše di lego ka go lona,

le lefase le bohle ba ba dulago mo go lona.

₈Dinoka a di ope diatla,

le dithaba di gobele megobo mmogo

₉pele ga Morena,

gobane o tlilo ahlola lefase.

O tla ahlola lefase ka toka,

ditšhaba a di ahlola a sa kgetholle.

₁Morena ke kgoši,

ditšhaba di a thothomela;

o dutše ka godimo ga bakerubi;

lefase le a tekema.

₂Morena ke yo mogolo kua Sione,

o okametše ditšhaba tšohle.

₃A di go rete, wena senatla, Motšhabegi.

Ke wena Mokgethwa!

₄Maatla ke a gago, wena Kgoši, Moratatoka;

o dirile gore baahlodi ba ahlole ba sa kgetholle,

wa swara Baisraele ka toka le ka tshwanelo.

₅Godišang Morena Modimo wa rena,

le mo khunameleng ka go itahlela maotong a gagwe.

Ke yena Mokgethwa!

₆Moshe le Arone e be e le bangwe ba baprista ba gagwe,

Samuele e le yo mongwe wa barapedi ba gagwe.

Ge ba mo llela o be a ba theeletša.

₇O be a bolela nabo a le thololong ya leru;

ba phetha melao le ditaelo tše a ba filego tšona.

₈Morena, Modimo wa rena, o be o ba kwa;

go bona o be o le Modimo wa tshwarelo,

le ge o be o ba otlela dibe tša bona.

₉Godišang Morena Modimo wa rena;

le mo khunameleng thabeng ya gagwe ye kgethwa,

gobane Morena Modimo wa rena ke yo mokgethwa.

₁Morena o rile go kgoši, mong wa ka:

“Dula ka letsogong la ka la mmagoja

ke be ke tle ke go fenyetše manaba a gago.”

₂Morena o tla atiša pušo ya gago

a le Tempeleng ya gagwe a re:

“Buša manaba a gago.”

₃Mohla o rapa dira setšhaba sa gago se tla ithaopa.

Masogana a gago a tla tla go wena a itlhamile ka tša ntwa ye kgethwa,

a tsarogile phoka ya masa.

₄Morena o ikanne gomme a ka se hlaname;

o rile: “O moprista go ya go ile wa boprista bja go swana le bja Melkitsedeke.”

₅Morena o go thuša ntweng;

mohla a galefile o pšhatlaganya magoši.

₆O tla ahlola ditšhaba a ba a di otla,

gwa tlala ditopo;

o tla fediša babuši gohle lefaseng.

₇Kgoši e tla nwa ka nokaneng ya kgauswi ga tsela,

a re go lapologa a lwa mme a fenya.