To The Word – Day 21

₁“Tente ye kgethwa, Tente ya bodulo bja Morena, o e dire ka diripa tše lesome tša lešela le boletiana le le logeletšwego wulu ya botala bja legodimo, le ya bohubedu bja moretele, le ya bohubedu bja madi. O di logelele mekgabišo ya diswantšho tša bakerubi. ₂O lekalekanye diripa tšeo e be tša dimetara tše 12,9 botelele, le bophara bja dimetara tše 1,8. ₃O rokaganye diripa tše tlhano e be thokaganyo e tee, gomme tše dingwe tše tlhano o di rokaganye ka wona mokgwa woo. ₄O dire digole tša lešela la botala bja legodimo morumong wa seripa sa ka ntle thokaganyong tše pedi. ₅Mo seripeng sa mathomo sa thokaganyo ya mathomo o rokelele digole tše masome a mahlano, mo go sa mafelelo sa thokaganyo ya bobedi le gona o rokelele digole tše masome a mahlano, di lebane. ₆O dire dikgwaetšo tša gauta tše masome a mahlano tša go kgokaganya dithokaganyo tšeo tše pedi gore e be selo se tee.

₇“O direle Tente sepipetši ka diripa tše lesome le setee tša lešela la boya bja dipudi. ₈O lekalekanye diripa tše e be tša dimetara tše 13,8 botelele, le bophara bja dimetara tše 1,8. ₉O rokaganye diripa tše tlhano di dire thokaganyo e tee, gomme diripa tše dingwe tšeo tše di selelago le tšona o di rokaganye thokaganyo ye nngwe. O menaganye seripa sa boselela gabedi mo pele ga Tente. ₁₀Morumong wa seripa sa mafelelo sa thokaganyo ye nngwe o kgokelele digole tše masome a mahlano, morumong wa ye nngwe thokaganyo le gona o kgokelele digole tše masome a mahlano. ₁₁O dire dikgwaetšo tša mphiri tše masome a mahlano, mme o di tsenye digoleng go kgohlaganya dithokaganyo tše pedi go dira sepipetši se tee. ₁₂Seripana se sengwe se se šalago sa sepipetši o se lekeletše ka morago ga Tente. ₁₃Diripana tše dingwe tša disentimetara tše 46 tše di šalago ka mathoko a mabedi a Tente di lekelele ka moo mathoko go e pipa.

₁₄“O dire dipipetši tše pedi gape, se sengwe ka matlalo a dikgapa a a tloditšwego ka letsoku, mme se sengwe ka mekgopa ye boletiana gore di pipetše bokantle.

₁₅“O dire mahlomo a dikota tša mogohlo go thekga Tente. ₁₆Mahlomo a go thekga e be a dimetara tše 4,6 botelele, le disentimetara tše 69 bophara, ₁₇le maphakga a mabedi lefateng go swaraganya mahlomo ao a go thekga. Mahlomo ka moka a go thekga a be le maphakga a. ₁₈O dire mahlomo a go thekga a masome a mabedi lehlakoreng la ka borwa, ₁₉le mabogato a silibera a masome a mane ka fase ga wona, mabogato a mabedi a le ka fase ga lehlomo le lengwe le le lengwe go swarelela maphakga ka mabedi a lehlomo. ₂₀O dire mahlomo a go thekga a masome a mabedi a ka leboa la Tente, ₂₁le mabogato a silibera a masome a mane, a mabedi a le ka fase ga lehlomo le lengwe le le lengwe. ₂₂Ka lehlakoreng la ka morago, ka bodikela, o dire mahlomo a go thekga a a selelago, ₂₃le mahlomo a mabedi a go thekga a dikhutlo tša ka morago. ₂₄Mahlomo a a go thekga a dikhutlo a tlemaganywe go tloga fase go rotoga go fihlela mokgokong wa ka godimo. Mahlomo a mabedi a go thekga a a dirago dikhutlo tše pedi a dirwe ka tsela yeo. ₂₅Ka gona go tla ba le mahlomo a seswai a go thekga a a nago le mabogato a silibera a lesome le a a selelago, e le a mabedi ka fase ga lehlomo le lengwe le lengwe.

₂₆“O betle dipalelo tše lesome le tše tlhano ka dikota tša mogohlo, tše tlhano e be tša mahlomo a go thekga a ka thoko ye nngwe ya Tente, ₂₇tše tlhano e be tša mahlomo a go thekga a ka thoko ye nngwe, mme tše tlhano gape e be tša mahlomo a go thekga a ka thoko ya ka bodikela, ka morago. ₂₈Palelo ya gare, ye e lego seripagareng sa bogodimo bja mahlomo a go thekga, e tloge mathomong a Tente e fihle mafelelong a yona. ₂₉O manege mahlomo ao a go thekga ka gauta, gomme o a kgokelele mekgoko ya gauta ya go khwamela dipalelo; le tšona dipalelo di manegwe ka gauta. ₃₀O hlome Tente go ya ka leano le ke go laeditšego lona kua thabeng.

₃₁“O dire seširo ka lešela le boletiana le le logeletšwego wulu ya botala bja legodimo, le ya bohubedu bja moretele, le ya bohubedu bja madi. O e logelele mokgabišo wa diswantšho tša bakerubi. ₃₂O fege seširo dikoteng tše nne tša mogohlo tše di manegilwego ka gauta, tše di kgokeletšwego dikgwaetšo, di tsemilwe mabogatong a silibera a mane. ₃₃O kgokelele seširo ka fase ga molokoloko wa dikgwaetšo tlhakeng ya Tente, gomme ka morago ga seširo o bee Polokelo ya Kgwerano ye e swerego matlapa. Seširo se tla aroganya Felo mo Gokgethwa le Felo mo Gokgethwakgethwa. ₃₄O khurumele Polokelo ya Kgwerano ka sekhurumelo ka Felong mo Gokgethwakgethwa. ₃₅Ka mo ntle ga Felo mo Gokgethwakgethwa o bee tafola ka thoko ya ka leboa ya Tente, gomme sehlomamabone o se bee ka thoko ya ka borwa go lebana le tafola.

₃₆“O direle mojako wa Tente seširo ka lešela le boletiana le le logeletšwego wulu ya botala bja legodimo, le ya bohubedu bja moretele, le ya bohubedu bja madi, e be mologelelo wa mebala wa mekgabišo ya bokgwari. ₃₇Seširo se o se direle dikota tša mogohlo tše tlhano tše di manegilwego ka gauta mme di kgokeletšwe dikgwaetšo tša gauta; dikota tše o di direle mabogato a mahlano a mphiri.”

₁“O dire aletare ka dikota tša mogohlo. E lekalekane ka thoko tšohle: E be ya dimetara tše 2,3 ka botelele, dimetara tše 2,3 ka bophara, mme bogodimo e be ya dimetara tše 1,4. ₂O dire dinakana dikhutlong ka bone. Di be selo se tee le aletare, gomme aletare ka moka e manegwe ka mphiri. ₃O dire dibjana tša go olelela melora, le digarafo, le meruswi, le diforoko tša mašimelo, le dibjana tša magala. Ditlabakelo tše ka moka di dirwe ka mphiri. ₄O dire papetla ya mphiri, gomme o e khwamele mekgoko ye mene ya mphiri ya go e kuka dikhutlong tša yona. ₅O bee papetla ye ka fase ga morumo wa aletare gore e be gare ga bogodimo bja aletare. ₆O betle mapara a go rwala ka dikota tša mogohlo, mme o a manege ka mphiri; ₇ona o a tsenye mekgokong ka mahlakoreng a mabedi a aletare ge e rwalwa. ₈O dire aletare ka diphaphathi, gomme e be lehoa, go ya ka leano le ke go laeditšego lona kua thabeng.”

₉“O age kgoro ya Tente ya bodulo bja ka ka legora la diširo tša lešela le boletiana. Ka lehlakoreng la ka borwa diširo e be tša dimetara tše 46 botelele, ₁₀mme di lekeletšwe dikoteng tše masome a mabedi tša mphiri tše di lego mabogatong a masome a mabedi a mphiri ka dikgwaetšo le mapheko a silibera. ₁₁Le ka lehlakoreng la ka leboa la kgoro o dire ka yona tsela yeo. ₁₂Ka lehlakoreng la ka bodikela go be le diširo tša dimetara tše 23 botelele, di lekelele dikoteng tše lesome tše di tsemilwego mabogatong a lesome. ₁₃Le ka bohlabela, mo go lego mojako wa Tente, le gona kgoro e be ya bophara bja dimetara tše 23. _14-15Ka thoko ye nngwe le ye nngwe ya mojako go be le diširo tša dimetara tše 6,9 tše di lekelelago dikoteng tše tharo tše di tsemilwego mabogatong a mararo. ₁₆Mo mojakong go lekelele seširo sa dimetara tše 9,2 botelele se se dirilwego ka lešela le boletiana le le logeletšwego wulu ya botala bja legodimo, le ya bohubedu bja moretele, le ya bohubedu bja madi, e be mologelelo wa mebala ya mekgabišo ya bokgwari. Seširo se thekgwe ka dikota tše nne tše di tsemilwego mabogatong a mane. ₁₇Dikota ka moka tša kgoro go dikologa di kopanywe ka mapheko a silibera; dikgwaetšo tša tšona e be tša silibera mme mabogato a tšona e be a mphiri. ₁₈Kgoro e be ya dimetara tše 46 botelele, le dimetara tše 23 bophara, le dimetara tše 2,3 bogodimo. Diširo di dirwe ka lešela le boletiana, mme mabogato e be a mphiri. ₁₉Ditlabakelo ka moka tše di dirišwago Tenteng le dibapola ka moka tša Tente le kgoro di dirwe ka mphiri.”

₂₀“O laele setšhaba sa Israele go go tlišetša makhura a mohlware a a sego a tswakwa a sehlomamabone a mabotsebotse, gore mabone a fele a tuka bošego bjo bongwe le bjo bongwe. ₂₁Arone le barwa ba gagwe ba a gotetše ka Tenteng ya bodulo bja ka ka ntlenyana ga seširo sa ka pele ga Polokelo ya Kgwerano. Gona moo pele ga Morena mabone a tuke bošego ka moka go fihlela go esa. Taelo ye e phethwe ke Baisraele le ditlogolo tša bona ka mehla go ya go ile.”

₁“Bitša Arone, morwarrago, le barwa ba gagwe, Nadaba, Abihu, Eleasara le Ithamara. O ba hlaole setšhabeng sa Israele, gore ba ntirele e le baprista. ₂O rokele Arone, morwarrago, diaparo tše dikgethwa, gore a be le serithi le botšhepi. ₃O bitše bomakgone ka moka ba ke ba filego bokgoni, o ba botše ba rokele Arone diaparo a tle a bewe moprista wa go ntirela. ₄O ba botše ba dire phaphathiana ya sehubeng, le seaparo se sekgethwa, le phurabura, le hempe ye e kgabišitšwego, le tuku ya hlogo, le lepanta la bodiredi. A ba rokele morwarrago Arone le barwa ba gagwe diaparo tše dikgethwa tše, gore bona ba ntirele e le baprista. ₅Bomakgone ba roke tša wulu ya botala bja legodimo, le ya bohubedu bja moretele, le ya bohubedu bja madi, le tlhale ya gauta, le lešela le boletiana.

₆“Ba roke seaparo se sekgethwa ka wulu ya botala bja legodimo, le ya bohubedu bja moretele, le ya bohubedu bja madi, le ka tlhale ya gauta, le ka lešela le boletiana, e be mologelelo wa mekgabišo ya bokgwari. ₇Mapantana a mabedi a go tlemelela seaparo se sekgethwa magetleng a rokelelwe ka mathoko. ₈Lepanta le le logilwego gabotse le dirilwego ka tšona dilo tšeo le logelelwe seaparong se sekgethwa sehubeng, e be selo se tee le seaparo. ₉O tšee matlapa a mabedi a magakabje a karneliene o a tloke maina a barwa ba lesome le ba babedi ba Jakobo ₁₀ka go hlatlamana ga bona, maina a a selelago a be letlapeng le lengwe, a mangwe a selelago a be go le lengwe. ₁₁O nyake mmetli wa magakabje, a tloke maina a barwa ba Jakobo matlapeng ao a mabedi, a a rokelele ka tlhale ya gauta. ₁₂O a rokelele mapantaneng a mabedi a magetleng a seaparo se sekgethwa go emela dikgoro tše lesome le tše pedi tša Baisraele. Ka tsela ye Arone o tla šikara maina a bona magetleng a gagwe gore nna, Morena, ka mehla ke gopole setšhaba sa ka. ₁₃O dire merokelelo ye mebedi ya gauta, ₁₄le diketane tše pedi tša gauta ye e sego ya tswakwa tše di logagantšwego bjalo ka thapo, mme o di rokelele merokelelong yeo.”

₁₅“O direle Moprista yo Mogolo phaphathiana ya sehubeng gore a e diriše go tseba thato ya Modimo. E dirwe ka dilo tša go swana le tša ge go dirwa seaparo se sekgethwa le mologelelo wa sona. ₁₆E lekalekane ka thoko tšohle, e menwe gabedi, e be ya disentimetara tše 22 ka botelele, le disentimetara tše 22 ka bophara. ₁₇O rokelele methalo ye mene ya magakabje go yona; mothalong wa mathomo o rokelele rubi, thopase le garneta; ₁₈mothalong wa bobedi o rokelele emerale, safire le taamane; ₁₉mothalong wa boraro o rokelele thekoise, agathe le amethesite; ₂₀mothalong wa bone o rokelele berile, karneliene le jaspere. Magakabje a a rokelelwe ka tlhale ya gauta. ₂₁Le lengwe le le lengwe la magakabje a lesome le a mabedi a le tlokwe leina la yo mongwe wa barwa ba Jakobo go emela dikgoro tše lesome le tše pedi tša Baisraele. ₂₂O dire diketane tša phaphathiana ya sehubeng tše di logagantšwego bjalo ka thapo ka gauta ye e sego ya tswakwa. ₂₃O dire mekgoko ye mebedi ya gauta, o e rokelele dikhutlong tša ka godimo tša phaphathiana ya sehubeng, ₂₄mme o tlemelele thapo tšeo tše pedi tša gauta moo mekgokong ka mebedi. ₂₅O tlemelele dintlha tša dithapo tšeo tše pedi merokelelong yeo ye mebedi, mme ka tsela ye o tlemelele dithapo ka pele mapantaneng a magetleng a seaparo se sekgethwa. ₂₆Bjale o dire mekgoko ye mebedi ya gauta, o e rokelele dikhutlong tše pedi tša ka fase tša phaphathiana ya sehubeng, momenetšong wa ka gare kgauswi le seaparo se sekgethwa. ₂₇O dire mekgoko ye mengwe ye mebedi ya gauta, o e rokelele seripeng sa ka fase ka pele mapantaneng ka mabedi a magetleng a seaparo se sekgethwa, kgauswi le morumo le ka godingwana ga lepanta la seaparo se sekgethwa. ₂₈O tlemaganye mekgoko ya phaphathiana ya sehubeng le ya seaparo se sekgethwa ka thapo ya botala bja legodimo, gore phaphathiana ya sehubeng e be godimo ga lepanta la seaparo se sekgethwa mme e se ke ya hlepha.

₂₉“Ge Arone a tsena Felo mo Gokgethwa a apare phaphathiana ya sehubeng ye e tlokilwego maina a dikgoro tša Baisraele gore e be kgauswi le pelo ya gagwe, gore nna, Morena, ka mehla ke gopole setšhaba sa ka. ₃₀O bee Urime le Tumime ka gare ga phaphathiana yeo ya sehubeng, gore di be kgauswi le pelo ya gagwe ge a etla go lebana le nna. Ka mehla ge a lebana le nna, a apare phaphathiana ye ya sehubeng, gore a tsebe thato ya ka go setšhaba sa Israele.”

₃₁“Phurabura ye e aparwago ka godimo ga seaparo se sekgethwa e rokwe ka wulu ya botala bja legodimo fela. ₃₂E be le lešoba la go tsenya hlogo, mme lešoba leo le phethwe ka morumo wo o logilwego gore seaparo se se ke sa gagoga. _33-34Go dikologa morumo wa ka fase wa phurabura yeo go lekeletšwe mekgabišo ya wulu ya go swana le garenate ya botala bja legodimo, le ya bohubedu bja moretele, le ya bohubedu bja madi, e latelane le ditleloko tša gauta. ₃₅Arone a apare phurabura ye ge a dira modiro wa boprista. Ge a etla pele ga ka Felong mo Gokgethwa goba a etšwa, ditleloko di tla lla tša kwala mme a ka se bolawe.

₃₆“O dire sekgabišo sa gauta ye e sego ya tswakwa, mme godimo ga sona o tloke mantšu a: ‘Se abetšwe Morena’. ₃₇O se tlemelele tukung ya hlogo mo phatleng ka thapo ya botala bja legodimo. ₃₈Arone a dule a se rwele mo phatleng ya gagwe go phumola bošaedi bja Baisraele, gore nna, Morena, ke amogele dikabelo tše ba nkabelago tšona, le ge ba ka dira bošaedi bjo bongwe ge ba nkabela tšona.

₃₉“O rokele Arone hempe ka lešela le boletiana, le tuku ya gagwe ya hlogo o e dire ka lešela le boletiana, o mo rokele le lepanta la bodiredi le le logeletšwego mekgabišo ya mebalabala.

₄₀“O rokele barwa ba Arone dihempe, le mapanta a bodiredi, le dikefana ba be le serithi le botšhepi. ₄₁O apeše Arone, morwarrago, le barwa ba gagwe diaparo tše. E be gona o ba beago baprista le go ba šegofaletša modiro ka go ba tlotša ka makhura a mohlware gore ba ntirele e le baprista. ₄₂O ba rokele marokgwana ka lešela, a tloge mathekeng a boe diropeng, gore ba se ke ba bonelwa. ₄₃Arone le barwa ba gagwe ba tšware marokgo a ka mehla ge ba tsena ka Tenteng ya bodulo bja ka, goba ge ba batamela aletare go dira modiro wa boprista Felo mo Gokgethwa, gore ba se ke ba bolawa ka lebaka la go se tšware ga bona. Molao wo o beetšwe Arone le ditlogolo tša gagwe go ya go ile.”

₁“Sese se o swanetšego go se direla Arone le barwa ba gagwe ge o ba bea baprista ba go ntirela. O hlaole powana e tee le dikgapa tše pedi tše di se nago bosodi. ₂Ka bupi bja matoka bja korong bjo bo se nago komelo o apee dinkgwa tše di hlakantšwego le makhura a mohlware, le dinkgwa tše di se nago makhura a mohlware, le dinkgwana tša diphaphathiana tše di tšhatšhitšwego ka makhura a mohlware. ₃O di lokele ka leselong, gomme o nkabele tšona ge o dira sehlabelo ka powana le dikgapa tše pedi.

₄“O batametše Arone le barwa ba gagwe mojakong wa Tente ya bodulo bja ka, gomme o ba hlapiše ka meetse. ₅Ke moka o apeše Arone diaparo tše dikgethwa – hempe, le phurabura ya seaparo se sekgethwa, le seaparo se sekgethwa, le phaphathiana ya sehubeng, o tlemelele seaparo se sekgethwa sehubeng ka lepanta la sona, ₆o mo rweše tuku ya hlogo, gomme go yona o tlemelele sekgabišo se sekgethwa seo godimo ga sona go tlokilwego mantšu a: ‘Se abetšwe Morena’. ₇Bjale o tšee makhura a tlotšo o a tšhele hlogong ya gagwe, o mo tlotše.

₈“O batametše barwa ba gagwe go wena, o ba apeše dihempe; ₉o ba tleme matheka ka mapanta a bodiredi, mme o ba rweše dikefana dihlogong. Ye ke yona tsela ya go bea Arone le barwa ba gagwe baprista. Bona le ditlogolo tša bona ba ntirele e le baprista go ya go ile.

₁₀“O batametše powana pele ga Tente ya bodulo bja ka, mme o botše Arone le barwa ba gagwe ba bee diatla tša bona godimo ga hlogo ya powana. ₁₁O hlabe powana moo pele ga ka mojakong wa Tente. ₁₂O tšee madi a mangwe a powana o a tlotše dinakaneng tša aletare ka monwana. Bjale o tšhollele madi a a šetšego thitong ya aletare. ₁₃Ka morago ga moo o kgakgamolle mabipi ka moka, o tšee le mphapha wo moteletšana wa sebete le dipshio bobedi bja tšona le makhura a tšona, mme tšeo ka moka o di tšhume aletareng e le kabelo ya ka. ₁₄Ge e le nama ya powana le mokgopa wa yona le dikateng tše dingwe tša yona o di tšhume ka mollo kua ntle ga mešaša. Se ke sehlabelo sa go tloša dibe tša baprista.

₁₅“O tšee kgapa ye nngwe mme o botše Arone le barwa ba gagwe ba bee diatla tša bona godimo ga hlogo ya yona. ₁₆O e hlabe gomme o tšee madi a yona o a fokele aletare ka mahlakoreng ka mane. ₁₇O phakologanye kgapa, o hlatswe dikateng tša yona le meomo ya yona, o di bee godimo ga hlogo ya kgapa le ditho tše dingwe. ₁₈O tšhume kgapa ka moka ga yona godimo ga aletare e le sehlabelo sa go tšhungwa ka moka. Ke tsefelwa ke monkgo wa sehlabelo se.

₁₉“O tšee kgapa yela ye nngwe o botše Arone le barwa ba gagwe gore ba bee diatla tša bona godimo ga hlogo ya yona. ₂₀O e hlabe, o tšee madi a mangwe a yona o tlotše lerephu la tsebe ya la go ja ya Arone ka ona, le marephu a ditsebe tša la go ja tša barwa ba gagwe, le menwana ya bona ye megolo ya diatla tša la go ja, le menwana ya bona ye megolo ya maoto a la go ja. Ka madi a a šetšego o fokele aletare ka mahlakoreng ka mane. ₂₁O tšee madi a mangwe a a lego godimo ga aletare le makhura a tlotšo o foke Arone le diaparo tša gagwe, le barwa ba gagwe le diaparo tša bona ka ona. Yena Arone le diaparo tša gagwe le barwa ba gagwe le diaparo tša bona ba tla be ba abetšwe nna.

₂₂“O tšee makhura a kgapa, le mosela, le mabipi, le mphapha wo moteletšana wa sebete, le dipshio ka bobedi, le makhura a tšona, le serope sa la go ja. ₂₃Mola dinkgweng tša ka leselong tše di se nago komelo tše di abetšwego nna o tšee senkgwa se tee se se apeilwego ka makhura a mohlware, se tee se se apeilwego ka ntle le makhura, le senkgwana sa phaphathiana. ₂₄O bee dijo tše ka moka ka diatleng tša Arone le ka go tša barwa ba gagwe, gomme o nkabele tšona e le mpho ye e fiwago nna ka tsela ye e itšeng. ₂₅Bjale o di tšee diatleng tša bona, o di tšhume aletareng godimo ga sehlabelo sela sa go tšhungwa ka moka, e be sehlabelo go nna. Ke tsefelwa ke monkgo wa sehlabelo seo.

₂₆“O tšee leumo la kgapa yeo gomme o nkabele lona e le mpho ye e fiwago nna ka tsela ye e itšeng. Setho se sa seruiwa e tla ba sa gago.

₂₇“Ge monna a bewa moprista, leumo le serope sa kgapa yeo e dirišetšwago go bewa moprista moo di abelwe nna e le mpho ye e fiwago nna ka tsela ye e itšeng, mme di bewe ka thoko e be tša baprista. ₂₈Ke taelo ya ka ya ka mehla go iša go sa felego, gore ka mehla ge setšhaba se dira dihlabelo tša sona tša kagišano, leumo le serope sa seruiwa ke tša baprista. Mpho ye e fiwago nna ye ka tsela ye e itšeng, ke kabelo ye batho ba e abelago nna, Morena.

₂₉“Diaparo tša Arone tše dikgethwa di neelwe barwa ba gagwe ka morago ga ge a hwile, gore ba di apare ge ba bewa baprista. ₃₀Morwa wa Arone yo a latelago tatagwe bopristeng gomme a tsena ka Tenteng ya bodulo bja ka go dira mošomo wa baprista ka Felo mo Gokgethwa, a apare diaparo tše matšatši a a šupago.

₃₁“O tšee nama ya kgapa ye e dirišetšwago go bea Arone le barwa ba gagwe baprista, o e apeele ka felo mo gokgethwa. ₃₂Arone le barwa ba gagwe ba jele nama ye gotee le dinkgwa tše di šetšego ka leselong, mojakong wa Tente ya bodulo bja ka. ₃₃Ba je seo se dirišitšwego tirelong ya tebalelo ge ba bewa baprista. Ke baprista fela ba ka jago dijo tše, ka gobane ke dijo tše kgethwa. ₃₄Ge nama ye nngwe goba dinkgwa tše dingwe di se tša lewa go fihlela ka la ka moswane, gona dijo tšeo di tšhungwe. Di se ke tša lewa ke motho, gobane ke tše kgethwa.

₃₅“O sware ditirelo tša go bewa baprista ga Arone le ga barwa ba gagwe matšatši a a šupago ka moo ke go laetšego ka gona. ₃₆Tšatši le lengwe le le lengwe o dire sehlabelo sa powana e be tefelo ya dibe. Sehlabelo se se tla hlwekiša aletare. Ka morago o tlotše aletare ka makhura a mohlware go e kgethwafatša. ₃₇O dire ka mokgwa woo letšatši le lengwe le le lengwe matšatši a a šupago. Gona aletare e tla ba ye e kgethwafetšego ruriruri, gomme mang le mang goba eng le eng ye e ka e kgwathago e tla tšhelwa madimabe ke maatla a bokgethwa bja yona.

₃₈“Letšatši le lengwe le le lengwe, mabakeng ka moka, o dire dihlabelo aletareng ka kwanyana tše pedi tša ngwaga o tee. ₃₉O dire sehlabelo ka e tee mosong, gomme ka ye nngwe o dire sehlabelo mantšiboa. ₄₀Ge o dira sehlabelo ka kwanyana ya pele, o abe le bupi bja matoka bja korong bja tekanyo ya kilokramo e tee, o bo dube ka makhura a mohlware a a hlwekilego a litara e tee. O tliše litara e tee ya beine e be kabelo ya seno. ₄₁Mantšiboa le gona o dire sehlabelo ka kwanyana ya bobedi gotee le ditekanyo tša bupi le makhura a mohlware le beine bjalo ka mosong. Bupi le makhura a mohlware ke kabelo ya dijo, mme beine ke kabelo ya seno go nna, Morena. Monkgo wa sehlabelo se ka moka o a ntsefela. ₄₂Sehlabelo se sa go tšhungwa ka moka se dirwe pele ga ka mabakeng ka moka a a tlago, mojakong wa Tente ya bodulo bja ka. Moo ke mo ke tlago gahlana le setšhaba sa ka, ka bolela le wena. ₄₃Gona moo ke tla gahlana le setšhaba sa Israele, gomme seetša se se fahlago sa letago la ka se tla kgethwafatša felo fao. ₄₄Ke tla kgethwafatša Tente le aletare, gomme ka hlaola Arone le barwa ba gagwe gore ba ntirele e le baprista. ₄₅Ke tla dula gare ga setšhaba sa Israele, gomme ka ba Modimo wa bona. ₄₆Ba tla tseba gore ke nna Morena Modimo wa bona yo ke ba ntšhitšego Egepeta gore ke dule gare ga bona. Ke nna Morena Modimo wa bona.”

₁“O dire aletare ya go tšhumela seorelo ka dikota tša mogohlo. ₂O e lekalekanye ka mathoko, e be botelele bja disentimetara tše 46 le bophara bja disentimetara tše 46, mme bogodimo e be disentimetara tše 92. Dinakana tša dikhutlo tša yona e be selo se tee le yona. ₃O e manege bogodimo ka gauta ye e sego ya tswakwa, le mahlakore ka mane le dinakana tša yona ka moka, gomme o e direle morumo wa gauta go e dikologa. ₄O dire mekgoko ye mebedi ya go e rwala, o e kgokelele ka tlase ga morumo mahlakoreng ka mabedi gore go tsene mapara a go e rwala. ₅O betle mapara a ka dikota tša mogohlo, mme le ona o a manege ka gauta. ₆Aletare ye o e bee ka ntle ga seširo se se fegilwego pele ga Polokelo ya Kgwerano. Moo ke felo mo ke tlago gahlana le wena. ₇Mosong wo mongwe le wo mongwe ge Arone a etla go lokiša mabone, a tšhume seorelo sa go nkga bose godimo ga yona. ₈A dire ka yona tsela yeo le ge a gotetša mabone mantšiboa. Seorelo se se fele se tšhungwa ka mehla. ₉O se ke wa tupiša seorelo se šele godimo ga aletare ye, goba wa dira sehlabelo sa seruiwa, goba kabelo ya dijo, le gona o se ke wa tšhela kabelo ya seno godimo ga yona. ₁₀Gatee mo ngwageng Arone a dire tirelo ya go hlwekiša aletare ka go tlotša dinakana tša yona ka dine ka madi a seruiwa se se dirilwego sehlabelo sa tshwarelo ya dibe. Se se dirwe ngwaga ka ngwaga mehleng ka moka ye e tlago. Aletare ye e be ye e kgethwafetšego ruriruri, ye e abetšwego nna, Morena.”

₁₁Morena o laetše Moshe a re: ₁₂“Mohla o bala setšhaba sa Israele monna yo mongwe le yo mongwe a ntefe ka tšhelete, gore bošula bo se ke bja mo wela lebakeng la ge setšhaba se balwa. ₁₃Mang le mang yo a balwago a lefe dikramo tše di selelago tša silibera ye e etšwego go ya ka boima bja papetlana ya silibera ya ka Felo mo Gokgethwa. Mang le mang a lefe tšhelete ye e le kabelo ya ka. ₁₄Mang le mang yo a balwago, ke go re monna yo mongwe le yo mongwe wa mengwaga ye masome a mabedi goba go feta, a lefe motšhelo wo. ₁₅Mohumi a se ke a ntšha tšhelete ya go feta ye e beilwego, le modiidi a se ke a ntšha ya go fetwa ke ye e beilwego, ge ba tšhela motšhelo wo. ₁₆O kgobokanye tšhelete ye setšhabeng sa Israele gomme o e diriše go hlokomela Tente ya bodulo bja ka. Motšhelo wo e tla ba seloba sa gore ke se ba bolaye, gomme ke tla gopola go ba šireletša.”

₁₇Morena o laetše Moshe a re: ₁₈“O dire sebjana sa mphiri sa go hlapela se se nago le bogato bja mphiri. O bee sebjana se kgathe ga Tente le aletare, gomme o tšhele meetse ka go sona. ₁₉Arone le barwa ba gagwe ba hlape diatla le maoto ka meetse a ₂₀pele ba tsena ka Tenteng, goba ba batamela aletare go dira sehlabelo. Ke moo ba ka se bolawego. ₂₁Ba hlape diatla le maoto gore ba se ke ba hwa. Wo ke molao wo bona le ditlogolo tša bona ba swanetšego go o phetha go ya go ile.”

₂₂Morena a re go Moshe: ₂₃“Tšea dinoko tše dibotsebotse: dikilokramo tše 5,7 tša seela sa mira, dikilokramo tše 2,9 tša sinamone ya monkgo wo mobose, dikilokramo tše 2,9 tša lehlaka la monkgo wo mobose, ₂₄dikilokramo tše 5,7 tša kasia, ka moka di etšwe go ya ka boima bja papetlana ya silibera ya ka Felo mo Gokgethwa. O oketše ka dilitara tše 3,7 tša makhura a mohlware ₂₅mme o dire makhura a makgethwa a tlotšo a a tswakantšwego go swana le senkgabose. ₂₆O diriše makhura a go tlotša Tente ya bodulo bja ka, le Polokelo ya Kgwerano, ₂₇le tafola le ditlabakelo tša yona ka moka, le sehlomamabone le ditlabakelo tša sona ka moka, le aletare ya go tšhumela seorelo, ₂₈le aletare ya dihlabelo le ditlabakelo tša yona ka moka, le sebjana sa go hlapela gotee le bogato bja sona. ₂₉O nkabele dilo tše ka mokgwa wo mme e tla ba tše di kgethwafetšego ruriruri, gomme mang le mang goba sengwe le sengwe se se ka di kgwathago se tla tšhelwa madimabe ke maatla a bokgethwa bja tšona. ₃₀Ke moka o tlotše Arone le barwa ba gagwe, o ba kgethwafatše gore ba ntirele e le baprista. ₃₁O botše le setšhaba sa Israele o re: ‘Makhura a makgethwa a tlotšo a dirišwe tirelong ya ka mabakeng ka moka a a tlago. ₃₂A se ke a tšhelwa bathofela, gomme le se ke la dira a mangwe a motswako wo o swanago le wa ona. Ke a makgethwa gomme le a sware bjalo ka selo se sekgethwa. ₃₃Motho mang le mang yo a ka dirago a a swanago le ona, goba a tlotša motho yo mongwe yo e sego moprista ka ona, a kgaolwe setšhabeng sa ka.’ ”

₃₄Morena o laetše Moshe a re: “Tšea diripa tše di lekanago tša se sengwe le se sengwe sa dinoko tše bose tše di latelago: setakite le onika le galebanume, le seorelo se se sego sa tswakwa. ₃₅Ka tšona o dire seorelo se se tswakantšwego go swana le senkgabose. O se noke ka letswai gore se fele se hlwekile e le se sekgethwa. ₃₆O šile seripa se sengwe sa sona e be lerole, o se iše Tenteng ya bodulo bja ka moo ke gahlanago nago, o se gaše pele ga Polokelo ya Kgwerano. O sware seorelo se bjalo ka selo se se kgethwafetšego ruriruri. ₃₇Le se ke la itirela seorelo se sengwe se se swanago le sona. Le se sware bjalo ka selo se sekgethwa se se abetšwego nna. ₃₈Yo a kago dira seorelo se se swanago le se go itirela senkgabose, o tla kgaolwa setšhabeng sa ka.”

₁Morena a re go Moshe: ₂“Ke kgethile Betsaliele, morwa wa Uri, wa kgorwana ya Hure, wa kgoro ya Juda, ₃gomme ke mo hlamile ka moya wa ka. Ke mo file tsebo le tlhaologanyo le bokgoni go dira modiro ofe le ofe wa bokgwari ₄go beakanya mediro ya bokgwari, le go e šoma ka gauta le silibera le mphiri, ₅le go seta magakabje a go rokelelwa, le go betla dikota, le go dira mošomo ofe le ofe wa bokgwari. ₆Ke kgethile le Oholiabe, morwa wa Ahisamake, wa kgoro ya Dane, go šoma le yena. Le gona ke file bomakgone ba bangwe ka moka bokgoni bjo bogolo gore ba kgone go phetha se sengwe le se sengwe se ke laetšego gore se dirwe: ₇Tente ya bodulo bja ka, le Polokelo ya Kgwerano le sekhurumelo sa yona, le ditlabakelo ka moka tša Tente, ₈le tafola le ditlabakelo tša yona, le sehlomamabone sa gauta ye e sego ya tswakwa le ditlabakelo tša sona ka moka, le aletare ya go tšhumela seorelo, ₉le aletare ya dihlabelo le ditlabakelo tša yona ka moka, le sebjana sa go hlapela le bogato bja sona, ₁₀le diaparo tša botšhepi tše dikgethwa tša Arone le tša barwa ba gagwe tše ba di aparago ge ba dira modiro wa baprista, ₁₁le makhura a tlotšo, le seorelo sa go nkga bose sa Felo mo Gokgethwa. Ge ba dira dilo tše ka moka ba dire ka moo ke go laetšego ka gona.”

₁₂Morena o laetše Moshe ₁₃gore a botše setšhaba sa Israele a re: “Le tloge le hlokomela Sabatha, letšatši la ka la go khutša, gobane ke sešupo kgatheng ga ka le lena mabakeng ka moka a a tlago gore nna, Morena, ke le dirile setšhaba sa ka. ₁₄Le hlokomele letšatši la go khutša, ka gobane ke le lekgethwa. Yo a tšhilafatšago letšatši le ka go šoma ka lona, a kgaolwe setšhabeng sa ka, a bolawe a hwe lehu. ₁₅Le na le matšatši a a selelago ao ka wona le ka dirago mešomo ya lena, eupša letšatši la bošupa ke letšatši le legolo la go khutša le le abetšwego nna. Yo a dirago modiro ofe le ofe ka lona letšatši leo, a bolawe a hwe lehu. ₁₆Setšhaba sa Israele se hlokomele letšatši le go iša ditlogolong tša sona e le sešupo sa kgwerano. ₁₇Ke sešupo sa go ya go ile kgathe ga setšhaba sa Israele le nna, gobane nna, Morena, ke dirile legodimo le lefase ka matšatši a a selelago, gomme ka letšatši la bošupa ka khutša, ka lapologa.”

₁₈Ge Modimo a feditše go bolela le Moshe thabeng ya Sinai, a mo fa matlapa a mabedi ao mo go ona Modimo ka noši a bego a ngwadile melao.

₁Ge setšhaba se bona Moshe a diega go theoga thabeng, sa bokanela Arone sa re go yena: “Ga re tsebe se se hlagetšego yola Moshe, monna yo a re ntšhitšego nageng ya Egepeta; ka gona, ema o re direle modimo yo a tlago re eta pele.”

₂Arone a ba fetola re: “Khwamolang mangina a gauta ao basadi ba lena le barwa ba lena le barwedi ba lena ba a rwelego ditsebeng, le a tlišeng mo go nna.” ₃Ka gona setšhaba ka moka sa khwamola mangina a sona a gauta, sa a iša go Arone. ₄Arone a tšea mangina ao go bona, a a tološa, a a tšhollela foromong, a bopa powana ya gauta.

Setšhaba sa re: “Lena Baisraele, yo ke modimo wa rena yo a re ntšhitšego nageng ya Egepeta!”

₅Ya re ge Arone a bona tšeo, a aga aletare pele ga powana ya gauta mme a goeletša a re: “Ka la ka moswane e tla ba monyanya wa go tumiša Morena.”

₆Ka la ka moswane setšhaba sa tsogela go dira dihlabelo tša go tšhungwa ka moka le dihlabelo tša kagišano. Sa dulela monyanya gomme wa fetoga bohlaswa bja botagwa le thobalano.

₇Morena a re go Moshe: “Itlhaganele o theoge, gobane setšhaba sa geno se o se ntšhitšego nageng ya Egepeta se sentše, se ntlhanogetše. ₈Ba šetše ba arogile tsela ye ke ba laetšego gore ba e latele; ba dirile powana ka gauta ye e tološitšwego, gomme ba e khunametše ba ba ba e hlabela dihlabelo. Ba re yona ke yena modimo wa bona yo a ba ntšhitšego nageng ya Egepeta. ₉Ke tseba ka moo batho ba ba nago le melala ye methata. ₁₀Bjale hle, o se ke wa leka go nkema pele. Ke ba befeletšwe, mme ke ile go ba fediša. Ka morago ga fao ke tla dira wena le ditlogolo tša gago setšhaba se segolo.”

₁₁Eupša Moshe a phophotha Morena Modimo wa gagwe a re: “Morena, o reng o befelelwa setšhaba sa gago gakaaka, setšhaba se o se hlakodišitšego Egepeta ka maatla a magolo le ditiro tše maatla? ₁₂O reng o nyaka go re kweriša Baegepeta, gore ba re o ntšhitše setšhaba sa gago Egepeta e le maanomabe a go ba bolaya dithabeng le go ba feleletša sa ruri? Hle, o se sa re galefela; buša pelo, gomme o se ke wa tlišetša setšhaba sa gago bošula bjoo. ₁₃Gopola bahlanka ba gago, Abrahama le Isaka le Jakobo. Gopola kholofetšo ya gago ye kgolo ye o ba enetšego yona wa re o tla ba fa ditlogolo tše ntši bjalo ka dinaledi tša legodimo, le gore o tla fa ditlogolo tša bona naga ka moka ye o ba holofeditšego yona wa re e tla ba ya bona go ya go ile.” ₁₄Ka gona Morena a buša pelo mme a se ke a tlišetša setšhaba sa gagwe bošula bjo a bego a ikemišeditše go se tlišetša bjona.

₁₅Moshe a theoga thabeng a swere matlapa ao a ngwadilwego melao ka mo le ka mo. ₁₆Matlapa ao a be a betlilwe ke Modimo, mme yena ka noši a a tlokile melao.

₁₇Joshua a kwa setšhaba se hlabile lešata, mme a re go Moshe: “Ke kwa mašata a ntwa kua mešašeng.”

₁₈Moshe a re: “Hleng go kwagala e ke mašata ale ga se mekgolokwane ya phenyo, goba dillo tša go fenywa; mašata ale ke a mogobo.”

₁₉Ge Moshe a batametše mešašeng mo a kgonago go bona powana le go bona batho ba bina, a tuka bogale. Gona moo patogeng ya thaba Moshe a napa a lahlela matlapa ale a bego a a swere fase, a pšhatlagana. ₂₀A tšea powana yela ba bego ba e dirile, a e tološa, a e šila ya ba lerole la matoka, gomme a le tšhela ka meetseng. A gapeletša Baisraele go nwa meetse ao. ₂₁A botšiša Arone a re: “Setšhaba se se go dirile eng ge e bile o se diriša sebe se sekaaka?”

₂₂Arone a mo fetola a re: “Hle, se mpefelelwe, mong wa ka; wena o tseba gabotse ka moo setšhaba se e lego se sebe ka gona. ₂₃Ba rile go nna: ‘Ga re tsebe se se hlagetšego yola Moshe, monna yo a re ntšhitšego nageng ya Egepeta; ka gona re direle modimo yo a tlago re eta pele.’ ₂₄Nna ka ba kgopela gore ba ntlišetše dikgabišo tša bona tša gauta, gomme ba ba bego ba na le tšona ba di kgakgamolla ba nneela tšona. Nna ka di lahlela mollong, mme fao gwa tšwa powana ye!”

₂₅Ge Moshe a bona gore Arone o ntšhitše setšhaba tseleng gomme sa itlontlolla pele ga manaba a sona, ₂₆a ema kgorong ya mešaša a goa a re: “Yo a emago le Morena a a tle go nna!” Ke moo Balefi ka moka ba mo kgobokanetšego, ₂₇gomme yena a re go bona: “Morena Modimo wa Israele o laela yo mongwe le yo mongwe wa lena go itlhama ka tšhoša le go putlaganya mešaša go tloga kgorong ye go fihla go ye nngwe, le go bolaya bomorwarragwe le bagwera ba gagwe le baagišani ba gagwe.” ₂₈Balefi ba phetha taelo yeo, gomme ba bolaya banna ba e ka bago ba dikete tše tharo ka lona tšatši leo. ₂₉Moshe a re go Balefi: “Lehono le ikgethwafaditše la ba baprista ba go direla Morena ka go bolaya barwa ba lena le bomorwarragolena, ka gona Morena o le šegofaditše.”

₃₀Ka letšatši le le latelago Moshe a re go setšhaba: “Le dirile sebe se segolo. Bjale ge, ke tla boela kua thabeng go Morena; mohlomongwe nka kgona go le boelanya naye.” ₃₁Ke gona Moshe a boetšego go Morena a re: “Jonna, Morena, setšhaba se se dirile sebe se segolo. Se itiretše modimo ka gauta, gomme sa o khunamela. ₃₂Bjale hle, ba lebalele sebe sa bona; go sego bjalo o phumole leina la ka pukung ye o ngwadilego maina a batho ba gago go yona.”

₃₃Morena a mo fetola a re: “Bao ba mphošeditšego ke bona bao ke tlago phumola maina a bona pukung ya ka. ₃₄Wena bjale sepela, o ete setšhaba sa ka pele o se iše felo mo ke go boditšego gona. Bona, morongwa wa ka o tla go eta pele, fela mohla nako ya kotlo e fihla, ke tla otla setšhaba se ka lebaka la sebe sa bona.”

₃₅Ke moka Morena a romela bolwetši bja leuba setšhabeng, ka gobane ba gapeleditše Arone go bopa powana ya gauta.