To The Word – Day 205

₁Nna, Paulose, le Silase le Timotheose, re dumediša lena ba phuthego ya Thesalonika le lego ba Modimo, Tatagorena, le Morena Jesu Kriste, re re:

Nke Modimo a le gaugele, a le fe khutšo.

₂Ka moka ga lena re le lebogela go Modimo ka mehla re le gopola re le thapelong. ₃Ge re le pele ga Modimo, Tatagorena, re gopola tše le di dirilego ge le dumela, ka mo lerato la lena le le dirilego gore le šome gaboima ka gona, le ka mo le phetšego le holofela go Morena wa rena, Jesu Kriste, ka gona. ₄Banabešo ba le ratwago ke Modimo, rena re tseba ge Modimo a le kgethile gore le be ba gagwe, ₅gobane Taba ye Botse ga se ra le tlišetša yona ka molomo fela, eupša re le tlišeditše yona le ka maatla a Moya wo Mokgethwa le ka tumelo ye e tletšego gore ke nnete. Le tseba ka mo re bego re phela ka gona go le hola mola re le moo go lena. ₆Le ithutile go phela bjalo ka rena le bjalo ka Morena; gomme le ge le ile la tlaišwa kudu, le amogetše molaetša ka thabo ya go tšwa go Moya wo Mokgethwa. ₇Ka gona la ba mohlala mo go badumedi bohle ba Matsedonia le ba Agaya. ₈Go tloga moo ga gabolena molaetša wa Morena o ile wa se tume Matsedonia le Agaya fela, eupša tumelo ya lena go Modimo e kwagetše gohle, mo e lego gore taba ye ga se ye re ka hlwago re sa bolela ka yona. ₉Bohle ba bolela ka mo le re amogetšego ka gona mola re le etetše, le ka mo le tlogetšego medingwana ya diswantšho la sokologela go Modimo, gore le tle le direle yena Modimo wa go phela wa mmakgonthe, ₁₀gomme le letele Morwagwe yo a tlago tla a etšwa legodimong – yena Jesu yo a mo tsošitšego bahung, yo a tlago re hlakodiša ge Modimo a tlilo ahlola batho a ba galefetše ka lebaka la dibe tša bona.

₁Lena ka noši le a tseba, banabešo, gore go le etela ga rena ga se ya ba ga lefeela. ₂Le tseba ka mo re bego re šetše re ile ra tlaišwa ra ba ra rogwa ka gona kua Filipi pele ga ge re etla go lena moo Thesalonika. Gomme le ge batho ba bantši ba be ba re gana, Modimo wa rena o ile a re kgontšha go le botša Taba ye Botse ya go tšwa go yena re sa boife. ₃Go le kgothatša ga rena ga se ga go tšwa boforeng, goba maikemišetšong a go se loke, goba bomenemeneng, ₄eupša re bega molaetša wa Modimo ka mo a ratago, gobane o bone go re swanetše gore a re neele wona gore re o bege. Ga re leke go kgahla batho, re leka go kgahla Modimo yo a lekolago maikemišetšo a rena. ₅Bjalo ka ge le tseba, ga se ra ka ra tla go lena ra le gegea goba ra bolela dipolelo tša go agela megabaru ya rena legora; Modimo ke hlatse ya rena. ₆Le gona tša go gaba go retwa ke batho, ana ke lena, ana ke ba bangwe, ga re di šale morago, ₇le ge, ka ge re le baapostola ba Kriste, re be re ka no le gapeletša. Fela ge re be re na le lena re be re le boleta, re le bjalo ka mosadi ge a hlokomela bana ba gagwe. ₈Ka ge re le rata gakaaka, re be re ikemišeditše go le fa e sego Ebangedi ya Modimo fela, eupša le tšona dipelo tša rena, gobane re le rata e le ruri. ₉Banabešo, ga ke re le a gopola ka mo re bego re katana ka gona re itapiša? Re be re šoma bošego le mosegare gore re se le tshwenye ka selo ge re le begela Taba ye Botse ya Modimo.

₁₀Lena le dihlatse, le Modimo ke hlatse, gore lena, badumedi, re be re le swere ka mokgwa wo o kgahlago Modimo, wo o lokilego, wo o se nago bosodi. ₁₁Le a tseba gore re be re swere yo mongwe le yo mongwe wa lena ka mokgwa wo monna a swarago bana ba gagwe. ₁₂Re be re le kgothatša, re le bea pelo, re le tutuetša gore le phele bophelo bjo bo kgahlago Modimo, yo a le biletšago mmušong wa gagwe le letagong la gagwe.

₁₃Le lengwe lebaka le le dirago gore re leboge Modimo re sa kgaotše ke gore e rile mola re le tlišetša molaetša wa Modimo, la re go o kwa la o amogela e le wa Modimo, e sego wa batho. Ruri o tšwa go Modimo, gomme Modimo o šoma mo gare ga lena le dumelago. ₁₄Banabešo, gape tše di le hlagetšego ke tšona tše di ilego tša hlagela diphuthego tša Modimo kua Judea, tše di ilego tša hlagela batho ba gona ba e lego ba Kriste Jesu. Le tlaišitšwe ke batho ba gabolena ka mokgwa wo le bona ba tlaišitšwego ke Bajuda. ₁₅Bajuda ke bona ba ba bolailego Morena Jesu le baprofeta, gomme le rena ba re hlomara. Ga ba kgahle Modimo; ba lwa le batho ka moka. ₁₆Ba leka le go re ganetša ge re begela baditšhaba molaetša wa gore ba phološwe. Se ke sona sebe sa mafelelo sa dibe ka moka tše ba duletšego go di dira. Gomme bjale Modimo o feleleditše a ba ahlola a ba galefetše.

₁₇Ge e le rena, banabešo, e sa le mola re kgaoganago le lena lebakanyana, re sa bonane le lena ka mahlo, re bonana ka pelo fela, re le hlolosetše kudu, gomme re lekile ka maatla go tla go le bona. ₁₈Re be re ratile go tla gape go lena. Nna, Paulose, ke lekile makgathenyana, fela Sathane a re šitiša. ₁₉Gobane ke mang yo a re fago lehutšo le thabo, yo a re kgontšhago go kgantšha go fenya ga rena mo pele ga Morena wa rena, Jesu Kriste, mohla a etla, ge e se lena? ₂₀Ruri, ke lena setumo sa rena le thabo ya rena.

₁Bjale e rile ge re se sa kgona go kgotlelela, ra ikgethela go šala re le noši motseng wa Athene. ₂Ra roma ngwanaborena, Timotheose, yo a šomago mmogo le rena ge re šomela Modimo go bega Ebangedi ya Kriste, gore a tle a le tiiše, a le kgothatše go tša tumelo, ₃gore go tle go se be le yo a ka ferehlwago ke mathata a. Lena ka bolena le a tseba gore mathata a ke se se re lebanego. ₄Gobane e rile mola re sa na le lena ra le lemoša e sa le pele gore re tlilo ba le mathata. Gomme bjalo ka ge le tseba, seo ke sona se se diregilego. ₅Ke ka lebaka leo ke ilego ka roma Timotheose. Ke be ke se sa kgona; ka gona ke be ke mo romile gore a tle a lekodišiše tša tumelo ya lena, gore e se be mohlomongwe Moleki a ka no ba a le lekile, gomme modiro wa rena wa be o fetogile lefeela.

₆Bjale Timotheose o sa tšo boa moo go lena, gomme o re tletše le ditaba tše dibotse tša tumelo ya lena le lerato la lena. O re boditše gore ka mehla le dula le re gopola gabotse, le gore le re hlolosetše kudu bjalo ka rena ge re le hlolosetše. ₇Ka gona, banabešo, mo matshwenyegong le mathateng a rena re wišwa pelo ke tumelo ya lena. ₈Ka ge le tiišeditše go ba ba Morena, bjale re imologile. ₉Na bjale Modimo wa rena re ka mo leboga bjang ka mo go swanelago ka lebaka la thabo ye re le thabetšego ka yona pele ga gagwe? ₁₀Bošego le mosegare re rapela ka pelo ka moka gore a re dumelele go tlo le bona le go tlaleletša ka tše le sa hlaelelwago ka tšona mo tumelong ya lena.

₁₁Nke Modimo, Tatagorena, ka boyena le Morena wa rena, Jesu, ba re lokišetše ditsela gore re tle re le etele. ₁₂Nke Morena a ka le okeletša lerato ya ba le legologolo, gore le ratane, le be le rate le batho ka moka bjalo ka ge le rena re le rata. ₁₃E tla be e le gona ge a le tiiša, gomme mohla Morena wa rena, Jesu, a etla le bakgethwa ba gagwe bohle, la ba ba ba se nago bosodi ba bakgethwa mo go Modimo, Tatagorena.

₁Banabešo, ke fetša ka go re re le rutile ka mo le swanetšego go phela ka gona le kgahla Modimo. Ke ka mo le bego le ntše le phela ka gona. Gomme bjale re le kgopela re le tutuetša legatong la Morena Jesu gore le iteke le go feta. ₂Gobane ditaelo tše re le filego tšona di etšwa go Morena Jesu le a di tseba. ₃Se Modimo a se ratago ke gore le be ba bakgethwa, le ile bohlola. ₄Yo mongwe le yo mongwe wa lena a tsebe go nyala mosadi wa gagwe ka mokgwa wo mokgethwa wo o hlomphegago, ₅e sego go laolwa ke phišego ye mpe basading, go swana le baditšhaba ba ba sa tsebego Modimo. ₆Mo tabeng ye go se be le yo a fošetšago modumedikayena, le ge e le go mo hlalefetša, gobane bjalo ka ge re ile ra le botša pele re tiišitše, Morena ke mootli wa bohle ba ba dirago tše dibjalo. ₇Modimo ga se a re biletša go phela ka bohlola, o re bileditše go phela re le ba bakgethwa. ₈Ka gona, yo a nyatšago taelo ye ga a nyatše motho, o nyatša Modimo yo a le fago Moya wa gagwe wo Mokgethwa.

₉Ge e le mabapi le go rata modumedikawena, ga se taba ye nka hlwago ke le ngwalela yona, gobane lena ka noši le laetšwe ke Modimo gore le ratane. ₁₀Gomme gabotse le phedišana le badumedikalena bohle ba Matsedonia yohle ka yona tsela yeo. Gomme, banabešo, re le tutuetša gore le iteke le go feta. ₁₁Sa lena e be go rata go phela ka khutšo, go se tsenatsene tša bangwe, le go itirela ka tša lena diatla, bjalo ka ge re ile ra le laya. ₁₂Ka tsela yeo le tla itlhomphiša ba e sego badumedi, le gona le ka se ikanye motho gore a le fe tše le di hlokago.

₁₃Banabešo, re rata ge le tseba gabotse tša ba ba ithobaletšego, gore le tle le se ke la hlokofala, la etša ba ba se nago kholofelo. ₁₄Rena, ka ge re dumela gore Jesu o ile a hwa a ba a tsoga, re dumela gore le ba ba ithobaletšego ba dumela go yena, Modimo o tla ba iša go Jesu.

₁₅Se ke tlilogo le botša sona ke molaetša wa Morena: Rena ba re tlago ba re sa phela ge Morena a etla, re ka se thake pele ba ba ithobaletšego. ₁₆Morena ka sebele o tla theoga legodimong ge go hlabja mokgoši le mokgolokwane wa morongwa yo mogolo, ge go letšwa phala ya Modimo. Bao ba hwilego ba dumela go Kriste ba tla tsoga pele, ₁₇gwa tlo latela rena re tla bego re sa phela, ra rotošwa le bona ka maru go yo gahlanetša Morena lefaufaung. Ke ka mo re tlago dula re na le Morena. ₁₈Ka fao, beanang pelo ka mantšu a.

₁Banabešo, ge e le dinako le mabaka a go tla ga Morena, ga se taba ye nka hlwago ke le ngwalela ka yona. ₂Gobane lena beng le tseba gabotse gore Letšatši leo la Morena le tla tla bjalo ka lehodu ge le etla bošego. ₃Ge batho ba sa re: “Go iketlilwe, ke šebešebe,” ke mohla tahlego e tlago ba wela ka bjako go etša lešoko ge le swara moimana, gomme ga go yo a tlago phonyokga. ₄Ge e le lena, banabešo, ga le mo leswiswing, gomme le ka se khukhunetšwe ke Letšatši leo bjalo ka lehodu. ₅Ka moka ga lena le batho ba seetša, ba e lego ba mosegare. Ga re ba bošego goba ba leswiswi. ₆Ka gona, a re se robaleng go etša bao ba bangwe; a re phafogeng, re ntšheng mahlo dinameng. ₇Gobane ba ba robalago ba robala bošego, ba ba tagwago ba tagwa bošego. ₈Eupša rena ba re lego ba mosegare a re ntšheng mahlo dinameng, re apareng tumelo le lerato, e be tšona difahlelakgara tša rena, mme kholofelo ya go phološwa e be mongatse wa rena wa tshipi. ₉Modimo ga se a re bopela go tlo re ahlola a re galefetše, o re bopetše go tlo re phološa ka Morena wa rena, Jesu Kriste, ₁₀yo a re hwetšego gore, le ge re phela le ge re hwile, re tle re phele naye. ₁₁Bjale ge, dulang le kgothatšana le tiišana ka mokgwa wo le felago le dira ka wona.

₁₂Re a le kgopela, banabešo, gore le hlomphe bao ba katanago gare ga lena, ba ba le etilego pele gape ba le eletšago ka tša Sekriste. ₁₃Le ba hlomphe e le ruri le gona le ba rate ka lebaka la modiro wa bona. Le phedišane le sa kgopišane.

₁₄Re a le rapela, banabešo, le kgale dibodu, le kgothatše bomahlomašia, le thuše bafokodi, le se felele motho pelo. ₁₅Le bone gore go se be le yo a lefetšago bobe ka bobe, ka mehla sa lena e be go dirana botse le go dira bohle botse.

₁₆Le dule le thabile; ₁₇le se kgaotše go rapela; ₁₈dilong ka moka sa lena e be go leboga, gobane tšeo ke tšona tše Modimo a di nyakago mo go lena ge le le ba Kriste Jesu.

₁₉Le se ke la šitiša Moya wo Mokgethwa medirong ya wona, ₂₀le gona le se nyatše diprofeto. ₂₁Le lekole tšeo ka moka, le itshwarelele ka tše di lokilego, ₂₂gomme le ile bobe bofe le bofe.

₂₃Yena Modimo wa khutšo a le kgethwafatše ka botlalo mme a le lote moya, pelo le mmele ka mokgwa wo o phethegilego, a le šireletše le se be le bosodi mohla Morena wa rena, Jesu Kriste, a etla. ₂₄Yo a le bitšago o a botega, ka gona o tla di kgona.

₂₅Banabešo, le rena le re rapeleleng.

₂₆Le dumediše badumedi bohle ka go ba atla, gona go bontšhago go ratana ga badumedi.

₂₇Ke le laela ka Morena gore le balele badumedi bohle lengwalo leo.

₂₈Morena wa rena, Jesu Kriste, a le gaugele.

₁A ke maele ao Lemuele, kgoši ya Masa, a lailwego ke mmagwe ka ona: