2 BATHESALONIKA 3

₁Banabešo, ke fetša ka go re le re rapelele, gore molaetša wa Morena o phatlalale ka lebelo mme o amogelwe ka tlhompho, go no swana le moo go lena. ₂Le re rapelele le gore Modimo a re hlakodiše bathong ba babe le ba bakgopo, gobane ga se mang le mang yo e lego modumedi.

₃Ge e le Morena yena ke mmotegi, gomme o tla le tiiša a le emela go Rabobe. ₄Morena o dira gore re le bote gore le dire tše re le laelago tšona, ebile le tla no tšwela pele le go di dira.

₅Morena a le dire gore le kwešiše lerato la Modimo le kgotlelelo ye le e fiwago ke yena Kriste.

₆Banabešo, re le laya legatong la Morena wa rena, Jesu Kriste, gore le kgaogane le badumedi bohle ba dulago ka diatla le gona ba sa phelego ka dithuto tše re ba rutilego tšona. ₇Lena beng le tseba ka mo le swanetšego go re ekiša ka gona. Rena re be re sa dule ka diatla mola re le moo go lena. ₈Re be re sa phele ka mphiwafela. Sa rena e be e le go itapiša le go katana; re be re šoma bošego le mosegare gore re se tshwenye motho wa lena, ₉e se ka gobane re se na tokelo ya go babalelwa, eupša e le ka ge re nyaka gore le tle le re ekiše. ₁₀Le gona mola re le moo go lena re be re hlwa re le botša re re: “Maganagošoma le dijo a se di fiwe.”

₁₁Re realo ka ge re ekwa ba re ba bangwe ba lena ke metlapa ye e sa dirego selo ge e se go tsenatsena ditaba tša ba bangwe. ₁₂Ba mohuta woo re ba laya re ba kgothatša legatong la Morena Jesu Kriste gore ba se itšharakantšhetše bophelo, ba upše ba šomele tša go iphediša.

₁₃Ge e le lena, banabešo, le se ke la lapa go dira tše dibotse. ₁₄Ge go ka ba le yo a ganago go kwa ditaelo tše re le romelago tšona ka lengwalo le, le mmee leihlo, gomme le kgaogane naye gore a inyatše. ₁₅Fela le se mo tšee gore ke lenaba, le upše le mo kgale bjalo ka ngwanabolena.

₁₆Yena Morena wa khutšo a fele a le fa khutšo le ka mekgwa yohle. Morena a be le lena ka moka.

₁₇Ka seatla sa ka ke ngwala gore: Paulose o re le dumele. Ke ka mokgwa wo ke swayago mangwalo a ka ohle go bontšha gore ka nnete a tšwa go nna.

₁₈Morena wa rena, Jesu Kriste, a le gaugele bohle.