To The Word – Day 20

_1-3“A lefele se a se utswitšego. Ge a se ne selo, a rekišwe e be lekgoba go lefa se a se utswitšego. Ge seruiwa se se utswitšwego – e ka ba kgomo goba pokolo goba nku – se ka hwetšwa diatleng tša gagwe se sa phela, a lefe se tee ka tše pedi.

“Ge lehodu le ka hwetšwa le thuba ntlo bošego mme la bolawa, yo a le bolailego ga a ne molato wa polao. Fela ge e le mosegare o na le molato wa polao.

₄“Ge motho a ka re a fudiša diruiwa mo tšhemong goba serapeng sa merara a di lesa tša ja tšhemong ya yo mongwe, mong wa tšona a lefe tshenyegelo ya yo mongwe yoo ka tše kaonekaone tša tšhemong ya gagwe goba tša ka serapeng sa gagwe sa merara.

₅“Ge motho a ka re a goditše mollo tšhemong ya gagwe, mollo wa tšhuma hlaga wa tshelela tšhemong ya yo mongwe gomme wa tšhuma mabele lehlakeng, goba ao a kgobetšwego, goba wa tšhuma tšhemo, yoo a goditšego mollo a lefele tshenyegelo ka moka.

₆“Ge motho a ka re a neetše yo mongwe tšhelete goba dilo tše dingwe tša mohola gore a mo lotele tšona, tša utswiwa ngwakong wa gagwe gomme lehodu la swarwa, a le lefe selo se tee ka tše pedi. ₇Eupša ge lehodu le sa swarwe, motho yoo a bego a lotile tšeo tša mohola a tlišwe felo ga tirelo, mme fao a ene gore ga se a utswa dilo tšeo tša yo mongwe.

₈“Ge batho ba bakišana dilo, e ka ba kgomo, goba pokolo, goba nku, goba seaparo, goba se sengwe se se timetšego, a babakišani ba tlišwe felo ga tirelo. Yo Modimo a mo hwetšago molato a lefe yo mongwe yola gabedi.

₉“Ge motho a ka re a fišitše yo mongwe pokolo, goba kgomo, goba nku, goba seruiwa se sengwe, seruiwa seo sa hwa, goba sa gobala, goba sa thopša ke manaba, mme gwa hlokega hlatse, ₁₀mofišetšwa a ye felo ga tirelo gomme a ene gore ga se a utswa seruiwa sa yo mongwe yoo. Ge seruiwa se se sa utswiwa, mong wa sona a dumele mofišetšwa gomme mofišetšwa a se ke a lefa selo; ₁₁eupša ge seruiwa se utswitšwe diatleng tša mofišetšwa, mofišetšwa a lefe mong. ₁₂Ge seruiwa se bolailwe ke dibata, motho a tliše mašaledi gore e be bohlatse; a se ke a lefa se se bolailwego ke dibata.

₁₃“Ge motho a adimile seruiwa go yo mongwe, gomme seruiwa sa gobala goba sa hwa mong wa sona a se gona, motho yoo a se lefe. ₁₄Fela ge seo se ka direga mong wa seruiwa a le gona, moadingwa a se ke a lefa. Ge seruiwa se adimilwe ka tšhelete, tahlegelo e lefše ka tefo ya kadimo.”

₁₅“Ge monna a ka pateletša kgarebe ye e sego ya beeletšwa a e robala, a ntšhe magadi a nyale kgarebe yeo. ₁₆Fela ge tatagokgarebe a ka tloge a mo ganetša go mo nyala, gona monna yoo a lefe tatagokgarebe tšhelete ye e lekanego magadi a kgarebe.

₁₇“Mosadi yo a loyago a bolawe.

₁₈“Monna yo a robalago phoofolo, a bolawe tho.

₁₉“Motho yo a direlago modimo wo mongwe dihlabelo ka ntle ga ka, le yena a bolawe tho.

₂₀“O se ke wa tlaiša goba wa gatelela mofaladi; gopola gore le lena le be le le bafaladi Egepeta. ₂₁Le se ke la tlaiša bahlologadi goba ditšhuana. ₂₂Ge le ka ba tlaiša, nna, Morena, ruri ke tla ba araba ge ba ntelela ba nyaka thušo, ₂₃ke tla tuka bogale ka le bolaya ntweng. Gomme basadi ba lena ba tla fetoga bahlologadi, le bana ba lena ya ba ditšhuana.

₂₄“Ge o ka adima modiidi tšhelete setšhabeng sa ka, o se ke wa etša baadimiši ba ditšhelete, wa re e boe e tsweše. ₂₅Ge o ka tšeela yo mongwe kobo e le setlemo sa gore a go lefe, o mmušetše yona pele ga ge letšatši le sobela, ₂₆gore a se ke a bolawa ke phefo, gobane ke sona seaparo sa gagwe se nnoši. Kgane wena o re a robale ka eng? Ge a ntelela ke tla mo thuša, gobane nna ke yo botho.

₂₇“O se ke wa nyatša Modimo, le gona o se ke wa rogaka moetapele wa setšhaba sa geno.

₂₈“O mphe ka pelo ka moka kabelo ye e tšwago mabeleng a gago, le beineng ya gago, le makhureng a gago a mohlware ka mabaka a gona.

“O nkabele morwa wa gago wa leitšibolo. ₂₉O nkabele maitšibolo a dikgomo tša gago le a dihuswane tša gago. Leitšibolo la pholwana le hlwe le mmagolona matšatši a a šupago, gomme ka letšatši la seswai o nkabele lona.

₃₀“Ke lena batho ba ka ba bakgethwa, ka gona le se ke la ja nama ya seruiwa se se bolailwego ke dibata; nama ye bjalo le e fe dimpša.

₁“O se ke wa phatlalatša mabarebare a maaka. O se thuše motho yo a rwelego molato ka bohlatse bja maaka. ₂O se ke wa ya le mogofe ge o dira phošo goba ge o hlatsela ka maaka go kgopamiša toka. ₃O se ke wa emelela modiitšana tshekong e le ka ge e le modiitšana.

₄“Ge o ka bona kgomo goba pokolo ya lenaba la gago e timela, o e bušetše go mong wa yona. ₅Ge pokolo ya yo a go hloilego e pharame ka morwalo, o thušane le mong wa yona go e tsoša; o se ke wa no feta.

₆“O se ke wa pateletša mohloki tshekong. ₇O se rweše motho molato ka maaka. O se bolaye motho yo a se nago molato, gobane ge o ka mmolaya, ke tla go bona molato. ₈O se ke wa amogela tsogolekobong, gobane tsogelekobong le foufatša motho yo a bonago therešo gabotse, mme a senyeletša ba ba se nago molato.

₉“O se ke wa tlaiša mofaladi; lena ka noši le a tseba gore go bjang go ba mofaladi, gobane le be le le bafaladi Egepeta.”

₁₀“Mengwageng ye e selelago o leme tšhemo ya gago gomme o kgobele tše o di bunnego. ₁₁Eupša ka ngwaga wa bošupa o e ladiše, o se bune selo se se hlogago go yona. Badiitšana ba bune se se melago moo, le diphoofolo tša naga di fule ka boithatelo. Le dirapeng tša gago tša merara le mehlareng ya gago ya mehlware o dire bjalo.

₁₂“O šome ka matšatši a a selelago, eupša ka la bošupa o se šome, gore makgoba le bafaladi ba ba go šomelago, le tšona diruiwa tša gago, ba khutše.

₁₃“Le ele hloko tšohle tše nna, Morena, ke le boditšego tšona. Le se ke la rapela medimo ye mengwe; le ona maina a yona le se ke la a bolela.”

₁₄“O ntirele menyanya ye meraro mo ngwageng. ₁₅Mo kgweding ya Abibi, kgwedi ye o tšwilego ka yona Egepeta, o dire Monyanya wa Dinkgwa tše di se nago komelo, ka moo ke go laetšego ka gona. Mo matšatšing a a šupago a monyanya wo o se je dinkgwa tše di hlabegilwego. O se ke wa tla go nkhunamela o se wa ntshwarela kabelo.

₁₆“O bine Monyanya wa Puno nakong ya ge o thoma go buna.

“O bine Monyanya wa Kgobelo lehlabula ge o kgobela dienywa tša gago mašemong. ₁₇Ngwaga ka ngwaga, menyanyeng ye meraro ye, banna ba geno bohle ba tle go ntirela, nna, Morena Modimo.

₁₈“Ge o ntirela sehlabelo o se se tliše gotee le senkgwa se se nago le komelo. Makhura a diruiwa tše di hlabilwego menyanyeng ye a se ke a latšwa go fihlela ka la ka moswane.

₁₉“Dithakangwaga tše kaonekaone tša ka mašemong a gago o di tliše ntlong ya Morena Modimo wa gago.

“O se ke wa apea kwanyana goba putšanyana ka maswi a mmayo.”

₂₀“Bona, ke tla go romela morongwa a go eta pele go go šireletša tseleng le go go goroša felo fa ke go lokišitšego. ₂₁O mo ele hloko, o mo theeletše. O se mo nyatše; o romilwe ke nna, gomme a ka se kgotlelele lenyatšo. ₂₂Fela ge o ka tloga o mo theeletša, wa dira tšohle tše ke go laelago tšona, ke tla go lwela manabeng a gago ka moka. ₂₃Morongwa wa ka o tla go eta pele, a go goroša nageng ya Baamore le Bahete le Baperise le Bakanana le Bahibe le Bajebuse, gomme ke tla ba thubaganya. ₂₄O se ke wa obamela medimo ya bona, goba wa e khunamela, goba wa latela ditlwaedi tša bona. Medimo ya bona o e pšhatlaganye, o pšhatlaganye le dikokwane tša bona tša borapedi tša maswika. ₂₅Ge le nkhunamela, nna, Morena Modimo wa lena, ke tla le šegofatša ka dijo le meetse, gomme ka tloša malwetši ka moka gare ga lena. ₂₆Mo nageng ya gabolena go ka se be le mosadi yo a senyegelwago ke mpa, goba wa moopa. Ke tla le phediša galelele.

₂₇“Ke tla dira gore batho ba ba le lwantšhago ba tšhoge nna; ke tla dira gore batho ba le lwago nabo ba gakanege, ka ba ka dira gore manaba a lena a hlanole direthe. ₂₈Ke tla tšhoša manaba a lena; ke tla leleka Bahibe le Bakanana le Bahete ge le goroga. ₂₉Nka se ba leleke ka ngwaga o tee gore naga e se tlo fetoga lešoka, gomme diphoofolo tša naga tša le bekiša. ₃₀Ke tla ba leleka gannyane gannyane, go fihlela le atafetše, naga e eba ya lena. ₃₁Ke tla dira gore mellwane ya naga ya lena e thome kgogometšaneng ya Akaba e fihle nokeng ya Yufratese, e tloge Lewatleng la Mediteraniene e sobelele lešokeng. Ke tla le fa maatla gore le fenye badudi ba naga yeo, gomme le tla ba leleka ge le goroga. ₃₂Le se ke la dira kgwerano le bona goba le medimo ya bona. ₃₃Le se ke la ba dumelela go dula nageng ya lena. Ge le ka ba dumelela, ba tla le diriša sebe pele ga ka. Mohla le khunamelago medimo ya bona, le tsebe gore le wetše molabeng.”

₁Morena o rile go Moshe: “Rotogela go nna thabeng o na le Arone le Nadaba le Abihu le bagolo ba Baisraele ba masome a a šupago, gomme le obame le le kgojana. ₂Wena o le noši o mpatamele, ba bangwe bona ba se mpatamele. Setšhaba sona se se ke sa namela thaba.”

₃Moshe o ile a tloga a botša setšhaba ditaelo ka moka tša Morena, gomme setšhaba sa fetola setee sa re: “Re tla dira tšohle tše Morena a di boletšego.” ₄Moshe a ngwala ditaelo tšohle tša Morena. Ka le le latelago a tsogela go aga aletare tlase ga thaba, a ba a tsema mabje a lesome le a mabedi, le lengwe le le lengwe la emela kgoro ya Israele. ₅A roma masogana ba ya ba direla Morena dihlabelo tša go tšhungwa ka moka, mme ka dipoo ba dira dihlabelo tša kagišano. ₆Moshe a arola madi a diruiwa a a tšhela ka meruswing; a tšea madi a a šetšego a foka aletare ka ona. ₇A tšea puku ya kgwerano, ye e bego e ngwadilwe ditaelo tša Morena, a e balela setšhaba ka go hlaboša. Ba bolela ba re: “Re tla theeletša Morena, ra dira tšohle tše a re laetšego tšona.”

₈Moshe a napa a tšea madi ale a ka meruswing a foka setšhaba ka ona a re: “A ke madi a go tiišetša kgwerano ye Morena a e dirilego le lena ge a le fa ditaelo tše ka moka.”

₉Moshe le Arone le Nadaba le Abihu le bagolo ba Israele ba masome a a šupago ba namelela thabeng, ₁₀mme ba bona Modimo wa Baisraele. Ka fase ga nao tša gagwe go be go ikadile se ekego lebato la magakabje a safire, a botala bja legodimo. ₁₁Modimo o ile a se ke a dira baetapele ba ba Baisraele selo; ba bone Modimo, gomme ba ja, ba nwa.

₁₂Morena a re go Moshe: “Namelela thabeng o tle go nna, mme ge o na le nna mo ke tla go neela matlapa ao godimo ga ona go ngwadilwego melao le ditaelo tše ke di ngwaletšego go ruta setšhaba.” ₁₃Moshe le mothuši wa gagwe, Joshua, ba itokiša, mme Moshe a thoma go namelela thabeng ye kgethwa. ₁₄Moshe a re go bagolo ba setšhaba: “Re leteleng mo mešašeng go fihlela re boa. Arone le Hure ba na le lena mo; motho yo a nago le taba ye a ratago e rerwa a ka ya go bona.”

₁₅Moshe a namelela thabeng ya Sinai, gomme leru la pipetša thaba. _16-17Seetša se se fahlago sa letago la Morena sa theogela thabeng; go Baisraele seetša seo e be eke ke mollo wo o laumago godimo ga thaba. Leru la pipetša thaba matšatši a a selelago, gomme ka letšatši la bošupa Morena, a le gare ga leru, a bitša Moshe. ₁₈Moshe a namelela thabeng a tsena lerung. A ba fao thabeng matšatši a masome a mane le mašego a ona.

₁Morena a re go Moshe: ₂“Botša Baisraele ba ntlišetše dikabelo. Le amogele dikabelo tšeo go motho yo mongwe le yo mongwe yo a ratago go ntlišetša tšona. ₃Šedi dikabelo tše le swanetšego go di tliša: gauta le silibera le mphiri; ₄mašela a boletiana; wulu ya botala bja legodimo le ya bohubedu bja moretele le ya bohubedu bja madi; lešela le le dirilwego ka boya bja dipudi; ₅matlalo a dikgapa a a tloditšwego ka letsoku; mekgopana e boletiana; dikota tša mogohlo; ₆makhura a go tukiša mabone; dinoko tša makhura a tlotšo le tša seorelo sa go nkga bose; ₇dikarneliene le magakabje a mangwe a go rokelelwa seaparong se sekgethwa sa Moprista yo Mogolo le phaphathianeng ya sehubeng sa gagwe. ₈A setšhaba se ntirele tente ye kgethwa, gore ke tle ke dule gare ga bona. ₉O dire tente le ditlabakelo tšohle tša yona go ya ka leano le ke tlago go laetša lona.”

₁₀“Botša batho ba betle polokelo ka dikota tša mogohlo, e be ya disentimetara tše 115 botelele, le bophara bja disentimetara tše 69, le bogodimo bja disentimetara tše 69. ₁₁Polokelo o e manege ka ntle le ka gare ka gauta ye e sego ya tswakwa, mme o e direle morumo wa gauta go e dikologa. ₁₂O dire mekgoko ye mene ya gauta, mme o e kgokelele maotwaneng a yona ka mane, mekgoko ye mebedi lehlakoreng le lengwe le lengwe. ₁₃O betle mapara a go rwala ka dikota tša mogohlo, mme le ona o a manege ka gauta, ₁₄o a tsenye mekgokong ya ka mahlakoreng a polokelo. ₁₅Mapara a dule a le mekgokong a se ke a ntšhwa. ₁₆Ke moka o lokele matlapa ka polokelong a ke tlago go fa ona, ao go ona go ngwadilwego melao.

₁₇“O dire sekhurumelo ka gauta ye e sego ya tswakwa, sa disentimetara tše 115 botelele le disentimetara tše 69 bophara. ₁₈O bope bakerubi ba babedi ka gauta ye e rutšwego. ₁₉Mokerubi o tee o mmee ka mafelelong a mangwe a sekhurumelo, yo mongwe o mmee ka mafelelong a mangwe a sona. O dire gore ba kgomagane le sekhurumelo. ₂₀Bakerubi bao ba lebane ka difahlego go putla sekhurumelo, gomme diphego tša bona di phurologele godimo di pipetše sekhurumelo. ₂₁O lokele matlapa ao ka polokelong, gomme o e khurumele ka sekhurumelo. ₂₂Nna ke tla go gahlanetša moo polokelong ka go fa melao ya ka ka moka ye e amago Baisraele ke le godimo ga sekhurumelo, kgathe ga bakerubi bao ba babedi.”

₂₃“O betle tafola ka dikota tša mogohlo, e be ya botelele bja disentimetara tše 92, le bophara bja disentimetara tše 46, le bogodimo bja disentimetara tše 69. ₂₄O e manege ka gauta ye e sego ya tswakwa, gomme o e direle morumo wa gauta go e dikologa. ₂₅O dire lepanta la bophaphathi bja dimilimetara tše 75 go e dikologa, gomme o bee morumo wa gauta go dikologa lepanta leo. ₂₆O e direle mekgoko ye mene ya gauta ya go e rwala, o e kgokelele dikhutlong ka dine maotwaneng. ₂₇Mekgoko ya go swara mapara a go rwala tafola e kgokelelwe kgauswi le lepanta. ₂₈O betle mapara a ka dikota tša mogohlo, gomme o a manege ka gauta. ₂₉O dire meruswi, megopo, diphafana, le digo tša go tšhela dikabelo tša dino. Dibjana tše ka moka di dirwe ka gauta ye e sego ya tswakwa. ₃₀Tafola e bewe pele ga Polokelo ya Kgwerano, gomme godimo ga tafola ka mehla go be le dinkgwa tše kgethwa tšeo di abetšwego nna.”

₃₁“O dire sehlomamabone ka gauta ye e sego ya tswakwa. O dire bogato bja sona le thito ya sona ka gauta ye e rutšwego; matšoba a go se kgabiša gotee le matšoba a a sego a khukhuša le matlakala a ona e be selo se tee le bogato le thito. ₃₂Makabe a a selelago a tšwe ka mathoko a thito, a mararo ka thoko e tee. ₃₃Lekabe le lengwe le le lengwe la ona ao a selelago le be le matšoba a mararo a go le kgabiša a sebopego sa letšoba la moalmone, le matšoba a a sego a khukhuša, le matlakala a ona. ₃₄Thito ya sehlomamabone e be le matšoba a mane a go e kgabiša a sebopego sa letšoba la moalmone le matšoba a a sego a khukhuša le matlakala a ona. ₃₅Go be le letšoba le le sego la khukhuša ka fase ga makabe a mangwe le a mangwe a mabedi. ₃₆Matšoba a a sego a khukhuša le makabe le sehlomamabone e be selo se tee sa gauta ye e rutšwego ye e sego ya tswakwa. ₃₇O dire mabone a a šupago a sehlomamabone, gomme o a hlome gore a bonegele pele. ₃₈Ditlao tša sona le dibjana tša sona tša magala e be tša gauta ye e sego ya tswakwa. ₃₉O diriše gauta ye e sego ya tswakwa ya boima bja dikilokramo tše masome a mararo go dira sehlomamabone le ditlabakelo tše ka moka. ₄₀O hlokomele gore o di dire go ya ka leano le ke go laeditšego lona kua thabeng.”